Read Yambeta 2 Kɔlɛ́ɛnt 7 Bible Online

2 Kɔlɛ́ɛnt 7 - Yambeta bible

2 Kɔlɛ́ɛnt 7

¹Pɔsɔ́sɔ́g páam pá ɔʼtɛ́m, pɛbán pɛ́ɛb piim pɛ́ mbábana, Táán ayɛ́bɛgágɛn lɛ́ nyɔ́lɛ́ alɛ́ɛ́ kɛɛlɛ pɛ́lɛ́ a kidíídí kiə́s. Kólɛ́ aa tigódíí lɛ́ tiə́fúŋi a nkə kiim kɛ́ kíəfiləni nkó na uŋun, tɛ́yaágɔ́nɛgɛ kɛɛn yuudi na ɔlaa wó ólɛɛ́ tə́ngə́d a oʼto ó Táán, tɛámoódammana.

²Púbiíbuənin ntɛ́m yaaŋan, tɛ́ɔŋ oʼkɔɔ kɔ. Tɛdiɛlɛnɛ nyummú kɔbɛ́, tidiunə lɛ́ tíwíiyi mɔɔd a tugúm tuə́ŋ, tindígə tɛn mɔɔd agɛɛlɛ lɛ́ tísiəd tugúm tuə́ŋ.

³Ntɛɔ́gɔ əgusəə náan agoboyɛ́ʼkɛn nsɔ́ɔ́, ndóo. Kɛ́lɛ lɛ́, əgín wɔnɔ́ ná tɛyɛ́bodɛánɛ kalaʼ, polɛ a ntɛ́m yəəs a kaadɛ. Tɛlɛ paladáán a ɔlaa wə́ə́s ungim. Ɔmbɔ́ kugu kódɛɔ́gɔ kó kɛbɛɛ́saa.

⁴Nyaágɛn oʼto wáam ungim na pəŋi, ndɛ agɔnyɔ́ga na pəŋi kɛ́fɔlɛ́. Ɔmbɔ́ ná ndɛɛ́ a ntɔ́b, tɔnyɔ́g tóɛsánɛ́n oʼto, ndɛ na ɔʼtɛ́m a kaadɛ yəə́b.

⁵Kɛ́lɛ lɛ́, ná tɛyɛ́ɛ́n əgiig a Masɛdowáan[19], tɛdɛʼkɔ́ɔgɔɔŋ kioyig ɔmbɔ́ sɔɔŋ. Tiɛ́nɛ́ ntɔ́b a mbod ngim. Tɛyɛ́ɛ lɛ́, a táán pɛbán na pɛbán na pɔɔd, ɛságág na pəsi a ntɛ́m.

⁶Náa, Táán nyɔ́ alɛɛ́ agɛɛlɛ lɛ́ ntɛ́m ɛ pɔɔd pá páʼkodóó pidíg íwiiyi, əyíbiwííyi tɛn yəəs ná ayɛ́ɛ́lɛ lɛ́ Tíid yíim.

⁷Adɛ́njaŋ əgín lɛ́ Tíid əyíím áa ntɛ́m yəəs yiíwííyi, ndóo. Yiíwííyi tɛn a nkə kɛ́ ayɛ́bɛdɛánɛ wɔnɔ́ ná pəŋibáamɔɛ́d poyɛ́mogónɛ nkó. Ayɛ́bɛdɛánɛ lɛ́ polɛ na njaan lɛ́ póɛʼtála. Yiísə́ə́ tɛn lɛ́ poyóób ɔʼtɛ́m kogany a nkə kɛ́ kɛ́yásánɛ́ɛ́, na lɛ́ poɛ́dɛ́lɛm na toɛn a ngim yaam. Kólɛ́ aa njɔ́ɔ́ŋ kə́mmú tɔnyɔ́g kɛ́fɔlɛ́.

⁸Mbálɛŋ lɛ́ nufuuʼ nó njíbudílən[20] nóyɛ́boyɛ́ʼkɛn ɔʼtɛ́m kogany. Náa, ntɛɔ́gɔ əgəə́lə́ʼkəni kɛ́lɛ́ nɛ́gɔŋ. Ɛɛ́ɛ, kɛ́lɛ fɔ́lɔ́b lɛ́ ná nyɛɛ́dála lɛ́ nufuuʼ nóam nóyɛ́boyɛ́ɛ́lɛ ɔʼtɛ́m wááŋan ógany ɛyaa ɛ́ kɛnɛŋ, njə́lə́ʼkə́níí.

⁹Náa nɛ́gɔŋ yɛ́ɛnɛ, ndɛ na tɔnyɔ́g. Ntɛɔ́gɔ agɔnyɔ́ga a oʼto wóonɛ lɛ́ njɛ́boyɛ́ʼkɛn ɔʼtɛ́m kogany, ndóo. Ndɛ agɔnyɔ́ga lɛ́ ɔʼtɛ́m kogany wááŋan óyɛ́boyɛ́ɛ́lɛ lɛ́ puə́suʼki, pógasɛ ɔlaa. Ɔʼtɛ́m kogany wááŋan wóow óyɛ́ɛ wɔnɔ́ ná Táán ayɛ́ɛ anyɔ́ŋɛn. Áay lɛ́ tɛdɛboyɛ́ɛlɛnɛ yoom na yoom yɛ́ yááyɛ́b.

¹⁰Kɛ́lɛ lɛ́, ɔʼtɛ́m kogany wó ólɛɛ́ wɔnɔ́ ná Táán alɛɛ́ anyɔ́ŋɛn, ólɛ ɔʼtɛ́m kogany wó wáagɛɛlɛ lɛ́ mɔɔd yə́suʼki, ágasɛ ɔlaa, yɛ́ɛn na wó wáamoyɔ́ɔyɛ. Pə́diə́gəə́lə́ʼkəni ɔʼtɛ́m kogany wóow náan. Náa, wó ólɛɛ́ a ɛságág yɛ́ a moom mó a nsí yɛ́ɛnɛ, ólɛ wó wə́əními mɔɔd.

¹¹Ɔʼtɛ́m kogany wááŋan ólɛ ɔŋŋɛʼ a əngis á Táán. Táláan nkə kɛ́ ómáboyɛ́ʼkɛn ə́! Táláan wɔnɔ́ ná polɛɛ́ na ɔʼtɛ́d na ɔʼtɛ́d agɛɛlɛ kó mbod mbod ɛ pɛbán! Wɔnɔ́ ná polɛɛ́ na ɔʼtɛ́d na ɔʼtɛ́d agaáfada pɛgan ə́! Wɔnɔ́ na kɔbɛ́ kólɛɛ́ agobogányɛn a ɔʼtɛ́m ə́! Wɔnɔ́ ná polɛɛ́ agodammana kɛɛlɛ Táán kɔbɛ́ ə́! Wɔnɔ́ ná ɔʼtɛ́m wááŋan ólɛɛ́ ɔgɔ́lɔ a kaadɛ lɛ́ polɛ anyɔ́ŋɛn kɛʼtála əə́! Wɔnɔ́ ná poáyɛ́ʼkɛ́nɛ́nɛ́ɛ́ a pigólí pɛ́ Táán ə́! Wɔnɔ́ ná polɛɛ́ ndúmiʼ na kɛɛ́ʼkɛn ntɔ́b na nyɔ́ amɛ́ɛ́lɛ kɔbɛ́ ə́! Puóloodi a pungə́ puim lɛ́ podɛɔ́gɔ na ɛgom a pɛbán pɛ́ɛb piim.

¹²Agosom kosómáán, kɛ́lɛ lɛ́, nga njíbudílən, kɛ́dɛʼkɛ́ɛ a oʼto ó mɔɔd nyɔ́ ayɛ́ɛ́lɛ kɔbɛ́, kɛ́diɛn tɛn a ó nyɔ́ páyɛ́moyɛ́ɛ́lɛ kɔbɛ́, ndóo. Njíbudílən agɛɛlɛ lɛ́ pólɛŋ moááŋ a udi ó Táán wɔnɔ́ ná poáyɛ́ʼkɛ́nɛ́nɛ́ɛ́ a kidíídí kiə́s.

¹³Kólɛ́ aa niɛlɛ nɛáŋan nɛ́ɛn nɛ́mɛ́ɛ́lɛ lɛ́ ɔʼtɛ́m wə́ə́s úwiiyi. Adɛ́njaŋ əgín ntɛ́m yəəs áa yəə́wiiyi, ndóo. Tɛyɔ́ɔ́ŋ tɛn kə́mmú tɔnyɔ́g tó toálaŋ náan ná tɛɛ́dála wɔnɔ́ ná Tíid ayɛ́ɛ kɔŋɛʼ a ombod wó puyímuwííyi ɔʼtɛ́m na kɔŋɛʼ kuim kó poyɛ́moyɛ́ɛ́lɛ.

¹⁴Kɛ́lɛ lɛ́, nga njə́gídə́níí a igog a kidíídí kɛáŋan a udi wə́ə́ŋ, podɛʼkáyɛnyɛɛlɛ lɛ́ nyɔ́ɔŋ oʼto kono. Wɔnɔ́ ná tɛyɛ́ɛ agobodɛ́ananɛ fɔ́lɔ́b pɛnɛŋ piim, yoom tɛn ímuʼ náan aa nɛboógany nɛ́ tɛyɛ́boógány a udi ó Tíid nɛ́yɛ́ɛ fɔ́lɔ́b.

¹⁵Kɛnɛŋ kɛ́ amáyóŋɛ́ɛ́ wɔnɔ́ ná pəŋi piim poyɛ́moyóbɛn, pumə́əmuúsiəd kɔŋɛʼ na nnyáádɛ́ ngim, puə́liminə kulimínə́ə́n, nnyɔ́ŋánán yəəŋ na pəŋi ɛlɛ əgiiʼkini koyam agosan náan.

¹⁶Ndɛ na tɔnyɔ́g kɛ́fɔlɛ́ lɛ́ ndɛ ogaag oʼto na pəŋi a pɛbán piim.