Read Yambeta 2 Kɔlɛ́ɛnt 8 Bible Online

2 Kɔlɛ́ɛnt 8 - Yambeta bible

2 Kɔlɛ́ɛnt 8

¹Pomóŋŋí, tɛlɛ anyɔ́ŋɛn lɛ́ pólɛŋ wɔnɔ́ ná Táán yiílóódi kɔŋɛʼ kuə́ŋ na ɛgɔny ɛ́ pəə́liʼtiniʼ yɛ́ a Masɛdowáan.

²Pɛ́ɛ́nɛ́ ntɔ́b kɔ́gɔ́ɔg kɛ́fɔlɛ́, náa tɔnyɔ́g toɔ́bɔn tóyɛ́ɛ kɛlaŋanan a ombod wóonɛ lɛ́, ɔmbɔ́ ná páyɛ́ɛ na osog kɛ́fɔlɛ́, pɛ́ɛ́ŋáán a fuʼ.

³Ndɛ wɛ́sɛnɛg lɛ́ páyɛ́ʼkɛn wɔnɔ́ ná ɔmbɔg yɔ́ɔ́bɔn ə́yííg. Pɛ́ɛ́láŋ sɛ́ɛb náan súʼtə́ə́ pámɛ́ʼkɛn agaáyɛn nkə kɛ́ páyɛ́ɛ págɛɛ́ʼkɛn. Páyáyɛ́ɛ́ŋɛ́nɛ́ɛ́ kaáyɛ́ɛ́ŋɛ́náán lɛ́ pɛ́ɛlɛ náan,

⁴pámábɛyɔ́sɔ́gɔ́lɔ́nɛ́ɛ́ na toɛn lɛ́ ngab yɔɔbɔn yə́bulid na nkə kɛ́ tiígóodi lɛ́ tɛ́dómɛn pəə́liʼtiniʼ pá a Siudə́ə pá páagoob na Táán[21]

⁵Páyɛ́ɛ́lɛ agaáyɛn nkə kɛ́ tɛyɛ́ɛ págofɛg lɛ́ páagɛɛlɛ. Pɛ́ɛ́yáŋ agaáyɛ́ʼkɛn pɔ́lɛ́báamɔɛ́d na Sə́dúk. A ngim yɛ́ɛy pááság kaáyɛ́ʼkɛn na pəsi wɔnɔ́ ná Táán alɛɛ́ anyɔ́ŋɛn.

⁶Wɔnɔ́ ná kɛ́lɛɛ́ lɛ́ Tíid aa əyə́ʼtúmíí pigólí pɛ́ mag yɛ́ɛy agɛɛ́ʼkɛn na pəə́liʼtiniʼ pá a Siudə́ə, kólɛ́ aa tɛyɛ́moyɔ́sɔ́gɔ́lɔ́nɛ́ɛ́ lɛ́ yímbuúlini, yíim əyibənən pigólí piə́ŋ pɛ́laŋ pɛ́ɛb.

⁷Polɛ na tugúm a moom muim lɛ́ na a kəə́liʼtiniʼ, na agolɔɛgɛ Tɔsɔm, na agolɛŋ pafɔ́lɔ́b, na a mbod ɛ kaáyɛ́ʼkɛn ngim na Táán, na a nnyɔ́ŋánán yɛ́ polɛɛ́ na yɛ́lɛ́ na pəsi. Náan aa tɛlɛɛ́ anyɔ́ŋɛn tɛn lɛ́ púgúmi a pigólí pɛ́laŋ pɛ́ɛnɛ pɛ́ mag.

⁸Ntɛɔ́gɔ agoboogóda ambaan a yɛ́lɛ́, náa ndɛ əgubuúloodi agá wɔnɔ́ ná pɔsɔ́g pə́mmú páyáyɛ́ʼkɛ́nɛ́ɛ́ agɛɛ́bɛ pəə́liʼtiniʼ. Náan ndaalɛŋ nga fɔ́lɔ́b polɛ tɛn na nnyɔ́ŋánán na pɔsɔ́g.

⁹Kɛ́lɛ lɛ́, poálɛŋ wɔnɔ́ ná Sə́dúk wəəs Yə́sus Kilíʼtus ayɛ́boyɛ́ɛ́lɛ kɔŋɛʼ. Nyɔ́lɛ́ nyɔ́ a kidíídí kɛáŋan, ayáyáánɛ́ɛ́ ɛsɔ́gasɔ́gá, kɔmɔɛ́d lɛ́ ayɛ́ɛ na tugúm[22] Ayɛ́ɛ́lɛ náan lɛ́ ná pəŋi púgúmi a osog wə́ə́ŋ.

¹⁰Nkə kɛ́ mɛ ndɛɛ́ afɛga a kɛbán kɛ́ɛg aa kɛ́ɛnɛ ndáabodɛ́anɛ. Kɛ́lɛ lɛ́, waag wó wɛ́ɛ́sán, pəŋi aa poyɛ́ɛ na oʼto na oʼto əgusəə lɛ́ poagɛɛ́bɛ pəə́liʼtiniʼ pá a Siudə́ə. Pəŋi tɛn aa poyɛ́ɛ na oʼto na oʼto agɛɛlɛ náan. Kɛ́lɛ kɔŋɛʼ náan na pəŋi lɛ́ puə́yíis agɛɛlɛ.

¹¹Nɛ́gɔŋ yɛ́ɛnɛ anɛ́ɛ́n, púyibənən pigólí pɛáŋan pɛ́ɛb, poɛ́ʼkɛn wɔnɔ́ ná ɔmbɔg yááŋan ə́míig. Ə́yísíən na toɛn wɔnɔ́ ná puyə́yísíí a niə́bə́ə.

¹²Kɛ́lɛ lɛ́, nkə kɛ́ mɔɔd aágɛɛ́ʼkɛn na ɔʼtɛ́m wə́ə́ŋ ungim, kɛ́go aa kɛ́lɛɛ́ kɛŋɛʼ na Táán. Nyɔ́lɛ́ alɛ anyɔ́ŋɛn lɛ́ mɔɔd yɛ́ʼkɛn yoom na sɔ́g wɔnɔ́ ná ɔmbɔg yə́ə́ŋ ə́míig, adɛ́njaŋ wɔnɔ́ ná ɔdɛɔ́gɔ ɔgɔɔ́ŋɛ́ɛ́.

¹³Ntɛɔ́gɔ əgusəə lɛ́ poáyóóla agɛɛ́ʼkɛn na sɔ́g. Náa kíəguunə lɛ́ ungim yɔ́ɔŋ yoom ímuʼ.

¹⁴A kɛnɛŋ kɛ́ɛnɛ, pəŋi pugóódi. Nkə kɛ́ kímə́bulúbin, kɛ́lɛ kɛ́ kɛɛ́bɛ pá póʼkódií. Náan, wɔɔ́s tɛn wó pəŋi polɛ́ɛ́ koʼtaŋɛɛ́, pɔ́lɛ́ pálɛ́ɛ́ koboɛ́bɛ na nkə kɛ́ kímə́bulúbin pɔ́lɛ́. Náan pəŋi piim poagɛɛn yoom ímuʼ

¹⁵wɔnɔ́ ná kɛ́lɛɛ́ kidiídílə́ a kálaʼtaʼ lɛ́: «Nyɔ́ yɛɛ́gómmɛ moom kɛ́fɔlɛ́, múdiʼkə́yəmuúlubin. Nyɔ́ yɛɛ́gómmɛ sɔɔŋ, adɛʼkáaʼtaŋ[23]»

¹⁶Tiɛ́ʼkɛnaan pisoyidiʼ na Táán, nyɔ́lɛ́ nyɔ́ ayɛ́ɛ́lɛ lɛ́ Tíid yáyɛ́ʼkɛn na toɛn wɔnɔ́ ná pəsi tɛn tɛáyɛ́ʼkɛ́nɛ́nɛ́ɛ́ agoboɛ́bɛ.

¹⁷Ná tɛɛ́dɛánɛ na Tíid lɛ́ yíim a pəŋi, əyə́líʼtíníí. Yɛɛ́ság kodɛ́ɛmɛn əgiim lɛ́ ayɛ́ɛ na ɔʼtɛ́m na pəŋi.

¹⁸Timíim tɛ́moodom na móŋŋí wəəs nyummú nyɔ́ mogony mó pəə́liʼtiniʼ muim mólɛɛ́ agonyáadɛ a pigólí pɛ́ kolɔɛgɛ Tɔsɔm Tólaŋ pɛ́ alɛɛ́ agɛɛlɛ.

¹⁹Kɛ́lɛ tɛn lɛ́ nyɔ́lɛ́ aa pəə́liʼtiniʼ pə́yííyid, pámáamoyáág a ondáŋ wə́ə́s a pigólí pɛ́ kodáŋananɛ pɛbán pɛ́ kɛɛn agɛɛ́ʼkɛn na mogony mó pəə́liʼtiniʼ mó a Siudə́ə nkə kɛ́ kɛáʼkaámagɛɛ́. Pɛ́lɛ pigólí pɛ́ pɛ́agɛɛ́ʼkɛn nugəm na Sə́dúk nyɔ́lɛ́nyɔ́amɔɛ́d, píiloodi tɛn mafɛgaʼ málaŋ má tigódíí a ɔʼtɛ́m lɛ́ tɛlɛ anyɔ́ŋɛn kɛɛ́bɛ pɔsɔ́g.

²⁰Mɔɔnɛ́ móom mə́ə́bú. Náan aa tɛdɛɔ́gɔ agɔnyɔ́ŋɛnɛɛ́ lɛ́ ná pɔɔd pɔ́mɔ́ɔ́ŋ ɛgom ɛ́ kɛbɛɛ́bɛn a ombod wó tɛádáŋananɛ mólɛ́.

²¹Tɛlɛ əguunə lɛ́ ná tɛálɛŋ kɛɛlɛ. Náa, adɛ́njaŋ əgín a əngis á Sə́dúk, náa, na a əngis tɛn á pɔɔd[24]

²²A ondáŋ ó pɔɔd pá tɛádóm, móŋŋí wəəs tɛn nyummú alɛ kɔ. Móŋŋí wəəs nyóon, tɛyɛ́moyásɔ́sɛ́nɛ́ɛ́ pɛnɛŋ piíŋ agodála wɔnɔ́ ná əə́gəə́siəd, əmə́əbiíloodi lɛ́ yaáyɛ́ʼkɛ́nɛn na toɛn a pigólí pɛ́ Táán. Náa, nɛ́gɔŋ yɛ́ɛnɛ, yəə́yíísin kə́mmú agaáyɛn náan lɛ́ yɛɛ́yɛ́gɛn oʼto wə́ə́ŋ ungim na pəŋi.

²³A noá na Tíid, tɛlɛ ondáŋ na nyɔ́lɛ́ a pigólí. Alɛ sɔ́g waam o pigólí nyɔ́ alɛɛ́ əgugud a pəŋi. A pomóŋŋí pə́ə́s pə́mmú pá pálɛ́ɛ́ na nyɔ́lɛ́, pəə́liʼtiniʼ aa pə́yíbuyííyid əgiim páboodom. Nkə kɛ́ pálɛɛ́ agɛɛlɛ, pálɛ agɛɛlɛ kɛ́lɛ́ agɛɛ́ʼkɛn nugəm na Kilíʼtus.

²⁴Íbuliódíən anɛ́ɛ́n lɛ́ polɛ na nnyɔ́ŋánán na pɔ́lɛ́ a fɔ́lɔ́b, agɛɛlɛ lɛ́ mogony mó pəə́liʼtiniʼ mólɛŋ, fiɛ́d na isuŋ lɛ́ tɛdɛɔ́gɔ əgubuyə́gidən a igog náan iyó a udi wɔ́ɔ́bɔn.