Read Yambeta 2 Kɔlɛ́ɛnt 9 Bible Online

2 Kɔlɛ́ɛnt 9 - Yambeta bible

2 Kɔlɛ́ɛnt 9

¹A nkə kɛ́ kɛ́adɛ́ʼtɛg ɛ́lɛ́ɛb ɛ pəə́liʼtiniʼ pá a Siudə́ə, kídíəguunə kə́mmú lɛ́ nyíiʼkini kubuúdilən.

²Kɛ́lɛ lɛ́, mbálɛŋ lɛ́ puígúmin lɛ́ poaboɛ́bɛ. Kólɛ́ aa ndɛɛ́ əgəə́gidən a igog a kidíídí kɛáŋan a udi ó pɔsɔ́g pá a Masɛdowáan nyɔʼkɔ́: «Kɔ́gɔ́ɔg pɛ́ waag wó wɛ́ɛ́sán áa pəŋi pomóŋŋí pə́ə́s pá a Aʼkáay polɛɛ́ ndúmiʼ paábɔ́ŋɛ́náán lɛ́ poɛ́ʼkɛn yoom.» Kaáyɛ́ʼkɛn koáŋan kóog koɛ́gónɛ ɛ́fɔlɛ́ nkó a ondáŋ wɔ́ɔ́bɔn.

³Náa, mbábodómɛn pomóŋŋí pə́ə́s póonɛ anɛ́ɛ́n agɛɛlɛ lɛ́ nɛboógany nɛ́ɛn nɛ́ njɛ́boógány nídinjíím alon pɛfaa. Ndóo, kíɛn fɔ́lɔ́b lɛ́ poándɛ paábɔ́ŋɛ́náán wɔnɔ́ ná njɛ́bodɛánɛ.

⁴Ndɛ agodammana lɛ́ mbəʼkiim alon áay na pɔsɔ́g pá a Masɛdowáan, tɛmboan lɛ́ poáʼkaáboŋɛn, kɛ́abɛyɛ́ɛlɛ lɛ́ tíɛn na oʼto kono kɛ́fɔlɛ́ lɛ́ tɛyɛ́yɛgɛn oʼto wə́ə́s ungim na pəŋi. Ɔmbɔ́ pəŋibáamɔɛ́d tɛn poagɛɛn na oʼto kono.

⁵Nyɛɛ́dála anɛ́ɛ́n lɛ́ kɛ́lɛ kɔŋɛʼ lɛ́ nyɔ́sɔ́gɔlɔn pomóŋŋí pə́ə́s póonɛ, páyaŋ əgiim əgiig káag na pəsi, pádáaŋɛ nkə kɛ́ puísə́ə́ lɛ́ poamaga. Áay, ná mɛ ndə́əgiim əgiig, ndaaboan lɛ́ muim moándɛ modáŋɛán kɛnɔ kímuʼ. Kíoloodi lɛ́ adɛ́njaŋ mɔɔd aa amáboogóda, pomɛ́ʼkɛn na ɔʼtɛ́m wááŋan ungim.

⁶Áyɔ́ŋɛ́an lɛ́: Nyɔ́ alɛ́ɛ́ kugudií sɔɔŋ, alɛ́ɛ́ kɔɔŋ tɛn sɔɔŋ a nibug. Nyɔ́ alɛ́ɛ́ kugudií kɛ́fɔlɛ́, alɛ́ɛ́ tɛn kɔɔŋ kɛ́fɔlɛ́ a nibug!

⁷Ɛ́nɛ́ mɔɔd yɛ́ʼkɛn anɛ́ɛ́n əgín wɔnɔ́ ná alɛɛ́ afɛga a ɔʼtɛ́m wə́ə́ŋ a kaadɛ, fiɛ́d kəə́lə́ʼkəni, ɔmbɔ́ tɛn káag wɔnɔ́ pámámoogóda agá ambaan, ndóo. Yɛ́ʼkɛn na tɔnyɔ́g lɛ́ Táán alɛ anyɔ́ŋɛn nyɔ́ aágɛɛ́ʼkɛn na tɔnyɔ́g.

⁸Táán alɛ na toɛn tó kubusúgi niúd na mbod ɛ kɔŋɛʼ kuə́ŋ ngim agɛɛlɛ lɛ́ póɔŋ nkə kiim yɛ́ kɛ́abosógɛn, múubuúlubin. Mó múmə́bulúbin mólɛ lɛ́ póɛlɛ mbod ɛ kɔŋɛʼ ngim na mólɛ́,

⁹wɔnɔ́ ná kɛ́lɛɛ́ kidiídílə́ a Kálaʼtaʼ lɛ́: «Mɔɔd olaŋ agɛɛ́ʼkɛn kɛ́fɔlɛ́ na pá póʼkódií, sáád yəəŋ ɛlɛ a pəliə́g[25]»

¹⁰Táán áa alɛɛ́ agɛɛ́ʼkɛn ombod ó moom na pəgud. Nyɔ́lɛ́ tɛn aa alɛɛ́ agoboyɛ́ʼkɛn nkə kɛ́ páanɛ[26] Alɛ́ɛ́ koboyɛ́ʼkɛn tɛn pəŋi ombod wó wáásɛʼtan, áyɛɛlɛ tɛn lɛ́ údəg agɛɛlɛ lɛ́ sáád yaaŋan ɛ́lon na ɛ́fɔlɛ́ ɛ́ pɛbán pɛ́laŋ.

¹¹Nyɔ́lɛ́ aa alɛ́ɛ́ koboyɛ́lɛɛ́ lɛ́ póɛn pɛnɛŋ piim na mbod ɛ tugúm ngim agɛɛlɛ lɛ́ pəŋi tɛn poɛ́ʼkɛn na pɔsɔ́g na ɔʼtɛ́m wááŋan ungim. Náan, piíŋ páagɛɛ́ʼkɛn pisoyidiʼ na Táán

¹²lɛ́ nkə kɛ́ɛg kɛ́ polɛɛ́ agɛɛlɛ náan, kɛ́dɛ́agɛɛ́bɛ əgín pəə́liʼtiniʼ pɔ́lɛ́ na pɔ́lɛ́, kɛ́agɛɛlɛ tɛn lɛ́ ɛ́fɔlɛ́ yɛ́ʼkɛn pisoyidiʼ na Táán.

¹³Ná pɔɔd páadála lɛ́ nkə kɛ́ɛg kɛ́ polɛɛ́ agɛɛlɛ kɛ́lɛ kɛŋɛʼ, ɛ́fɔlɛ́ ɛ́lɛ́ɛ́ konyáadɛ Táán. Pálɛ́ɛ́ konyáadɛ Táán lɛ́ puóloodi lɛ́ polɛ amooyóóbɛn wɔnɔ́ ná pumə́líʼtíníí Tɔsɔm Tólaŋ tó túəsəə kɛbán kɛ́ Kilíʼtus. Pálɛ́ɛ́ komonyáadɛ tɛn a oʼto wóonɛ lɛ́ nkə kɛ́ pugódíí polɛ na nuboʼ na kɛ́lɛ́ na pɔ́lɛ́ na pəə́liʼtiniʼ piim kɛ́.

¹⁴Pálɛ́ɛ́ kɔɔ́sɔ́gɔlɔn Táán a kidíídí kɛáŋan, pə́yibuúloodi nnyɔ́ŋánán yɔɔbɔn lɛ́ Táán ayɛ́boyɛ́ɛ́lɛ pəŋi kɔŋɛʼ kɛ́fɔlɛ́.

¹⁵Tiɛ́ʼkɛnaan pisoyidiʼ na Táán a nɔŋáan nuə́ŋ nó nódɛɔ́gɔ nó kofɛg na yoom!