Read Yambeta Kalasíi 1 Bible Online

Kalasíi 1 - Yambeta bible

Kalasíi 1

¹Mɛ Póol aa mbə́budílən nufuuʼ nóonɛ. Mɛ nyɔ́ ndɛɛ́ mɔɔ́n o maʼtom lɛ́ Táán Sɛ na Yə́sus Kilíʼtus nyɔ́ Táán ayɛ́moyóndɛ́gɛ aa pɛ́ɛ́nyɔ́ŋɛn lɛ́ nyɛ́ɛn. Adɛ́njaŋ a nɛnyɔ́ŋɛn nɛ́ pɔɔd aa ndɛɛ́ mɔɔ́n ó maʼtom, ndóo. Kɛ́diɛn tɛn ɔmbɔ́ lɛ́ mɔɔd aa amɛ́nyɛɛlɛ lɛ́ nyɛ́ɛn.

²Nufuuʼ nóonɛ, pəsi piim, ondáŋ na pomóŋŋí pə́ə́s pá pálɛɛ́ áanɛ na mɛ áa timə́budílən pəŋi pomóŋŋí pə́ə́s, pəə́liʼtiniʼ pá a Kalasíi[1]

³Táán Sɛ wəəs, pɔ́lɛ́ na Sə́dúk Yə́sus Kilíʼtus páboyɛ́ʼkɛn mawɔʼ na kiwiiyiʼ aá!

⁴Kilíʼtus ayáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d lɛ́ ná ábɛyɔ́ɔyɛ a mabɛ́ mə́ə́s. Ayɛ́bɛyááŋɛn a ɔmbɔg á toɛn tó tobɛ́ tó a nsí yɛ́ɛnɛ ɛ nɛ́gɔŋ, əgín wɔnɔ́ ná Táán Sɛ wəəs yɛɛ́nyɔ́ŋɛn.

⁵Tɛ́moyɛ́ʼkɛn nugəm pɛnɛŋ piim aá! Aamɛn.

⁶Ndɛ əgəə́wúunəni kɛ́fɔlɛ́ wɔnɔ́ ná pumə́bísígíí kudum ngim náan na Táán nyɔ́ ayɛ́boodɔ́ŋɔn a kɔdɛ́ɛ ɔʼtɛ́m kuə́ŋ, a oʼto ó Kilíʼtus, puə́ndəyə́ən agá Tɔsɔm Tólaŋ toɛ́ndɛ́ŋ.

⁷A fɔ́lɔ́b, Tɔsɔm Tólaŋ túmmú toɛ́ndɛ́ŋ tódɛɔ́gɔ. Pɔɔd pə́mmú pɛ́ndɛ́ŋ agá aa pálɛɛ́ kɔ pá pə́əbuyúnjugəni nsiŋ, páanyɔ́ŋɛn kogasɛ Tɔsɔm Tólaŋ tó tóɔsɔyɔ kɛbán kɛ́ Kilíʼtus.

⁸Mɔɔd əməʼkiim aboólɔɛgɛnɛ Tɔsɔm Tólaŋ tó tólɛɛ́ ndɛ́ŋ na tó tɛyɛ́bolɔɛ́gɛ́nɛ, yɛɛn ɔmbɔ́ nyɔ́ a ondáŋ wə́ə́s óo, yɛɛn uŋun ó maʼtom wó úmíim úsuu a mɔɛn óo, tuúdudúú na nyɔ́lɛ́!

⁹Nkə kɛ́ɛnɛ kɛ́ mbə́ndəgiʼkini kubuúbiʼtinií nɛ́gɔŋ, mbáʼkobodɛ́anɛ kɛ́lɛ́, nyɔʼkɔ́: Mɔɔd əməʼkiim aboólɔɛgɛnɛ Tɔsɔm Tólaŋ tó tódɛɔ́gɔ tó poálɛŋ, tuúdudúú na nyɔ́lɛ́!

¹⁰Mɛ, ntiə́guunə lɛ́ pɔɔd aa pɛ́ɛnɛɛ́ a ngim yaam, ndóo. Táán áa ndə́əguunə lɛ́ yɛ́ɛn a ngim yaam. Ntɛɔ́gɔ əguunə lɛ́ pɔɔd pɛ́ɛʼkany, ndóo. Mbɛ́ɛ əguunə náan ná ntɛɔ́gɔ uʼkudin o Kilíʼtus.

¹¹Pomóŋŋí, ndabodɛ́anɛ nyɔʼkɔ́ aá: Tɔsɔm Tólaŋ tóonɛ tó njɛ́bolɔɛ́gɛ́nɛ, tódɛɔ́gɔ yoom yɛ́ mɔɔd amáána kaanáán na oʼto wə́ə́ŋ, ndóo.

¹²Adɛ́njaŋ na mɔɔd aa mbóób, kɛ́diɛn tɛn mɔɔd aa amɛ́nyaʼkánánɛ tólɛ́, ndóo. Yə́sus Kilíʼtus nyɔ́lɛ́nyɔ́amɔɛ́d aa amɛ́ɛ́lɛ lɛ́ ndɛŋ tólɛ́.

¹³Poyóób wɔnɔ́ ná njɛ́ɛ nyəə́siəd kalaʼ ná nyiíligi əguyə́ən kəə́liʼtiniʼ kó Yúdɛn. Poyóób wɔnɔ́ ná njɛ́ɛ nnɔɛyɛ na toɛn tuim pá páyáágɛn oʼto na Táán, nyɔʼkɔ́ mpuwíiyi.

¹⁴A pɛbán pɛ́ a kəə́liʼtiniʼ kó Yúdɛn, nyɛɛ́laŋɛn pɔsɔ́g nto páam piim, pɔɔ́n pá Yúdɛn. Ntɛʼkɛ́ɛ kɔ na nfɛg a nɛáyɛ́ʼkɛn nɛ́ njáyɛ́ʼkɛnɛn agɔnɔna pɛbán pɛ́ pɛmbáa[2]

¹⁵Náa, Táán əyínyiiyid əgín kɔ kalaʼ na pə́díyímbíən, amáyɛʼtɔ́ŋɔn a kɔdɛ́ɛ ɔʼtɛ́m kuə́ŋ lɛ́ mmuúgudin. Ná yiígúmin lɛ́ nyɔ́lɛ́ əəgindoodi ánɛ aa alɛɛ́ mɔɔ́n wəəŋ, agɛɛlɛ lɛ́ nyɛ́ɛn alɔɛgɛnɛ pɛnɔɔŋɛʼ Tɔsɔm Tólaŋ tó tóɔsɔyɔ kɛbán kiə́ŋ, ntɛʼkáagɛɛn əŋíən ndə́b na mɔɔd[3]

¹⁷Ntɛʼkáabag tɛn ɔmbɔ́ a Yolósalɛm lɛ́ nyɛ́ɛn adála pá pɛ́ɛ́yáŋ abag pɔɔ́n pá maʼtom na mɛ. Nyɛɛ́ság kɛɛn agá a Ələbíi, mbádɛ́ɛ́mɛn kɔ́gɔ́ɔg, mbímbuúlíni a Tamáas.

¹⁸Pɛag pɛ́dáád a ngim yɛ́ɛy, nyɛɛ́bág a Yolósalɛm agɛɛlɛ lɛ́ tɛ́dɛ́ʼtɛganan na Sɛ́fas, tɛ́lɛŋanan na nyɔ́lɛ́. Njɛ́ɛ́lɛ kɔ na nyɔ́lɛ́ mədúg puuniʼ.

¹⁹Kɔ́gɔ́ɔg, ntɛʼkáadála mɔɔ́n o maʼtom wɛndɛ́ŋ, əgín Sɛ́ag, móŋŋí o Sə́dúk áa nyɛɛ́dála nyɔ́lɛ́nyɔ́əsíŋ.

²⁰Taa, tódáád a mɔɛn, nkə kɛ́ɛnɛ kɛ́ mbə́budílən kɛ́dɛɔ́gɔ pɛnyaʼ.

²¹A ngim yɛ́ɛy, njɛ́ɛ́n tɛn a əʼkúu yɛ́ɛnɛ lɛ́ na a Silíi, na a Silisíi.

²²Náa, pɔsɔ́g pá a mogony mó pəə́liʼtiniʼ mó a Siudə́ə pándɛŋɛn kifílí kɛ́am.

²³Páyóób əgín wɔnɔ́ ná pɔɔd páyɛ́ɛ agosɔyɔ pɔ́nɔ́: «Mɔɔd nyɔ́ ayɛ́ɛ agɛbɛɛ́nɔɛyɛ kalaʼ, nyɔ́lɛ́ ogo aa əə́ndəgimií álɔɛgɛ nɛ́gɔŋ lɛ́ pɔɔd páág oʼto na Kilíʼtus, nkə kɛ́ ayɛ́ɛ əguunə kuwíiyi kalaʼ!»

²⁴Taa, náan aa pɔɔd páyɛ́ɛ agonyáadɛ Táán a kidíídí kɛ́am.