Read Yambeta Kalasíi 2 Bible Online

Kalasíi 2 - Yambeta bible

Kalasíi 2

¹Pɛag tɛn pɛówád na píniʼ a ngim yɛ́ɛy, tiyíʼkíni kuúlini a Yolósalɛm, pəsi na Panábas. Nyiísiə́d tɛn Tíid agɛɛn kɔ na nyɔ́lɛ́[4]

²Njɛ́ɛ́n náan a Yolósalɛm lɛ́ Táán əyíndoodi lɛ́ nyɛ́ɛn kɔ, nyɛ́ɛn alɛŋ kobomoáŋɛnɛ Tɔsɔm Tólaŋ tó ndɛɛ́ alɔɛgɛ a kɛgaágadɛ kɛ́ pɛnɔɔŋɛʼ. Nyɛɛ́moáŋɛ́nɛ tɛn tólɛ́ kɔ́gɔ́ɔg a ɛgɔny na pɛgóʼkóón pɛ́lɛ́ na pɛ́lɛ́. Njɛ́ɛ́lɛ náan lɛ́ ntɛʼkɛ́ɛ anyɔ́ŋɛn lɛ́ pigólí pɛ́ ndɛɛ́ agɛɛlɛ nɛ́gɔŋ, ná pɛ́ ndɛ́ɛ́ kɛɛlɛɛ́ a mədúg má yuudi, písuu məní.

³Mɔɔd ədiʼkə́əsəə ɔmbɔ́ lɛ́ wɔnɔ́ ná Tíid, mɔɔ́n ó Kɛlɛ́ɛg, alɛɛ́ ondáŋ na pəsi, tɛ́moogóda ambaan, yáanyɛ.

⁴Pɔɔd agá pə́mmú pá pə́yíím ɔsɔd a kɛgaágadɛ kiə́s áa páyɛ́ɛ anyɔ́ŋɛn lɛ́ ná pámámoyáányɛ, pɔ́lɛ́ pamɔɛ́d pádiɛn fɔ́lɔ́b pomóŋŋí pə́ə́s. Pɛ́ɛ́sɔ́d a kɛgaágadɛ kiə́s lɛ́ píim abɛɛ́cɛʼtɛ, pálɛŋ tuə́ áa Yə́sus Kilíʼtus amábɛyɛ́ɛ́lɛ wɔnɔ́ ná tɛlɛɛ́ náan filí. Páyɛ́ɛ anyɔ́ŋɛn lɛ́ ná pə́míʼkíni kɛbɛyáánɛ pɛɔ́lɛ́ pɛ́ pɛcɛm.

⁵Tidiʼkə́əgəə́di na pɔ́lɛ́ ɔmbɔ́ sɔɔŋ lɛ́ ná a oʼto wááŋan, pɛnyaʼ pɛ́dɛsɔ́d a Tɔsɔm Tólaŋ.

⁶Kɛbán kímuʼ, a noá na pá pɔɔd páadɛ́ʼtɛg lɛ́ pálɛ pɛgóʼkóón, pɔ́lɛ́ pádɛʼkáagɛʼkóda ambaan a yoom ɔmbɔ́ ímuʼ. (Oʼtɛ́lɛm wɔ́ɔ́bɔn ó kalaʼ ódɛʼkɛ́ɛ kɔ na mɛ na kɛbán. Táán adɛádɛ́ʼtɛg a nkə kɛ́ mɔɔd alɛɛ́[5])

⁷Pɛgóʼkóón pɛ́ɛb pɛ́ɛ́dála lɛ́ Táán áa ayɛ́ʼtóm a nó pá pɔ́dɛɔ́gɔ Yúdɛn lɛ́ nyɛ́ɛn aboólɔɛgɛnɛ Tɔsɔm Tólaŋ, wɔnɔ́ ná yɛɛ́dóm tɛn Píɛ a nó pibíəniʼ pɛ́ Yúdɛn lɛ́ yɛ́ɛn aboólɔɛgɛnɛ tólɛ́.

⁸Kɛ́lɛ lɛ́, əgín wɔnɔ́ ná Táán ayɛ́ɛ́lɛ lɛ́ Píɛ yɛ́ɛn mɔɔ́n o maʼtom a nó pibíəniʼ pɛ́ Yúdɛn, náan tɛn aa ayɛ́nyɛɛlɛ mɛ lɛ́ nyɛ́ɛn a nó pɛnɔɔŋɛʼ.

⁹Na Sɛ́ag, na Sɛ́fas, na Sɛ́aŋ[6] pá páyɛ́ɛ wɔnɔ́ mogon a ɛgɔny ɛ́ pəə́liʼtiniʼ yɛ́ɛy, pə́yə́líʼtíníí lɛ́ Táán áa ayɛ́nyɛɛ́ʼkɛn kisig kɛ́ oʼtom kɛ́ɛg, pááság kibiícugə ombɔg pəsi na Panábas, əguloodi lɛ́ pɔ́lɛ́ pálɛ unuʼ úmmuʼ na pəsi. Tɛyáyóóbánánɛ́ɛ́ pəsi na pɔ́lɛ́ lɛ́, pɔ́lɛ́ páagɛɛn agɛɛlɛ oʼtom wɔ́ɔ́bɔn ná pibíəniʼ pɛ́ Yúdɛn pɛ́lɛɛ́, pəsi tiə́siəd yəəs ngə́ agɛɛn ná pɛnɔɔŋɛʼ pɛ́lɛɛ́.

¹⁰Yoom ímuʼ yɛ́ pə́yíbiŋíən ɛ́lɛ lɛ́, ná tɛándagɛɛnɛɛ́, tidinjə́bə́líí pasɔ́gasɔ́gá. Nkə kɛ́ɛg kɛ́ pə́yíbiŋíən, njɛ́ɛ́lɛ kɛ́lɛ́ tɛn na ɔʼtɛ́m wáam ungim[7]

¹¹Kɛbán kímuʼ, ná Sɛ́fas əyíím a Əntiyóos[8], ntiʼkə́əmugúin niis, njɛ́modɛánɛ pafɔ́lɔ́b udi na udi lɛ́ nyɔ́lɛ́nyɔ́amɔɛ́d áa əyə́də́ə́ŋíí a ɔsɛd wóow

¹²lɛ́, ná pɔɔd pá Sɛ́ag yɛɛ́dóm páyɛ́ɛ pádɛ́njɛ́ɛn əgiig kɔ́gɔ́ɔg, ayɛ́ɛ agonɛ́ɛnɛ na pɛnɔɔŋɛʼ. Ná páyɛ́ɛ pə́ʼkiim əgiig, aáság kudi ədiiʼkíni kaáyɛʼtɛnɛ a ɛbá yɔ́ɔ́bɔn kə́mmú, annɛ́ɛ́nɛ tɛn na pɔ́lɛ́ kə́mmú lɛ́ ayɛ́ɛ agodammana pəə́liʼtiniʼ pá páyɛ́ɛ agɔnyáadanɛ kɛcɛm kɛ́ waany.

¹³Pɔɔ́n pá Yúdɛn pə́mmú pííyə́ən ongoo wə́ə́ŋ ó kubin. Panábas nyɔ́lɛ́nyɔ́amɔɛ́d tɛn yiídə́əŋ a ongoo ó kubin wóow ó moɔ́ŋɛ́ná pusú.

¹⁴Ná nyɛɛ́dála náan lɛ́ pə́ndigi agodáŋana kə́mmú a ngə́ ɛ pasáád pá pálɛɛ́ a Tɔsɔm Tólaŋ, nyɛɛ́dɛánɛ na Sɛ́fas a udi ó mɔɔd ungim, nyɔʼkɔ́: «Wɛ Sɛ́fas, kibíəniʼ kɛ́ Yúdɛn, uyə́siə́díí áanɛ wɔnɔ́ kɛnɔɔŋɛʼ, udiʼkə́əgəə́siəd wɔnɔ́ kibíəniʼ. Tuə́ anɛ́ɛ́n áa olɛɛ́ ogogóda pɛnɔɔŋɛʼ lɛ́ pɛ́laa wɔnɔ́ Yúdɛn əə́? Ndóo!»

¹⁵Pəsi, tɛlɛ pibíəniʼ pɛ́ pímə́biə́níí Yúdɛn, tɛdɛɔ́gɔ pɛnɔɔŋɛʼ pɛ́ pɛ́lɛ́ pɛ́lɛɛ́ pɛɛlɛ mabɛ́.

¹⁶Náa, Tɛálɛŋ lɛ́ mɔɔd ɔdɛɔ́gɔ ogɛɛn na kilumiʼ a udi ó Táán[9] a oʼto wóonɛ lɛ́ əə́nuŋ pɛcɛm piim, ndóo. Mɔɔd agɛɛn na kɛ́lɛ́ lɛ́ amáág oʼto na Yə́sus Kilíʼtus. Kólɛ́ aa pəsi tɛn tɛyáág oʼto na Yə́sus Kilíʼtus agɛɛlɛ lɛ́ tíɛn na kilumiʼ a udi ó Táán a oʼto wóow, kɛ́dɛnjɛ́ɛ́n a oʼto wóonɛ lɛ́ tiínúŋ pɛcɛm, ndóo. Kɛ́lɛ lɛ́, mɔɔd ɔdɛɔ́gɔ ogulum a udi ó Táán lɛ́ əə́nuŋ pɛcɛm.

¹⁷Náa, pəsi Yúdɛn tɛmaʼkɛɛn lɛ́ tɛlɛ əguunə kɛɛn na kilumiʼ a ngim ɛ Kilíʼtus, tɛlɛ anyóon pɛɛlɛ mabɛ́, yoom ímuʼ wɔnɔ́ pɛnɔɔŋɛʼ, kióloodi anyóon lɛ́ Kilíʼtus alɛ agɛɛlɛ lɛ́ pɔɔd pɛ́ɛlɛ kɔbɛ́ ə́? Ndóo óo, adɛ́njaŋ náan!

¹⁸Kɛ́lɛ lɛ́, mɛ mbəʼkiiʼkini kudə́nigi kɛcɛm kɛ́ mbə́ʼkuwíyií, mbóloodi aa nyóon moááŋ lɛ́ ntɛɔ́gɔ agoóbɛn pɛcɛm.

¹⁹A noá na pɛcɛm, mɛɛ́nyɔ́amɔɛ́d mbándɛ wɔnɔ́ kɛlóŋ. Kɛcɛm aa kɛmɛ́njoón. Nkə kɛ́ɛg kiim kɛ́yáyɛ́lɛ́ɛ́ náan lɛ́ ná ndaa a oʼto ó Táán. Páyɛ́mbaŋan ondáŋ na Kilíʼtus a ɔmbásá

²⁰lɛ́ ná kɛ́dɛnjɛ́ɛ́n kə́mmú lɛ́ mɛ áa ndɛɛ́ alaa, kíɛn lɛ́ Kilíʼtus aa alɛɛ́ alaa a mɛ. Kɛ́lɛ lɛ́, ɔlaa wó ndɛɛ́ alaa nɛ́gɔŋ a pumog póam pó mɔɔd, ndɛ alaa lɛ́ nyaágɛn oʼto na Mɔɔ́n o Táán nyɔ́ ayɛ́nnyɔ́ŋɛn, əmə́əgu a kidíídí kɛ́am.

²¹Ntɛɔ́gɔ ogosáŋɛnɛ kɔŋɛʼ kó Táán əmíndoodi. Kɛ́yɛ́ɛnɛn lɛ́ mɔɔd alɛ ogɔɔŋ kilumiʼ a udi ó Táán lɛ́ əə́nuŋ pɛcɛm, ná Kilíʼtus yiígú anyóon a nsíísí iyó.