Read Yambeta Kalasíi 3 Bible Online

Kalasíi 3 - Yambeta bible

Kalasíi 3

¹Tuə́ ə́ən, pəŋi pɔɔd pá a Kalasíi. Tuə́, podɛɔ́gɔ na nto agá á? Pəŋi pá páyɛ́bomoáŋɛ́nɛ kɔŋɛʼ kɔŋɛʼ kɛbán kɛ́ Yə́sus Kilíʼtus nyɔ́ pɛ́ɛ́báŋan a ɔmbásá á! Ánɛ anɛ́ɛ́n áa aáʼkɛɛlɛɛ́, poáʼkonanɛɛ́ ngə́?

²Ɛ́ʼtɛánɛ́an áŋ! Uŋun wó Ufúlúʼtú wó Táán ayɛ́boyɛ́ʼkɛn əə, ayɛ́boyɛ́ʼkɛn a oʼto wóonɛ lɛ́ poyɛ́ngɛg pɛcɛm oóm, lɛ́ poyóób Tɔsɔm Tólaŋ, pomáyaág oʼto a tólɛ́ ə́?

³Ndóo, puʼkóodi nto fɔ́lɔ́b! Pəŋi pá na oʼto na oʼto, puyə́ʼtúmíí a toɛn tó Uŋun wó Ufúlúʼtú, nɛ́gɔŋ puə́ndəyibənií agá a toɛn toáŋan tó pəŋibáamɔɛ́d á?

⁴Nkə kiim kɛ́ kɛ́yɛ́bobóan a ɔlaa wááŋan əə, a náan iyó aa kɛ́yɛ́bobóan ə́? Ndóo, kɛ́dɛɔ́gɔ kɛ́gɛɛn a náan iyó.

⁵Táán nyɔ́ alɛɛ́ agoboyɛ́ʼkɛn Uŋun wə́ə́ŋ, aágɛɛlɛ mangán a kɛgaágadɛ kɛáŋan, alɛ agɛɛlɛ náan a wɔnɔ́ ná polɛɛ́ agɛɛ́ngɛg pɛcɛm oóm, a wɔnɔ́ ná poyóób Tɔsɔm tuə́ŋ Tólaŋ pomáyaág oʼto a tólɛ́ ə́?

⁶Táán ayɛ́ʼkɛn Ábɛlaam kilumiʼ lɛ́ ayáág oʼto na nyɔ́lɛ́.

⁷Lɛŋáan anɛ́ɛ́n tɛn lɛ́ pá páágɛ́nɛ́ɛ́ oʼto na Táán áa pálɛɛ́ pɔɔ́n pá Ábɛlaam.

⁸Kíyə́dílə́ə́ kɔ kalaʼ a Pagálaʼtaʼ pá Táán lɛ́, pɛnɔɔŋɛʼ pɛ́lɛ́ɛ́ kaag oʼto na Táán, áaboyɛ́ʼkɛn kilumiʼ a əngis yə́ə́ŋ. Táá Tɔsɔm Tólaŋ tó Táán yɛɛ́yáŋ alɔɛgɛnɛ Ábɛlaam kɔ́gɔ́ɔg kalaʼ aa tóonɛ ɔnɔ́: «Ndɛ́ɛ́ kɛɛlɛnɛ mɔnɔŋ miim má a nsí kɔŋɛʼ a kidíídí kɛáŋ[10]»

⁹Táán ayɛ́ɛ́lɛ́nɛ Ábɛlaam kɔŋɛʼ lɛ́ ayáág oʼto na nyɔ́lɛ́. Náan tɛn aa alɛ́ɛ́ kɛɛlɛnɛɛ́ ungim nyɔ́ amáág oʼto na nyɔ́lɛ́, kɔŋɛʼ.

¹⁰Kɛ́lɛ lɛ́, ungim nyɔ́ alɛɛ́ afɛga lɛ́ nyɔ́lɛ́ alɛ́ɛ́ kɔɔŋ kilumiʼ a udi ó Táán lɛ́ əə́nuŋ pɛcɛm, aaboan pulumisi lɛ́ náan aa kɛ́lɛɛ́ kidiídílə́ a Kálaʼtaʼ ɛ Táán lɛ́: Tuúdudúú na ungim nyɔ́ adɛágɛɛlɛɛ́ nkə kiim kɛ́ pɛcɛm piim pɛ́lɛɛ́ əgusəə, áyɛɛlɛ kɛ́lɛ́ pɛnɛŋ piim.

¹¹Tɛálɛŋ lɛ́ mɔɔd adɛndɛ́ɛ́ kɔɔŋ kilumiʼ a udi ó Táán lɛ́ əə́nuŋ pɛcɛm lɛ́ kɛ́lɛ tɛn náan kidiídílə́ moááŋ a Kálaʼtaʼ ɛ Táán lɛ́ nyɔ́ amáág oʼto na nyɔ́lɛ́ Táán áa alɛ́ɛ́ kɛɛnɛɛ́ na kilumiʼ a udi wə́ə́ŋ, áyɛɛn na ɔlaa ó pɛnɛŋ piim.

¹²Náa, kɛɛ́ngɛg kó pɛcɛm kódɛɔ́gɔ yoom ímuʼ na kaag kó oʼto na Táán. Kɛ́lɛ kidiídílə́ a Kálaʼtaʼ ɛ Táán lɛ́: «Nyɔ́ əə́nuŋ pɛcɛm piim, nyóon tɛn agɛɛn na ɔlaa a oʼto ó pɛcɛm[11]»

¹³Kilíʼtus yɛɛ́nyáŋɛn pulumisi puə́s pó pəsi pá tiígóodi nsɔ́ɔ́ a udi ó Táán lɛ́ tɛdɛʼkáagɛɛ́ngɛg pɛcɛm piim. Yɛɛ́nyáŋɛn nsɔ́ɔ́ yəəs, amɛ́ɛ́lɛ nkə kɛ́ kɛ́yɛ́ɛ əgəə́yúunə a kidíídí kiə́s, amáyaáyɛ́ʼkɛn nyɔ́lɛ́nyɔ́amɔɛ́d lɛ́ ná ábɛyááŋɛn a pulumisiʼ póob. Kɛ́lɛ əgín wɔnɔ́ ná kíyə́dílə́ə́ a Kálaʼtaʼ ɛ Táán lɛ́: «Tuúdudúú na ungim nyɔ́ alɛ́ɛ́ oʼtóŋáán a nɔɛd[12]»

¹⁴Yə́sus Kilíʼtus ayɛ́ɛ́lɛ náan lɛ́ ná a ngim yəəŋ, pɛnɔɔŋɛʼ tɛn pɛɔ́ŋɔnɔn a nkə kɛ́ Táán yɛɛ́gágɛn Ábɛlaam. Pəsi tɛyɔ́ɔ́ŋ tɛn Uŋun wó Ufúlúʼtú wó ólɛɛ́ kɔ a nkə kɛ́ɛg kɛ́ ayɛ́bɛgágɛn lɛ́ aabɛyɛ́ʼkɛn ná tɛmáág oʼto na nyɔ́lɛ́.

¹⁵Pomóŋŋí, ndəbuúsiədin nkaʼtɛ́n na nkə kɛ́ ándɛ kɛ́agaásan a ɔlaa wə́ə́s. Tɛlɛanɛ lɛ́, kɛnɛŋ kɛ́ nto ɛ pɔɔd ɛ́baan ɛmáyóóbánánɛ́ɛ́ a kɛbán, páágód unuʼ, wɛndɛ́ŋ ɔdɛɔ́gɔ ugiim, áalóʼkanɛ nkə kɛ́ pɔsɔ́g póob páágód, ndóo. Wɛndɛ́ŋ tɛn ɔdɛɔ́gɔ ugiim, áyaábɛg yoom na yoom yɛ́ndɛ́ŋ kɔ.

¹⁶Náan tɛn yoom ímuʼ na nkə kɛ́ Táán ayáágánan na Ábɛlaam, na a mɔɔ́n nyɔ́ əə́bíən. Kɛ́dɛɔ́gɔ kidiídílə́ kɔ a kálaʼtaʼ lɛ́: «Táán yɛɛ́gágɛn Ábɛlaam, na pɔɔ́n pə́ə́ŋ», káag wɔnɔ́ na pɔɔ́n pə́ə́ŋ piíŋ, ndóo. Kɛ́lɛ kidiídílə́ lɛ́ na mɔɔ́n, «mɔɔ́n úmmuʼ nyɔ́ əə́bíən[13]» Ogo anyóon alɛɛ́ Kilíʼtus.

¹⁷Nkə kɛ́ ndɛɛ́ anyɔ́ŋɛn kobodɛ́anɛ kɛ́lɛ lɛ́: Táán áa yɛɛ́yáŋ agod unuʼ na Ábɛlaam. Kɛcɛm kɛ́lɛ́ kíədíin kiim alon ɔ́ndɛd ɛ pɛag íniʼ, na pɛag niʼtin na pɛówád a ngim[14] Kɛ́dɛɔ́gɔ kɛ́ kuwíiyi nkə kɛ́ Táán yɛɛ́gágɛn Ábɛlaam lɛ́ nyɔ́lɛ́ aagɛɛlɛ.

¹⁸Kɛ́maʼkɛɛn lɛ́ nkə kɛ́ Táán aágagɛn mɔɔd, pɛcɛm aa pɛ́agɛɛlɛ lɛ́ yɔ́ɔŋ kɛ́lɛ́, ná kíndigi anyóon kə́mmú nkə kɛ́ amámogágɛn. Ndóo, Táán ayɛ́ɛ́lɛ́nɛ Ábɛlaam kɔŋɛʼ a oʼto wóonɛ lɛ́ ayɛ́mogágɛn.

¹⁹Kóog anɛ́ɛ́n óo, pɛcɛm píyə́də́nígə́níí a oʼto igə ə́? Pɛcɛm pɛ́yáyáábɛ́gɛ́ɛ́ a tɔgɛ́ɛ́ tó Táán lɛ́ ná túloodi masɛd má pɔɔd. Píyə́də́nígə́níí agɛɛn əgiig əgín a kɛnɛŋ kɛ́ mɔɔ́n ogo nyɔ́ a ndɛg yɛ Ábɛlaam alɛ́ɛ́ kəə́bíənií, nyɔ́lɛ́ nyɔ́ oʼkag ólɛɛ́ a oʼto wə́ə́ŋ. Pɛcɛm pɛ́ɛb, Táán ayɛ́ɛ́lɛ lɛ́ məŋun má maʼtom aa málɔɛgɛɛ́ pɛ́lɛ́. Mɔ́lɛ́ mɛ́ɛ́sán a ngim ɛ kɛgom agɛɛlɛ lɛ́ málɔɛgɛnɛ pɔɔd.

²⁰Pə́diə́də́nigi kɛgom ná mɔɔd alɛ úmmuʼ súg, ndóo. Kɛgom kɛ́lɛ a pɔɔd piíŋ. Áanɛ a oʼkag wó Táán ayɛ́ɛ́lɛ na Ábɛlaam, Táán ayɛ́ɛ kɔ nyɔ́lɛ́nyɔ́əsíŋ, kɛgom kɛ́dɛʼkɛ́ɛ kɔ.

²¹Kióloodi aa nyóon lɛ́ pɛcɛm pɛ́dɛɔ́gɔ ngə́ mmuʼ na oʼkag wó Táán aágagɛn pɔɔd ɔ? Ndóo, adɛ́njaŋ náan! Páyɛ́bɛyɛ́ʼkɛnɛn kɛcɛm kɛ́ kɛ́agɛɛ́ʼkɛn mɔɔd ɔlaa, ná mɔɔd alɛ ogɔɔŋ kilumiʼ a udi ó Táán lɛ́ əə́nuŋ kɛ́lɛ́.

²²Náa, Kálaʼtaʼ ɛ Táán ɛlɛ əgusəə lɛ́ mɔɔd ungim alɛ a kɛáŋ kɛ́ kɔbɛ́ lɛ́ ná nkə kɛ́ Táán yɛɛ́gág, pəə́liʼtiniʼ pɔ́ɔŋ kɛ́lɛ́ a oʼto wóonɛ lɛ́ pámáág oʼto na Yə́sus Kilíʼtus.

²³A kɛnɛŋ kɛ́ kalaʼ, ná ngə́ ɛ kaag oʼto na Táán ɛyɛ́ɛ ɛdɛ́njɛ́ɛ kɔ, kɛcɛm kíyíbiíguminin a kɛáŋ, agoboŋ lɛ́ ngə́ yɛ́ɛy ɛ kaag oʼto yóloodi.

²⁴Náan anɛ́ɛ́n, pɛcɛm aa pímə́biínúŋ əgiim əgiig wɔnɔ́ ná Kilíʼtus aándɛɛ́ kɔ lɛ́ ná a oʼto ó kəə́liʼtiniʼ, tíɛn na kilumiʼ a udi ó Táán.

²⁵Náa nɛ́gɔŋ yɛ́ɛnɛ ngə́ ɛ kaag oʼto na Kilíʼtus yaándɛ kɔ, tindigi kə́mmú a kɛáŋ kɛ́ pɛcɛm pɛ́ pɛ́yɛ́ɛ əgibiínuŋ

²⁶lɛ́ wɔnɔ́ ná poágɛ́nɛ́ɛ́ oʼto na Yə́sus Kilíʼtus, poándɛ pəŋi piim pɔɔ́n pá Táán.

²⁷Ɛɛ́ɛ, pəŋi piim pá puísiə́d ɔsɔgɛn a niiŋ nɛ́ Kilíʼtus, poándɛ wɔnɔ́ nyɔ́lɛ́nyɔ́amɔɛ́d.

²⁸Kíndigi kə́mmú lɛ́, mɔɔ́n ó Yúdɛn aa nyóonɛ, kɛnɔɔŋɛʼ aa kɛ́ɛg, kɛɔ́lɛ́ aa kɛ́ɛnɛ, mɔɔd o noádɛʼ aa nyóʼkáag. Kɛ́diɛn tɛn lɛ́ ɔnɔ́mɛɛd áa nyóonɛ, ɔʼkɛ́ɛd áa nyóon. Pəŋi piim poándɛ úmmuʼ a mándad na Yə́sus Kilíʼtus.

²⁹Kɛ́maʼkɛɛn lɛ́ polɛ agoob na Kilíʼtus, áay lɛ́ poándɛ anyóon palaa Ábɛlaam, poagɛɛn na ngab a nkə kɛ́ Táán ayɛ́mogágɛn[15]