Read Yambeta Kalasíi 4 Bible Online

Kalasíi 4 - Yambeta bible

Kalasíi 4

¹Táá nkə kɛ́ ndɛɛ́ anyɔ́ŋɛn kusəə aa kɛ́ɛnɛ lɛ́: Kɛnɛŋ kiim kɛ́ mɔɔ́n o kibúúm nyɔ́ ɔɔ́lɔb na kibúúm əligíí yoóndaa, oʼtɛ́lɛm wə́ə́ŋ ólɛ yoom ímuʼ na ó kɛɔ́lɛ́, ɔmbɔ́ ná kɛ́lɛɛ́ lɛ́ na nyɔ́lɛ́ aa muim móagoob.

²Kíəguunə lɛ́ yóóbɛn pɔɔd pá páamodɛ́ʼtɛg, pɔɔd pá páadáŋananɛ tugúm tuə́ŋ agɛɛn əgiig a pɛag pɛ́ sɛ yiísə́ə́[16]

³Yoom ímuʼ tɛn náan na pəsi. Ná tɛyɛ́ɛ tiligi poómbaa, tɛyɛ́ɛ pɛɔ́lɛ́ pɛ́ pá pálɛɛ́ na toɛn a nsí yɛ́ɛnɛ.

⁴Ná wɔɔ́s wó Táán yiídə́nígi úyíím əgiig, əyíím ádom Mɔɔ́n wəəŋ lɛ́ ɔʼkɛ́ɛd ə́mubíən. Pɛ́ɛ́yámɛ Mɔɔ́n nyóon a nɛ́ pɛcɛm pɛ́ Moyíis

⁵lɛ́ ná yááŋɛn pá páyɛ́ɛ pɛɔ́lɛ́ pɛ́ pɛcɛm pɛ́ɛb, áabɛyɛ́ɛlɛ lɛ́ tɛ́an pɔɔ́n pá Táán.

⁶Nkə kɛ́ kióloodi lɛ́ polɛ fɔ́lɔ́b pɔɔ́n pə́ə́ŋ kɛ́lɛ lɛ́, ayɛ́bɛdómɛn a ntɛ́m yəəs a kaadɛ, Uŋun ó Mɔɔ́n wəəŋ, Uŋun wó wáabɛyɛ́ɛlɛ lɛ́ tiə́sílə tɛɔʼkɔ́: «Mbáa əə́y! Sɛ waam oo!»

⁷Pundigi kə́mmú anyóon pɛɔ́lɛ́, poándɛ nɛ́gɔŋ yɛ́ɛnɛ pɔɔ́n pə́ə́ŋ. Wɔnɔ́ ná poándɛɛ́ lɛ́ polɛ pɔɔ́n pə́ə́ŋ, Táán alɛ́ɛ́ koboyɛ́ʼkɛn tugúm tó yiídə́nígi lɛ́ tólɛ tó pɔɔ́n pə́ə́ŋ.

⁸Ná poyɛ́ɛ podɛ́ndɛŋ Táán Kalaʼ, poyɛ́ɛ pɛɔ́lɛ́ pɛ́ padáán pá pádɛʼkɛ́lɛɛ́ fɔ́lɔ́b padáán[17]

⁹Náa nɛ́gɔŋ yɛ́ɛnɛ, wɔnɔ́ ná poáʼkolɛŋɛɛ́ Táán, ndóo, tísəə agá lɛ́ wɔnɔ́ ná nyɔ́lɛ́ aáʼkoboólɛŋɛɛ́ pəŋi, tuə́ áa polɛɛ́ pə́giiʼkini kaágasɛ agoóbɛn agá məŋun má mɔ́dɛɔ́gɔ na toɛn ə́? Məŋun má mə́diə́buúgudinií yoom na yoom ə́? Poanyɔ́ŋɛn lɛ́ púiʼkini kuúlini pɛɔ́lɛ́ pɛ́ məŋun móom a?

¹⁰Pugóódóni mɔɔ́s mə́mmú na məə́ tɛn mə́mmú má poányáadanɛ. Pugóódi tɛn pɛalɛn pɛ́ pigólí pímmú, na maag mə́mmú má poányáadanɛ tɛn!

¹¹Polɛ agɛnyɛɛlɛ lɛ́ ntammana ə́y! Pomɛ́nyɛɛlɛ lɛ́ ntammana kɛ́fɔlɛ́, nyɔʼkɔ́ pigólí pɛ́ njɛ́ɛ́lɛ a pəŋi piə́suu anyóon məní!

¹²Sɛ́gɔɔ aáan, pomóŋŋí! Áyónɛ́an wɔnɔ́ ná mɛ nyɛɛ́sáŋɛ́nɛ pɛcɛm agɛɛlɛ lɛ́ nyáyáánɛ wɔnɔ́ pəŋi pɛnɔɔŋɛʼ. Áyánɛ́an tɛn wɔnɔ́ mɛ. Puʼkóodi ɔsɛd wó pomɛ́nyɛɛlɛ́nɛ ɔmbɔ́ úmmuʼ.

¹³Poálɛŋ kɔŋɛʼ kɔŋɛʼ lɛ́, na oʼto na oʼto yaam ɛ kolɔɛgɛ Tɔsɔm Tólaŋ a pəŋi, kobany kó nyɛɛ́bány áa kóyɛ́nyɛɛ́ʼkɛn ngə́ lɛ́ mpoólɔɛgɛnɛ tólɛ́.

¹⁴Ɔmbɔ́ ná kobany kóog kóyɛ́ɛ́lɛ nkó yaam mənyəny na mənyəny, pudiʼkə́əgimmə́nyə, podɛʼkáagɛʼto. Puyísiə́d kɔŋɛʼ wɔnɔ́ ndɛ uŋun ó maʼtom ó Táán, ɔmbɔ́ lɛ́ ndɛ Yə́sus Kilíʼtus nyɔ́lɛ́nyɔ́amɔɛ́d.

¹⁵A kɛnɛŋ kɛ́go kɛ́ɛg, tɔnyɔ́g tóyɛ́ɛ na pəŋi a ntɛ́m síɛ́ɛ́d. Tuə́ áa kɛándɛɛ́ anɛ́ɛ́n nɛ́gɔŋ na pəŋi ə́? Náa, ndɛ ogobodɛ́lɛmɛn mbaasɔ́ lɛ́ a kɛnɛŋ kɛ́go kɛ́ɛg, ngə́ igoóliogi əngis yááŋan agɛnyɛɛ́ʼkɛn ɛyɛ́ɛnɛn kɔ, ná puyóliógóníí!

¹⁶Nɛ́gɔŋ anɛ́ɛ́n óoʼ, mbándɛ na pəŋi oʼtɔ́ɔ́dɔ́ aa nyóon a oʼto wóonɛ lɛ́ mbábodɛánɛ sáád yi?

¹⁷Pɔɔd póob pá páboyámádɛ́nɛ́ɛ́ nɛ́gɔŋ, póʼkóodi mafɛgaʼ málaŋ a ntɛ́m yɔɔbɔn. Nkə kɛ́ pálɛɛ́ əguunə kɛ́lɛ lɛ́ pəsi na pəŋi tɛ́saalɛg, ɔʼtɛ́m wááŋan ungim wɛ́ɛn agá na pɔ́lɛ́.

¹⁸A kó fɔ́lɔ́b, kɛ́lɛ kɔŋɛʼ lɛ́ mɔɔd yáámád na sɔ́g na mafɛgaʼ málaŋ a ɔʼtɛ́m. Yɛ́ɛn na mafɛgaʼ málaŋ náan pɛnɛŋ piim, adɛ́njaŋ əgín a kɛnɛŋ kɛ́ ndɛɛ́ kɔ a ondáŋ wááŋan.

¹⁹Pɔɔ́n, a oʼto wááŋan aa ndɛɛ́ agonɛ kə́mmú ntɔ́b yɛ́ɛnɛ náanɛ kɛ́fɔlɛ́ wɔnɔ́ ɔʼkɛ́ɛd nyɔ́ alɛɛ́ a ɔsánɛʼ. Ndagaánɛ náan súʼtə́ə́ agɛɛn əgiig əgín ná kɛ́lɛ́ɛ́ kolon moááŋ lɛ́ Kilíʼtus aándɛ na pəŋi.

²⁰A nɛ́am, ná nɛ́gɔŋ yɛ́ɛnɛ mbándɛ káag ná polɛɛ́, agɛɛlɛ lɛ́ mpoósɔyɔn kɔŋɛʼ kɔŋɛʼ. Ndɛ əgəə́wúunəni kɛ́fɔlɛ́ na pəŋi!

²¹Ɛ́ʼtɛánɛ́an áŋ, pəŋi pá poɔʼkɔ́ poagoóbɛn pɛcɛm pɛ́ Moyíis. Nkə kɛ́ pɛ́lɛ́ pɛmɔɛ́d pɛ́lɛɛ́ əgusəə, pomóób óm?

²²[18] Kɛ́lɛ kidiídílə́ a Kálaʼtaʼ ɛ Táán lɛ́ Ábɛlaam yiíbíən pɔɔ́n pábaan lɛ́: Úmmuʼ na kiombiʼ kiə́ŋ, Agáa. Nyummú tɛn na oʼkán o noádɛʼ.

²³Náa, kɛbán kímuʼ, sɔ́g nyɔ́ yiíbíən na kiombiʼ, əyímubíən a nɛnyɔ́ŋɛn nɛ́ pɔɔd. Kɔmɔɛ́d lɛ́ nyɔ́ yiíbíən na oʼkán wəəŋ ó noádɛʼ, əyímubíən a nɛ́ oʼkag wó Táán ayɛ́mogágɛn[19]

²⁴Yisí yimmú ɛlɛ kɔ a kɛbán kɛ́ɛg. Ɛgo aa yɛ́ɛnɛ lɛ́: Pagɛ́ɛd póob pábaan pálɛ mbod tɛn ɛ nɛálad ɛ́baan. Nɛálad nɛ́ na oʼto na oʼto nɛ́lɛ nɛálad nɛ́ Táán ayɛ́ɛ́lɛ na Moyíis a oʼkon a mɔɛn, oʼkon ó Sinayíi. Nɛ́lɛ nɛálad nɛ́ Agáa. Pɔɔ́n pá a nɛálad nɛ́ɛn pálɛ pɛɔ́lɛ́.

²⁵Agáa alɛ wɔnɔ́ oʼkon ó Sinayíi wó ólɛɛ́ a Ələbíi. Alɛ wɔnɔ́ Yolósalɛm ɛ nɛ́gɔŋ lɛ́ alɛ kɛɔ́lɛ́ na pɔɔ́n pə́ə́ŋ kɛ́.

²⁶Náa, Yolósalɛm yɛ́ a mɔɛn, yɛ́lɛ́ ɛdɛɔ́gɔ kɛɔ́lɛ́. Yɛ́lɛ́ ɛgo aa ɛlɛɛ́ ŋŋí wəəs.

²⁷Kɛ́lɛ kidiídílə́ lɛ́: «Nyɔ́ga, wɛ ɔʼkɛ́ɛd nyɔ́ wɛɛ́lɔ́b kisúsún, wɛ nyɔ́ udiʼkə́bíənií! Áágan pɛʼkɛ́ʼkɛ́ pɛ́ tɔnyɔ́g, wɛ nyɔ́ odɛʼkáalɛŋɛɛ́ kogany kó a ɔsánɛʼ lɛ́ pɔɔ́n pá ɔʼkɛ́ɛd nyɔ́ pɛ́ɛ́dó, pálɛ́ɛ́ kudəg agaáyɛn pá sɔ́g nyɔ́ onom ayɛ́ɛ anyɔ́ŋɛn[20]»

²⁸Pomóŋŋí, a pəŋi, polɛ wɔnɔ́ Ɛ́sag. Polɛ pɔɔ́n pá pə́mə́biə́níí a nɛ́ oʼkag ó Táán.

²⁹Náa, əgín tɛn wɔnɔ́ ná a kɛnɛŋ kɛ́go kɛ́ɛg, mɔɔ́n nyɔ́ əyə́biə́níí a nɛnyɔ́ŋɛn nɛ́ pɔɔd yɛɛ́nɔɛ́yɛ nyɔ́ əyə́biə́níí wɔnɔ́ ná Uŋun ó Táán wísə́ə́, náan tɛn aa kɛ́lɛɛ́ agaáyɛ́ɛlɛ nɛ́gɔŋ na pəŋi.

³⁰Ooʼó, Kálaʼtaʼ ɛ Táán ɛlɛ əgusəə anɛ́ɛ́n lɛ́ nkə ə́? Ɛlɛ əgusəə lɛ́: «Ŋɛ́ŋ kiombiʼ na mɔɔ́n kɛ́ lɛ́ mɔɔ́n o kiombiʼ oʼkóodi lɛ́ ə́siəd oʼkɔɔ ó sɛ. Ndóo, mɔɔ́n wo ɔʼkɛ́ɛd o noádɛʼ aa ogódíí lɛ́ ə́siəd wólɛ́[21]»

³¹Náan anɛ́ɛ́n, pomóŋŋí, tɛdɛɔ́gɔ pɔɔ́n pá ɔʼkɛ́ɛd nyɔ́ alɛɛ́ kɛɔ́lɛ́, tɛlɛ pɔɔ́n pá ɔʼkɛ́ɛd o noádɛʼ aá.