Read Yambeta Kalasíi 5 Bible Online

Kalasíi 5 - Yambeta bible

Kalasíi 5

¹Kilíʼtus ayɛ́bɛyááŋɛn lɛ́ ná tɛdɛnjɛ́ɛ́n kə́mmú pɛɔ́lɛ́ pɛ́ pɛcɛm pɛ́ Yúdɛn. Ə́bísíən anɛ́ɛ́n, pudiyə́líʼtíníí kə́mmú lɛ́ púiʼkini kɛɛn pɛɔ́lɛ́.

²Mɛ Póol, ndabodɛ́anɛ nyɔʼkɔ́: Pomaʼkaag oʼto a waany, áay lɛ́ Kilíʼtus ədiə́buúgudin anyóon yoom na yoom.

³Ndəgiiʼkini kubiʼti kə́mmú na pəŋi nyɔʼkɔ́: Nyɔ́ amáág oʼto a waany, nyóon ogóódi lɛ́ yɛ́ɛlɛ nkə kiim kɛ́ pɛcɛm pɛ́ Moyíis pɛ́lɛɛ́ əgusəə.

⁴Pəŋi pá puə́guunə kɛɛn na kilumiʼ a udi ó Táán a oʼto wóonɛ lɛ́ puə́nuŋ pɛcɛm, poásaalánan kɛlaa na Kilíʼtus, poáʼtaŋ kɔŋɛʼ kó Táán.

⁵A pəsi, tɛlɛ agomɛna pɛda na Táán lɛ́ alɛ́ɛ́ kɛbɛyɛ́ʼkɛn kilumiʼ lɛ́ tɛmáág oʼto na nyɔ́lɛ́. Nkə kɛ́ tɛlɛɛ́ agobóŋan aa kɛ́ɛg a toɛn tó Uŋun wó Ufúlúʼtú.

⁶Kɛ́lɛ lɛ́, nyɔ́ alɛɛ́ ondadáán na Yə́sus Kilíʼtus, yɛɛn onganyɛán óo, adiɛnɛn onganyɛán óo, kɛbán kɛ́dɛɔ́gɔ áay. Nkə kɛ́ kɛ́lɛɛ́ kɔ kímuʼ kɛ́lɛ lɛ́, yɛ́ɛn na kəə́liʼtiniʼ kó kólɛɛ́ əgugud a nnyɔ́ŋánán.

⁷Niə́bə́ə nɛáŋan niɛ́dɛ́ɛ́ ə́y! Náa, ánɛ aa əə́ʼkiim aboyásómɛ́ɛ́ a ngə́ agobosáŋɛnɛnɛ lɛ́ puóbɛn pasáád ə́?

⁸Nkə kɛ́ páyɛ́bodɛánɛ agɛɛlɛ lɛ́ póʼtiɛngɛlɛd, kɛ́dɛɔ́gɔ nkə kɛ́ kímíim a nó Táán, nyɔ́lɛ́ nyɔ́ ayɛ́boodɔ́ŋɔn.

⁹Pálɛ əgusəə lɛ́: Niiŋ nímuʼ nɛ́ɛ́lóʼkánɛ unuʼ ungim.[22]

¹⁰A mɛ, Sə́dúk amɛ́nyɛɛlɛ lɛ́ nyáág oʼto wáam na pəŋi ungim. Ntɛɔ́gɔ kɔ na isuŋ, mbálɛŋ lɛ́ podɛɔ́gɔ págɛɛn na mafɛgaʼ má málɛɛ́ ndɛ́ŋ na máam. Náa, nyɔ́ əmíim agaag yayayaʼ a kɛgaágadɛ kɛáŋan, yɛɛn ɔmbɔ́ ánɛ, Táán alɛ́ɛ́ komoyɛ́ʼkɛn njəʼkə́nə́ní.

¹¹A noá na mɛ, pomóŋŋí páam, pɔ́nɔ́ nyiíligi alɔɛgɛ lɛ́ pɔɔd páanyɛ ná pálɛ agɛnnɛ́ɛyɛ ntɔ́b kə́mmú ə́? Ndóo. Náan aa kɛ́yɛ́ɛnɛn ná kíndigi əguyə́bi mɔɔd kə́mmú lɛ́ pálɔɛgɛ lɛ́ pɛ́ɛ́báŋan Kilíʼtus a ɔmbásá.

¹²A págo póob pá pálɛɛ́ əgubuúnyunyugəni, pádɛndɔ́b əgín lɛ́ kaáyáanyɛ kólɛ́ na kólɛ́, páásom wólɛ́ agá kúfuʼ.

¹³Pomóŋŋí! A pəŋi, Táán ayɛ́boodɔ́ŋɔn lɛ́ ná pudiyíʼkíni kɛɛn kə́mmú pɛɔ́lɛ́. Náa, kɛbán kímuʼ, kóog wɔnɔ́ ná pundigií pɛɔ́lɛ́, kɛ́dɛnjɛ́ɛ́n agá lɛ́ púsəə poɔʼkɔ́ fɔ́lɔ́b áa poándɛɛ́ filí ə́, ná púbə́ə́ agá kuyə́ən nkə kɛ́ pumog poáŋan pólɛɛ́ anyɔ́ŋɛn, ndóo! Pɔ́nyɔ́ŋanan pəŋi na pəŋi, púgóomonon

¹⁴lɛ́, nidíŋ nɛ́ pɛcɛm piim aa nɛ́ɛnɛ nɛ́lɛɛ́ lɛ́: «Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d[23]»

¹⁵Náa, pəŋi pomaʼkɛɛn lɛ́ poadáaŋanan wɔnɔ́ nkud, poámɛnanan wɔnɔ́ nkə́, pólóʼkɔd o! Poaman kəə́wíiyi.

¹⁶Ndabodɛ́anɛ nyɔʼkɔ́: Tíən Uŋun wó Ufúlúʼtú ódáŋananɛ ɔlaa wááŋan. Pomaʼkɛɛlɛ náan, pudiə́yə́ən kə́mmú nkə kɛ́ pumog poányɔ́ŋɛn,

¹⁷lɛ́ nkə kɛ́ pumog pólɛɛ́ anyɔ́ŋɛn kɛ́lɛ ndɛ́ŋ na nkə kɛ́ Uŋun wáanyɔ́ŋɛn. Nkə tɛn kɛ́ Uŋun wáanyɔ́ŋɛn, kɛ́lɛ ndɛ́ŋ na nkə kɛ́ pumog poányɔ́ŋɛn. Pálɛ polɛ́ŋ polɛ́ŋ. A oʼto wóow aa kɛ́lɛɛ́ lɛ́, odɛɔ́gɔ ogɛɛlɛ nkə kɛ́ waányɔ́ŋɛn kɛɛlɛ[24]

¹⁸Náa, uməʼkəə́di lɛ́ Uŋun aa ódáŋananɛɛ́ ɔlaa wááŋ, odɛágɛɛn kə́mmú kɛɔ́lɛ́ kɛ́ pɛcɛm.

¹⁹Tɛálɛŋ kɔŋɛʼ kɔŋɛʼ pigólí pɛ́ pumog puə́s poányóŋɛnɛla kɛɛlanɛ. Táá, pɛ́go aa pɛ́ɛnɛ pɛ́lɛɛ́ lɛ́: Ɔlaa ó pɛɔg, pɛbán pɛ́ fúlúus, nɛbambɛɛ,

²⁰ambog, musiədə́siədə, pɔɔd páabɛmbɛnanan pɔ́lɛ́ na pɔ́lɛ́, páasáŋa, yaág yɛ́ əngis, mulúún na mulúún, sɔ́g ɔnɔ́ mbálaŋ sɔ́g, moásaala saala, unuʼ úmmuʼ fiɛ́d.

²¹Pánnyɔ́ŋɛn lɛ́ ná páádála sɔ́g na yoom, poloʼ koŋóaŋan máyɛboŋwáŋɛ, kɛnɛ́niɛ́n kɛ́ toɛn, na pɛbán tɛn pímmú piíŋ wɔnɔ́ pɛ́ɛb. Njɛ́boyáágánan mbaŋ kalaʼ, ndəgiiʼkini koboyááganan yɛ́lɛ́ kə́mmú nɛ́gɔŋ: Pá páagɛɛlanɛ pɛbán pɛ́ɛb náan, pádɛndɛ́ɛ́ kɛɛn na oʼkɔɔ a Nɛlaamɛʼ nɛ́ Táán.

²²Náa, pɛbán pɛ́ Uŋun wó Ufúlúʼtú wáabɛyɛ́ʼkɛn a ɔlaa wə́ə́s áa pɛ́ɛnɛ lɛ́: Nnyɔ́ŋánán, tɔnyɔ́g, uŋóón, konóʼtanan, ɔʼtɛ́m ólaŋ, kusiədənən kɔŋɛʼ, kaag oʼto na Táán.

²³Uŋun wáabɛyɛ́ɛlɛ lɛ́ tíɛn na ntɛ́m ngwiyə́ə́n, tiə́siəd a nɛmɔɔd. Mbod ɛ pɛbán wɔnɔ́ yɛ́ɛy náan, pɛcɛm pɛ́ Moyíis pɛ́dɛ́asáŋɛnɛ pɛ́lɛ́.

²⁴Pɔɔd pá pándagoóbɛ́ɛ́ na Kilíʼtus, [25] pɛ́ɛ́báŋan mbod ɛ pɛbán yɛ́ mbɛ́ ngim a ɔmbásá, mbod ɛ pɛbán yɛ́ pumog pólɛɛ́ agonyóŋɛnɛla.

²⁵Wɔnɔ́ ná kɛ́lɛɛ́ lɛ́ Uŋun wó Ufúlúʼtú aa ómábɛyɛ́ʼkɛn ɔlaa, tímudíən tɛn óbɛdáŋananɛ.

²⁶Tɛdɛmbágɛ́dánɛ pɛɔsɛd, tɛdɛmbɛ́lánánɛ pəsi na pəsi, tɛdɛnjɛ́ɛ́n tɛn na yaág yɛ́ əngis pəsi na pəsi.