Read Yambeta Kalasíi 6 Bible Online

Kalasíi 6 - Yambeta bible

Kalasíi 6

¹Pomóŋŋí, pámaʼkonanɛ sɔ́g nyummú aágɛɛlɛ nkə kɛ́ kɛ́lɛɛ́ kɛbɛ́, pəŋi pá poágoóbɛn Uŋun ó Táán áa pugódíí kiiʼkini kumudə́nigi a ngə́ ɛ sáád. Poándagɛɛlɛ kɛ́lɛ́, póɛlɛ na ɔʼtɛ́m a kaadɛ ungwiyə́ə́n. Pólóʼkɔd na pəŋibáamɔɛ́d agɛɛlɛ lɛ́ pudiʼtə́əŋ tɛn a kɔbɛ́.

²Púgóomonon konyáŋɛn pɛnó pəŋi na pəŋi. Pomaʼkɛɛlɛ náan, pomóóbɛn kɛcɛm kɛ́ Kilíʼtus.

³Mɔɔd amaʼkɛɛn na mafɛgaʼ lɛ́ amááyɛn pɔsɔ́g, kɔmɔɛ́d lɛ́ nyɔ́lɛ́ ɔmmɔɛ́d alɛ kifód, əmə́lígə́ə́ anyóon nyɔ́lɛ́nyɔ́amɔɛ́d.

⁴Ɛ́nɛ́ mɔɔd ogóódi kaásóngɛ a ɔlaa wó nyɔ́lɛ́nyɔ́amɔɛ́d alɛɛ́ alaa. Ɔmɔʼkɔɔŋ kɔ nkə kɛ́ alɛɛ́ ogaágany a kɛ́lɛ́, kíɛn a nyɔ́lɛ́nyɔ́amɔɛ́d, ədiyúúnə kaáfɛg na sɔ́g wɛndɛ́ŋ

⁵lɛ́, na mɔɔd na kiə́ŋ kɛnó.

⁶Nyɔ́ pálɛɛ́ agaaʼkananɛ Tɔsɔm tó Táán, ogóódi lɛ́ yɛ́ʼkɛn ngab ɛ kɔŋɛʼ kó ogódíí na mɔɔd nyɔ́ alɛɛ́ amoyáʼkananɛ tólɛ́.

⁷Pudinjə́lígə́ə́ pəŋibáamɔɛ́d: Mɔɔd ogosɛ́ga Táán ɔdɛɔ́gɔ. Kɛ́lɛ lɛ́, nkə kɛ́ wəə́gud, kɛ́lɛ́ tɛn aa wəə́bug[26]

⁸Nyɔ́ alɛ́ɛ́ kogónaá əgín nkə kɛ́ kɛ́lɛɛ́ kɛŋɛʼ a ɔlaa wə́ə́ŋ ó pumog, a nibug tɛn, alɛ́ɛ́ kɔɔŋ nkə kɛ́ pumog póagɛɛ́ʼkɛnan, áay lɛ́ kugu. Kɔmɔɛ́d lɛ́ nyɔ́ aágóna nkə kɛ́ kiə́gə́mmi Uŋun wó Ufúlúʼtú, a nibug, wáamoyɛ́ɛlɛ lɛ́ yɛ́ɛn na ɔlaa ó pɛnɛŋ piim.

⁹Tɛdɛʼtɔ́m kɛɛlɛ kɔŋɛʼ lɛ́, tɛmaʼkaágɔ́nɛgɛ, tɛlɛ́ɛ́ kɔɔ́ŋɔnɔn a nibug, ná kɛnɛŋ kɛ́go kɛ́lɛ́ɛ́ kiim əgiig.

¹⁰Náan aa kɛnɛŋ kɛ́ tiligíí na ngə́ ɛgɛɛlɛ kɔŋɛʼ, tíɛlɛnɛ ungim kɔŋɛʼ. Tíɛlɛ kólɛ́ kɔŋɛʼ kɔŋɛʼ na pomóŋŋí pə́ə́s pá a kəə́liʼtiniʼ.

¹¹Táláan pɛlɛŋ pɛ́ɛnɛ taa, pɛ́lɛ́ piʼtóg. Ombɔg wáam ó kudilə ó mɛɛ́nyɔ́amɔɛ́d áa wóow nɛ́gɔŋ aá.

¹²Pɔɔd pá pálɛɛ́ anyɔ́ŋɛn koboogóda ambaan lɛ́ póanyɛ, pálɛ pá pə́əguunə koóloodi a pɛbán pɛ́ a noá na pumog. Nkə kɛ́ɛg kɛ́ pálɛɛ́ agɛɛlɛ kɛ́lɛ lɛ́ na pádɛyɛ́boonɛ́ɛ́yɛ ntɔ́b lɛ́ pálɛ alɔɛgɛ kugu kó Kilíʼtus a ɔmbásá.

¹³Pɔɔd pamɔɛ́d póob pá páágɛ́nɛ́ɛ́ oʼto a waany, pɔ́dɛɔ́gɔ ənuŋ kɔmɔɛ́d pɛcɛm pɛ́ Moyíis pɛ́go. Pálɛ anyɔ́ŋɛn agá lɛ́ pəŋi póanyɛ ná páágany lɛ́ pámáboyɛ́ɛ́lɛ lɛ́ póanyɛ.

¹⁴Náa mɛ, ntɛɔ́gɔ na yoom yɛ́ndɛ́ŋ yɛ́ ndɛɛ́ ogaányáadɛ a yɛ́lɛ́ ná kɛ́sánɛn əgín lɛ́ ɔmbásá ó Sə́dúk wəəs Yə́sus Kilíʼtus. Kugu kuə́ŋ kó yiígú a ɔmbásá aa kómɛ́ɛ́lɛ lɛ́ ntɛ́ʼtɛg pɛbán pɛ́ a nsí wɔnɔ́ pɛbán pɛ́ píndigií a ɔlaa. A pɛ́lɛ́ tɛn, mɛ mbándɛ wɔnɔ́ kɛlóŋ.

¹⁵Kólɛ́ aa kɛ́lɛɛ́ lɛ́, mɔɔd yɛɛn onganyɛán óo, adiɛnɛn onganyɛán óo, kɛbán kɛ́dɛɔ́gɔ áay. Nkə kɛ́ kɛ́lɛɛ́ kɔ kímuʼ kɛ́lɛ lɛ́ Táán áa amábɛyɛ́ʼkɛn ɔlaa wó ongwa.

¹⁶Mbə́səə lɛ́ Táán áboyɛ́ʼkɛn uŋóón na pəŋi ndɛg yəəŋ ngim, na ungim nyɔ́ alɛɛ́ agodáŋana a ngə́ yəəŋ, áabodɛ́ɛ́lɛn ɔʼtɛ́m áaá!

¹⁷Əgəə́bə́ə nɛ́gɔŋ yɛ́ɛnɛ, mɔɔd ədiyíʼkíni kɛʼkányanɛ ɔʼtɛ́m lɛ́ pɛbɛɛʼ pɛ́ mbándɛɛ́ na pɛ́lɛ́ a nkó pióloodi lɛ́ mbándagoob na Yə́sus[27]

¹⁸Pomóŋŋí, Sə́dúk wəəs Yə́sus Kilíʼtus áboyɛ́ʼkɛn mawɔʼ á! Aamɛn.