Read Yambeta Ɛfɛ́ɛs 1 Bible Online

Ɛfɛ́ɛs 1 - Yambeta bible

Ɛfɛ́ɛs 1

¹Mɛ Póol nyɔ́ a nɛnyɔ́ŋɛn nɛ́ Táán, ndɛɛ́ mɔɔ́n o maʼtom o Yə́sus Kilíʼtus aa mbə́budílən nufuuʼ nóonɛ. Mbə́budílən pəŋi pá polɛɛ́ a Ɛfɛ́ɛs, pəŋi pá polɛɛ́ agoob na Táán, pá poágɛ́nɛ́ɛ́ oʼto na Yə́sus Kilíʼtus.

²Táán Sɛ wəəs pɔ́lɛ́ na Sə́dúk Yə́sus Kilíʼtus páboyɛ́ɛlɛ kɔŋɛʼ á! Páboyɛ́ʼkɛn tɛn kiwiiyiʼ á!

³Tɛ́nyádɛan Táán nyɔ́ alɛɛ́ Sɛ o Sə́dúk wəəs Yə́sus Kilíʼtus! Amɛ́ɛ́lɛ́nɛ uŋun wə́ə́s kɔŋɛʼ a mbod ngim. Kɔŋɛʼ kóog kúəbiyíimin a mɔɛn, a niiŋ nɛ́ Kilíʼtus.

⁴Əyíbiyííyid a oʼto ó Kilíʼtus əgín kɔ́gɔ́ɔg kalaʼ ná adɛ́njɛ́ɛlɛ nsí. Əyíbiyííyid lɛ́ ná tíɛn pɔɔd pá pálɛɛ́ Sálábádábádá, ɔsɛd fiɛ́d na pəsi. Wɔnɔ́ ná alɛɛ́ na nnyɔ́ŋánán na pəsi,

⁵əyíbiyííyid əgín kɔ kalaʼ lɛ́ tíɛn pɔɔ́n pə́ə́ŋ pá ombɛɛn. Ayɛ́bɛyɛ́ɛ́lɛ náan a ngim ɛ Yə́sus Kilíʼtus. Taa náan aa kíyímugə́mmi lɛ́ yɛ́ɛlɛ, a nɛnyɔ́ŋɛn niə́ŋ.

⁶Tɛ́nyádɛan anɛ́ɛ́n nugəm nó Táán a nɔŋáan nuə́ŋ nó a ɔʼtɛ́m ólaŋ na pəsi, a oʼto ó Mɔɔ́n wəəŋ wo ɔʼtɛ́m.

⁷A maŋɔ́ má Kilíʼtus aa Táán ayɛ́bɛyááŋɛn. Əgín tɛn a oʼto wə́ə́ŋ áa əyíbilísin mabɛ́ mə́ə́s[1] Ayɛ́ɛ́lɛ kɛ́ɛg kiim əgín a kɛlaŋanan kɛ́ ɔʼtɛ́m kɔdɛ́ɛ kuə́ŋ.

⁸Ɛɛ́ɛ, əyíbisúgínin kɔŋɛʼ, amáabɛyɛ́ɛlɛ lɛ́ tíɛn na nsiŋ, tɛ́ɛlɛŋ pɛbán.

⁹Amábɛyɛ́ɛ́lɛ lɛ́ tɛ́lɛŋ pɛbán pɛ́ pɛ́yɛ́ɛ pɛɔsɛ́gáán, pɛbán pɛ́, a nsiŋ yəəŋ, yiísə́ə́ lɛ́ agɛɛlɛ. A kɔdɛ́ɛ ɔʼtɛ́m kuə́ŋ, yɛɛ́fɛ́g lɛ́ agɛɛlɛ pɛ́lɛ́ a ngim ɛ Kilíʼtus.

¹⁰Nkə kɛ́go kɛ́ɛg, Táán alɛ́ɛ́ kɛɛn agoon oʼto əgín a nɛman nɛ́ nsí. Alɛ́ɛ́ kogonyɛd nkə kiim kɛ́ kɛ́lɛɛ́ a mɔɛn na a nsí, agɛɛlɛ lɛ́ Kilíʼtus aa yɛ́ɛnɛɛ́ nkúm ɛ moom móom muim.

¹¹Yiígúmin kɔ kalaʼ əgín wɔnɔ́ a nɛnyɔ́ŋɛn niə́ŋ nɛ́ nyɔ́lɛ́ Táán nyɔ́ alɛɛ́ agodáŋananɛ piim lɛ́, wɔnɔ́ ná tɛyáládɛ́ɛ́ na Kilíʼtus, tɛlɛ na yəəs ngab na nyɔ́lɛ́.

¹²Pəsi pá tɛlɛɛ́ pɔɔd pá na oʼto na oʼto págomɛna pɛda na Kilíʼtus, tɛ́nyádɛan anɛ́ɛ́n Táán lɛ́ alɛ kɛgóʼkóón!

¹³Pəŋi tɛn pá poyóób tɔgɛ́ɛ́ tó tólɛɛ́ fɔ́lɔ́b, tɔgɛ́ɛ́ tó tólɛɛ́ Tɔsɔm Tólaŋ tó Táán aáboyɔ́ɔyɛ a tólɛ́. Ná poyáág oʼto na Kilíʼtus, Táán ayɛ́boyáág kɛbɛɛ əguloodi lɛ́ poándagoob na nyɔ́lɛ́. Kɛbɛɛ kɛ́ɛg kɛ́lɛ Uŋun wó Ufúlúʼtú wó ayɛ́bɛgágɛn lɛ́ aabɛdómɛn.

¹⁴Uŋun wó Ufúlúʼtú ólɛ ngab ɛ na oʼto na oʼto a kɔŋɛʼ kó Táán yɛɛ́ngɛ́gɛ́nɛ́ɛ́ pɔɔd pə́ə́ŋ. Tɛlɛ́ɛ́ kɛɛn ɔɔgɔɔŋ mólɛ́ əgín ná tɛáʼkolon kúfuʼ kúfuʼ a kɛáŋ kɛ́ kɔbɛ́. Tɛ́nyádɛan anɛ́ɛ́n nɛgóón nɛ́ Táán.

¹⁵Kólɛ́ aa, əgín ná njóób lɛ́ poágɛn oʼto na Sə́dúk Yə́sus, mbáyoob tɛn wɔnɔ́ ná polɛɛ́ na nnyɔ́ŋánán na ungim nyɔ́ aágoob na Táán,

¹⁶ntɛɔ́dɔm kɛɛ́ʼkɛn pisoyidiʼ na Táán a kidíídí kɛáŋan kɛnɛŋ kiim kɛ́ ndɛɛ́ amoyɔ́sɔ́gɔlɔn.

¹⁷Ndɛ ɔgɔɔ́sɔ́gɔlɔn lɛ́: Táán ɛ Sə́dúk wəəs Yə́sus Kilíʼtus, Mbáa nyɔ́ alɛɛ́ na nugəm, áboyɛ́ʼkɛn nsiŋ yɛ́ yaágɛɛlɛ lɛ́ pómoyɔ́ɔŋ, póomoólɛŋ tɛn kɔŋɛʼ kɔŋɛʼ á!

¹⁸Ndɛ amoyɔ́sɔ́gɔlɔn tɛn lɛ́ ə́buən nto yaaŋan, pólɛŋ nkə kɛ́ ayɛ́boodɔ́ŋɔn a kɛ́lɛ́, nkə kɛ́ polɛɛ́ agomɛna pɛda na kɛ́lɛ́. Ndaanyɔ́ŋɛn tɛn lɛ́ pólɛŋ pisig na pɛgóʼkóón pɛ́ tugúm pɛ́ aboyɛ́ngɛ́gɛ́nɛ́ɛ́ lɛ́ na pəŋi na ungim nyɔ́ alɛɛ́ agoob na nyɔ́lɛ́.

¹⁹Ndaanyɔ́ŋɛn tɛn lɛ́, áboyɛ́ɛlɛ pólɛŋ toɛn tuə́ŋ tó tómááyɛn toɛn tuim. Toɛn tuə́ŋ tó tólɛɛ́ əgugud a kɛgaágadɛ kiə́s kɛ́ pəsi pá tɛágɛ́nɛ́ɛ́ oʼto na nyɔ́lɛ́. Toɛn tuə́ŋ tógo aa tóonɛ

²⁰yiílóódi a fɔ́lɔ́b ná ayóndɛ́gɛ Kilíʼtus a kəəniʼ, əmə́əmuúligigi a ombɔg wə́ə́ŋ ó nɛnom a mɔɛn[2]

²¹Kilíʼtus alɛ kɔ́gɔ́ɔg, yaábɛ́gɛn yiim ombɔg a oʼto. Alɛ alaamɛ lɛ́ na pá páalaamɛ a mɔɛn, na puʼkúm, na ungim nyɔ́ alɛɛ́ na toɛn, na palaamɛʼ kɛ́[3] Alɛ alaamɛ yiim yɛ́ ɛ́lɛɛ́ kɔ nɛ́gɔŋ, na mó mólɛ́ɛ́ kɛɛnɛɛ́ kɔ a mədúg má yuudi.

²²Ɛɛ́ɛ, Táán ayɛ́ʼkɛn Kilíʼtus toɛn lɛ́ álaamɛ yiim[4], əmə́əmudə́nigi lɛ́ nyɔ́lɛ́ aa yɛ́ɛnɛɛ́ a oʼto ó Nɛágɔnyɛd nɛ́ pəə́liʼtiniʼ.

²³Nɛágɔnyɛd nɛ́ pəə́liʼtiniʼ nɛ́ɛn aa nɛ́lɛɛ́ nkó ɛ Kilíʼtus. Alɛ kɔ a nɛ́lɛ́ nyɔ́lɛ́nyɔ́amɔɛ́d ungim, yoom ímuʼ tɛn wɔnɔ́ ná Táán álɛɛ́ a nyɔ́lɛ́.