Read Yambeta Ɛfɛ́ɛs 3 Bible Online

Ɛfɛ́ɛs 3 - Yambeta bible

Ɛfɛ́ɛs 3

¹Mɛ Póol nyɔ́ ndɛɛ́ a yoog yɛ njaan lɛ́ ndɛ agɛɛlɛ pigólí pɛ́ Yə́sus Kilíʼtus a oʼto wááŋan ó pəŋi pɛnɔɔŋɛʼ.

²Pəŋibáamɔɛ́d poáʼkoob oʼtom wó a kɔdɛ́ɛ ɔʼtɛ́m kuə́ŋ, Táán ayɛ́nyɛɛ́ʼkɛn lɛ́ nyɛ́ɛlɛ a kidíídí kɛáŋan.

³Ayɛ́nyaásɛ́nɛn pɛbán pɛ́ pɛ́yɛ́ɛ pɛɔsɛ́gáán, agɛɛlɛ lɛ́ ndɛŋ mafɛgaʼ má málɛɛ́ na nyɔ́lɛ́ a kaadɛ. Njə́bísígíí kubuúdilən kɛ́lɛ́ náan əgín kɔ kalaʼ.

⁴Ná poábana nkə kɛ́ mbə́dilid, poagoob nkə kɛ́ mɛ mbálɛŋ a nkə kɛ́ kɛ́lɛɛ́ kɛɔsɛ́gáán a noá na Kilíʼtus

⁵lɛ́ pɛ́lɛ pɛbán pɛ́ adɛʼkáagaásɛnɛnɛɛ́ pɔɔd pá kalaʼ, kólɛ́ áa nɛ́gɔŋ yɛ́ɛnɛ əə́ʼkiim ádómɛ́ɛ́ Uŋun wə́ə́ŋ lɛ́ wíim alɛŋ kɛbɛyásɛnɛn pɛ́lɛ́ moááŋ a unuʼ ó palɔɛgɛʼ pɛbán pə́ə́ŋ na pɔɔ́n pá maʼtom pá páagoob na nyɔ́lɛ́.

⁶Kɛbán kɛ́go kɛ́ kɛ́yɛ́ɛ kɛɔsɛ́gáán náa aáʼkoʼkwaŋɛɛ́ aa kɛ́ɛnɛ kɛ́lɛɛ́ lɛ́: «Pɔsɔ́g pá páyɛ́ɛ lɛ́ pálɛ pɛnɔɔŋɛʼ, pálɛŋ lɛ́ kɔŋɛʼ kuim kó Táán ayɛ́ɛ́lɛ lɛ́ kólɛ kó pɔɔ́n pá Yúdɛn, koándɛ tɛn koɔ́bɔn, pándɛ ndɛg ɛgo mmuʼ.» Kɛ́agɛɛn nɛ́gɔŋ lɛ́, yoom yiim yɛ́ Táán yɛɛ́gágɛn ndɛg yəəŋ, yándɛ tɛn yɔ́ɔ́bɔn a oʼto ó Yə́sus Kilíʼtus. Kɛ́ɛg kiim kɛándɛ náan lɛ́ wɔnɔ́ ná pəŋi tɛn pomáág oʼto a Tɔsɔm tuə́ŋ Tólaŋ tó pomóób.

⁷Táán, a kɔdɛ́ɛ ɔʼtɛ́m kuə́ŋ, ayɛ́nyáŋɛ́nɛ oʼtom wóow lɛ́ ndɔɛgɛ Tɔsɔm Tólaŋ a toɛn tuə́ŋ tó ayɛ́nyɛɛ́ʼkɛn.

⁸Mɛ ndɛ isúgəniʼ ɛ́ las a piim pá páagoob na Táán[6] Náa, a kɔdɛ́ɛ ɔʼtɛ́m kuə́ŋ, mɛ áa ayɛ́ʼtála lɛ́ ndɔɛgɛnɛ pɛnɔɔŋɛʼ Tɔsɔm Tólaŋ tó a tugúm tó Kilíʼtus tó tódɛndɛ́ɛ́ komanɛɛ́.

⁹Táán nyɔ́ ayɛ́ɛ́lɛ moom muim, ɔyɔ́ɔ́sɛg nkə kiim kɛ́ kɛ́yɛ́ɛ na nyɔ́lɛ́ a kaadɛ kɔ́gɔ́ɔg a niə́bə́ə. Náa, amɛ́nyɛɛ́ʼkɛn tɛn lɛ́ mmoáŋɛnɛ na pɔɔd wɔnɔ́ ná nyɔ́lɛ́ alɛ́ɛ́ kɛɛlɛɛ́[7],

¹⁰agɛɛlɛ lɛ́ pá páalaamɛ a mɔɛn, na puʼkúm poɔ́bɔn kɛ́ pádála na pɔɔ́n pá Táán, ná pálɛŋ tuə́ áa nsiŋ ɛ Táán ɛlɛɛ́ ndímə́ə́n.

¹¹Kɛ́lɛ aa ayɛ́ɛ əgusəəlilə lɛ́ aagɛɛlɛ, náa nɛ́gɔŋ yɛ́ɛnɛ aáʼkɛɛlɛɛ́ kɛ́lɛ́ a Yə́sus Kilíʼtus Sə́dúk wəəs.

¹²Wɔnɔ́ ná tɛlɛɛ́ paladáán na Kilíʼtus, tɛmáyaág oʼto na nyɔ́lɛ́, tɛándɛ págodɛ́lɛm a udi ó Táán fiɛ́d na wɛɛ́y.

¹³Kólɛ́ aa ndábodɛ́anɛ na pəŋi lɛ́, ntɔ́b yɛ́ ndɛɛ́ agonɛ a kidíídí kɛáŋan, ɛdɛɛ́boyɛ́ɛ́lɛ lɛ́ púsuuli ɔmbɔg. Ntɔ́b yɛ́ɛy ɛlɛ lɛ́ ná póɛn na nugəm.

¹⁴Kólɛ́ aa mbə́dúm əndu a nsí a udi wó Mbáa agomoyɔ́sɔ́gɔlɔn,

¹⁵nyɔ́lɛ́ nyɔ́ puog pó pɔɔd puim, na pó a mɔɛn, na pó a nsí, póagoob na nyɔ́lɛ́.

¹⁶Ndɛ amoyɔ́sɔ́gɔlɔn lɛ́, a kɛa kɛ́ nugəm nó ogódíí, yɛ́ɛlɛ pógon a ntɛ́m yaaŋan a toɛn tó Uŋun wə́ə́ŋ,

¹⁷áyɛɛlɛ lɛ́ Kilíʼtus yíim ələndin a ntɛ́m yaaŋan lɛ́ poágɛn oʼto na nyɔ́lɛ́. Ndɛ əgumuŋíən tɛn lɛ́ áboyɛ́ɛlɛ pɔ́nyɔ́ŋanan pəŋi na pəŋi. Pomaʼkɛɛn na nnyɔ́ŋánán pəŋi na pəŋi, poagon ngaŋ a nyɔ́lɛ́, póolɛŋ kəə́bis tɛn a ɔlaa wááŋan na nyɔ́lɛ́.

¹⁸Áay, na pəŋi na ndɛg ɛ Táán ngim puəgiim ɔɔgɔɔŋ toɛn tó koob wɔnɔ́ ná nnyɔ́ŋánán ɛ Kilíʼtus ɛlɛɛ́ mbubə́ə́n, wɔnɔ́ ná ɛmóom, wɔnɔ́ ná ɛlɛɛ́ lóóŋ a mɔɛn, na wɔnɔ́ ná ɛlɛɛ́ ndímə́ə́n.

¹⁹Ɛɛ́ɛ, puəgiim alɛŋ nnyɔ́ŋánán ɛ Kilíʼtus yɛ́ ɛmááyɛn nkə kiim kɛ́ mɔɔd aálɛŋ. Náan yiim yɛ́ ɛ́lɛɛ́ ɛ́ Táán, yáagɛɛn tɛn yááŋan.

²⁰Pəə́liʼtiniʼ pɛ́ʼkɛnan pɛnɛŋ piim nugəm na Táán nyɔ́ a toɛn tuə́ŋ tó tólɛɛ́ na pəsi, alɛɛ́ ogɛɛlɛ agosan nkə kiim kɛ́ tiə́muŋíən, ɔmbɔ́ lɛ́ kɛ́ tɛáfɛga á! Nugəm nóɛn na nyɔ́lɛ́ a pəliə́g a niiŋ nɛ́ Yə́sus Kilíʼtus aá. Aamɛn!