Read Yambeta Ɛfɛ́ɛs 6 Bible Online

Ɛfɛ́ɛs 6 - Yambeta bible

Ɛfɛ́ɛs 6

¹Pəŋi pɔɔ́n, pugóódi lɛ́ puóbɛn pasɛ pááŋan na pa ŋŋí pááŋan. Táá nkə kɛ́ kɛ́lɛɛ́ sáád áa kɛ́ɛg a nɛnyɔ́ŋɛn nɛ́ Sə́dúk.

²Kɛcɛm kɛ́ na oʼto na oʼto kɛ́ Táán ayɛ́bɛyɛ́ʼkɛn, amáyaábɛg polomɛ́ɛs a mɔɛn áa kɛ́ɛnɛ kɛ́lɛɛ́ lɛ́: «Nyáádɛ sɛ waaŋ na ŋŋí waaŋ,

³wagɛɛn na ɔlaa ólaŋ, óosom tɛn mədúg miíŋ a nsí yɛ́ɛnɛ[21]»

⁴Pəŋi pasɛ a pɔɔ́n, podɛnnyɛ́ɛ́lɛ lɛ́ pɔɔ́n pááŋan pə́də́əmini oʼto. Póboyámɛ agá, púubulə́bən wɔnɔ́ ná Sə́dúk alɛɛ́ anyɔ́ŋɛn.

⁵Pəŋi pɛɔ́lɛ́, pugóódi lɛ́ puóbɛn pəsə́dúg pááŋan pá pálɛɛ́ a nsí yɛ́ɛnɛ, puə́suuli nkó na pɔ́lɛ́, póbonyáadɛ ntɛ́m yaaŋan mmoáŋáán wɔnɔ́ ná polɛɛ́ agoóbɛn Kilíʼtus.

⁶Podɛnnyɛ́ɛ́lánɛ náan əgín ná pálɛ agobodɛ́ʼtɛg, káag wɔnɔ́ polɛ əguunə agá lɛ́ pányɔ́ga na pəŋi, ndóo. Wɔnɔ́ munə́mbí mó Kilíʼtus, poágɔ́nɛgɛ agá kɛɛlɛ nɛnyɔ́ŋɛn nɛ́ Táán na ɔʼtɛ́m wááŋan ungim.

⁷Púbuúgudin ntɛ́m mmoáŋáán, adɛ́njaŋ káag wɔnɔ́ pálɛ agoboogóda ambaan. Púbuúgudin wɔnɔ́ pɔɔd pá pálɛɛ́ əgugudin Sə́dúk, adɛ́njaŋ pɔsɔ́g pɔɔd.

⁸Lɛŋáan poɔʼkɔ́, áyɛɛn ɔmbɔ́ lɛ́ kɛɔ́lɛ́, ɔmbɔ́ lɛ́ mɔɔd nyɔ́ alɛɛ́ a oʼto wə́ə́ŋ, nyɔ́ aágɛɛlɛ kɔŋɛʼ, Sə́dúk aamosáábɔn əgín wɔnɔ́ a kɔŋɛʼ kuə́ŋ kó amɛ́ɛ́lɛ.

⁹Pəŋi pá polɛɛ́ pəsə́dúg pá pɛɔ́lɛ́ pɛ́ɛb, lɛŋáan kubuúgumin, podɛɛ́bonɔ́mɛ́dánɛ əngis. Poálɛŋ lɛ́ pəŋi piim na pɔ́lɛ́ kɛ́ pugóódi Sə́dúk úmmuʼ nyɔ́ alɛɛ́ a mɔɛn. A udi wə́ə́ŋ, ungim alɛ yoom ímuʼ[22]

¹⁰Əguyibəni tɔgɛ́ɛ́ tóam, ndabodɛ́anɛ lɛ́, toɛn túbuyíimin a nɛálad nɛ́ poáládɛ́nɛ́ɛ́ na Sə́dúk, a toɛn tuə́ŋ tó tólɛɛ́ na toɛn tuim.

¹¹Siə́dəən muduə́m muim mó Táán aboyɛ́ʼkɛ́nɛ́nɛ́ɛ́, agɛɛlɛ lɛ́ pónyɔŋ Omɔlɛɔ́g ná əə́guunə kubulígə

¹²lɛ́, adɛ́njaŋ na pɔɔd aa tɛlɛɛ́ a kiʼtuuliʼ, ndóo. Na məŋun má mabɛ́ má málɛɛ́ a mɔɛn, na pá pálɛɛ́ na toɛn, na pá pálɛɛ́ alaamɛ na pá toɛn tó mbin tó a nsí yɛ́ɛnɛ tólɛɛ́ na pɔ́lɛ́ aa tɛlɛɛ́ a kɛ́lɛ́.

¹³Kólɛ́ aa, kumínəən nɛ́gɔŋ muduə́m muim mó Táán aboyɛ́ʼkɛ́nɛ́nɛ́ɛ́. Áay, ná wɔɔ́s wó ɔmbɛ́ ogo ólɛ́ɛ́ kiimií, póɛn na toɛn a udi ó mɔɔd nyɔ́ poádɛ́lɛm a pɛdá na nyɔ́lɛ́. Pomaʼkɔnɔɛyɛ, púyiig a nisug, puəgəə́yíis a oʼtɛ́lɛm wááŋan.

¹⁴Lɛŋáan anɛ́ɛ́n kodɛ́lɛm, poágaáboŋ. Ə́súŋíən pafɔ́lɔ́b wɔnɔ́ kandá a nɛdáá. Puə́nííg pasáád wɔnɔ́ ná polɛɛ́ əgəə́níig kiob kɛ́ pɛdá.

¹⁵Poáboŋɛn agɛɛn alɔɛgɛ Tɔsɔm Tólaŋ tó tóagɛɛ́ʼkɛn uŋóón. Tóɛn a ambaan yááŋan wɔnɔ́ palábá.

¹⁶Puə́gumənən pɛnɛŋ piim a kəə́liʼtiniʼ wɔnɔ́ ná ándɛ puə́gumin kiob kɛ́ kɛ́abaga tungə́niʼ. Kɛ́agɛɛlɛ lɛ́ púwíiyəni tungə́niʼ tó tonámáán tó ɔmbɛ́.

¹⁷Táán amáboyɔ́ɔ́yɛ. Siə́dəən kɔɔy kóog wɔnɔ́ pumə́nígíí ɛdam ɛ́ pɛdá. Tɔgɛ́ɛ́ tuə́ŋ tóɛn na pəŋi wɔnɔ́ ɛyafág ɛ́ pɛdá yɛ́ Uŋun wó Ufúlúʼtú ómáboyɛ́ʼkɛn[23]

¹⁸Ɔɔŋɔ́nɔɔn moom móom muim na Táán a pɛɔ́sɔ́gɔ́lɔ́n. Pómoyɔ́sɔ́gɔlɔn pɛnɛŋ piim. Uŋun wó Ufúlúʼtú óbodáŋananɛ a pɛɔ́sɔ́gɔ́lɔ́n. Mafɛgaʼ mááŋan mɛ́ɛn pɛnɛŋ piim na pá páagoob na Táán, poɔ́sɔ́gɔlɔn a kidíídí kɛɔ́bɔn kɛ́ pɔ́lɛ́ piim.

¹⁹Poɔ́sɔ́gɔlɔn tɛn a kidíídí kɛ́am lɛ́ Táán yɛ́nyaag tɔgɛ́ɛ́ tó sáád a unuʼ kɛnɛŋ kɛ́ mbɔ́ndɔsɔyɔɔ́. Ndaamɛnɛ pɔɔd nkə kɛ́ kɛ́lɛɛ́ kɛɔsɛ́gáán a Tɔsɔm Tólaŋ na pɛsány piim.

²⁰Mɛ, ndɛ mɔɔd nyɔ́ páyɛ́ʼtóm lɛ́ nyíim alɔɛgɛ Tɔsɔm Tólaŋ tóod, ɔmbɔ́ ná ndɛɛ́ nɛ́gɔŋ a yoog yɛ njaan. Poɔ́sɔ́gɔlɔn anɛ́ɛ́n Táán lɛ́ ndɔɛgɛ tólɛ́ na pɛsány piim, wɔnɔ́ ná nyiígóodi lɛ́ nyɛ́ɛlɛ.

²¹Móŋŋí wəəs wo ɔʼtɛ́m Tisíig nyɔ́ tɛlɛɛ́ agɛɛlɛ pigólí pɛ́ Sə́dúk pɛ́go pímuʼ ondáŋ, nyɔ́lɛ́ nyɔ́ yaáyɛ́ʼkɛ́nɛ́nɛ́ɛ́ tɛn a pɛ́lɛ́, aabodɛ́anɛ nkə kiim wɔnɔ́ ná ndɛɛ́, agɛɛlɛ lɛ́ pólɛŋ nkə kɛ́ ndɛɛ́ agɛɛlɛ.

²²Nyɔ́lɛ́ aa mbányɔ́ŋɛn lɛ́ nyíim mpodómɛn lɛ́ ná yíim abodɛ́anɛ wɔnɔ́ ná tɛlɛɛ́, áabogónɛ nkó.

²³Táán sɛ, pɔ́lɛ́ ná Sə́dúk Yə́sus Kilíʼtus páboyɛ́ʼkɛn pəŋi pomóŋŋí pə́ə́s piim kiwiiyiʼ aá! Pɛ́ɛlɛ lɛ́ pɔ́nyɔ́ŋanan, póyɛɛn yuudi na kəə́liʼtiniʼ aá!

²⁴Táán yɛ́ɛlɛnɛ kɔŋɛʼ na ungim nyɔ́ alɛɛ́ na nnyɔ́ŋánán a pəliə́g na Sə́dúk wəəs Yə́sus Kilíʼtus.