Read Yambeta Filíib 2 Bible Online

Filíib 2 - Yambeta bible

Filíib 2

¹Mbálɛŋ lɛ́ polɛ agonom ɔʼtɛ́m lɛ́ polɛ paladáán na Kilíʼtus. Nnyɔ́ŋánán yəəŋ yɛ́ alɛɛ́ na yɛ́lɛ́ na pəŋi aa ɛlɛɛ́ agoboónasɛ nkó. Polɛ paladáán na Uŋun wó Ufúlúʼtú, náan aa polɛɛ́ na nnyɔ́ŋánán a kɛgaágadɛ kɛáŋan, puə́siədənən tɛn mbilígɔɔ́ʼkɔn pəŋi na pəŋi.

²Ndɛ anyɔ́ŋɛn anɛ́ɛ́n lɛ́ póɛnyɛɛlɛ mɛ nyɛ́ɛn na tɔnyɔ́g a kúfuʼ. Póɛnyɛɛ́ʼkɛn tɔnyɔ́g a nnyɔ́ŋánán yɛ́ poágɛɛn na yɛ́lɛ́ pəŋi na pəŋi, na a unuʼ úmmuʼ wó poágɛɛn na wólɛ́ pəŋi na pəŋi, na a mafɛgaʼ mə́muʼ má poágɛɛn tɛn na mɔ́lɛ́.

³Podɛmbámbááŋánɛ pəŋi na pəŋi, pudiyə́sə́sə́líí, ə́súlíən agá nkó a nsí. Mɔɔd na mɔɔd adɛyáyáágɛ́ɛ́ a oʼto lɛ́ nyɔ́lɛ́ amááyɛn pɔsɔ́g, ndóo.

⁴Mɔɔd na mɔɔd ədinjúúnə kɛɛlɛ əgín nkə kɛ́ kɛ́lɛɛ́ a kɔŋɛʼ kuə́ŋ kó nyɔ́lɛ́nyɔ́əsíŋ, ndóo. Álɛŋ tɛn lɛ́ pɔsɔ́g pálɛ kɔ.

⁵Ə́siə́díən a kɛgaágadɛ kɛáŋan wɔnɔ́ pɔɔd pá pándɛɛ́ paladáán na Yə́sus Kilíʼtus:

⁶Nyɔ́lɛ́ ədiʼkə́əbis lɛ́ pə́muúsiəd əgín yoom ímuʼ na Táán, kɔmɔɛ́d lɛ́ na nyɔ́lɛ́ na Táán páyɛ́ɛ a oʼtɛ́lɛm əgín ogo úmmuʼ.

⁷Əyíín nyɔ́lɛ́nyɔ́amɔɛ́d oʼtɛ́lɛm wóow, amáyaásoŋ agá wó inə́mbí[6] wɔnɔ́ ná ayáyáánɛ́ɛ́ mɔɔd. Tɛlɛ agodála náan a niə́siəd niə́ŋ nɛ́ əyə́siə́díí fɔ́lɔ́b wɔnɔ́ pəsi pɔɔd.

⁸Əyə́súlíí nyɔ́lɛ́nyɔ́amɔɛ́d nkó a nsí, amóóbɛn Táán súʼtə́ə́ aábod əə́gú. Kugu kɔmɔɛ́d kógo, kugu kó a ɔmbásá.

⁹Kólɛ́ aa Táán ayɛ́mobágɛ a oʼkɔɔ wó ómááyɛn mɔʼkɔɔ miim, amáamoyɛ́ʼkɛn tɛn niiŋ nɛ́ níəgə́mən agaáyɛn əngiŋ əngim

¹⁰agɛɛlɛ lɛ́ ungim nyɔ́ a nsí yɛ́ɛnɛ na pá pálɛɛ́ a mɔɛn, na pɔsɔ́g pá a piíd kɛ́, ungim nyóon yíim əmudúmin əndu agomonyáadɛ.

¹¹Ungim áyɛɛ́ʼkɛn tɛn nugəm na Táán Sɛ, əə́səə nyɔ́lɛ́nyɔ́amɔɛ́d na unuʼ wə́ə́ŋ lɛ́ Yə́sus Kilíʼtus aa alɛɛ́ Sə́dúk[7]

¹²Áay anɛ́ɛ́n, pəŋi pɔsɔ́sɔ́g páam pá ɔʼtɛ́m, pəŋi pá poyóbɛn Táán ná njɛ́ɛ na pəŋi, pómoyóbɛn anɛ́ɛ́n nɛ́gɔŋ kə́mmú agaáyɛn náan, ɔmbɔ́ wɔnɔ́ ná ntiligií na pəŋi. Ndabodɛ́anɛ lɛ́, ɛɛ́ɛ! Táán ayɛ́boyɔ́ɔ́yɛ, kíəguunə anɛ́ɛ́n lɛ́ pəŋi tɛn poágɔ́nɛgɛ pigólí, póɛlɛ pɛ́lɛ́ na kodammana Táán

¹³lɛ́ nyɔ́lɛ́ alɛ əgugud a ntɛ́m yaaŋan, agɛɛlɛ lɛ́ púunə kɛɛlɛ nkə kɛ́ kíəmugə́mmi, póyɔɔŋ toɛn tó kɛɛlɛ kɛ́lɛ́.

¹⁴Yoom yiim yɛ́ poágɛɛlɛ, póɛlɛ yɛ́lɛ́, podɛɔ́gɔ́dɔ́ɔ́, podiɛn na nkasɛ́,

¹⁵ná pádɛɛ́boóbɛ́n, póɛn ɛgom fiɛ́d, ɔsɛd fiɛ́d. Póyɛɛn tɛn pɔɔ́n pá Táán a kɛgaágadɛ kɛ́ pɔɔd pá pɛfaa, pɛɛlanɛ mabɛ́ pá a ɔsɛg wóonɛ ó nɛ́gɔŋ[8] Pugóódi kɛɛn wɔnɔ́ tomony tó tóanom a kɛgaágadɛ kɛɔ́bɔn a nsí yɛ́ɛnɛ,

¹⁶poáboólɔɛgɛnɛ tɔsɔm tó tóaboyɛ́ʼkɛn ɔlaa. Pomaʼkɛɛlɛ náan, mɛ, ndɛ́ɛ́ kəə́gidən a igog a udi ó Kilíʼtus a kidíídí kɛáŋan, a wɔɔ́s wó alɛ́ɛ́ kimbuúlinií, lɛ́ kɛ́lɛ́ɛ́ kuloodi lɛ́ ntɛʼkáagaáyóóna na pigólí a náan iyó.

¹⁷Nɛag nɛ́ poágɛ́nɛ́ɛ́ oʼto na Yə́sus Kilíʼtus nɛ́lɛ wɔnɔ́ kɛfɔny kɛ́ pugódíí kɛɛ́ʼkɛn na Táán[9] Náan aa, kɛ́maʼkɛɛn lɛ́ nku agɛɛlɛ lɛ́ nyáábɛg yoom a kɛfɔny kɛáŋan kɛ́ɛg, ndaanyɔ́ga kugu, ndɛ nyiʼkini kɔnyɔ́ga kə́mmú ondáŋ na pəŋi piim.

¹⁸Pəŋi tɛn náan yoom ímuʼ, póɛn na tɔnyɔ́g, pɔ́nyɔ́ga ondáŋ na mɛ.

¹⁹Ndɛ agomɛna pɛda lɛ́ ndəəgiim ntom Timoʼtə́ə káag a mədúg má mə́ndəgimií, ná Sə́dúk Yə́sus əmə́líʼtíníí. Ndəəgiim mmoodom lɛ́ ná nyóób tɔsɔm tó túəgiim a pəŋi, ɔʼtɛ́m wáam úwiiyi a kaadɛ.

²⁰Ntɛɔ́gɔ na mɔɔd wɛndɛ́ŋ áanɛ nyɔ́ yaágɛ́nɛ́ɛ́ ɔʼtɛ́m na pəŋi wɔnɔ́ nyɔ́lɛ́.

²¹Pɔsɔ́g póʼkáanɛ pɛ́ndɛ́ŋ pálɛ əgín na ɔʼtɛ́m a pɛbán pɛɔ́bɔn pɛ́ pɔ́lɛ́báamɔɛ́d. Póʼkóodi kɛnɛŋ ɔmbɔ́ sɔɔŋ na nkə kɛ́ kɛ́adɛ́ʼtɛg pɛbán pɛ́ Yə́sus Kilíʼtus.

²²Náa, a Timoʼtə́ə, pomámoólɛ́ŋ nyɔ́lɛ́ kɔŋɛʼ kɔŋɛʼ. Yiílóódi niə́siəd niə́ŋ nɛ́laŋ na pɔɔd. Yiígúd na mɛ agolɔɛgɛ Tɔsɔm Tólaŋ əgín wɔnɔ́ ná mɔɔ́n ándɛ əə́gud na sɛ.

²³Kólɛ́ aa ndɛɛ́ agomɛna pɛda lɛ́ pámaʼkosom mɛ kɛbán, ndəəgiim mmoodom káag ná polɛɛ́.

²⁴Ntɛɔ́gɔ kɔ na isuŋ na Sə́dúk lɛ́ adɛɔ́lɔb ədiə́líʼtíníí lɛ́ mɛɛ́nyɔ́amɔɛ́d tɛn nyíim aboodála əgín a mədúg móonɛ.

²⁵Kɛbán kímuʼ, nyɛɛ́dála kɔŋɛʼ lɛ́ móŋŋí wəəs Ɛʼpafolodíid[10] yímbuúli, nyɔ́lɛ́ nyɔ́ puyíím pódom lɛ́ yíim agɛnyɛɛ́ʼkɛn nkə kɛ́ poyɛ́nyɛɛ́bɛ na kɛ́lɛ́ a moom mó móyɛ́ɛ agɛsógɛn áanɛ. Tiígúd ondáŋ na nyɔ́lɛ́, tɛ́máyaábáam wɔnɔ́ pasɔ́njaa.

²⁶Alɛ na njaan kɛ́fɔlɛ́ lɛ́ ná amáboodála pəŋi piim. Alɛ agolaŋ kaáságɛma wɔnɔ́ ná aálɛŋ lɛ́ poyóób lɛ́ nyɔ́lɛ́ yɛɛ́bány.

²⁷Ɛɛ́ɛ, yɛɛ́bány náan wɔnɔ́ yoom ɛ́ fɔ́lɔ́b. Yɛɛ́lɔ́b ɛgɛ́sɛd sɔɔŋ lɛ́ ə́gu. Náa, Táán áa ayɛ́bɛɛdá maan pəsi ná nyɔ́lɛ́, wɔnɔ́ ná ədiʼkə́gúú. Táán ədiʼkə́əgəə́liʼtini náan agɛɛlɛ lɛ́ adɛyɛ́sáʼtɛ́nɛn ɔʼtɛ́m kogany wúmmú a wóonɛ wó ndɛɛ́ na wólɛ́ kalaʼ.

²⁸Taa, kɛ́lɛ́ aa kɛ́mɛ́ɛ́lɛ náan lɛ́ nyə́bisig kiim mmuyúlisi káag. Mbálɛŋ lɛ́ ná poámoodála, poanyɔ́ga kɛ́fɔlɛ́, mɛ tɛn ndɛ nyɛɛn ɔʼtɛ́m yəə́b a kaadɛ.

²⁹Pólɛŋ anɛ́ɛ́n kumuúsiəd na tɔnyɔ́g wɔnɔ́ ná kíəgəə́yúunə, lɛ́ alɛ móŋŋí waaŋan a noá na Sə́dúk. Mbod ɛ pɔɔd wɔnɔ́ yɛ́ɛy, kɛ́lɛ kɔŋɛʼ lɛ́ póboyɛ́ʼkɛn nnyáádɛ́

³⁰lɛ́, əyəʼkəʼkú a pigólí pɛ́ Kilíʼtus kɛɛlɛ. Wɔnɔ́ ná pəŋi podɛʼkɛ́lɛɛ́ na ngə́ igiim agɛnyɛɛ́ʼkɛn nkə kɛ́ɛg kɛ́ poyɛ́nyɛɛ́bɛ na kɛ́lɛ́, nyɔ́lɛ́ yɛɛ́dála kugu na əngis, agɛɛlɛ lɛ́ yíim agɛnyɛɛ́ʼkɛn kɛ́lɛ́ a niiŋ nɛáŋan.