Read Yambeta Filíib 3 Bible Online

Filíib 3 - Yambeta bible

Filíib 3

¹Əguyibənən tɔgɛ́ɛ́ tóam nɛ́gɔŋ, ndabodɛ́anɛ na pəŋi pomóŋŋí páam lɛ́ pɔ́nyɔ́ga a oʼto wóonɛ lɛ́ polɛ paladáán na Sə́dúk. Ntɛndɛ́ɛ́ kodɔm kobodɛ́ananɛ kə́mmú nkə kɛ́ mbáʼkoyaŋ kobodɛ́anɛɛ́ kalaʼ. Kɛ́lɛ tɛn náan agoboogónɛ.

²Pólóʼkɔd na pəgudin pá pabɛ́, pobo póob[11], páanyáadanɛ waany!

³Pəsi aa tɛlɛɛ́ na waany ɔmmɔɛ́d ó fɔ́lɔ́b, lɛ́ pəsi aa tɛlɛɛ́ ɔgɔɔ́sɔ́gɔlɔn Táán a toɛn tó Uŋun wə́ə́ŋ. Pəsi aa tɛlɛɛ́ əgəə́gidən a oʼto wóonɛ lɛ́ tɛlɛ paladáán na Yə́sus Kilíʼtus. Pəsi tidiə́díin nkó a pɛbán pɛ́ pɔɔd pá a nsí.

⁴Kɔmɔɛ́d lɛ́ mɛ, njɛ́ɛ ugəə́di nkó a pɛbán pɛ́ɛb. Mɛ áa njɛ́ɛ ugusəə lɛ́ ndəgəə́di nkó a pɛbán pɛ́ɛb agaáyɛn mɔɔd ungim.

⁵Mɛ, ndɛ kibíəniʼ kɛ́ Ɛ́sɛlayɛl, a kibúúm kɛ́ Pɛnsɛamɛ́ɛŋ, saŋɛ́d saŋɛ́d ɛ mɔɔ́n wo Əbələ́ə. Ná pə́yímbíən, páyɛ́njaanyɛ a mədúg máʼtáan na mádáád cág. A kɛ́ kunuŋ pɛcɛm pɛ́ Yúdɛn, njiínúŋ pɛ́lɛ́ wɔnɔ́ ná kíəguunə lɛ́ mɔɔ́n ó Falɛsɛyɛ́ɛŋ ə́nuŋ[12]

⁶Njáyɛ́ʼkɛnɛn a pɛ́lɛ́ a ombod wúmmú súʼtə́ə́ mbánɔɛyɛ mogony mó pəə́liʼtiniʼ[13] Kɛ́mɛ́ɛ agɛɛn lɛ́ mɔɔd aalon sáád a udi ó Táán lɛ́ amɛ́ngɛg pɛcɛm, ná mɛ ndɛ ugusəə lɛ́ ntɛɔ́gɔ na ɛgom yɛ́ pálɛɛ́ págɛmbɛn a yɛ́lɛ́ ɔmbɔ́ ímuʼ.

⁷Njɛ́ɛ afɛga lɛ́ nkə kɛ́ɛg kiim kɛ́ njɛ́ɛ agɛɛlɛ kɛ́yɛ́ɛ kɛŋɛʼ. Nɛ́gɔŋ yɛ́ɛnɛ pɛándɛ a əngis yáam wɔnɔ́ moom mó náan iyó, a oʼto ó Kilíʼtus.

⁸Ɛɛ́ɛ, mbáʼkolɛŋ lɛ́ pɛ́ɛb piim pɛ́yɛ́ɛ iyó, a ɛbá ɛ́ kɛa kɛ́ kɔŋɛʼ kó kómááyɛn moom muim. Kólɛ lɛ́; kolɛŋ kó mbáʼkolɛŋɛɛ́ Yə́sus Kilíʼtus Sə́dúk waam, piim pɛ́ɛb pɛ́lɛ nɛ́gɔŋ a əngis yáam wɔnɔ́ pɛsaángaa lɛ́ ná nyɔ́ɔŋ Kilíʼtus wɔnɔ́ pɛsáábɔ́n,

⁹ndɛ nyɛɛn fɔ́lɔ́b fɔ́lɔ́b ondadáán na nyɔ́lɛ́. Ntiə́giiʼkini kusəə lɛ́ mbálón sáád a udi ó Táán lɛ́ ndɛ agɛɛlɛ nkə kɛ́ pɛcɛm pɛ́lɛɛ́ əgusəə, náa ndɛ́ɛ́ kolon sáád a udi wə́ə́ŋ lɛ́ mbáág oʼto na Kilíʼtus. Táán áa alɛɛ́ agɛɛlɛ lɛ́ ungim nyɔ́ amáág oʼto na Kilíʼtus, álon sáád a udi wə́ə́ŋ.

¹⁰Nkə kɛ́ ndɛɛ́ anyɔ́ŋɛn na toɛn kɛ́lɛ lɛ́ ndɛŋ Kilíʼtus, ndɛ ndɛŋ tɛn toɛn tó tómɛ́ɛ́lɛ lɛ́ álon a kəəniʼ, nsiəd ngab a ntɔ́b yɛ́ yɛɛ́nɛ́, ndɛ nku tɛn wɔnɔ́ ná nyɔ́lɛ́ yiígú,

¹¹ná mɛ mmɛna tɛn pɛda lɛ́ ndɛ́ɛ́ kolon a kəəniʼ.

¹²Ntɛɔ́gɔ əgusəə lɛ́ mɛ mbə́ʼkiig a nisug, ɔmbɔ́ lɛ́ mbáʼkogon a kúfuʼ, ndóo. Náa ndɛ agaábáam əgín lɛ́ ná nyɛ́ɛn əgiig, nsiəd pɛsáábɔ́n pɛ́go lɛ́ mɛɛ́nyɔ́amɔɛ́d, Yə́sus Kilíʼtus ayɛ́ɛ əə́ʼkisiəd a ɔmbɔg yə́ə́ŋ.

¹³Pomóŋŋí, ntɛɔ́gɔ afɛga lɛ́ mɛ mbáʼkaádɛ, ndóo. Yoom yɛ́ ndɛɛ́ agɛɛlɛ ímuʼ ɛ́lɛ lɛ́, mbə́ʼkudum ngim na nkə kɛ́ kɛándɛɛ́ a mɛ ngim. Ndɛ nɛ́gɔŋ agaábáam lɛ́ ná nyɔ́ɔŋ nkə kɛ́ kɛ́lɛɛ́ yuudi.

¹⁴Ndɛ əgín agodɛ́da lɛ́ nyɛ́ɛn əgiig, nyɔ́ɔŋ pɛsáábɔ́n pɛ́ Táán alɛɛ́ agɛbɛɛdɔ́ŋɔn a pɛ́lɛ́ kɔ́gɔ́ɔg a mɔɛn a ngim ɛ Yə́sus Kilíʼtus.

¹⁵Pəsi piim pá tɛáʼkogónɛ́ɛ́ a kəə́liʼtiniʼ, tiə́siədəə́n náan. Kɛbán kímuʼ, a ondáŋ wááŋan, pə́mmú pámaʼkɛɛn kɔ pá pálɛɛ́ na mafɛgaʼ mɛ́ndɛ́ŋ, Táán əəbuúloodi kɛmoámoáŋ.

¹⁶Ɔmbɔ́ kɛ́lon tuə́, kɛnɔ kɛ́ tɛándɛɛ́ nɛ́gɔŋ a ngə́ yɛ́ɛy, tíɛn yuudi na yɛ́lɛ́.

¹⁷Pomóŋŋí, pəŋi piim púyə́ən ongoo wáam. Pódɛ́ʼtɛg ɔlaa ó pá pálɛɛ́ əguyə́ən ongoo wáam na ó pɔsɔ́sɔ́g páam.

¹⁸Kɛ́lɛ lɛ́, piíŋ pálɛ kɔ pá pálɛɛ́ əgəə́siəd wɔnɔ́ pálɛ agonɔɛyɛ Kilíʼtus nyɔ́ yiígú a ɔmbásá. Kɛbán kɛ́ɛnɛ mbáʼkobodɛ́anɛ kɛ́lɛ́ pɛnɛŋ wɔnɔ́ pɛnɛŋ; ndəgiiʼkini kobodɛ́anɛ kɛ́lɛ́ na pɛlɛɛ a əngis.

¹⁹Póob náan, pálɛ agaágɔnyan yug pɔ́lɛ́báamɔɛ́d lɛ́ kaadɛ kɔ́ɔ́bɔn aa kálɛɛ́ wɔnɔ́ táán yɔɔbɔn. Pálɛ əgəə́gidən agá a igog a pɛbán pɛɔ́bɔn pɛ́ páagɛɛlanɛ, kɔmɔɛ́d lɛ́ pógóódi koob agá oʼto kono a pɛ́lɛ́. Pə́ə́díin agá nkó a pɛbán pɛ́ a nsí yɛ́ɛnɛ pɛ́lɛ́ na pɛ́lɛ́.

²⁰A noá nuə́s, nigúu niə́s nɛ́lɛ a mɔɛn. Tɛlɛ agobóŋan əgín lɛ́ Ongɔɔyɛʼ wəəs, Sə́dúk Yə́sus Kilíʼtus yíim ə́suu a mɔɛn.

²¹Ná əə́giim, aagóʼpɛ nkó yəəs ɛ pumog, agɛɛlɛ lɛ́ yɛ́ɛn wɔnɔ́ yəəŋ yɛ́ yəə́gə́mən. Alɛ́ɛ́ kɛɛlɛ náan a toɛn tó alɛɛ́ na tólɛ́, toɛn tó tóagɛɛlɛ lɛ́ yoom yiim ɛ́moyóbɛn.