Read Yambeta Filíib 4 Bible Online

Filíib 4 - Yambeta bible

Filíib 4

¹Pomóŋŋí páam pá ɔʼtɛ́m, ndɛ na njaan kɛ́fɔlɛ́ lɛ́ ná mbáboodála. Tɔnyɔ́g tóam na pəŋi aa tólɛɛ́. A oʼto wááŋan tɛn aa ndɛɛ́ əgəə́gidən a igog. Kólɛ́ aa ndábodɛ́anɛ na pəŋi pɔsɔ́sɔ́g páam pá ɔʼtɛ́m lɛ́ sɛ́gɔɔ pólaa əgín náan, paladáán na Sə́dúk.

²Ndɛ ɔgɔɔ́sɔ́gɔlɔn pa Əfodíi pɔ́lɛ́ na Səntíis lɛ́, sɛ́gɔɔ əgín pə́ləndin unuʼ wɔ́ɔ́bɔn úmmuʼ paáládáán na Sə́dúk.

³Wɛ tɛn móŋŋí waam, wɛ nyɔ́ tɛlɛɛ́ agɛɛlɛ pigólí pɛ́go pímuʼ, mbágoyɔ́sɔ́gɔ́lɔ́nɛ́ɛ́, sɛ́gɔɔ áábɛ́gɛn pagɛ́ɛd póob ombɔg agɛɛlɛ lɛ́ póóbanan. Pálɛ pagɛ́ɛd pá páyáyɛ́ʼkɛ́nɛ́ɛ́ kɛ́fɔlɛ́ ondáŋ na mɛ, na Kɛlɛmáaŋ, na pɔsɔ́g tɛn pá tɛlɛɛ́ agɛɛlɛ pigólí pɛ́go pímuʼ na pɔ́lɛ́ agolɔɛgɛnɛ pɔɔd Tɔsɔm tó Táán. Pɔ́lɛ́ póob piim, Táán ayáág əngiŋ yɔ́ɔ́bɔn a kálaʼtaʼ yəəŋ yɛ ɔlaa.

⁴Póɛn pɛnɛŋ piim na tɔnyɔ́g lɛ́ polɛ paladáán na Sə́dúk. Ndəgiiʼkini kobodɛ́anɛ nyɔʼkɔ́ na pəŋi: Nyɔ́gáan áaá!

⁵Liodíən na ungim lɛ́ polɛ na ntɛ́m ɛlaŋ. Kɛnɛŋ sɔɔŋ Sə́dúk yíim.

⁶Podɛyáságɛ́máá yoom na yoom[14] Kɛnɛŋ kiim kɛ́ yoom ɛ́mábosógɛn, púŋíən na Táán, pómoyálɛɛlɛn. Ɔ́sɔ́gɔ́lɔ́nɛ́an Táán, poámoyɛ́ʼkɛnan tɛn pisoyidiʼ.

⁷Áay, kiwiiyiʼ kɛ́ Táán kɛ́ kɛ́mááyɛn kolɛŋ kuim kó mɔɔd alɛɛ́ ogɛɛn na kólɛ́ kɛ́agɛɛlɛ lɛ́ ntɛ́m yaaŋan na mafɛgaʼ mááŋan mɛ́ɛn a kaadɛ wiiy, lɛ́ pólaa paladáán na Yə́sus Kilíʼtus.

⁸Pomóŋŋí, táá las yaam ɛ tɔgɛ́ɛ́ áa yɛ́ɛnɛ: Ágáan ɔʼtɛ́m wááŋan a pɛbán piim pɛ́ pɛ́lɛɛ́ pɛŋɛʼ, pɛbán pɛ́ ponnom pó pɔɔd, pɛbán piim pɛ́ pɛ́lɛɛ́ fɔ́lɔ́b, pɛbán pɛ́ pɔɔd páanyáadɛ, pɛbán pɛ́ pɛ́lɛɛ́ sáád, pɛ́ pɛ́dɛɔ́gɔ na kibuu, pɛbán pɛ́ píəgə́mmi Táán, pɛbán pɛ́ pɔɔd páabágɛdɛ.

⁹Nkə kiim kɛ́ njíbulóódi, kiim kɛ́ poyáʼkan na mɛ, nkə kiim kɛ́ poyɛ́njoób ndə́əsəə, kɛ́ poyɛ́ʼtála ndáagɛɛlɛ, pəŋi tɛn póɛlɛ kɛ́lɛ́. Áay Táán ɛ kiwiiyiʼ agɛɛn na pəŋi.

¹⁰Nyɛɛ́nyɔ́ga kɛ́fɔlɛ́ a ɔlaa wáam na Sə́dúk lɛ́ puyíʼkíni kɛnjaáyɔ́ɔ́ŋɛ. Ɔʼtɛ́m wááŋan óyɛ́ɛ əgín kɔ na mɛ pɛnɛŋ piim, náa poyɛ́ɛ podɛɔ́ŋ agá ngə́ ɛgɛʼtómanan.

¹¹Ntɛɔ́gɔ agosɔyɔ náanɛ lɛ́ wɔnɔ́ ná ndɛɛ́ a osog, ndóo. Mɛ ndɛ lɛ́, nyɔɔ́ŋ oo, kɛbán fiɛ́d; ntɛɔ́ŋɛn oo, kɛbán fiɛ́d.

¹²Mbálɛŋ ɔlaa wó a osog. Mbálɛŋ tɛn wó a tugúm. Njáʼkan kolaa a oʼtɛ́lɛm ɔmbɔ́ óyaán. Nnɛ́ɛnɛ oo, iiʼí! Ntɛnɛ́ɛnɛnɛ oo, iiʼí! Nyɛɛn a tugúm óo, iiʼí! Nsóg oo, iiʼí!

¹³Maʼtɛ́lɛm móom miim, ndɛ agonóʼtan mɔ́lɛ́ a oʼto ó nyɔ́ alɛɛ́ agɛnyɛɛ́ʼkɛn toɛn.

¹⁴Kɔmɔɛ́d, poálɛŋ kɛɛlɛ əginyəə́giig a ntɔ́b yaam.

¹⁵Pəŋibáamɔɛ́d, pəə́liʼtiniʼ pá a Filíib poálɛŋ lɛ́ ná nyɛɛ́dɛ́ɛ́mɛn a pálɛ́ɛg ɛ Masɛdowáan[15], kɛnɔ kɛ́ njə́ʼtúmíí kolɔɛgɛ Tɔsɔm Tólaŋ, əgín pəŋi aa poyɛ́nyaábɛ́gɛn ombɔg na nkə kɛ́ poyɛ́ɛ agɛnyɛɛ́ʼkɛnan. Pəə́liʼtiniʼ pɛ́ndɛ́ŋ pá pəsi na pɔ́lɛ́ tɛyɛ́ɛ agosásananɛ mɔbɔ́mbɔ́g, pádɛʼkɛ́ɛ kɔ.

¹⁶Ɔmbɔ́ tɛn ná njɛ́ɛ mbándɛ a Təsaloníig, poyɛ́ɛ agɛɛlanɛ lɛ́ nkə kɛ́ kɛ́mɛ́ʼtaŋɛn, púyiim póɛʼtómɛn[16]

¹⁷Adɛ́njaŋ moom aa ndɛɛ́ agolɛɛ lɛ́ ná póɛnyɛɛ́ʼkɛnan, ndóo. Ndɛ anyɔ́ŋɛn lɛ́ Táán ábosáábɔn kə́mmú agaáyɛn náan.

¹⁸Njɔ́ɔ́ŋ nkə kɛ́ puyíím póɛʼtómɛn. Kíyíʼkíni kaáyɛn nkə kɛ́ njɛ́ɛ njaan na kɛ́lɛ́. Na nkə kɛ́ɛg kiim kɛ́ puyíím póɛʼtómɛn na Ɛʼpafolodíid, mbándɛ na mólɛ́ ilubənən. Nuboʼ noáŋan nóon nólɛ wɔnɔ́ lamɛ́ndaʼ yɛ́ yəə́nug kɔŋɛʼ, kɛfɔny kɛ́ kiə́gə́mmi Táán, əmə́əsiəd kɛ́lɛ́[17]

¹⁹Táán nyɔ́ ndɛɛ́ anyáadɛ alɛ na tugúm yɔɔ́yɔɔ. Nkə kiim kɛ́ kɛ́abosógɛn, alɛ́ɛ́ kosan a ngim ɛ Yə́sus Kilíʼtus, agɛɛlɛ lɛ́ áboyɛ́ʼkɛn kɛ́lɛ́.

²⁰Tɛ́nyádɛan Táán Sɛ wəəs pɛnɛŋ piim. Aamɛn!

²¹Paladáán na Yə́sus Kilíʼtus, púsoyidəni pəə́liʼtiniʼ piim pá a ondáŋ wááŋan aá! Piim tɛn pá pálɛɛ́ áanɛ na mɛ, pomóŋŋí pááŋan pá kəə́liʼtiniʼ, pɔ́nɔ́ mpuúsoyidi tɛn aá!

²²Pəə́liʼtiniʼ piim póonɛ áanɛ, kɔŋɛʼ kɔŋɛʼ pɔsɔ́g pá pálɛɛ́ əgugudin Sɛsáal, pɔ́nɔ́ mpuúsoyidi tɛn aá!

²³Sə́dúk Yə́sus Kilíʼtus áboyɛ́ʼkɛn pəŋi piim mawɔʼ aá!