Read Yambeta Kolóos 2 Bible Online

Kolóos 2 - Yambeta bible

Kolóos 2

¹Ndɛ anyɔ́ŋɛn nyɔʼkɔ́ pólɛŋ lɛ́ njáyɛ́ʼkɛ́nɛ́ɛ́ na toɛn a pigólí a oʼto wááŋan ó pəŋi pəə́liʼtiniʼ pá a Kolóos, na a oʼto ó pɔsɔ́g pá a Lawodisə́ə, na a ungim nyɔ́ adɛ́yɛ́ndɛŋɛɛ́ kɛ́.

²Mbáyɛ́ʼkɛ́nɛ́ɛ́ náan lɛ́ ná pəŋi piim, na pɔ́lɛ́ kɛ́, puə́yíis, pɔ́nyɔ́ŋanan pəŋi na pəŋi, póɛn ɔʼtɛ́m úmmuʼ. Ndɛ anyɔ́ŋɛn tɛn lɛ́ pólɛŋ koob kɔŋɛʼ kɔŋɛʼ yisí yɛ́ ɛlɛɛ́ a kɛbán kɛ́ Táán. Yisí ɛgo ɛlɛ yɛ́ poálɛŋ, ɛlɛ Kilíʼtus.

³Nyɔ́lɛ́ ogo aa alɛɛ́ agɛɛlɛ lɛ́ pəsi tíɛn na nsiŋ, tɛ́ɛlɛŋ koob pɛbán. Nsiŋ ɛ Kilíʼtus yɛ́ɛy aa ɛlɛɛ́ kɛa kɛ́ kisig kɛ́ yoom.

⁴Ndɛ agobodɛ́ananɛ pɛbán pɛ́ɛb náan lɛ́ ná mɔɔd ədiyíbulígə na tɔgɛ́ɛ́ tó məbəə́.

⁵Lɛŋáan lɛ́, ɔmbɔ́ ná ndɛɛ́ káanɛ laálá na pəŋi, ndɛ agoboyáyɔ́ɔ́ŋanɛ pɛnɛŋ piim. Ndɛ na tɔnyɔ́g wɔnɔ́ ná poágɛ́nɛ́ɛ́ oʼto na Kilíʼtus na toɛn, pumə́yəə́bis, poágɛɛlɛ nkə kɛ́ kɛ́lɛɛ́ a ngə́.

⁶Nɛ́gɔŋ yɛ́ɛnɛ pəŋi puə́ʼkəə́liʼtini Yə́sus Kilíʼtus wɔnɔ́ Sə́dúk yaaŋan. Ə́siə́díən anɛ́ɛ́n wɔnɔ́ ná alɛɛ́ anyɔ́ŋɛn.

⁷Póɛn paáyɛ́ʼkɛ́náán na nyɔ́lɛ́, púyə́ən nkə kɛ́ pálɛɛ́ agoboyáʼkananɛ, póɛn yuudi na kəə́yíis a pɛbán pɛ́ Kilíʼtus, púsoyidəni Táán na toɛn.

⁸Pólóʼkɔd óo! Mɔɔd ədiyíbulígə na pusiŋ pó piyəg, pusiŋ pó pódɛ́agɛɛ́bɛɛ́ mɔɔd. Pusiŋ póob pólɛ pusiŋ pó a mandoŋá má pɔɔd, pusiŋ pó a pɛbán pɛ́ a mbin. Pódɛɔ́gɔ pusiŋ pó pólɛɛ́ əgiim a nó Kilíʼtus.

⁹Podɛnjáág oʼto a pusiŋ póob lɛ́ mandoŋá miim má Táán alɛɛ́ na mɔ́lɛ́, málɛ yoom tɛn náan ímuʼ na Kilíʼtus.

¹⁰Poálɛŋ lɛ́ Táán amáboyɛ́ʼkɛn yiim a kúfuʼ lɛ́ polɛ unuʼ úmmuʼ na Kilíʼtus, nyɔ́lɛ́ nyɔ́ alɛɛ́ alaamɛ yiim yɛ́ ɛ́lɛɛ́ na toɛn a nsí na a mɔɛn.

¹¹Wɔnɔ́ ná polɛɛ́ paladáán na nyɔ́lɛ́, pólɛŋ lɛ́ polɛ paanyɛán a udi wə́ə́ŋ. Kɛbán kímuʼ waany wóow ódɛɔ́gɔ wó pɔɔd páagɛɛlanɛ lɛ́ páasom kiony, ndóo. Ólɛ wó Kilíʼtus amáboyɛ́ɛ́lɛ. [4]

¹²Kɛnɛŋ kɛ́ puísiə́d ɔsɔgɛn, kɛ́yɛ́ɛ wɔnɔ́ pə́yíbuúní ondáŋ na Kilíʼtus. Náan tɛn aa kɛ́lɛɛ́ wɔnɔ́ puyíím tɛn puóndɛg ondáŋ na nyɔ́lɛ́ lɛ́ pomáág oʼto lɛ́ Táán alɛ na toɛn tó kɛɛlɛ lɛ́ pəŋi tɛn puóndɛg. Nyɔ́lɛ́ nyɔ́ ayóndɛ́gɛ Yə́sus[5]

¹³Poyɛ́ɛ a kɛnɛŋ kɛ́ kalaʼ wɔnɔ́ pɛlóŋ pɛ́ kúfuʼ lɛ́ poyɛ́ɛ na masɛd, podiɛn tɛn a ondáŋ ó pɔɔd pá pándagoóbɛ́ɛ́ na Táán. Nɛ́gɔŋ yɛ́ɛnɛ, aáʼkoboyɛ́ʼkɛn ɔlaa wó ongwa na Kilíʼtus, əmə́bilísin mabɛ́ mə́ə́s.

¹⁴Tiígóodi nsɔ́ɔ́ a udi ó Táán kalaʼ lɛ́ tɛdɛʼkɛ́ɛ agɛɛlɛ nkə kɛ́ ayɛ́ɛ əgusəə, náa əə́ʼkibiílisinií mabɛ́ má máyɛ́ɛ na nsɔ́ɔ́ na pəsi. Yiíyúnjúgə́ni mɔ́lɛ́, əə́siəd, aányáŋɛ́nɛ Yə́sus a nɛbaŋan nɛ́ páyɛ́mobáŋan a ɔmbásá.

¹⁵A kugu kóog kó Yə́sus yiígú a ɔmbásá aa Táán yɛɛ́sóólɛ pá páyɛ́ɛ na toɛn a yoom yiim yɛ́ a mɔɛn na yɛ́ a nsí, páalaamɛ. Ayɛ́boyɛ́ʼkɛn oʼto kono a əngis á pɔɔd piim, əguloodi lɛ́ Mɔɔd alɛ kɔ nyɔ́ alɛɛ́ na toɛn amáboyág pɔ́lɛ́ piim.

¹⁶Wɔnɔ́ ná kɛ́lɛɛ́ anɛ́ɛ́n náan, pudinjə́líʼtíníí nkə kɛ́ɛnɛ kɛ́ pɔɔd pálɛɛ́ əgusəə pɔ́nɔ́: Taa yɛ́ɛnɛ, podɛnnɛ́, yɛ́ɛy podɛŋŋó. Mɔɔd na mɔɔd adɛɛ́boóbɛ́n tɛn lɛ́ a igə aa polɛɛ́ agɔnyɔ́ga na wɔɔ́n wóonɛ náanɛ, ponnyáádɛ wóow kága ə́? Ɔmbɔ́ lɛ́ a igə aa podɛɔ́gɔ agonyádɛɛ́ nɛbáá nɛ́ wəə́ ə́? Oó lɛ́ pisúgiʼ ə́?

¹⁷Nkə kɛ́ɛg kiim kɛ́lɛ agá kílíndiʼ kɛ́ pɛbán pɛmɔɛ́d pɛ́ pɛ́lɛ́ɛ́ kiimií. Kɛbán kɛ́go kɛ́ fɔ́lɔ́b kɛmɔɛ́d áa kɛ́ɛnɛ kɛ́lɛɛ́ Kilíʼtus.

¹⁸Pudiyə́díí lɛ́ pɔɔd póob páboyɛ́ɛlɛ póɛn na oʼto kono a niɛlɛ nɛ́ɛn nɛ́ pálɛɛ́ oloodi káanɛ na mɔɛn na mɔɛn lɛ́ pɔ́lɛ́ pálɛ əgəə́suuli nkó a nsí, páanyáadɛ məŋun má maʼtom. Pálɛ agaábágɛdɛ pɔ́nɔ́ Táán amáboyásɛ́nɛn pɛbán a kɛlɛm. Mbod ɛ pɔɔd wɔnɔ́ yɛ́ɛy náan ɛlɛ agaábágɛdɛ a náan iyó lɛ́ mafɛgaʼ mɔ́ɔ́bɔn miim málɛ əgín a pɛbán pɛ́ a nsí.

¹⁹Pɔ́dɛɔ́gɔ unuʼ úmmuʼ na Kilíʼtus, nyɔ́lɛ́ nyɔ́ alɛɛ́ lɛ́ alɛ oʼto. Pá pálɛɛ́ unuʼ úmmuʼ na nyɔ́lɛ́, pálɛ agoyam a ɔmbɔg yə́ə́ŋ wɔnɔ́ ná Táán alɛɛ́ anyɔ́ŋɛn. Alɛ unuʼ úmmuʼ na pɔ́lɛ́ agɛɛlɛ lɛ́, na nyɔ́lɛ́ na pɔ́lɛ́, pɛ́ɛn kilúd kɛ́ yoom əgín náan kímuʼ, wɔnɔ́ ná nkó ɛ mɔɔd ɛlɛɛ́ tɛn náan kilúd kɛ́ yoom kímuʼ.

²⁰Polɛ palɛŋáán lɛ́ na Kilíʼtus na pəŋi, puígú pəŋi piim fɔ́lɔ́b a nkə kɛ́ kɛ́adɛ́ʼtɛg toɛn tó a pɛbán pɛ́ a mbin. Wɔnɔ́ ná kɛ́lɛɛ́ anɛ́ɛ́n náan əə, tuə́ áa polɛɛ́ pə́giiʼkini kolaa wɔnɔ́ pɔɔd pá pə́ligíí agoóbɛnɛɛ́ na nsí ə́? A igə anɛ́ɛ́n aa polɛɛ́ əgiiʼkini kodɔ́ɔg oʼto wááŋan a mbod ɛ pisiə́g wɔnɔ́ yɛ́ɛnɛ lɛ́:

²¹«Udisiə́d yoom wɔnɔ́ yɛ́ɛnɛ», «odɛnnɛ́ yɛ́ɛnɛ náanɛ», «udisiə́d yɛ́ɛy káag əə́?»

²²Mbod ɛ pisiə́g wɔnɔ́ yɛ́ɛy náan ɛlɛ a oʼto əgín ó moom mó mólɛ́ɛ́ lɛ́ na páaman konyɔ́sam mólɛ́, kɛɔ́bɔn kɛáman. Pɛ́ɛb pɛ́lɛ pɛbán pɛ́ pɛ́lɛɛ́ pɛ́ pɔɔd páadɛ́ananɛ na pɔɔd, páaboyáʼkananɛ.

²³Kɛ́lɛ fɔ́lɔ́b náan lɛ́, pɔɔd páafɛga lɛ́ pisiə́g pɛ́ɛb pɛ́lɛ pɛ́goboyɛ́ʼkɛn nsiŋ lɛ́ pɛ́lɛ əgusəə wɔnɔ́ ná mɔɔd ə́yə́nií pɛcɛm, yə́suuli nkó a nsí, ánɛ́ɛyɛ pumog puə́ŋ ntɔ́b. Náa a mɛ, mbádála lɛ́ pɛ́lɛ pisiə́g pɛ́ pɛ́dɛ́agɛɛ́ʼkɛnɛɛ́ mɔɔd yoom ɛ́laŋ, pɛ́agɛɛ́bɛ əgín mɔɔd a ɔlaa wə́ə́ŋ ó pumog.