Read Yambeta Kolóos 3 Bible Online

Kolóos 3 - Yambeta bible

Kolóos 3

¹Polɛ palɛŋáán lɛ́ Táán ayɛ́boyóndɛ́gɛ ondáŋ na Kilíʼtus. Wɔnɔ́ ná kɛ́lɛɛ́ anɛ́ɛ́n náan, áyɛ́ʼkɛ́nɛ́an a pɛbán pɛ́ a mɔɛn, kɛnɔ kɛ́ Kilíʼtus alɛɛ́ undəndínə́ə́n a ombɔg ó nɛnom ó Táán, oʼkɔɔ ó nugəm[6]

²Ágáan mafɛgaʼ mááŋan pɛnɛŋ piim a pɛbán pɛ́ a mɔɛn. Podɛnjáág oʼto wááŋan a pɛbán pɛ́ a nsí

³lɛ́, pəŋi puígú, Táán amáamoyóndɛgɛ. Ɔlaa wááŋan ólɛ ongɛɛ́ngɛ́gáán na Kilíʼtus a nó Táán.

⁴Kilíʼtus aa alɛɛ́ ɔlaa wááŋan ó fɔ́lɔ́b. Ná alɛ́ɛ́ kimbuúlini, pəŋi piim, na nyɔ́lɛ́ kɛ́, polɛ́ɛ́ kɛɛn a nugəm.

⁵Liogíən anɛ́ɛ́n ongoo a pɛbán pɛ́ pɛbɛ́ pɛ́ a nsí. Pɛbán pɛ́ɛb pígóódi kɛɛn a əngis yááŋan wɔnɔ́ pɛbán pɛ́ piə́ʼkugúú. Táá pɛbán pɛ́go aa pɛ́ɛnɛ pɛ́lɛɛ́ lɛ́: Pɛdaŋ, ɔlaa ó pɛɔg, kaag kó ɔʼtɛ́m a pɛbɛ́ pɛ́ pɛbán pɛ́ pumog pólɛɛ́ anyɔ́ŋɛn, mafɛgaʼ má mabɛ́, yaág yɛ́ əngis yɛ́ ɛ́lɛɛ́ ombod wúmmú ó kugə́midi pɛbán pɛ́ nsí agolaŋ Táán.

⁶Táá mbod ɛ pɛbán yɛ́ ɛlɛ́ɛ́ kɛɛlɛɛ́ lɛ́ Táán óloodi ilúún yəəŋ na pɔɔd pá páagɛɛlanɛ pɛ́lɛ́ aa yɛ́ɛy.

⁷Taa, náan aa kɛnɛŋ kɛ́ ntɛ́m yaaŋan ɛyɛ́ɛ igə́ligi a mbod ɛ pɛbán wɔnɔ́ yɛ́ɛy, pəŋi tɛn poyɛ́ɛ poɛlanɛ pɛ́lɛ́ kalaʼ.

⁸Náa nɛ́gɔŋ yɛ́ɛnɛ, liogíən ongoo a pɛbán pɛ́ɛb, tíən mulúún, nɛnyɛ́n, ɔʼtɛ́m wó ɔmbɛ́, pɛdog. Pudiyíʼkíni kɛɛn kə́mmú na tɔgɛ́ɛ́ tó fúlúus a nnuʼ yaaŋan.

⁹Pudindígə́nən pəŋi na pəŋi lɛ́ pundigi kə́mmú a mandoŋá má kalaʼ, puə́ʼkudi pɛbán pɛ́ pɛbɛ́ pɛ́ poyɛ́ɛ agɛɛlanɛ.

¹⁰Nɛ́gɔŋ yɛ́ɛnɛ poándɛ na ɔlaa wó ongwa. Táán Ɔngɛɛlɛʼ waaŋan, aáʼkoboyɛ́ʼkɛn ɔʼtɛ́m wó ongwa. Alɛ əgusóbinəni wólɛ́ pɛnɛŋ piim agɛɛlɛ lɛ́ wɛ́ɛn wɔnɔ́ wə́ə́ŋ[7], ná pólɛŋ komoólɛŋ kɔŋɛʼ kɔŋɛʼ.

¹¹Áay, kɛ́dɛágɛɛn kə́mmú lɛ́ Yúdɛn aa yɛ́ɛnɛ, kɛnɔɔŋɛʼ aa kɛ́ɛg káag. Oó lɛ́ nyɔ́ aáʼkanyɛɛ́ aa nyóonɛ, nyɔ́ adɛ́njányɛɛ́ aa nyóon káag, ndóo. Kɛ́dɛndɛ́ɛ́ kɛɛn tɛn ɔmbɔ́ lɛ́ sɔ́g nyóonɛ əligi na mbin a əngis, nyóon kága alɛ əgín mɔɔd o kidun o kúfuʼ. Oó lɛ́ kɛɔ́lɛ́ aa kɛ́ɛnɛ, mɔɔd o noádɛʼ aa nyóon kága, ndóo. Ungim alɛ yoom ímuʼ a udi ó Táán. Əgín Kilíʼtus nyɔ́lɛ́nyɔ́əsíŋ áa alɛ́ɛ́ kɛɛnɛɛ́ kɔ. Alɛ yiim, a ungim.

¹²Áyɔ́ŋɛ́an lɛ́ Táán əyíbuyííyid lɛ́ ná puóbanan na nyɔ́lɛ́. Amábonyɔ́ŋɛn. Pəŋi, ágáan anɛ́ɛ́n ɔʼtɛ́m wááŋan a pɛbán pɛ́ɛnɛ pɛ́ pɛ́lɛɛ́ lɛ́: Kɛɛlɛ kɔŋɛʼ, ɔʼtɛ́m ɔ́laŋ, niə́suuliʼ nkó a nsí, ntɛ́m yɛ́ ngwiyə́ə́n, fiɛ́d na ɛgalɛgalɛʼ.

¹³Pónóʼtanan pəŋi na pəŋi. Wɛ nyɔ́ olɛɛ́ na kɛbán na sɔ́g ímuúlísín. Púlisənən pəŋi piim wɔnɔ́ ná Sə́dúk əyíbulísin pəŋi[8]

¹⁴Kɔŋɛʼ kɔŋɛʼ, pɔ́nyɔ́ŋanan pəŋi na pəŋi lɛ́ nnyɔ́ŋánán yaaboyɛ́ɛlɛ lɛ́ póɛn fɔ́lɔ́b fɔ́lɔ́b unuʼ wááŋan úmmuʼ.

¹⁵Póɛlɛ lɛ́ wiiy ɛ Kilíʼtus yɛ́ ɛlɛɛ́ a ntɛ́m yaaŋan yáágon kɔŋɛʼ lɛ́ Táán ayɛ́boodɔ́ŋɔn lɛ́ ná póɛn a uŋóón, paladáán, ɔʼtɛ́m úmmuʼ. Pómoyɛ́ʼkɛnan pisoyidiʼ pɛnɛŋ piim.

¹⁶Áyágɛ́an tɔgɛ́ɛ́ tó Kilíʼtus a ntɛ́m yaaŋan kɔŋɛʼ. Poáyɔ́ɔ́ŋanɛ tólɛ́ pɛnɛŋ piim. Póɛn lɛ́ sɔ́g aágaaʼkananɛ sɔ́g, puə́lə́bənən pəŋi na pəŋi a nsiŋ. Poɛ́ʼkɛn Táán pisoyidiʼ na ɔʼtɛ́m wááŋan ungim. Kɛnɛŋ kiim kɛ́ polɛ amoyɔ́sɔ́gɔlɔn, púmudúmən pɛʼkwáá na mbod ɛ pɛlɛ́ɛ́ ngim yɛ́ Uŋun wó Ufúlúʼtú wáagɛɛlɛ lɛ́ púdúmə agomonyáadɛ[9]

¹⁷Nkə kiim kɛ́ poágɛɛlɛ na nkə kɛ́ poɔ́sɔyɔ, póɛlɛ kɛ́lɛ́ a niiŋ nɛ́ Sə́dúk Yə́sus. Pisoyidiʼ pɛ́ poágɛɛ́ʼkɛn na Táán Sɛ wəəs, pósánɛ pɛ́lɛ́ na nyɔ́lɛ́.

¹⁸Pəŋi pagɛ́ɛd pá kodɔn, wɔnɔ́ ná polɛɛ́ unuʼ úmmuʼ na Sə́dúk, puóbɛn panom pááŋan lɛ́ náan aa alɛɛ́ anyɔ́ŋɛn.

¹⁹Pəŋi panɔ́mɛɛd pá poáʼkogóanɛɛ́, nyɔ́ŋɛ́naan pagán pááŋan, podɛnjɛ́ɛ́n nyɛ́n nyɛ́n nyɛ́n na pɔ́lɛ́.

²⁰Pəŋi poómbaa! Puóbɛn pasɛ pááŋan na pa ŋŋí pááŋan a yoom yiim. Táá nkə kɛ́ Sə́dúk alɛɛ́ anyɔ́ŋɛn a kɛ́ɛg lɛ́ polɛ unuʼ úmmuʼ na nyɔ́lɛ́.

²¹Pəŋi tɛn pasɛ na pa ŋŋí a pɔɔ́n! Podɛnjɛ́ɛ́lánɛ lɛ́ pɔɔ́n pááŋan póóbɛla ilúún. Kɛ́lɛ kɛ́ koboyáág ɛsɔ́mɛg a ɔʼtɛ́m pádiɛlɛ nkə kɛ́ kiə́gə́mmi Táán.

²²Pəŋi pá polɛɛ́ pɛɔ́lɛ́! Puóbɛn pəsə́dúg pááŋan pá a nsí yɛ́ɛnɛ. Adɛ́njaŋ əgín kɛnɛŋ kɛ́ pálɛɛ́ a ɛbá yááŋan aa póboyóóbɛnɛɛ́ lɛ́ ná páboógany, ndóo! A nnyáádɛ́ yɛ́ polɛɛ́ na yɛ́lɛ́ na Sə́dúk, púbuúgudin a fɔ́lɔ́b.

²³Pigólí piim pɛ́ páaboyɛ́ʼkɛn lɛ́ póɛlɛ, ɛlɛ́an pɛ́lɛ́ na ɔʼtɛ́m wááŋan ungim lɛ́ adɛ́njaŋ əgín pɔɔd lɛ́ pɔɔd aa polɛɛ́ əgugudin, ndóo. Polɛ əgudin Sə́dúk.

²⁴Lɛŋáan lɛ́ pɛsáábɔ́n pɛáŋan, na Sə́dúk áa pɛ́lɛ́ɛ́ kiimií. Alɛ́ɛ́ koboyɛ́ʼkɛn nkə kɛ́ ayɛ́ngɛ́gɛn ndɛg yəəŋ. Sə́dúk áa nyóon alɛɛ́ Kilíʼtus. Pigólí piə́ŋ áa polɛɛ́ a pɛ́lɛ́.

²⁵A pá páagɛɛlanɛ pɛbán pɛ́ pɛbɛ́, pɔ́lɛ́ pálɛ́ɛ́ kɛɛn tɛn na pɛsáábɔ́n pɛ́ a pɛbán pɛ́ pɛbɛ́ lɛ́, Táán ədiə́gu niis na mɔɔd[10]