Read Yambeta Kolóos 4 Bible Online

Kolóos 4 - Yambeta bible

Kolóos 4

¹A pəŋi anɛ́ɛ́n pá polɛɛ́ pəsə́dúg pá pɛɔ́lɛ́! Ləndínəən kɔŋɛʼ na pɔ́lɛ́ wɔnɔ́ ná kíəguunə lɛ́ mɔɔd ə́ləndin na kɛɔ́lɛ́. Lɛŋáan lɛ́ pəŋi pugóódi tɛn Sə́dúk náan yoom ímuʼ a mɔɛn.

²Ɔ́sɔ́gɔ́lɔ́nɛ́an Táán pɛnɛŋ piim, ágáan ɔʼtɛ́m wááŋan ungim a pɛ́lɛ́, poámoyɛ́ʼkɛn pisoyidiʼ.

³Ɛ́moyɔ́sɔ́gɔ́lɔ́nɛ́an tɛn a oʼto wə́ə́s lɛ́ ə́biíbuənin ngə́ agɛɛlɛ lɛ́ tɛ́lɔɛgɛnɛ pɔɔd Tɔsɔm tuə́ŋ, tɛ́ɛboyásɛnɛn yisí yɛ́ ɛlɛɛ́ kɔ a tɔgɛ́ɛ́ tó Kilíʼtus lɛ́, yoog yɛ njaan yɛ́ɛnɛ yɛ́ ndɛɛ́ a yɛ́lɛ́, ɛlɛ a oʼto wóonɛ lɛ́ ndɛ alɔɛgɛ Tɔsɔm.

⁴Pómoyɔ́sɔ́gɔlɔn tɛn lɛ́ yɛ́nyɛɛlɛ lɛ́ mmoáŋɛnɛ pɔɔd Tɔsɔm Tólaŋ wɔnɔ́ ná kíəgəə́yúunə, páalɛŋ koob tólɛ́ kɔŋɛʼ kɔŋɛʼ.

⁵Ə́siə́díən na nsiŋ a kɛgaágadɛ kɛ́ pá pɔ́dɛɔ́gɔ pəʼkilíʼtɛn. Kɛnɛŋ kiim kɛ́ pomɔ́ɔ́ŋ ngə́, púunə koboɛ́bɛ.

⁶Póɛn pɛnɛŋ piim na tɔgɛ́ɛ́ tólaŋ a nnuʼ yaaŋan, tɔgɛ́ɛ́ tó túosóbin mɔɔd. Nyɔ́ əmə́buŋíən kɛbán, púmuyúúlisini kɔŋɛʼ, na tɔgɛ́ɛ́ tólaŋ.

⁷A noá na ɔlaa wáam, móŋŋí wəəs na sɔ́g wəəs wo ɔʼtɛ́m Tisíig nyɔ́ tɛlɛɛ́ agɛɛlɛ pigólí pɛ́ Sə́dúk pɛ́go pímuʼ ondáŋ, nyɔ́lɛ́ nyɔ́ yaáyɛ́ʼkɛ́nɛ́nɛ́ɛ́ tɛn a pɛ́lɛ́ ɔʼtɛ́m úmmuʼ, aabodɛ́anɛ nkə kiim wɔnɔ́ ná ndɛɛ́.

⁸Nyɔ́lɛ́ aa mbányɔ́ŋɛn lɛ́ nyíim mpodómɛn lɛ́ ná yíim abodɛ́anɛ wɔnɔ́ ná tɛlɛɛ́, áabogónɛ nkó.

⁹Pálɛ na Onəsíim, móŋŋí tɛn wəəs wo ɔʼtɛ́m nyummú. Nyɔ́lɛ́ tɛn alɛ əguyə́ən Kilíʼtus na ɔʼtɛ́m úmmuʼ. Alɛ móŋŋí waaŋan tɛn o nigúu. Pɔ́lɛ́ póob piim pə́əbuúdəənən nkə kiim kɛ́ kɛ́lɛɛ́ agaásan áanɛ.

¹⁰Alɛstáag nyɔ́ nyɔ́lɛ́ tɛn alɛɛ́ a yoog yɛ njaan na mɛ ɔnɔ́ mpuúsoyidi á! Mə́líʼkus tɛn, mɔɔ́n ó sɛ o Panábas ɔnɔ́ mpuúsoyidi tɛn aá! Njɛ́bodɛánɛ kalaʼ wɔnɔ́ ná pugódíí lɛ́ puə́siəd na Mə́líʼkus nyóon. Nyɔ́lɛ́, əməʼkiim tɛn aboolónɛn wɔɔ́s, pólɛŋ kumuúsiəd aá.

¹¹Yə́sus nyɔ́ pɔ́ɔdɔ́ŋɔn tɛn lɛ́ Síústus, ɔnɔ́ mpuúsoyidi tɛn aá! A pəʼkilíʼtɛn piim pá pálɛɛ́ pɔɔ́n pá Yúdɛn, əgín nto yɛ́ɛy ɛ́dáád áa ɛlɛɛ́ əgugud na mɛ a oʼto ó nɛlaamɛʼ nɛ́ Táán. Pɔ́lɛ́ aa pálɛɛ́ agɛnyɛɛlɛ lɛ́ ɔʼtɛ́m wáam úwiiyi.

¹²Ɛʼpafɛláas nyɔ́ alɛɛ́ móŋŋí waaŋan o nigúu ɔnɔ́ mpuúsoyidi tɛn! Alɛ əgugudin Yə́sus Kilíʼtus. Ɔdɛɔ́gɔ agodɔm kɔɔ́sɔ́gɔlɔn Táán na toɛn a kidíídí kɛáŋan lɛ́ ná puə́bis a kəə́liʼtiniʼ, pógon pɔɔd a ngə́ ɛ Táán, póolɛŋ kɔŋɛʼ kɔŋɛʼ nkə kɛ́ Táán alɛɛ́ anyɔ́ŋɛn lɛ́ póɛlɛ.

¹³Mbámoyáágɛn mbaasɔ́, alɛ agonɛ ntɔ́b kɛ́fɔlɛ́ a pigólí pɛ́ alɛɛ́ agɛɛlɛ a kidíídí kɛáŋan na a kɛ́ pɔsɔ́g pá a Lawodisə́ə, na pá a Iyiə́laʼpolíis.

¹⁴Sɔ́g wəəs Lóʼkas nyɔ́ alɛɛ́ lɔ́gɛ́daʼ yɛ́ nkóʼkóón ɔnɔ́ Mpuúsoyidi á! Tɛmáas tɛn ɔnɔ́ mpuúsoyidi.

¹⁵Púisoyidini pəə́liʼtiniʼ piim pá a Lawodisə́ə aá! Púisoyidini tɛn ɔʼkɛ́ɛd nyóon nyɔ́ pɔ́ɔdɔ́ŋɔn lɛ́ Nɛ́nfa. Púisoyidini tɛn pəə́liʼtiniʼ piim pá páagaágɔnyɛla a noádɛʼ nuə́ŋ.

¹⁶Pəŋi pomaʼkoman kobana nufuuʼ nóonɛ, pódómɛn pɔsɔ́g pá a ɛgɔny ɛ́ pəə́liʼtiniʼ yɛ́ a Lawodisə́ə tɛn, pábana á! Páabodómɛn tɛn noɔ́bɔn nó njɛ́bodómɛn, pəŋi tɛn póbana nólɛ́[11]!

¹⁷Tɛánɛ́an na Ələsíib lɛ́ yágɔ́nɛgɛ kɛɛlɛ pigólí pɛ́ Sə́dúk ayɛ́moyɛ́ʼkɛn. Yúunə kɛɛlɛ pɛ́lɛ́ kɔŋɛʼ.

¹⁸Taa, ombɔg wáam ó mɛɛ́nyɔ́amɔɛ́d Póol aa wóonɛ ndə́ədilə pisoyidiʼ pɛ́ɛnɛ: Poáyɔ́ɔ́ŋɛ lɛ́ ndɛ a yoog yɛ njaan. Táán áboyɛ́ʼkɛn mawɔʼ á!