Read Yambeta 1 Təsaloníig 1 Bible Online

1 Təsaloníig 1 - Yambeta bible

1 Təsaloníig 1

¹Timə́budílən nufuuʼ nóonɛ lɛ́ na mɛ Póol, na Silifɛ́ɛŋ, na Timoʼtə́ə. Pəŋi pá a ɛgɔny ɛ́ pəə́liʼtiniʼ yɛ́ a Təsaloníig[1] aa timə́budílən. Pəŋi pá polɛɛ́ agoob na Táán Sɛ pɔ́lɛ́ na Sə́dúk Yə́sus Kilíʼtus. Táán áboyɛ́ʼkɛn mawɔʼ na wiiy aá!

²Tɛlɛ əgusoyidəni Táán pɛnɛŋ piim a kidíídí kɛáŋan kɛ́ pəŋi piim. Aándɛ tidibuyə́bə́líí ɔmbɔ́ wɔɔ́s a pɛɔ́sɔ́gɔ́lɔ́n piə́s.

³Tɛlɛ agaáyɔ́ɔ́ŋanɛ pɛnɛŋ piim a udi ó Táán Sɛ wəəs wɔnɔ́ ná polɛɛ́ agɛɛlɛ pɛbán pɛ́ píoloodi lɛ́ polɛ na kəə́liʼtiniʼ, na wɔnɔ́ ná puə́yísíníí a pigólí pɛ́ɛb lɛ́ polɛ na nnyɔ́ŋánán na Táán, poámɛna pɛda na toɛn lɛ́ Sə́dúk wəəs Yə́sus Kilíʼtus əəgimbuúlini[2]

⁴Pomóŋŋí, tɛálɛŋ lɛ́ Táán amábonyɔ́ŋɛn, əmə́əbuyíiyid lɛ́ na puób na nyɔ́lɛ́.

⁵Kɛ́lɛ lɛ́, ná tiyíím aboólɔɛgɛnɛ Tɔsɔm Tólaŋ, tɛdɛʼkáaboólɔɛgɛnɛ tólɛ́ na unuʼ na unuʼ, ndóo. Tɛɛ́lɔɛ́gɛ tólɛ́ na toɛn tó Uŋun wó Ufúlúʼtú. Tɔsɔm tóod túyólódíí moááŋ lɛ́ tólɛ fɔ́lɔ́b. Pəŋibáamɔɛ́d poɛ́dála ɔlaa wə́ə́s wó tɛɛ́láá a kɛgaágadɛ kɛáŋan ná tɛyɛ́ɛ káag. Tɛɛ́láá náan a kɔŋɛʼ koáŋan.

⁶Pəŋi, yə́nə́ən ongoo wə́ə́s na ongoo ó Sə́dúk! Poɛ́nɛ́ ntɔ́b a kidíídí kɛ́ Tɔsɔm Tólaŋ, pumə́əsiəd tólɛ́ na tɔnyɔ́g tó Uŋun wó Ufúlúʼtú óyɛ́boyɛ́ʼkɛn[3]

⁷Náan aa pəə́liʼtiniʼ piim pá a Masɛdowáan na pá a Aʼkáay[4] pííyə́ən ongoo wááŋan tɛn lɛ́ pɛ́ɛ́dála wɔnɔ́ ná poyɛ́ɛ alaa.

⁸Ɛɛ́ɛ, kɛ́lɛ náan fɔ́lɔ́b lɛ́ Tɔsɔm tó Sə́dúk na pəŋi aa túyíím túlumid wɔnɔ́ ná toálón niiŋ a Masɛdowáan na a Aʼkáay. Adɛ́njaŋ əgín áay anɛ́ɛ́n áa tuə́súg, ndóo. Nugəm noáŋan wɔnɔ́ ná poágɛ́nɛ́ɛ́ oʼto na Táán noálam nsí ngim. Tiʼkóodi kə́mmú kɛbán kɛ́ tɛlɛɛ́ pə́giiʼkini kusəə.

⁹Ungim alɛ agosɔyɔ wɔnɔ́ ná puyíbisiə́d kɔŋɛʼ kɛnɛŋ kɛ́ tɛyɛ́ɛ áay a pəŋi. Pálɛ agosɔyɔ tɛn lɛ́ puə́ʼkudi ɔlaa wó ambog, poáʼkaágasɛ agoóbɛn Táán. Nyɔ́lɛ́ nyɔ́ alɛɛ́ a ɔlaa. Nyɔ́lɛ́ Táán ɛ fɔ́lɔ́b.

¹⁰Polɛ agobóŋan nɛ́gɔŋ lɛ́ Yə́sus, Mɔɔ́n wəəŋ nyɔ́ ayóndɛ́gɛ a pɛlóŋ yíim ə́suu a mɔɛn. Nyɔ́lɛ́ nyɔ́ alɛ́ɛ́ kɛbɛyááŋɛnɛɛ́ a ilúún ɛ́ Táán yɛ́ ɛ́lɛɛ́ əgiim.