Read Yambeta 1 Təsaloníig 2 Bible Online

1 Təsaloníig 2 - Yambeta bible

1 Təsaloníig 2

¹Pomóŋŋí, pəŋibáamɔɛ́d poálɛŋ lɛ́ ongɛn wə́ə́s a pəŋi údiʼkə́əsuu məní, ndóo.

²Poálɛŋ tɛn lɛ́ tɛyɔ́ɔ́ŋ ntɔ́b kɛ́fɔlɛ́, pə́mə́biyólódíí na pɛdog ná tɛyɛ́ɛ a pálɛ́ɛg ɛ Filíib. Náa, ná tiyíím əgiig a pəŋi, Táán ayɛ́bɛgónɛ nkó lɛ́ ná tɛ́boólɔɛgɛnɛ Tɔsɔm tuə́ŋ Tólaŋ ɔmbɔ́ ná tɛyɛ́ɛ kɔ kɛ́fɔlɛ́ na njəʼkə́nə́ní[5]

³Kɛ́lɛ lɛ́, nkə kɛ́ tɛyɛ́ɛ alɔɛgɛnɛ pɔɔd kɛ́dɛʼkɛ́ɛ pɛnyaʼ. Tɛdɛʼkɛ́ɛ tɛn ɔmbɔ́ na mafɛgaʼ má mabɛ́ a ɔʼtɛ́m, tidiunə kulígə mɔɔd.

⁴Náa, tɛlɛ agá agosɔyɔ wɔnɔ́ ná Táán alɛɛ́ anyɔ́ŋɛn. Ayɛ́bɛɛdála lɛ́ tɛlɛ pá alɛɛ́ ugibiícum Tɔsɔm Tólaŋ lɛ́ tɛ́lɔɛgɛ. Kɛnɛŋ anɛ́ɛ́n kɛ́ tɛlɛɛ́ alɔɛgɛ, tɛdɛɔ́gɔ agɛɛlɛ lɛ́ ná pɔɔd pábɛɛ́gany, ndóo. Tɛlɛ agɛɛlɛ a oʼto ó Táán; nyɔ́lɛ́ alɛ agɛbɛdɛ́ʼtɛg a ntɛ́m yəəs a kaadɛ.

⁵Poálɛŋ lɛ́ tɔgɛ́ɛ́ tuə́s tó tɛyɛ́ɛ agosɔyɔ na pəŋi, tódɛʼkɛ́ɛ tɔgɛ́ɛ́ tó kɛliɛ́g. Táán aálɛŋ tɛn lɛ́ tɛdɛʼkɛ́ɛ na mafɛgaʼ móonɛ lɛ́ ná pomábɛyɛ́ʼkɛn mɔɔnɛ́ mááŋan, ndóo.

⁶Wɔɔ́s ɔmbɔ́ úmmuʼ, tidiʼkə́əguunə lɛ́ pɔɔd pábɛnyáadɛ. Ɔmbɔ́ tɛn na pəŋi, ɔmbɔ́ na pɔɔd pɛ́ndɛ́ŋ tidiʼkə́əguunə náan,

⁷ná tɛyɛ́ɛ a pəŋi, tɛdɛʼkáaboófanyan pɛbán. Kɔmɔɛ́d lɛ́ tɛyɛ́ɛ pá koboófanyan lɛ́ tɛlɛ pɔɔ́n pá maʼtom. Tɛyɛ́bomɔ́ɔ́lɔ́nɛ agá wɔnɔ́ ná ŋŋí a pɔɔ́n ándɛ ɔ́ɔmɔɔlɔnɛ pɔɔ́n pə́ə́ŋ.

⁸Nnyɔ́ŋánán yəəs na pəŋi ɛyɛ́bɛyɛ́ɛ́lɛ lɛ́ adɛ́njaŋ əgín Tɔsɔm Tólaŋ tó Táán tólɛ́ na tólɛ́ aa tɛ́boólɔɛgɛnɛɛ́, ɔmbɔ́ kɛ́yɛ́ɛnɛn lɛ́ tiɛ́ʼkɛn ɔlaa wə́ə́s a kidíídí kɛáŋan, tɛyɛ́ɛ págɛɛ́ʼkɛn lɛ́ tɛyɛ́boonyɔ́ŋɛn a kúfuʼ.

⁹Pomóŋŋí, polɛ agaáyɔ́ɔ́ŋɛ ntɔ́b ngim yɛ́ tɛyáyɛ́ʼkɛ́nɛ́ɛ́, na wɔnɔ́ ná tɛ́yɔ́dɔ́ʼtɔ́mɔ́nɛ́ɛ́ pumog a pigólí kɛnɛŋ kɛ́ tɛyɛ́ɛ a pəŋi. Tɛyɛ́ɛ əgugud na udúg na wɔɔ́s agɛɛlɛ lɛ́ tɛdɛɛ́bonóɛn wɔnɔ́ ná tɛyɛ́ɛ agoboólɔɛgɛnɛ Tɔsɔm tó Táán.

¹⁰Pəŋibáamɔɛ́d polɛ wɛ́sɛnɛg a ɔlaa wó poyɛ́bɛɛdála tɛálaa na pəŋi. Ɔmbɔ́ Táán tɛn alɛ wɛ́sɛnɛg lɛ́ tiyə́siə́díí na pəŋi pəə́liʼtiniʼ a ombod wó óyɛ́ɛ sáád, kibuu fiɛ́d, yoom ɛ́ mɔɔd kɛbɛɛ́bɛn a yɛ́lɛ́ fiɛ́d.

¹¹Poálɛŋ tɛn lɛ́ tiyə́siə́díí na mɔɔd ungim a kɛgaágadɛ kɛáŋan wɔnɔ́ ná sɛ a pɔɔ́n alɛɛ́ əgəə́siəd na pɔɔ́n pə́ə́ŋ.

¹²Tiyíbulə́bən, tɛmábonásɛ nkó. Tɛyɛ́ɛ agobodɛ́ananɛ, tíyiʼkini kubiʼti pɛnɛŋ wɔnɔ́ pɛnɛŋ lɛ́ puə́siəd wɔnɔ́ ná kiə́gə́mmi Táán, nyɔ́lɛ́ nyɔ́ alɛɛ́ agoboodɔ́ŋɔn lɛ́ púim əsiəd ngab a Nɛlaamɛʼ niə́ŋ na a nugəm nuə́ŋ.

¹³Táá kɛbán kímmú tɛn kɛ́ tɛlɛɛ́ əgusoyidəni Táán pɛnɛŋ piim a kɛ́lɛ́ aa kɛ́ɛnɛ kɛ́lɛɛ́ lɛ́: Ná tiyíím abodɛ́anɛ Tɔsɔm tuə́ŋ, poyóób tólɛ́, pumə́yəə́liʼtini tɛn tólɛ́. Pudiʼkə́əsiəd tólɛ́ wɔnɔ́ pɛbán pɛ́ pɔɔd pálɛanɛɛ́ na pɛ́lɛ́, ndóo. Puyə́líʼtíníí tólɛ́ lɛ́ tólɛ Tɔsɔm Tólaŋ tó Táán. Kɛ́lɛ fɔ́lɔ́b tɛn náan lɛ́ tólɛ Tɔsɔm Tólaŋ tó Táán. Tólɛ tɛn tólɛ əgugud a kɛgaágadɛ kɛáŋan kɛ́ pəŋi pəə́liʼtiniʼ.

¹⁴Pomóŋŋí, a ɔlaa wááŋan a Yə́sus Kilíʼtus, puíyə́ə́n ongoo wó ɛgɔny ɛ́ pəə́liʼtiniʼ Táán pá a Siudə́ə. Nkə kɛ́ kɛ́yáyɛ́lɛ́ɛ́ na pɔ́lɛ́, kɛ́lɛ́ kɛ́go tɛn aa kɛ́lɛɛ́ agaáyɛ́ɛlɛ na pəŋi. Ntɔ́b yɛ́ Yúdɛn ɛyɛ́bonɛ́ɛ́yɛ́ pɔ́lɛ́, yɛ́lɛ́ ɛgo aa pɔɔ́npásɛ pááŋan páyɛ́bonɛ́ɛ́yɛ tɛn pəŋi[6]

¹⁵Yúdɛn ɛyóóna palɔɛgɛʼ pɛbán pá Táán pá kalaʼ. A ngim yɛ́ɛy, pɔsɔ́g tɛn pə́mmú pámóón Sə́dúk Yə́sus. Pɔ́lɛ́ tɛn aa pə́yíbilóódi ŋwɛ́g[7] Táán ɔdɛɔ́gɔ na tɔnyɔ́g na pɔ́lɛ́. Pɔ́dɛɔ́gɔ tɛn a uŋóón na ungim.

¹⁶Pálɛ əguunə lɛ́ tɛdɛndɔɛ́gɛ́nɛ pɛnɔɔŋɛʼ Tɔsɔm Tólaŋ lɛ́ Táán alɛŋ koboyɔ́ɔyɛ. A niɛlɛ nɛ́ɛn, pálɛ əguyə́əgi ondáŋ wɔ́ɔ́bɔn ó mabɛ́. Náa, kɛbán kímuʼ, a komananɛ, ilúún ɛ́ Táán íyíbudə́ə́ŋə́nən əgín[8]

¹⁷Pomóŋŋí, a noá na pəsi, nɛádanan niə́s na pəŋi nɛ́dɛʼkɛ́ɛ nɛádanan nɛ́ kúfuʼ, ndóo. Kɛ́lɛ lɛ́, a noá na nkó, polɛ laálá na pəsi, náa, a ɔʼtɛ́m wə́ə́s a kaadɛ, polɛ ndúmiʼ. Tɛlɛ agɛɛlɛ nkə kiim kɛ́ kíəgəə́yúunə agɛɛlɛ lɛ́ tíim aboodála kə́mmú, lɛ́ tɛlɛ na njaan kɛ́fɔlɛ́ na pəŋi.

¹⁸Kólɛ́ aa tɛyɛ́ɛ anyɔ́ŋɛn lɛ́ ná timímbuúlíni káag a pəŋi. Mɛɛ́nyɔ́amɔɛ́d Póol, njáfɛ́gɛ́ɛ́ kiim pɛnɛŋ wɔnɔ́ pɛnɛŋ náa, Sáʼtan ɛdɛbɛyáʼkɛ́nɛ.

¹⁹Na pəŋi tɛn aa tɛlɛɛ́ agomɛna pɛda. Na pəŋi aa tɔnyɔ́g tuə́s tólɛɛ́ tɛn. Ná Sə́dúk wəəs Yə́sus alɛ́ɛ́ kimbuúlini, mbə́gidən yəəs a udi wə́ə́ŋ áa yɛ́ɛy tɛn pəŋi.

²⁰Ɛɛ́ɛ a fɔ́lɔ́b, a pəŋi aa nugəm nuə́s nólɛɛ́. Pəŋi aa polɛ́ɛ́ kɛbɛyɛ́ʼkɛnɛɛ́ tɔnyɔ́g!