Read Yambeta 1 Təsaloníig 3 Bible Online

1 Təsaloníig 3 - Yambeta bible

1 Təsaloníig 3

¹A komananɛ, tɛdɛʼkɛ́ɛ kə́mmú págaáʼkɛ kobóŋan. Tɛáság kusəə agá lɛ́ kɔŋɛʼ tɛ́lɔb a Aʼtɛ́ɛn pəsibə́əsíŋ[9]

²Timíim tɛ́bodómɛn móŋŋí wəəs Timoʼtə́ə, nyɔ́lɛ́ nyɔ́ alɛɛ́ əgugudin Táán ondáŋ úmmuʼ na pəsi, agolɔɛgɛ Tɔsɔm Tólaŋ tó túəsəə kɛbán kɛ́ Kilíʼtus. Tɛmámoodóm lɛ́ yíim aboogónɛ, áaboónasɛ nkó a nɛag nɛ́ poágɛ́nɛ́ɛ́ oʼto na Táán.

³Náan kɛ́agɛɛlɛ lɛ́ ntɔ́b yɛ́ polɛɛ́ na yɛ́lɛ́ nɛ́gɔŋ, ɛdɛnyɛ́ɛ́lɛ lɛ́ úmmuʼ a ondáŋ wááŋan ə́suuli ɔmbɔg. Poálɛŋ pəŋibáamɔɛ́d lɛ́ ntɔ́b wɔnɔ́ yɛ́ɛy, igóódi lɛ́ ɛ́bɛɛ́boan.

⁴Ná tɛyɛ́ɛ a pəŋi, tɛɛ́yáŋ abodɛ́anɛ əgín lɛ́ pálɛ́ɛ́ kɛbɛnɛ́ɛyɛ ntɔ́b. Kɛ́lɛ́ kɛ́go aa kɛ́ɛg kɛ́lɛɛ́ agaáyɛ́ɛlɛ wɔnɔ́ ná polɛɛ́ palɛŋáán kɔŋɛʼ.

⁵Wɔnɔ́ ná ntɛʼkɛ́ɛ ogaáʼkɛɛ́ kiiʼkini koboŋ, kólɛ́ aa mbíim ntom Timoʼtə́ə lɛ́ yíim, ádála kəə́liʼtiniʼ koáŋan wɔnɔ́ ná kólɛɛ́ agodáŋana. Njɛ́ɛ agodammana lɛ́ Uməlíg alɛ ugubulígə, pigólí piim pɛ́ tɛyɛ́ɛ́lɛ píisuu məní.

⁶Náa, nɛ́gɔŋ yɛ́ɛnɛ, mədúg mádɛ́san miíŋ wɔnɔ́ ná Timoʼtə́ə əyímbuúli. Əmə́biyímbuúlíni[10] na Tɔsɔm Tólaŋ wɔnɔ́ ná kɛ́lɛɛ́ agolɛŋ kodáŋana na pəŋi a noá na kəə́liʼtiniʼ, na a noá na nnyɔ́ŋánán yɛ́ polɛɛ́ na yɛ́lɛ́. Amábɛdɛánɛ lɛ́ polɛ agɛbɛ́yáyɔ́ɔ́ŋanɛ əgín na tɔnyɔ́g. Polɛ na njaan yɛ́ɛnɛ lɛ́ ná pomábɛɛdála. Wɔnɔ́ ná pəsi tɛn tɛlɛɛ́ na njaan yɛ́ɛnɛ lɛ́ ná tɛmáboodála pəŋi.

⁷Pomóŋŋí, kəə́liʼtiniʼ koáŋan kómábɛnásɛ pəsi nkó, ɔmbɔ́ wɔnɔ́ ná tɛlɛɛ́ kɔ na wɛɛ́y ungim, na ntɔ́b ngim.

⁸Náan aa nɛ́gɔŋ yɛ́ɛnɛ tɛándɛɛ́ kə́mmú a ɔlaa lɛ́ puə́gumənən əgín na toɛn, a nɛálad nɛáŋan na Sə́dúk.

⁹Pisoyidiʼ pɛ́ tɛlɛɛ́ págɛɛ́ʼkɛn na Táán a kidíídí kɛáŋan, pɛ́ɛsɛʼtan na tɔnyɔ́g tó pobɛyɛ́ʼkɛ́nɛ́nɛ́ɛ́ a udi wə́ə́ŋ, pɛ́dɛɔ́gɔ.

¹⁰Tɛlɛ amoyɔ́sɔ́gɔlɔn na toɛn, na wɔɔ́s na udúg lɛ́ ábɛyɛ́ɛlɛ tíiʼkini koboodála, tíyibənən nkə kɛ́ kíligíí kisug a kəə́liʼtiniʼ koáŋan.

¹¹Táán Sɛ wəəs nyɔ́lɛ́nyɔ́amɔɛ́d, na Sə́dúk wəəs Yə́sus, pə́biíbuənin ngə́ agɛɛlɛ lɛ́ tíim káag.

¹²Sə́dúk yɛ́ɛlɛ lɛ́ pɔ́nyɔ́ŋanan kə́mmú na toɛn, póonyɔ́ŋɛn tɛn ungim, póyɛɛn na nnyɔ́ŋánán na pɔɔd piim wɔnɔ́ ná pəsi tɛyɛ́boonyɔ́ŋɛn pəŋi.

¹³A niɛlɛ nɛ́ɛn, Sə́dúk aagónɛ ntɛ́m yaaŋan agɛɛlɛ lɛ́ wɔɔ́s wó Sə́dúk wəəs Yə́sus alɛ́ɛ́ kimbuúlinií ondáŋ na ungim nyɔ́ alɛɛ́ wəəŋ, pólon Sálábádábádá, yoom ɛ́goboóbɛn a yɛ́lɛ́ fiɛ́d a əngis á Táán Sɛ wəəs.