Read Yambeta 1 Təsaloníig 4 Bible Online

1 Təsaloníig 4 - Yambeta bible

1 Təsaloníig 4

¹Pomóŋŋí, a komananɛ, tɛyɛ́boyáʼkánánɛ wɔnɔ́ ná pugódíí lɛ́ pólaa ɔlaa wó wə́gə́mmi Táán. Polɛ alaa tɛn náan fɔ́lɔ́b. Tɛmáboyɔ́sɔ́gɔ́lɔ́nɛ́ɛ́ a niiŋ nɛ́ Sə́dúk Yə́sus. Timə́budúmin nilu a nsí, póɛn yuudi na ɔlaa wóow agaáyɛn náan.

²Kɛ́lɛ lɛ́ pəŋi, poálɛŋ ndə́b ngim yɛ́ tɛyɛ́boyɛ́ʼkɛ́nan, ndə́b yɛ́ yə́əgiim na Sə́dúk Yə́sus.

³Nkə kɛ́ Táán alɛɛ́ anyɔ́ŋɛn aa kɛ́ɛnɛ kɛ́lɛɛ́ lɛ́: Póɛn tóbó tóbó a oʼto wə́ə́ŋ, puə́gili pɛɔg,

⁴pólaa na pagán pááŋan a moááŋ, na nnyáádɛ́,

⁵pudiə́lísíí lɛ́ púdə́əŋ a nkə kɛ́ pumog pólɛɛ́ anyɔ́ŋɛn, wɔnɔ́ ná ándɛ pɔɔd pá pándɛŋɛnɛɛ́ Táán páagɛɛlanɛ.

⁶Mɔɔd na mɔɔd adɛnnɛ́ móŋŋí a ambaan yisí, adɛyɛ́moyɛ́ɛ́lɛ́nɛ ɔʼtɛ́m wó ɔmbɛ́ a kɛbán wɔnɔ́ kɛ́ɛg lɛ́ Sə́dúk adɛndɛ́ɛ́ kudiŋ əngiŋ na pɔɔd pá páagɛɛlanɛ mabɛ́ móom náan, əgín wɔnɔ́ ná tɛyɛ́bodɛánɛ, tɛmáyɛboyááganan mbaŋ kɔŋɛʼ kɔŋɛʼ.

⁷Kɛ́lɛ lɛ́, Táán adɛʼkáabɛɛdɔ́ŋɔn lɛ́ tíləndin a pinig, ndóo. Ayɛ́bɛɛdɔ́ŋɔn lɛ́ tíɛn pamoáŋáán.

⁸Kólɛ́ aa kɛ́lɛɛ́ lɛ́, mɔɔd nyɔ́ əə́fə́gídi oʼto na tɔgɛ́ɛ́ tóod, ogóódi kolɛŋ lɛ́ adɛ́njaŋ na mɔɔd aa əə́fə́gídi oʼto, ndóo, na Táán. Yɛ́lɛ́ yɛ́ yaáboyɛ́ʼkɛn Uŋun wə́ə́ŋ wó Ufúlúʼtú.

⁹A nkə kɛ́ kɛ́adɛ́ʼtɛg nnyɔ́ŋánán yɛ́ igódíí kɛɛn na pɔɔd pá pálɛɛ́ a kəə́liʼtiniʼ, kídíəguunə lɛ́ páyaŋ kubuúdilən a yɛ́lɛ́ lɛ́ Táán nyɔ́lɛ́nyɔ́amɔɛ́d əyíbulóódi wɔnɔ́ ná pugódíí kɔnyɔ́ŋanan.

¹⁰Náan kɔmɔɛ́d áa polɛɛ́ alaa na pomóŋŋí pə́ə́s piim pá a Masɛdowáan ngim[11] Náa pomóŋŋí, tɛaboyɔ́sɔ́gɔlɔn lɛ́ póɛlɛ agaáyɛn náan.

¹¹Əgín wɔnɔ́ ná tɛyɛ́bodɛánɛ, poágɔ́nɛgɛ kolaa a yəə́b, podɛsɔ́d a pɛbán pɛ́ pɛ́dɛ́abodɛ́ʼtɛgɛɛ́, poásɔɛ́lɛdɛd kɛɔsɛn a udi agɛɛlɛ lɛ́ pónɛ́ɛnɛ.

¹²Puməʼkəə́siəd náan, pɔɔd pá pádɛ́njáágɛ́ɛ́ oʼto na Kilíʼtus pə́əbuúsiəd wɔnɔ́ pɔɔd, pəŋi podɛágɛɛn tɛn kɛnó kɛ́ mɔɔd.

¹³Pomóŋŋí, a kɛbán kɛ́ɛnɛ kɛ́ pá píígú, tɛdɛɔ́gɔ anyɔ́ŋɛn lɛ́ ná poɔ́lɔ́b suúúm wɔnɔ́ pɔɔd pá pɔ́dɛɔ́gɔ agomɛnaá pɛda na ɔlaa ó pɛnɛŋ piim. Tɛanyɔ́ŋɛn lɛ́ pəŋi pólɛŋ fɔ́lɔ́b yɛ́ ɛlɛɛ́ kɔ.

¹⁴Ɛɛ́ɛ, pəsi timə́líʼtíníí lɛ́ Yə́sus yiígú, amáyoóndɛg. Timə́líʼtíníí tɛn lɛ́ Táán alɛ́ɛ́ koóndɛgɛ pá páyáág oʼto na Yə́sus. Alɛ́ɛ́ kubuúbulid ondáŋ na nyɔ́lɛ́, Mɔɔ́n wəəŋ.

¹⁵Táá nkə kɛ́ timíim aboólɔɛgɛnɛ aa kɛ́ɛg aá! Kɛ́lɛ nkə Sə́dúk nyɔ́lɛ́nyɔ́amɔɛ́d yiísə́ə́ na unuʼ wə́ə́ŋ, ɔnɔ́: Wɔɔ́s wó nyɔ́lɛ́ alɛ́ɛ́ kimbuúlinií, pəsi pá tɛlɛ́ɛ́ kɛɛnɛɛ́ a ɔlaa a kɛnɛŋ kɛ́ɛg tɛdɛndɛ́ɛ́ koyaŋ abag a mɔɛn na pɔsɔ́g pá píígú.

¹⁶Ná kɛnɛŋ kɛ́go kɛ́ɛg kɛ́lɛ́ɛ́ kiimií əgiig, Sə́dúk alɛ́ɛ́ kodɛ́anɛ na nkúm ɛ məŋun mə́ə́ŋ má maʼtom lɛ́ ɛ́sásɛd, ɛgo isə́ə́ ná Sə́dúk nyɔ́lɛ́nyɔ́amɔɛ́d yíim ádɛ́ɛmɛn kɔ́gɔ́ɔg a mɔɛn, ə́suu a nsí. Áay aa pá pííguə́ʼkən pɔ́lɛ́ paágáán oʼto na nyɔ́lɛ́ pálɛ́ɛ́ koyaŋ əgiim póndɛg.

¹⁷A ngim yɛ́ɛy aa Táán alɛ́ɛ́ kɛbɛbágɛɛ́ pəsi piim a mɔɛn, ondáŋ na pɔ́lɛ́. Náan, tɛlɛ́ɛ́ kɛɛn na Sə́dúk pɛnɛŋ piim[12]

¹⁸Poáyɛ́ngɛg nkə kɛ́ɛnɛ kɛ́ mbə́səə, poágaánasanɛ nkó pəŋi na pəŋi na tólɛ́ aá!