Read Yambeta 1 Təsaloníig 5 Bible Online

1 Təsaloníig 5 - Yambeta bible

1 Təsaloníig 5

¹A kɛbán kɛ́ nimbuúlini nɛ́ Sə́dúk, kídíəguunə lɛ́ tíiʼkini kubuúdilən kə́mmú agobodɛ́anɛ naanɛ́g, oó lɛ́ a kɛalɛn igə aa pɛbán pɛ́ɛb pɛ́lɛ́ɛ́ kaásánɛ́ɛ́.

²Kɛ́lɛ lɛ́, pəŋibáamɔɛ́d poálɛŋ kɔŋɛʼ kɔŋɛʼ lɛ́ wɔɔ́s wó Sə́dúk alɛ́ɛ́ kimbuúlinií, ólɛ́ɛ́ kiim ólon kiʼpus wɔnɔ́ ná ándɛ ungiíbən əə́búbi pɔɔd kubúbiə́n na udúg[13]

³Aláa pɔɔd pɔ́ndɔɔsɔyɔ pɔ́nɔ́: «Wóó! Nigúu nɛ́lɛ yəə́b ɛ́ɛɛ́, inyuunyugiʼ ɛ́dɛɔ́gɔ[14]!» A kɛnɛŋ kɛ́ɛg aa pálɛ́ɛ́ kaálɛ́mbɛdɛɛ́ ná ntɔ́b yəə́ʼkubuyə́súʼkinin. Ɛlɛ́ɛ́ kububúbi əgín wɔnɔ́ ná ándɛ ɔsánɛʼ wə́əbúbi ɔʼkɛ́ɛd o nium. Mɔɔd úmmuʼ na úmmuʼ adɛndɛ́ɛ́ kolɔb lɛ́ ntɔ́b ɛdɛmoóboanɛn.

⁴Náa, a pəŋi pomóŋŋí páam, wɔɔ́s wóow úʼkóodi lɛ́ úbubúbi wɔnɔ́ ná ándɛ ungiíbən əə́búbi pɔɔd lɛ́ pəŋi podɛɔ́gɔ a mbin a kaadɛ.

⁵Lɛŋáan lɛ́ polɛ pəŋi piim pɔɔ́n pá pálɛɛ́ a kɛmoámoáŋ, pɔɔ́n pá pálɛɛ́ a wɔɔ́s kwə́ləəŋ. Tɛdɛɔ́gɔ pɔɔd pá udúg, pɔɔd pá pálɛɛ́ a mbin a kaadɛ.

⁶Tidinnímən anɛ́ɛ́n monɔ wɔnɔ́ pɔsɔ́g. Tíɛn əngis ongóm, tiə́gə́ʼkiən a nɛŋo nɛ́ poloʼ.

⁷Pɔɔd pá pə́ənímən monɔ, na udúg aa ándɛ pə́ənímən mólɛ́. Na udúg tɛn aa ándɛ páaŋóaŋan poloʼ, máság koboŋwáŋɛ.

⁸Náa, pəsi, tɛlɛ pɔɔd pá wɔɔ́s. Tigóódi kəə́gə́ʼki a nɛŋo nɛ́ poloʼ. Tínígəən kəə́liʼtiniʼ kuə́s, na nnyɔ́ŋánán yəəs wɔnɔ́ kiob kɛ́ kɛ́agɛɛlɛ lɛ́ nɛɔŋ nɛ́dɛɛ́goosɔ́d. Komɛna kó tɛlɛɛ́ agomɛna pɛda lɛ́ Táán alɛ́ɛ́ kɛbɛyɔ́ɔyɛ kóɛn a nto yəəs wɔnɔ́ ɛdam ɛ́ pɛdá[15]

⁹Kɛ́lɛ lɛ́, Táán ədiʼkə́əbidə́nigi lɛ́ ná tɛ́dála ilúún yə́ə́ŋ, ndóo. Əyíbidə́nígi lɛ́ ná a ngim ɛ Sə́dúk wəəs Yə́sus Kilíʼtus, ábɛyɔ́ɔyɛ.

¹⁰Kilíʼtus yiígú a kidíídí kiə́s, agɛɛlɛ lɛ́, tiɛn ɔmbɔ́ lɛ́ tɛlɛ pəguə́n, ɔmbɔ́ a ɔlaa, tíɛn na nyɔ́lɛ́.

¹¹Kólɛ́ aa pugódíí lɛ́ poánasanɛ nkó pəŋi na pəŋi, púgóomonon tɛn agɛɛlɛ lɛ́ kəə́liʼtiniʼ koáŋan kóɛn yuudi wɔnɔ́ ná polɛɛ́ agɛɛlɛ kalaʼ.

¹²Pomóŋŋí, nkə kɛ́ tɛlɛɛ́ əgubuŋíən kɛ́lɛ lɛ́, póɛn na nnyáádɛ́ na pá Sə́dúk əyííyid lɛ́ pábodáŋananɛ, pɔ́lɛ́ pá pálɛɛ́ əgugud a kɛgaágadɛ kɛáŋan, páaboyááganan mbaŋ.

¹³Póbonyáadɛ na toɛn, póɛn na nnyɔ́ŋánán na pɔ́lɛ́ a oʼto ó pigólí pɛ́ pálɛɛ́ agɛɛlɛ. Pólaa a uŋóón pəŋi na pəŋi.

¹⁴Pomóŋŋí, nkə kɛ́ tiə́buŋíən kímmú kɛ́lɛ lɛ́, pá pálɛɛ́ na ɔlɛáŋ[16], póboyááganan mbaŋ. Pá pálɛɛ́ nsun a ngim, póobogónɛ nkó. Pá pálɛɛ́ palɛbɛ́dáán, póoboónasɛ nkó. Pónóʼtan mɔɔd ungim.

¹⁵Mɔɔd amaʼkoboyɛ́ɛlɛ kɔbɛ́, pudinjúúnə kumuə́gun. Uunə́ən əgín kɛɛlanɛ kɔŋɛʼ pəŋi na pəŋi, na pɔɔd tɛn kɛ́ pɛ́ndɛ́ŋ piim.

¹⁶Póɛn pɛnɛŋ piim a tɔnyɔ́g,

¹⁷ɔ́sɔ́gɔ́lɔ́nɛ́an pɛnɛŋ piim,

¹⁸ɛ́ʼkɛ́naan Táán pisoyidiʼ a pɛbán piim. Taa, nkə kɛ́ alɛɛ́ anyɔ́ŋɛn na pəŋi aa kɛ́ɛg, a pəŋi pá polɛɛ́ paladáán na Yə́sus Kilíʼtus.

¹⁹Pudingwííyi pigólí pɛ́ Uŋun wó Ufúlúʼtú.

²⁰Podɛsɛ́ɛ́dɛ nkə kɛ́ palɔɛgɛʼ pɛbán pá Táán pálɛɛ́ agoboólɔɛgɛnɛ.

²¹Lɛŋáan kufífibəni yoom yiim na nsiŋ, agɛɛlɛ lɛ́ púgumin yɛ́ ɛ́lɛɛ́ ɛŋɛʼ.

²²Poábalɛd kiim kɛ́ kɛ́lɛɛ́ kɛbɛ́.

²³Táán yɛ uŋóón íbufúŋi nyɔ́lɛ́nyɔ́amɔɛ́d a pungə́ puim, ə́əbuúnuŋ a nkə kɛáŋan kiim kɛ́ polɛɛ́, a uŋun wááŋan, a ɛdáányɛ́ yááŋan na a nkó yaaŋan, agɛɛlɛ lɛ́ podɛnjɛ́ɛ́n na ɛgom a wɔɔ́s wó Sə́dúk wəəs Yə́sus Kilíʼtus alɛ́ɛ́ kimbuúlini.

²⁴Nyɔ́ ayɛ́boodɔ́ŋɔn, alɛ́ɛ́ kɛɛlɛ náan lɛ́ nyɔ́lɛ́ adɛágasɛ unuʼ a nkə kɛ́ əə́səə.

²⁵Pomóŋŋí, poɔ́sɔ́gɔlɔn tɛn Táán a kidíídí kiə́s.

²⁶Soyídíən pomóŋŋí pə́ə́s piim, sɔ́g yə́gúlig sɔ́g a igog a nɛ́ niŋŋí aá! Púbuyə́súʼkənən a niə́súʼkənən nɛ́ pɔɔ́n pá niŋŋí.

²⁷A niiŋ nɛ́ Sə́dúk, mbáboyɔ́sɔ́gɔ́lɔ́nɛ́ɛ́, póbanan pomóŋŋí pə́ə́s piim nufuuʼ nóonɛ.

²⁸Mawɔʼ má Sə́dúk wəəs Yə́sus Kilíʼtus mɛ́ɛn na pəŋi aá!