Read Yambeta 2 Təsaloníig 1 Bible Online

2 Təsaloníig 1 - Yambeta bible

2 Təsaloníig 1

¹Mɛ Póol na Silifɛ́ɛŋ na Timoʼtə́ə aa timə́budílən nufuuʼ nóonɛ. Timə́budílən pəŋi ɛgɔny ɛ́ pəə́liʼtiniʼ yɛ́ a Təsaloníig[1], Pəŋi pá polɛɛ́ agoob na Táán Sɛ wəəs, pá pɔ́lɛ́ na Sə́dúk Yə́sus Kilíʼtus.

²Táán Sɛ pɔ́lɛ́ ná Sə́dúk Yə́sus Kilíʼtus páboyɛ́ʼkɛn mawɔʼ na kiwiiyiʼ aá!

³Pomóŋŋí, tigóódi kɛɛ́ʼkɛn Táán pisoyidiʼ pɛnɛŋ piim a kidíídí kɛáŋan. Kɛ́lɛ sáád lɛ́ tíɛlanɛ náan lɛ́ polɛ agɛɛn yuudi kɛ́fɔlɛ́ na kaag oʼto na Táán, nnyɔ́ŋánán tɛn yɛ́ polɛɛ́ na yɛ́lɛ́ a kɛgaágadɛ kɛáŋan ɛlɛ əgín agoyam.

⁴Kólɛ́ aa tɛlɛɛ́ əgubuyə́gidən a igog a udi ó pɔsɔ́g pá a mogony mó pəə́liʼtiniʼ lɛ́ ɔmbɔ́ ná páyɛ́bocɔ́ʼkɔ́nɛ, pámábonɛ́ɛ́yɛ ntɔ́b, poɛ́nóʼtan fiɛ́d kodambɛlɛd, na tɛn lɛ́ poágɛn oʼto a kúfuʼ.

⁵Kɛbán kímuʼ, ntɔ́b yɛ́ɛy ɛlɛ kɛálɛ́ʼkán kɛ́ kióloodi lɛ́ pɛyɔm pɛ́ Táán pɛ́lɛ sáád. Ɛlɛ lɛ́ ná ɛ́boyáánɛ pɔɔd pá fɔ́lɔ́b pá a Nɛlaamɛʼ nɛ́ Táán nɛ́ polɛɛ́ agaánɛ a kidíídí kiə́ŋ.

⁶Fɔ́lɔ́b, Táán alɛ sáád. Alɛ́ɛ́ kɛɛ́ʼkɛn njəʼkə́nə́ní na pá pə́əbuúyəʼkəni pəŋi.

⁷Pəŋi pá polɛɛ́ agonɛ ntɔ́b nɛ́gɔŋ, alɛ́ɛ́ kɛɛlɛ lɛ́ púoyig ondáŋ na pəsi. Alɛ́ɛ́ kɛɛlɛ náan ná Sə́dúk wəəs Yə́sus əə́ʼkiim ánom kɔ́gɔ́ɔg a mɔɛn na məŋun mə́ə́ŋ má maʼtom má mógódíí toɛn.

⁸Alɛ́ɛ́ kiim a yug yáalola na toɛn, əgiim agɛɛ́ʼkɛn pɔ́nɔ́ɔs na pɔɔd pá pándɛŋɛnɛɛ́ Táán[2], pádɛóbɛn nkə kɛ́ Tɔsɔm Tólaŋ tó Sə́dúk wəəs Yə́sus tólɛɛ́ əgusəə.

⁹Ntɔ́b yɛ́ pálɛ́ɛ́ konɛ aa yɛ́ɛnɛ ɛlɛɛ́ lɛ́: Pálɛ́ɛ́ kuwu a pɛnɛŋ piim, páyɛɛn laálá na Sə́dúk, na toɛn tuə́ŋ tó tólɛɛ́ na nugəm[3]

¹⁰Pɛ́ɛb piim pɛ́lɛ́ɛ́ kaásan a wɔɔ́s wó Sə́dúk alɛ́ɛ́ kimbuúlinií. Wɔɔ́s wóow, alɛ́ɛ́ kimbuúlini lɛ́ ná ungim nyɔ́ aágoob na nyɔ́lɛ́, ə́mugə́midi. Áay lɛ́, pəə́liʼtiniʼ piim pálɛ́ɛ́ komonyáadɛ. Pəŋi tɛn polɛ́ɛ́ kɛɛn a ondáŋ wɔ́ɔ́bɔn lɛ́ puyə́líʼtíníí tɔgɛ́ɛ́ tuə́s.

¹¹Kólɛ́ aa tɛlɛɛ́ ɔgɔɔ́sɔ́gɔlɔn pɛnɛŋ piim a kidíídí kɛáŋan. Tɛlɛ ɔgɔɔ́sɔ́gɔlɔn lɛ́ Táán wəəs áboyɛ́ɛlɛ ɔlaa wááŋan wɛ́ɛn wɔnɔ́ ná ayɛ́ɛ anyɔ́ŋɛn ná ayɛ́boodɔ́ŋɔn. Áboyɛ́ʼkɛn tɛn toɛn tuə́ŋ agɛɛlɛ lɛ́ póɛlɛ kɔŋɛʼ kó poányɔ́ŋɛn, na pigólí pɛ́ poágɛɛlɛ lɛ́ poágɛn oʼto na nyɔ́lɛ́.

¹²Tɛlɛ ɔgɔɔ́sɔ́gɔlɔn náan lɛ́ ná pɔɔd pányáadɛ Táán a kidíídí kɛáŋan, pəŋi póyɛɛn na ngab a nugəm nuə́ŋ lɛ́ polɛ paladáán na nyɔ́lɛ́. Kɛ́lɛ́ɛ́ kaáyɛ́ɛlɛ náan lɛ́ Táán wəəs, pɔ́lɛ́ ná Sə́dúk wəəs Yə́sus Kilíʼtus pálɛ́ɛ́ koboyɛ́ʼkɛn mawɔʼ.