Read Yambeta 2 Təsaloníig 2 Bible Online

2 Təsaloníig 2 - Yambeta bible

2 Təsaloníig 2

¹Pomóŋŋí, a kɛbán kɛ́ɛnɛ kɛ́ nimbuúliniʼ nɛ́ Sə́dúk wəəs Yə́sus Kilíʼtus, na nɛágɔnyɛd niə́s na nyɔ́lɛ́, tɛlɛ əgusəə na pəŋi lɛ́[4],

²ɔmbɔ́ pábodɛ́anɛ lɛ́ táá wɔɔ́s ogo aa wóonɛ wə́ʼkiigií, nto yaaŋan idindióŋ, pudiyə́líʼtíníí. Ɔmbɔ́ pámábodɛánɛ tɛn lɛ́ pɔ́lɛ́ pálɛ palɔɛgɛʼ pɛbán pá Táán, oó lɛ́ Uŋun aa úmə́biyíímin, ɔmbɔ́ pə́səə lɛ́ pəsi aa timə́budílən pɔ́lɛ́ nufuuʼ nóon náan, podɛʼtámmána yoom.

³Pudiyə́líʼtíníí lɛ́ mɔɔd ə́bulígə a ngə́ ɔmbɔ́ ɛyaán lɛ́, a kóonɛ lɛ́ wɔɔ́s wóow údíin wiim əgiig, ɛ́fɔlɛ́ ɛ́ pɔɔd ɛ́lɛ́ɛ́ koyaŋ ədə́əmini oʼto na Táán, ɔmbɛ́ o mɔɔd nyɔ́ alɛɛ́ lɛ́ pə́musíŋini, alɛ́ɛ́ kiim álon.

⁴Alɛ́ɛ́ kaábágɛdɛ, ə́ədə́əmini oʼto na yoom yiim yɛ́ pɔɔd pálɛɛ́ əgusiəd wɔnɔ́ Táán, páanyáadɛ yɛ́lɛ́. Alɛ́ɛ́ kobod ə́əsiəd oʼkɔɔ a Tɛ́mpɛl ɛ Táán ɔnɔ́ nyɔ́lɛ́ aa alɛɛ́ Táán[5]

⁵Podɛɔ́gɔ agaáyɔ́ɔ́ŋɛ lɛ́ mɛ njɛ́bodɛánɛ kɛbán kɛ́ɛg kɛnɛŋ kɛ́ njɛ́ɛ káag a pəŋi ə, ngɔ́ɔ́?

⁶Kɔmɔɛ́d lɛ́ poálɛŋ nkə kɛ́ kígumíníníí ɔmbɛ́ ogo nyóon nɛ́gɔŋ, lɛ́ ná álon əgín ná kɛnɛŋ kiə́ŋ kiə́ʼkiig.

⁷Ɔmbɛ́ aándɛ a pigólí na toɛn tuə́ŋ tó tólɛɛ́ toɔsɛ́gáán. Kíəguunə əgín lɛ́ mɔɔd nyɔ́ əmugúmíníníí nɛ́gɔŋ yáábalɛd,

⁸ɔmbɛ́ yóloodi, ná a ngim yɛ́ɛy, Sə́dúk Yə́sus ámɔɔ́fɛmɛd agomoyóon na kiŋun kiə́ŋ kɛ́ unuʼ. Ɛɛ́ɛ, alɛ́ɛ́ kumusíŋini na kisəə kɛ́ kɛ́lɛ́ɛ́ kiim na nyɔ́lɛ́ ná alɛ́ɛ́ kimbuúlini[6]

⁹A kɛ́ Ɔmbɛ́ o mɔɔd, nyɔ́lɛ́ alɛ́ɛ́ kiim na toɛn tó Sáʼtan. Alɛ́ɛ́ kɛɛlɛ wándáfúul ɛ pɛbán, na mangán əgulígə pɔɔd[7]

¹⁰Alɛ́ɛ́ kɛɛlɛ mbod ɛ pɛbɛ́ pɛ́ pɛbán ngim əgulígə pá pə́ndənímíí ngə́. Póob pə́ənim ngə́ lɛ́ pə́diʼkə́əgəə́liʼtini fɔ́lɔ́b yɛ́ yiígóodi lɛ́ ɛ́boyɔ́ɔyɛ, pádɛʼkáanyɔ́ŋɛn yɛ́lɛ́.

¹¹A oʼto wóow aa Táán amábodómɛn toɛn tó túəbuuními ngə́, túəbudíʼkəni lɛ́ pə́ə́liʼtini pɛnyaʼ.

¹²Náan, ungim nyɔ́ ədiə́gəə́liʼtinií pafɔ́lɔ́b, nyɔ́ aányɔ́ga na kɔbɛ́, yɔ́ɔŋ nsɔ́ɔ́.

¹³Pomóŋŋí, a noá na pəsi, tigóódi lɛ́ tiɛ́ʼkɛnan Táán pisoyidiʼ pɛnɛŋ piim a kidíídí kɛáŋan kɛ́ pəŋi pá Sə́dúk abonyóŋɛ́nɛ́nɛ́ɛ́. A fɔ́lɔ́b kɛ́lɛ lɛ́ Táán əyíbuyííyid lɛ́ ná póɛn pɔɔd pá na oʼto na oʼto[8] pá kɔɔyɛ a toɛn tó Uŋun wó wə́əbufúŋi, na wɔnɔ́ ná puyə́líʼtíníí pafɔ́lɔ́b.

¹⁴Táá nkə kɛ́ ayɛ́boodɔ́ŋɔn a kɛ́lɛ́ aa kɛ́ɛg a ngim ɛ Tɔsɔm Tólaŋ tó tɛyɛ́bodɛánɛ agɛɛlɛ lɛ́ póɛn na ngab a nugəm nó Sə́dúk wəəs Yə́sus Kilíʼtus.

¹⁵Pomóŋŋí, pugóódi anɛ́ɛ́n lɛ́ puə́bis, pólɛŋ kaáyáág a oʼto nkə kɛ́ tɛyɛ́boyáʼkánánɛ a moááŋ, oó lɛ́ kɛ́ tiyíbudílən a nufuuʼ.

¹⁶Sə́dúk wəəs Yə́sus Kilíʼtus nyɔ́lɛ́nyɔ́amɔɛ́d, na Táán Sɛ wəəs nyɔ́ ayɛ́bɛnyɔ́ŋɛn, amáabɛgónɛ nkó a kɔdɛ́ɛ ɔʼtɛ́m kuə́ŋ a pɛnɛŋ piim, amáabɛyɛ́ɛlɛ tɛn lɛ́ tɛ́mɛna pɛda pɛ́laŋ,

¹⁷pə́buúwiiyi ɔʼtɛ́m, páaboogónɛ tɛn lɛ́ ná póɛlanɛ pɛnɛŋ piim kɔŋɛʼ a pɛbán piim pɛ́ poágɛɛlɛ, na a nkə kiim kɛ́ poɔ́sɔyɔ.