Read Yambeta 2 Təsaloníig 3 Bible Online

2 Təsaloníig 3 - Yambeta bible

2 Təsaloníig 3

¹Pomóŋŋí, nɛ́gɔŋ anɛ́ɛ́n, ɔ́sɔ́gɔ́lɔ́nɛ́an Táán a kidíídí kiə́s, agɛɛlɛ lɛ́ tɔgɛ́ɛ́ tó Sə́dúk tóɛn yuudi na ɔʼtɛ́d, pányáadɛ tólɛ́ kɛnɔ kiim wɔnɔ́ ná pəŋi poɛ́nyáádɛ.

²Poɔ́sɔ́gɔlɔn tɛn lɛ́ Táán ábɛyááŋɛn a ɔmbɔg á pɔɔd pá ntɛ́m yɛ́ mbɛ́, pɛbɛ́ pɛ́ pɔɔd lɛ́ adɛ́njaŋ ungim aa yaágɛ́nɛ́ɛ́ oʼto na nyɔ́lɛ́.

³Sə́dúk nyɔ́lɛ́ adɛágasɛ unuʼ, aaboyɛ́ʼkɛn toɛn, ə́əbuúnuŋ lɛ́ Sáʼtan adɛyɛ́boyɛ́ɛ́lɛ yoom[9]

⁴A toɛn tó Sə́dúk, isuŋ ɛ́dɛɔ́gɔ na pəŋi lɛ́ poándagɛɛlɛ nkə kɛ́ tɛlɛɛ́ agobodɛ́anɛ lɛ́ póɛlɛ, polɛ́ɛ́ kɛɛn tɛn yuudi na kɛɛlɛ.

⁵Sə́dúk ádáŋananɛ ntɛ́m yaaŋan lɛ́ ná póɛn na nnyɔ́ŋánán na Táán, póyaáyɛ́ʼkɛn na toɛn wɔnɔ́ Kilíʼtus.

⁶Pomóŋŋí, tɛabodɛ́anɛ a niiŋ nɛ́ Sə́dúk Yə́sus Kilíʼtus lɛ́, Podɛyáládɛ́ɛ́ na pəə́liʼtiniʼ pá pálɛɛ́ na ɔlɛáŋ[10], pəə́liʼtiniʼ pá pádɛányɔ́ŋɛnɛɛ́ kɛɛlɛ nkə kɛ́ tɛyɛ́boyáʼkánánɛ.

⁷Pəŋibáamɔɛ́d poálɛŋ wɔnɔ́ ná pugódíí lɛ́ púyə́ən ongoo wə́ə́s. Ná tɛyɛ́ɛ a pəŋi, tɛdɛʼkɛ́ɛ palɛándɛáŋ pá pɔɔd.

⁸Tɛyɛ́ɛ tidiim tɛ́lɛ́ba moom mó konɛ na mɔɔd. Tɛyɛ́ɛ agaásɔɛ́lɛdɛd kɛɔsɛn, tɛɔ́gɔɔ́dɔʼtɔmɔnɛ. Tɛyɛ́ɛ əgugud na udúg na wɔɔ́s agɛɛlɛ lɛ́ tɛdɛnjɛ́ɛ́n kɛnó kɛ́ mɔɔd na mɔɔd a ondáŋ wááŋan[11]

⁹Ná tɛyɛ́ɛ agɛɛlɛ náan, adɛ́njaŋ lɛ́ tɛdɛʼkɛ́ɛ na filí yɛ́ɛnɛ lɛ́ ná pomábɛyɛ́ʼkɛ́nan moom, ndóo. Tiɛ́nyɔ́ŋɛn agá kubuúloodi wɔnɔ́ ná pəŋi tɛn pugódíí kɛɛlɛ.

¹⁰Kɛ́lɛ lɛ́, ná tɛyɛ́ɛ a pəŋi, tɛyɛ́bodɛánɛ lɛ́ mɔɔd nyɔ́ adɛányɔ́ŋɛnɛɛ́ kugud, adɛnnɛ́ɛ́nɛ tɛn[12]

¹¹Náa tɛlɛɛ́ agoob lɛ́ pə́mmú pálɛ áay a ondáŋ wááŋan pá pálɛɛ́ na ɔlɛáŋ[13], pánnyɔ́ŋɛn kɛɛlɛ yoom, əgín kosɔ́dɔn a pɛbán pɛ́ pɛ́dɛ́abodɛ́ʼtɛgɛɛ́.

¹²A niiŋ nɛ́ Sə́dúk Yə́sus Kilíʼtus, tɛadɛ́anɛ na pɔsɔ́g póob náan lɛ́ pə́gud a yəə́b, páámɛ́nɛ pɔ́lɛ́báamɔɛ́d.

¹³A noá na pəŋi pomóŋŋí, podɛʼtɔ́m kɛɛlɛ kɔŋɛʼ.

¹⁴Mɔɔd amaʼkɛɛn a ondáŋ wááŋan nyɔ́ adɛányɔ́ŋɛnɛɛ́ koob nkə kɛ́ɛnɛ kɛ́ tɛlɛɛ́ agobodɛ́anɛ a nufuuʼ nóonɛ, pómoyálɛʼkan kɔŋɛʼ kɔŋɛʼ, pómoyáág a ɛbá, yɔ́ɔŋ oʼto kono.

¹⁵Kɛbán kímuʼ pudiímusíəd wɔnɔ́ mɔɔd o kibən, ndóo. Pómoósɔyɔn agá wɔnɔ́ móŋŋí wááŋan.

¹⁶Sə́dúk nyɔ́ alɛɛ́ na kiwiiyiʼ, áboyɛ́ʼkɛn nyɔ́lɛ́nyɔ́amɔɛ́d kiwiiyiʼ pɛnɛŋ piim, na a mbod ngim aá! Sə́dúk yɛ́ɛn na pəŋi piim aá!

¹⁷Pisoyidiʼ pɛ́ɛnɛ, mɛ Póol mɛɛ́nyɔ́amɔɛ́d áa mbə́dilə pɛ́lɛ́ na ombɔg wáam. Əgín náan aa ándɛ ndáamananɛ tufuuʼ tóam tuim. Táá, ombɔg wáam ó kudilə a wóow aá.

¹⁸Mawɔʼ má Sə́dúk wəəs Yə́sus Kilíʼtus mɛ́ɛn na pəŋi piim aá!