Read Yambeta 1 Timoʼtə́ə 1 Bible Online

1 Timoʼtə́ə 1 - Yambeta bible

1 Timoʼtə́ə 1

¹Timoʼtə́ə[1], nufuuʼ nóonɛ, mɛ Póol nyɔ́ ndɛɛ́ mɔɔ́n o maʼtom o Yə́sus Kilíʼtus aa mbə́gudílən nólɛ́. A toɛn tó Táán nyɔ́ ayɛ́bɛyɔ́ɔ́yɛ, na a tó Yə́sus Kilíʼtus nyɔ́ tɛlɛɛ́ agomɛna pɛda na nyɔ́lɛ́ aa ndɛɛ́ mɔɔ́n o maʼtom.

²Olɛ fɔ́lɔ́b mɔɔ́n waam lɛ́ waágɛn oʼto na Yə́sus Kilíʼtus. Ndɛ ɔgɔɔ́sɔ́gɔlɔn lɛ́ Táán Sɛ wəəs na Yə́sus Kilíʼtus Sə́dúk wəəs págoyɛ́ʼkɛn mawɔʼ, págooda mbilígɔɔ́ʼkɔn, pálɛ págoyɛ́ʼkɛn kiwiiyiʼ a ɔʼtɛ́m.

³Ná nyɛɛ́dɛ́ɛ́mɛn áay a Ɛfɛ́ɛs agɛɛn a Masɛdowáan, njɛ́godɛánɛ lɛ́ wɛ ólɔb áay. Nyiísə́ə́ náan lɛ́ pɔɔd pə́mmú pálɛ kɔ áay pá páagaaʼkananɛ Tɔʼtilíin ɛ pɛnyaʼ. Óbodɛ́anɛ lɛ́ pɔ́lɔg nnuʼ yɔɔbɔn, pádɛnjɛ́ɛ́n yuudi na kaaʼkananɛ pɔɔd pɛnyaʼ.

⁴Óbodɛ́anɛ tɛn lɛ́ pə́dinjə́ən pɛbán pɛ́ məʼtəən, na kosɔg kó puog pó pɔɔd. Pɛbán pɛ́ɛb pɛ́lɛ pɛbán pɛ́ píəgiim na məʼtíiyiʼ miíŋ, pɛbán pɛ́ pídíogóminií mɔɔd a ɔlaa wó a ngə́ ɛ Táán. Mɔɔd aalɛŋ nkə kɛ́ Táán alɛɛ́ anyɔ́ŋɛn, ná amáág oʼto na nyɔ́lɛ́.

⁵Tɔgɛ́ɛ́ tóod tólɛ lɛ́ ná tóboyɛ́ɛlɛ, pɛ́ɛn na nnyɔ́ŋánán na pɔsɔ́g, ntɛ́m yɔɔbɔn mmoáŋáán a kaadɛ, fiɛ́d na yoom yɛ́ pə́əgəə́lə́ʼkəni, oʼto wɔ́ɔ́bɔn fɔ́lɔ́b fɔ́lɔ́b na Táán.

⁶Ngab ɛ pɔɔd yimmú yəə́ʼkunim ngə́. Pɔ́dɛɔ́gɔ agɛɛlɛ kə́mmú pɛbán pɛ́laŋ. Pálɛ agosɔyɔ agá pɛbán pɛ́ pɛ́dɛɔ́gɔ a ngə́.

⁷Pálɛ agofɛg lɛ́ pɔ́lɛ́ pálɛ págaaʼkananɛ pɔsɔ́g pɛcɛm pɛ́ Táán, kɔmɔɛ́d lɛ́ pɔ́dɛɔ́gɔ agoob pɔ́lɛ́báamɔɛ́d nkə kɛ́go kɛ́ pálɛɛ́ əgusəə, ɔmbɔ́ tɛn nkə kɛ́ pálɛɛ́ agosɔyɔ na pɛsány piim.

⁸Pəsi, tɛálɛŋ lɛ́ pɛcɛm pɛ́ Táán pɛ́lɛ pɛŋɛʼ. Pɛ́lɛ pɛŋɛʼ ná olɛ agodáŋana na pɛ́lɛ́ wɔnɔ́ ná Táán alɛɛ́ anyɔ́ŋɛn.

⁹Tɛáyɔ́ŋɛan lɛ́ Táán adɛʼkáagɛɛlɛ pɛcɛm a oʼto ó pɔɔd pá pálɛɛ́ alaa wɔnɔ́ ná pɛcɛm pɛ́anyɔ́ŋɛn, ndóo. Ayɛ́ɛ́lɛ pɛ́lɛ́ a pá pɔ́dɛɔ́gɔ agoóbɛnɛɛ́ pɛ́lɛ́, pá pə́ədə́əmini oʼto na nyɔ́lɛ́, pá pɔ́dɛɔ́gɔ na kɛnɛŋ kiə́ŋ, pá páagɛɛlanɛ kɔbɛ́, pá pádɛ́adammanaá Táán, pánnyáádɛ moom mó mólɛɛ́ mufúŋiə́n. Ayɛ́ɛ́lɛ tɛn pɛ́lɛ́ a pá páagoóna pasɛ pɔ́ɔ́bɔn, na a pá páagoóna pa ŋŋí pɔ́ɔ́bɔn, na a pá páagoóna tɛn pɔɔd pándɛŋ.

¹⁰Pɛ́lɛ tɛn a oʼto wó ungim nyɔ́ əə́yə́ən ɔlaa ó pɛɔg, na a panɔ́mɛɛd pá pə́əbúlimən na pɔsɔ́g panɔ́mɛɛd, ɔmbɔ́ lɛ́ pagɛ́ɛd pá pə́əbúlimən na pɔsɔ́g pagɛ́ɛd. Pɛ́lɛ tɛn a pɔɔd pá pálɛɛ́ alɛga pɔsɔ́g pɔɔd agoboyáánɛ pɛɔ́lɛ́. Pɛ́lɛ a pɔɔd pá pálɛɛ́ na pɛnyaʼ, na a pá páadɛ́lɛman mbaasɔ́ yɛ́ mbɛ́. Táán ayáágan pɛcɛm tɛn a oʼto ó pɔɔd pá páagɛɛlanɛ mbod ɛ pɛbán pɛ́ pɛbɛ́ pímmú piim pɛ́ pɛ́alóʼkanɛ Tɔsɔm Tólaŋ.

¹¹Tɔsɔm Tólaŋ tóod tólɛ a ɔmbɔg yáam. Táán nyɔ́ alɛɛ́ isim ɛ́ moom muim mó mólɛɛ́ mɔŋɛʼ, nyɔ́lɛ́ nyɔ́ alɛɛ́ əgugə́mən aa əyícum tólɛ́.

¹²Ndɛ agɛɛ́ʼkɛn pisoyidiʼ na Yə́sus Kilíʼtus, Sə́dúk wəəs nyɔ́ əyíʼtə́nígi lɛ́ nyɛ́ɛlɛ pigólí piə́ŋ, amɛ́ɛ adála tɛn lɛ́ ndɛ ogɛɛlɛ pɛ́lɛ́ ɔʼtɛ́m úmmuʼ, amáyɛnyɛɛ́ʼkɛn toɛn tó kɛɛlɛ pɛ́lɛ́.

¹³Ɔmbɔ́ ná kalaʼ njɛ́ɛ nsɔyɛla niiŋ nɛ́ Táán kɔbɛ́, ndáamoodóga, ndə́əyəʼkəni ndɛg yəəŋ. Yə́sus nyɔ́lɛ́ yɛɛ́dála lɛ́ ntɛɔ́gɔ agolɛŋ agá nkə kɛ́ ndɛɛ́ agɛɛlɛ lɛ́, njɛ́ɛ ntɛ́njáág oʼto na nyɔ́lɛ́, aáság kɛɛʼta maan[2]

¹⁴Sə́dúk wəəs ayɛ́ʼtɛ́ɛ́lɛn ɔʼtɛ́m a fug. Náan aa amɛ́nyɛɛlɛ lɛ́ nyáág oʼto na Yə́sus Kilíʼtus, mmɔnyɔ́ŋɛn tɛn.

¹⁵Nkə kɛ́ɛnɛ kɛ́ ndɛɛ́ əgusəə, kɛ́lɛ kɛbán kɛ́ kɛádɛ́ɛ́ lɛ́ ungim yə́liʼtini kɛ́lɛ́ na ɔʼtɛ́m wə́ə́ŋ ungim. Kɛ́lɛ kɛbán kɛ́ fɔ́lɔ́b. Kɛ́lɛ lɛ́, Yə́sus Kilíʼtus əyíím a nsí yɛ́ɛnɛ lɛ́ yíim ɔgɔɔyɛ pɛɛlɛ mabɛ́. Mɛ, mbálaŋánan agɛɛlɛ kó mabɛ́.

¹⁶Kɛbán kímuʼ, a oʼto wóow aa Táán yiísiə́d maan na mɛ. Yɛɛ́nyɔ́ŋɛn lɛ́ na mɛ nyɔ́ ndɛɛ́ kɛlaŋanan agɛɛlɛ kó mabɛ́ aa Yə́sus Kilíʼtus ólodií wɔnɔ́ ná alɛɛ́ na ɔʼtɛ́m ó konóʼtan. Óloodi wólɛ́ na pɔɔd pá pálɛ́ɛ́ kaágɛ́ɛ́ oʼto na nyɔ́lɛ́ a mədúg má málɛ́ɛ́ kiimií, pɔ́yɔɔŋ ɔlaa ó pɛnɛŋ piim.

¹⁷Táán, nkúm yɛ́ ɛlɛɛ́ alaamɛ a pɛnɛŋ piim, nyɔ́lɛ́ nyɔ́ adɛndɛ́ɛ́ kugúú, nyɔ́ mɔɔd adɛádálaá, nyɔ́lɛ́nyɔ́əsíŋ nyɔ́ alɛɛ́ Táán, kɛ́lɛ lɛ́ pómonyáadɛ, poámoyɛ́ʼkɛn nugəm a pɛnɛŋ piim, Aamɛn.

¹⁸Wɛ, mɔɔ́n waam Timoʼtə́ə! Tɔgɛ́ɛ́ tóonɛ, ndɛ agosɔyɔ tólɛ́ na wɛ əgín wɔnɔ́ ná palɔɛgɛʼ Tɔsɔm pá Táán Píísə́ə́ kalaʼ a kidíídí kɛáŋ. Udinjə́bə́líí tólɛ́ agɛɛlɛ lɛ́ wɛ́ɛn na pigólí pɛáŋ kɔŋɛʼ.

¹⁹Tod əgín yuudi na kaag oʼto na Táán, ɔʼtɛ́m wááŋ wɛ́ɛn yəə́b, fiɛ́d na kɛbán kɛ́ kəə́lə́ʼkəni. Pɔɔd pə́mmú pádɛányɔ́ŋɛn kuyə́ən ngə́ ɛlaŋ yɛ́ɛy, náan aa pə́ʼkuliogií ɔʼtɛ́m na Táán.

²⁰Pa Imənə́ə pɔ́lɛ́ na Alɛsándɛlɛ pálɛ a ondáŋ ó pɔɔd póob pá pə́ndigií əguyə́ən ngə́ ɛlaŋ. Mbə́ŋíən lɛ́ Táán ə́buudi, Sáʼtan áboyɛ́ʼkɛn njəʼkə́nə́ní[3] ná pɔ́ɔŋ nsiŋ, pə́diyíʼkíni kosɔyɔ kə́mmú niiŋ nɛ́ Táán kɔbɛ́.