Read Yambeta 1 Timoʼtə́ə 2 Bible Online

1 Timoʼtə́ə 2 - Yambeta bible

1 Timoʼtə́ə 2

¹Yoom ɛ́ na oʼto na oʼto yɛ́ ndáadɛ́ananɛ na pɔɔd ɛ́lɛ lɛ́, pɔ́ɔ́sɔ́gɔlɔn Táán a kidíídí kɛ́ mɔɔd ungim. Pə́muŋíənə moom, pámoyálɛɛlɛn, páamoyɛ́ʼkɛnan pisoyidiʼ a kidíídí kɛ́ ungim.

²Pámoyɔ́sɔ́gɔlɔn tɛn a kidíídí kɛ́ puʼkúm, na a kɛ́ ungim nyɔ́ alɛɛ́ na nɛlaamɛʼ lɛ́ ná tɛ́laa a yəə́b na a uŋóón, tɛágoóbɛn Táán, tiə́gəə́siəd kɔŋɛʼ.

³Kɔɔ́sɔ́gɔlɔn Táán a kidíídí kɛ́ mɔɔd ungim, táá nkə kɛ́ kɛ́lɛɛ́ kɛŋɛʼ na nyɔ́lɛ́ aa kɛ́ɛg, kíəmugə́mmi tɛn, nyɔ́lɛ́ nyɔ́ aábɛyɔ́ɔyɛ,

⁴nyɔ́ alɛɛ́ anyɔ́ŋɛn lɛ́ ungim yɔ́ɔy[4], áalɛŋ nkə kɛ́ kɛ́lɛɛ́ fɔ́lɔ́b.

⁵Kɛ́lɛ lɛ́, Táán alɛ súg úmmuʼ. Mɔɔd úmmuʼ tɛn nyɔ́ alɛɛ́ mándad a kɛgaágadɛ kɛ́ɛnɛ lɛ́ na Táán na pɔɔd, alɛ Yə́sus Kilíʼtus nyɔ́lɛ́nyɔ́əsíŋ

⁶nyɔ́ ayáyɛ́ʼkɛ́nɛ́ɛ́ a kugu lɛ́ ná yááŋɛn ungim. A kɛnɛŋ kɛ́go kɛ́ Táán yɛɛ́nyɔ́ŋɛn, yiílóódi a niɛlɛ nɛ́ɛn lɛ́ Táán alɛ anyɔ́ŋɛn kɔɔyɛ ungim[5]

⁷A kólɛ́ aa ayɛ́ɛ́lɛ lɛ́ nyɛ́ɛn mɔɔ́n wəəŋ o maʼtom, ndɔɛgɛ Tɔsɔm Tólaŋ[6] Oʼtom wó ayɛ́nyɛɛ́ʼkɛn ólɛ lɛ́ nyáaʼkananɛ pɛnɔɔŋɛʼ pɛ́ pɛ́dɛɔ́gɔ Yúdɛn, Tɔsɔm tó fɔ́lɔ́b ná páág oʼto na nyɔ́lɛ́. Nkə kɛ́ ndɛɛ́ əgusəə kɛ́lɛ fɔ́lɔ́b, kɛ́dɛɔ́gɔ pɛnyaʼ.

⁸Kólɛ́ aa ndáanyɔ́ŋɛn anɛ́ɛ́n lɛ́ kɛnɔ kiim kɛ́ pálɛɛ́, panɔ́mɛɛd pɔ́ɔ́sɔ́gɔlɔn Táán, ntɛ́m yɔɔbɔn a kaadɛ mmoáŋáán, páayɛbɛlɛdanɛ ɔmbɔg a mɔɛn[7], fiɛ́d kuliŋ, fiɛ́d masáŋ.

⁹A noá na pagɛ́ɛd, ndɛ anyɔ́ŋɛn lɛ́, pə́ndəgəə́níig kilə́ə́, pə́ə́níig kɛ́ kɛásɛʼtan a niə́níig nɛ́ ɔʼkɛ́ɛd, adɛ́njaŋ kɛ́ kɛ́agɛɛlɛ lɛ́ oʼto ó mɔɔd ólɛ́aŋ, pə́ə́suuli nkó yɔɔbɔn a nsí. Pámaʼkaábá oʼto, pádɛnjábáá ombod wó ólɛɛ́ lɛ́ əgín pɔ́lɛ́ aa pábodálaá. Pə́dinjə́nígə́níí palanga pá kóol, pasɛŋ pá kóol, muyə́njə́lə́ŋ mó kóol, ɔmbɔ́ lɛ́ pa pilə́ə́ pá mɔɔnɛ́ miíŋ[8]

¹⁰Kɔdɛ́ɛ koɔ́bɔn kúgóódi kɛɛn a pɛbán pɛ́laŋ pɛ́ páagɛɛlanɛ. Taa, nkə kɛ́ pagɛ́ɛd pá pɔ́nɔ́ pɔ́lɛ́ páadammana Táán pógódíí lɛ́ pɛ́ɛlɛ aa kɛ́ɛg.

¹¹A kɛnɛŋ kɛ́ kaaʼkananɛ, pagɛ́ɛd pógóódi lɛ́ pə́gumin nnuʼ yɔɔbɔn, póób koóbáán na ntóɛŋ na nnyáádɛ́ ngim.

¹²Ntiə́gəə́liʼtini lɛ́ ɔʼkɛ́ɛd ádɛ́lɛm lɛ́ agaaʼkananɛ panɔ́mɛɛd, ɔmbɔ́ lɛ́ aaboólaamɛ, ndóo! Pagɛ́ɛd pógóódi lɛ́ pə́ləndən yəə́b.

¹³Kɛ́lɛ náan lɛ́, ná Táán ayɛ́ɛ agɛɛlɛ mɔɔd, Ádam aa yɛɛ́yáŋ agɛɛlɛ, aáság kudíin yɛɛlɛ Ɛ́fa a ngim.

¹⁴Yoom tɛn yímmú yɛ́ yóoloodi lɛ́ ɔʼkɛ́ɛd ɔdɛɔ́gɔ na toɛn ɛ́lɛ lɛ́, Ɛ́fa nyɔ́ alɛɛ́ ɔʼkɛ́ɛd áa Sáʼtan yiílígə, aáság kɛɛlɛnɛ Táán oʼto wó ɔnnasáŋ, adɛ́njaŋ Ádam nyɔ́ alɛɛ́ ɔnɔ́mɛɛd[9]

¹⁵Ɔmbɔ́ náan, kɛ́lɛ lɛ́ pagɛ́ɛd pálɛ́ɛ́ kubíənə pɔɔ́n, Táán áaboyɔ́ɔyɛ a oʼto wóow, ná pámɛ́ɛn yuudi na kaag oʼto na nyɔ́lɛ́, páyɛɛn na nnyɔ́ŋánán na ungim, páagɛɛlɛ nkə kɛ́ kíəmugə́mmi, pə́əgəə́gə́ʼki, fiɛ́d kaábágɛdɛ!