Read Yambeta 1 Timoʼtə́ə 3 Bible Online

1 Timoʼtə́ə 3 - Yambeta bible

1 Timoʼtə́ə 3

¹Nkə kɛ́ɛnɛ kɛ́ mbándabodɛ́anɛɛ́ kɛ́lɛ fɔ́lɔ́b. Kɛ́lɛ lɛ́ mɔɔd nyɔ́ aányɔ́ŋɛn kɛɛn oʼtɛ́lɛm yuudi a yoog ɛ Táán, əmííyid kisig kɛ́ oʼtom.

²Oʼtɛ́lɛm yuudi a yoog ɛ Táán ogóódi kɛɛn mɔɔd nyɔ́ pádɛɔ́gɔɔ́gɔ́dɔɔ́ niə́siəd niə́ŋ, mɔɔd nyɔ́ alɛɛ́ na ɔʼkɛ́ɛd úmmu súg[10] Oʼtɛ́lɛm yuudi oʼkóodi kɛɛn ɛŋo maloʼ, ogóódi kɛɛn na nsiŋ, əə́gəə́siəd a nɛmɔɔd, aálɛŋ kusiəd pɔɔd a noádɛʼ nuə́ŋ na tɔnyɔ́g. Ogóódi tɛn lɛ́ yɛ́ɛn mɔɔd nyɔ́ alɛɛ́ ogaaʼkananɛ pɔsɔ́g.

³Adɛndáŋ kuyə́njən maloʼ koŋo, adɛnjɛ́ɛ́n na nɛgány, ogóódi kɛɛn yəə́b ɛ mɔɔd, kiwiiyiʼ kɛ́ mɔɔd. Ogóódi lɛ́ yɛ́ɛn tɛn mɔɔd nyɔ́ adɛágaágɛ́ɛ́ ɔʼtɛ́m kuíŋ a mɔɔnɛ́.

⁴Oʼtɛ́lɛm yuudi a yoog ɛ Táán ogóódi kɛɛn mɔɔd nyɔ́ alɛɛ́ agolɛŋ kodáŋananɛ yoog yəəŋ ɛ pɔɔd, aágɛɛlɛ lɛ́ pɔɔ́n pámoyóbɛn na nnyáádɛ́ ngim.

⁵Kɛ́lɛ lɛ́, kɛnɛŋ kɛ́ mɔɔd adɛálɛŋ kodáŋananɛɛ́ yoog yəəŋ ɛ pɔɔd, ɔdɛɔ́gɔ tɛn ogolɛŋ kodáŋananɛ ɛgɔny ɛ́ pəə́liʼtiniʼ Táán.

⁶Mɔɔd nyɔ́ yimíníí agaag oʼto na Yə́sus mawa mawa, adɛmbág oʼtɛ́lɛm yuudi a yoog ɛ Táán. Kɛ́lɛ kɛ́ komoyɛ́ɛlɛ lɛ́ yábágɛdɛ, ná agɛɛn amananɛ, yɛ́ɛn na nsɔ́ɔ́ wɔnɔ́ ná Omɔlɛɔ́g ɔyɔ́ɔ́ŋ yɛ́lɛ́.

⁷Oʼtɛ́lɛm yuudi a yoog ɛ Táán ogóódi lɛ́ yɛ́ɛn tɛn mɔɔd nyɔ́ niə́siəd niə́ŋ nɛ́agɛɛlɛ lɛ́ ɔmbɔ́ pandɛŋ Táán pámonyáadɛ lɛ́ náan fiɛ́d páamosɛ́ɛdɛ, ná ə́də́əŋ a kisindiʼ kɛ́ Omɔlɛɔ́g[11]

⁸Padɛáʼkɛlɛ pógóódi tɛn lɛ́ pɛ́ɛn pɔɔd pá páásɛʼtan lɛ́ pányáadɛ, pɔɔd pá pɔ́dɛɔ́gɔ na nnuʼ ɛ́baan. Pádɛnjɛ́ɛ́n moŋo poloʼ, pə́disiə́dín mɔɔd mɔɔnɛ́ a kɛcoo a mɔɛn.

⁹Pógóódi kɛɛn pɔɔd pá pə́ə́súŋíníí a pasáád pá páyɛ́boyásɛ́nɛn a ngə́ ɛ́ pəə́liʼtiniʼ, ɔʼtɛ́m wɔ́ɔ́bɔn a kaadɛ yəə́b, yoom ɛ́ kəə́lə́ʼkəni fiɛ́d.

¹⁰Kɛnɛŋ kɛ́ waányɔ́ŋɛn kudə́nigi mɔɔd tɛáʼkɛlɛ, yaŋ áamoyɛ́ʼkɛn pigólí, ódála wɔnɔ́ ná aágɛɛlɛ pɛ́lɛ́. Oʼtálan ɔsɛd a niɛlɛ nɛ́ pigólí pɛ́ɛb, áay lɛ́ alɛ ogɛɛlɛ pigólí pɛ́ tɛáʼkɛlɛ.

¹¹Pagɛ́ɛd tɛn pá pálɛɛ́ a pigólí pɛ́ɛb, pógóódi kɛɛn pagɛ́ɛd pá pə́əgəə́siəd kɔŋɛʼ, pádiɛn na ŋŋɔ́, pádiɛn tɛn moŋo poloʼ. Pógóódi kɛɛn pagɛ́ɛd pá pálɛɛ́ lɛ́, pə́məʼkusəə kɛbán, páyɛɛlɛ kɛ́lɛ́.

¹²Tɛáʼkɛlɛ igóódi lɛ́ yɛ́ɛn na ɔʼkɛ́ɛd úmmuʼ súg[12], ɛ́yɛɛn mɔɔd nyɔ́ alɛɛ́ agolɛŋ kodáŋananɛ pɔɔ́n pə́ə́ŋ, na ungim nyɔ́ alɛɛ́ a noádɛʼ nuə́ŋ.

¹³Kɛ́lɛ lɛ́, tɛáʼkɛlɛ ngim yɛ́ ɛlɛ́ɛ́ kɛɛlɛɛ́ pigólí piə́ŋ kɔŋɛʼ, pálɛ́ɛ́ komonyáadɛ, ɛ́yɛɛn fiɛ́d na wɛɛ́y lɛ́ yaágɛn oʼto na Yə́sus Kilíʼtus.

¹⁴Timoʼtə́ə oó! Mbə́gudílən nufuuʼ nóonɛ ndáamɛna pɛda lɛ́ ndəgəə́bisig kiim agoóboan.

¹⁵Náa, ɔmbɔ́ nyɛɛn lɛ́ ntiə́bisigin kiim, nkə kɛ́ɛnɛ kɛ́ mbə́dilə a nufuuʼ kɛágoyɛ́ɛlɛ lɛ́ ólɛŋ wɔnɔ́ ná wə́siədií a yoog ɛ pɔɔd ɛ Táán, yoog ɛ pɔɔd yɛ́ ɛlɛɛ́ nɛágɔnyɛd nɛ́ ungim nyɔ́ yaágɛ́nɛ́ɛ́ oʼto na Táán nyɔ́ alɛɛ́ na ɔlaa. Yɛ́lɛ́ yɛ́ igumíníníí Tɔsɔm Tólaŋ, yəə́nuŋ tólɛ́.

¹⁶A fɔ́lɔ́b, isuŋ ɛ́dɛɔ́gɔ. Ɛdɔɔgɛ yɛ́ Táán amábɛmoáŋɛ́nɛ a nɛag nɛ́ tɛmáág oʼto, ɛ́lɛ kɛa kɛ́ kɛdám kɛ́ yoom. Kɛ́lɛ lɛ́: Yə́sus Kilíʼtus nyɔ́ ayáyáánɛ́ɛ́ mɔɔd, Uŋun wó Ufúlúʼtú wóloodi lɛ́ alɛ sáád[13], məŋun má maʼtom má Táán mámámomáʼkánɛ, páálɔɛgɛ Tɔsɔm tuə́ŋ a mɔnɔŋ, piíŋ a nsí pámáág oʼto na nyɔ́lɛ́, Táán ayɛ́moyɛ́ʼkɛn nugəm ná əyímusiə́d a mɔɛn.