Read Yambeta 1 Timoʼtə́ə 4 Bible Online

1 Timoʼtə́ə 4 - Yambeta bible

1 Timoʼtə́ə 4

¹Nkə kɛ́ɛnɛ, Uŋun wó Ufúlúʼtú wísə́ə́ kɛ́lɛ moááŋ. Wísə́ə́ wɔnɔ́: A nɛman nɛ́ nsí, ngab ɛ pɔɔd yimmú ɛlɛ́ɛ́ koʼtɛadɛd ongoo a oʼtɛ́lɛm wó páyáág oʼto. Pálɛ́ɛ́ kuyə́ən agá unuʼ ó pɔɔd pá pálɛɛ́ na məŋun má pɛnyaʼ. Pálɛ́ɛ́ kaag oʼto a pɛbán pɛ́ məŋun má mabɛ́ máagaaʼkananɛ pɔɔd.

²Pálɛ́ɛ́ kəə́di lɛ́ pɔɔd póob, moɔ́ŋɛ́ná pusú móom, pɔɔd pá pɛnyaʼ póob pá pə́ndigi agoóbɛ́ɛ́ oʼto kono, pá ntɛ́m yɔɔbɔn yəə́ʼkuʼtindií, pə́buuními ngə́.

³Pɔɔd póob pálɛ́ɛ́ kaaʼkananɛ pɔsɔ́g lɛ́ kodɔn kódɛɔ́gɔ yoom ɛ́laŋ. Pálɛ́ɛ́ tɛn kugiləni pɔɔd lɛ́ pádɛnnɛ́ moom múmmú, kɔmɔɛ́d lɛ́ ná Táán nyɔ́lɛ́ ayɛ́ɛ́lɛ moom móom, yiísə́ə́ lɛ́ pá pámáág oʼto na Kilíʼtus, pɔ́lɛ́ pá páálɛŋ tɛn fɔ́lɔ́b yɛ́ ɛlɛɛ́ kɔ, pánɛ mɔ́lɛ́ páagɛɛ́ʼkɛn pisoyidiʼ na Táán.

⁴Kɛ́lɛ lɛ́, yoom yiim yɛ́ Táán ayɛ́ɛ́lɛ ɛ́lɛ ɛŋɛʼ[14] Ímuʼ yɛ́ ɛ́lɛɛ́ ɛ́ kodo ɛ́dɛɔ́gɔ. Aádɛ́ɛ́ agá kɛɛ́ʼkɛn pisoyidiʼ na Táán a yoom yiim.

⁵Táán, a tɔgɛ́ɛ́ tuə́ŋ tó nyɔ́lɛ́nyɔ́amɔɛ́d, na a pɛɔ́sɔ́gɔ́lɔ́n pɛ́ pəsi tɛámoyɛ́ʼkɛn tɛn, alɛ agɛɛlɛ lɛ́ muim móɛn mɔŋɛʼ.

⁶Timoʼtə́ə, omaʼkaaʼkananɛ pɛbán pɛ́ɛb náan na pomóŋŋí pə́ə́s pəə́liʼtiniʼ, wagɛɛn uʼkudin o Yə́sus Kilíʼtus o fɔ́lɔ́b. Tɔgɛ́ɛ́ tó a ngə́ yɛ́ waágɛ́nɛ́ɛ́ oʼto, na tɔʼtilíin ɛlaŋ yɛ́ páyɛ́goyáʼkánánɛ yaagoogónɛ.

⁷Wɛ udiyə́líʼtíníí pɛbán pɛ́ kalaʼ pɛ́ɛb pɛ́ pɔɔd pə́ədəənilə. Pɛ́lɛ pɛbán pɛ́ náan iyó, pɛbán pɛ́ pídiə́gə́mmií Táán. Ágɔ́nɛ́gɛ́ɛ́ kɛɛn agá yuudi alaa wɔnɔ́ ná Táán alɛɛ́ anyɔ́ŋɛn.

⁸Kɛɛlɛ pɛbán pɛ́ pɛ́anasɛ mɔɔd pigú náanɛ wɔnɔ́ ɔʼtɛ́d, pɛ́agɛɛ́bɛ a muyənjə́g mó moom. Kɔmɔɛ́d lɛ́ nkə kɛ́ mɔɔd aágɛɛlɛ a ngə́ ɛ kəə́liʼtiniʼ kɛ́amoɛ́bɛ kə́mmú agaáyɛn pɛbán piim lɛ́ ngə́ ɛ kəə́liʼtiniʼ yagɛɛlɛ lɛ́ tɛ́ɔŋ nkə kɛ́ Táán yɛɛ́gágɛn pɔɔd a ɔlaa wóonɛ ó nɛ́gɔŋ na a wó a pɛnɛŋ piim.

⁹Nkə kɛ́ɛnɛ kɛ́ ndɛɛ́ əgusəə, kɛ́lɛ fɔ́lɔ́b, kɛádɛ́ɛ́ lɛ́ mɔɔd yə́liʼtini kɛ́lɛ́ na ɔʼtɛ́m wə́ə́ŋ ungim.

¹⁰A oʼto wóow aa tɛlɛɛ́ agaáyóóna na pigólí, tɛáno lɛ́ tɛlɛ agomɛna pɛda na Táán nyɔ́ alɛɛ́ a ɔlaa. Nyɔ́lɛ́, alɛ Ogɔɔyɛ mɔɔd ungim, kɔŋɛʼ kɔŋɛʼ pá pámáág oʼto na Kilíʼtus.

¹¹Táá nkə kɛ́ ugódíí lɛ́ óbodɛ́anɛ lɛ́ pɛ́ɛlɛ aa kɛ́ɛg, óboyáʼkananɛ pɛbán pɛ́ɛb piim.

¹²Udiyə́díí lɛ́ mɔɔd na mɔɔd ágosɛ́ɛdɛ a oʼto wóonɛ lɛ́ wɔnɔ́ ná odɛ́ʼkónɛ́ɛ́ mɔɔd. A tɔgɛ́ɛ́ toáŋ, na a niə́siəd nɛáŋ, na a nnyɔ́ŋánán yaaŋ yɛ́ olɛɛ́ na yɛ́lɛ́, na a nɛag nɛ́ waágɛ́nɛ́ɛ́ oʼto na Táán, na a ɔlaa wááŋ ó fiɛ́d na kibuu, wɛ́ɛlɛ lɛ́ pəə́liʼtiniʼ pə́yə́ən ongoo wááŋ.

¹³Lɛŋ kaágɔ́nɛgɛ kobana əgín Tɔsɔm tó Táán a udi ó pəə́liʼtiniʼ[15] Óboyáʼkananɛ tólɛ́, ósɔyɔ na pɔ́lɛ́ lɛ́ póóbɛn tólɛ́ agɛɛn əgiig əgín ná ndə́giim.

¹⁴Odɛnyɛ́ɛ́lɛ ndioŋi a nkə kɛ́ Táán amágoyɛ́ʼkɛn toɛn lɛ́ wɛ́ɛlɛ a mawɔʼ mə́ə́ŋ. Ayɛ́goyɛ́ʼkɛn kɛ́lɛ́ ná palɔɛgɛʼ pɛbán pə́ə́ŋ píísə́ə́ a nkə kɛ́ alɛɛ́ afɛga na wɛ, padɛ́lɛm yuudi pá a yoog ɛ Táán pámáagoyábɛ́gɛn ɔmbɔg a oʼto.

¹⁵Taa, pigólí pɛ́ ugódíí lɛ́ wɛ́ɛlɛ aa pɛ́ɛb aá! Áyɛ́ʼkɛ́nɛ́ɛ́ a pɛ́lɛ́ na ɔʼtɛ́m wááŋ ungim, ungim ádála lɛ́ olɛ əgín agɛɛn yuudi a ngə́ yɛ́ yəə́gə́mmi Táán.

¹⁶Siəd kɛnɛŋ na niə́siəd nɛáŋ. Úsiəd tɛn kɛnɛŋ na nkə kɛ́ waágaaʼkananɛ pɔɔd. Odɛʼtámbɛ́lɛd áay. Omaʼkɛɛnanan náan, wɔgɔɔ́yɔ́ɔyɛ wɛɛ́nyɔ́amɔɛ́d, ɔ́yɔɔyɛ tɛn pá páagoyóob.[16]