Read Yambeta 1 Timoʼtə́ə 5 Bible Online

1 Timoʼtə́ə 5 - Yambeta bible

1 Timoʼtə́ə 5

¹Timoʼtə́ə, wɔɔ́ndɔsɔyɔn pasaá pá pɔɔd pá pə́ʼkulunií, odɛɛ́bosɔ́yɔn na nɛnyɛ́n, sɔyɔ na pɔ́lɛ́ a tɛmbɛlɛɛŋ wɔnɔ́ ná wɔɔ́sɔyɔ na sɛ waaŋ[17] Siəd panyɔmmɔ́n wɔnɔ́ pomóŋŋí pááŋ.

²Ə́siə́díí na pasaá pá pagɛ́ɛd wɔnɔ́ na pa ŋŋí pááŋ. Wə́siəd na pabɔ́dɔ́m wɔnɔ́ na pomóŋŋí pááŋ pá pagɛ́ɛd, odɛnjɛ́ɛ́n na mafɛgaʼ má kolaa na pɔ́lɛ́.

³Kidí kɛ́ kɛ́lɛɛ́ fɔ́lɔ́b kidí, úmuə́súidin na nnyáádɛ́ ngim[18]

⁴Náan kɛ́maʼkɛɛn kidí kɛ́ kɛ́lɛɛ́ na pɔɔ́n, ɔmbɔ́ lɛ́ na panan, ímuudí lɛ́ poómbaa póob pógóódi lɛ́ páaʼkan a yoog yɔɔbɔn ɛ pɔɔd, kɛɛlɛ nkə kɛ́ kɛ́lɛɛ́ a ngə́ ɛ kəə́liʼtiniʼ. Pógóódi kaaʼkan kuúlisini pasɛ pɔ́ɔ́bɔn, na pa ŋŋí pɔ́ɔ́bɔn, ɔmbɔ́ na pasɛʼkóón pɔ́ɔ́bɔn, na pa ŋŋíʼkóón pɔ́ɔ́bɔn, kɛnó kɛ́ mmɛ́nɛ yɛ́ páyɛ́boomɛ́nɛ pɔ́lɛ́. Táá nkə kɛ́ kɛ́lɛɛ́ kɛŋɛʼ a əngis á Táán áa kɛ́ɛg.

⁵A kidí kɛ́ ɔʼkɛ́ɛd kɛ́ kɛ́lɛɛ́ fɔ́lɔ́b kɛ́lɛ́gíəsiŋ, kɛ́ kíʼkódií mɔɔd nyɔ́ aámodɛ́ʼtɛg, kɛ́lɛ́ kɛ́ kɛ́amɛna pɛda na Táán, kɛ́ʼtɔm komoyɔ́sɔ́gɔlɔn, na udúg na wɔɔ́s lɛ́ ámoɛ́bɛ.

⁶Kɔmɔɛ́d lɛ́ kidí kɛ́ kɛ́lɛɛ́ əgiim kífúluminə, kɛ́ɛg kɛándɛ kɛlóŋ a uŋun, pumog puə́ŋ aa pólɛɛ́ a ɔlaa.

⁷Táá nkə tɛn kɛ́ ugódíí lɛ́ wáaʼkananɛ na pidí pɛ́ pagɛ́ɛd áa kɛ́ɛg ná pɛ́dɛnjɛ́ɛ́n na ɛgom a nkó yɔɔbɔn ɔmbɔ́ ímuʼ.

⁸Mɔɔd nyɔ́ ɔdɛɔ́gɔ əgusiəd kɛnɛŋ na pɔɔd pə́ə́ŋ, kɔŋɛʼ kɔŋɛʼ na yoog yəəŋ ɛ pɔɔd, nyóon náan aásáŋɛ́nɛ ngə́ ɛ kəə́liʼtiniʼ, əmíʼkíni kɔyɛb agaáyɛn kə́mmú nyɔ́ ɔdɛɔ́gɔ a kəə́liʼtiniʼ.

⁹Agɛɛlɛ lɛ́ páág niiŋ nɛ́ ɔʼkɛ́ɛd a kálaʼtaʼ ɛ pidí, ogóódi lɛ́ yɛ́ɛn kidí kɛ́ kiə́ʼkiigií əʼtin á pɛag ádáád, kidí kɛ́ kɛ́ɛ́dɔ́n na mɔɔd úmmuʼ súg[19]

¹⁰Ogóódi kɛɛn ɔʼkɛ́ɛd nyɔ́ pɔɔd pálɛɛ́ agogany a pɛbán pɛ́ alɛɛ́ agɛɛlanɛ, ɔʼkɛ́ɛd nyɔ́ yɛɛ́lɛ́ŋ koyámɛ pɔɔ́n pə́ə́ŋ, nyɔ́ ayɛ́ɛ agolɛŋ kusiəd pəən a noádɛʼ nuə́ŋ, nyɔ́ tɛn ayɛ́ɛ lɛ́ pəə́liʼtiniʼ pə́məʼkiim a noádɛʼ nuə́ŋ áaboósog ambaan[20] Ogóódi lɛ́ yɛ́ɛn tɛn ɔʼkɛ́ɛd nyɔ́ ayɛ́ɛ aágɛɛ́banɛ pɔɔd pá pálɛɛ́ a ntɔ́b, nyɔ́ ayáyɛ́ʼkɛnɛn pɛnɛŋ piim agɛɛlɛ mbod ɛ pɛbán ngim yɛ́ ɛlɛɛ́ ŋŋɛʼ.

¹¹A noá na kidí kɛ́ kɛ́dɛ́ʼkónɛ́ɛ́ ɔʼkɛ́ɛd, odɛɛ́moyáág a ɔmban ó pidí lɛ́, ná kodɔn kúəgiʼkini kumusóbin, əədúm ngim na Kilíʼtus.

¹²Kidí kɛ́ kɛ́mɛ́ɛ́lɛ náan, kɛ́agɛɛn na nsɔ́ɔ́ a udi ó Táán lɛ́ kiə́də́əŋ a nkə kɛ́ yɛɛ́gágɛn na Táán ɔnɔ́ nyɔ́lɛ́ ədiə́giiʼkini kodɔn kə́mmú.

¹³Nkə tɛn kímmú kɛ́ kɛ́agɛɛlɛ lɛ́ udiʼtílə kidí kɛ́ ɔʼkɛ́ɛd kɛ́ kɛ́dɛ́ʼkónɛ́ɛ́ kɛ́lɛ lɛ́, ɔmbɔ́ ɔɔ́lɔb ɔʼtɔ́n kə́mmú, uməʼkumuúdilə, ədiə́giiʼkini kɛɛlɛ yoom na yoom kə́mmú, əə́bə́ə́ agá kiim ófíoŋ a toádɛʼ tó pɔɔd. Ɔdɛɔ́lɔb anɛ́ɛ́n əgín lɛ́ kufíoŋ kólɛ́ na kólɛ́ a toádɛʼ tó pɔɔd, aagɛɛn na kɛlɛ́s, na pɔbɔ́nɔ́ a unuʼ. Nkə kɛ́ kɛ́dɛɔ́gɔ kɛ́ kusəə, əəsəə, ɔmbɔ́ kɛ́ kɛ́dɛ́amodɛ́ʼtɛgɛɛ́.

¹⁴Kólɛ́ aa ndágodɛ́anɛ lɛ́, kidí kɛ́ ɔʼkɛ́ɛd kɛ́ kɛ́dɛ́ʼkónɛ́ɛ́ kígóódi lɛ́ kɛ́dɔn, kíbíənə pɔɔ́n, kɛ́lɛŋ kugumin noádɛʼ nuə́ŋ. Náan, pɔɔd pá páabɛɛ́bɛnɛn pɔ́dɛ́ɔgɔɔŋ ɛgom ɛgɛbɛɛ́sɔyɔn kɔbɛ́ a yɛ́lɛ́.

¹⁵Ndɛ əgusəə náan lɛ́ pidí pɛ́ pagɛ́ɛd pímmú pɛ́ pɛ́dɛ́ʼkónɛ́ɛ́ pɛ́lɛ kɔ pɛ́ piə́ʼkudíí ngə́ ɛ Táán əguyə́ən ɛ Sáʼtan.

¹⁶Ɔʼkɛ́ɛd nyɔ́ alɛɛ́ ungəə́liʼtiniʼ, amaʼkɛɛn na pidí pɛ́ pagɛ́ɛd a yoog yəəŋ ɛ pɔɔd, ogóódi lɛ́ ányáŋɛn kɛnó kɛɔ́bɔn, adɛnyáŋɛ́nɛ yoog ɛ Táán kɛ́lɛ́. Náan pəə́liʼtiniʼ páalɛŋ kɛɛ́bɛ pidí pɛ́ píʼkódií fɔ́lɔ́b mɔɔd a ngim yɔɔbɔn.

¹⁷Kɛ́lɛ kɔŋɛʼ lɛ́ wɛ́ʼkɛn nnyáádɛ́ pɛnɛŋ pɛ́baan na padɛ́lɛm yuudi pá pálɛɛ́ agolɛŋ kɛɛlɛ pigólí pɛɔ́bɔn pɛ́ kodáŋananɛ pəə́liʼtiniʼ, kɔŋɛʼ kɔŋɛʼ na pá pááyɛ́ʼkɛ́nɛ́nɛ́ɛ́ agolɔɛgɛ na agaaʼkananɛ Tɔsɔm tó Táán

¹⁸lɛ́ tólɛ əgusəə toɔ́nɔ́: «Kɛ́ʼtɛ́ɛ́lɛn lɛ́ káwoʼ yɛ́ ɛlɛɛ́ əgugín ngəŋ, pámoogod unuʼ əgumusiə́gi lɛ́ ɛdɛnnɛ́.» Tólɛ əgusəə tɛn kə́mmú lɛ́ «Uʼkudin ungim ogóódi lɛ́ yɔ́sɔ́sɛd ombɔg a pigólí piə́ŋ[21]»

¹⁹Mɔɔd əməʼkiim agodɛ́anɛ lɛ́ Oʼtɛ́lɛm yuudi nyummú amɛ́ɛ́lɛ kɔbɛ́, udisiə́d kɛbán əgín a unuʼ wə́ə́ŋ ó nyɔ́lɛ́nyɔ́əsíŋ, póŋ nto ɛ pɔɔd ɛ́baan, ɛ́dáád ɛ́godɛ́anɛ náan ná wə́liʼtini anɛ́ɛ́n[22]

²⁰Mɔɔd amaʼkɛɛlɛ kɔbɛ́, ɛ́mosɔ́yɔn a udi ó pɔsɔ́g ná pɔ́lɛ́ tɛn pɔ́ɔŋ wɛɛ́y ogɛɛlɛ náan.

²¹Timoʼtə́ə, a udi ó Táán na udi ó Yə́sus Kilíʼtus, na a udi tɛn ó məŋun má maʼtom má Táán əyííyid, sɛ́gɔɔ mbágoyɔ́sɔ́gɔ́lɔ́nɛ́ɛ́, ɛɛlɛ nkə kɛ́ ndɛɛ́ agogodɛ́anɛ. Ɛɛlɛ kɛ́lɛ́ fiɛ́d kɛɛn a ngim ɛ mɔɔd, úsiəd ungim yoom ímuʼ.

²²Odɛmbɔ́gɔ́nɔn kaábɛgɛn mɔɔd ɔmbɔg a oʼto agomoyɛ́ʼkɛn toɛn lɛ́ ádɛ́lɛm a pigólí pɛ́ a yoog ɛ Táán. Udisiə́d ngab a mabɛ́ má pɔsɔ́g pɛ́ndɛ́ŋ, ə́núŋíí wɛɛ́nyɔ́amɔɛ́d wɛ́ɛn Sálábádábádá.

²³Wɔnɔ́ ná kaadɛ kááŋ kálɛɛ́ agogonómɛla, siəd mayaa má maloʼ óŋo, adɛ́njaŋ əgín məní na məní koŋo.

²⁴Pɔɔd pə́mmú pálɛ kɔ pá pálɛɛ́ lɛ́, ɔmbɔ́ odɛ́yɛ́moóyɔmɛ, mabɛ́ mɔ́ɔ́bɔn mándɛ malɛŋáán kalaʼ, máʼkolon táán. Kɔmɔɛ́d lɛ́ pə́mmú, ondɛŋɛn koboyáaʼkan náanɛ kɔŋɛʼ, odɛálɛŋ kɔbɛ́ koɔ́bɔn.

²⁵Pigólí tɛn pɛ́laŋ pɛ́ mɔɔd aágɛɛlɛ pɛ́dɛɔ́gɔɔsɛm. Pɛbán tɛn pɛ́ pídiə́gəə́bisigií kolon a kɛmoámoáŋ, pɛ́dɛ́ɔlɔb lɛ́ pɛ́ndónɛn.