Read Yambeta 1 Timoʼtə́ə 6 Bible Online

1 Timoʼtə́ə 6 - Yambeta bible

1 Timoʼtə́ə 6

¹Pɛɔ́lɛ́ piim pígóódi kodɛ́ʼtɛg pəsə́dúg pɔ́ɔ́bɔn wɔnɔ́ pɔɔd pá pálɛɛ́ lɛ́ pɛ́ɛn na nnyáádɛ́ ngim, agɛɛlɛ lɛ́ pɔɔd pádɛsɔ́yɔ niiŋ nɛ́ Táán kɔbɛ́, pɔ́sɔyɔ tɛn lɛ́ nkə kɛ́ tɛlɛɛ́ agaaʼkananɛ kɛ́lɛ kɛbɛ́.

²Pɛɔ́lɛ́ pɛ́ pɛ́lɛɛ́ na pəsə́dúg pá páágɛ́nɛ́ɛ́ oʼto na Kilíʼtus pɛ́dɛsɛ́ɛ́dɛ pəsə́dúg pɔ́ɔ́bɔn lɛ́ wɔnɔ́ ná pálɛɛ́ pomóŋŋí pɔ́ɔ́bɔn a kəə́liʼtiniʼ, ndóo. Pə́buúgudin agá kə́mmú na toɛn agaáyɛn náan lɛ́ pɔɔd póob pá pálɛɛ́ əgugudin, pálɛ pɔɔd pá páágɛ́nɛ́ɛ́ oʼto na Kilíʼtus, Táán alɛ na nnyɔ́ŋánán na pɔ́lɛ́. Táá nkə kɛ́ wáaʼkananɛɛ́ pɔɔd, nkə kɛ́ ugódíí lɛ́ ólɛŋ koboyááganan a ntóɛŋ aa kɛ́ɛg.

³Pɔɔd pá páagaaʼkananɛ pɔsɔ́g nkə kɛ́ kɛ́lɛɛ́ ndɛ́ŋ, pə́njə́ən tɔgɛ́ɛ́ tó sáád tó Sə́dúk wəəs Yə́sus Kilíʼtus, pə́diə́siə́díí tɛn wɔnɔ́ ná túoloodi lɛ́ pə́ə́siə́d a udi ó Táán,

⁴póob náan pálɛ pɔɔd pá páagaábágɛdanɛ náan iyó, páafɛg lɛ́ pɔ́lɛ́ páálɛŋ pɛbán piim, kɔmɔɛ́d lɛ́ pándɛŋɛn yoom na yoom. Nkə kɛ́ pányóŋɛ́nɛ́nɛ́ɛ́, kɛ́lɛ əgín musuŋ na nkasɛ́ a moyaa mó pɛbán mó náan iyó. Pálɛ abany kobányáán pɛbán pɛ́ɛb. A niɛlɛ nɛ́ɛn náan aa pɛbán pɛ́ɛnɛ pɛ́lɛɛ́ əgiim. Pɛ́lɛ lɛ́, yaág yɛ́ əngis, masáŋ, ŋŋɔ́, kaanɛn lɛ́ pímbuəm amɛ́ɛ́lɛ kɔbɛ́,

⁵masáŋ mámman na pɔɔd pá pə́ndigií na nsiŋ ɛlaŋ, pá pɔ́dɛɔ́gɔ agolɛŋɛɛ́ kə́mmú nkə kɛ́ kɛ́lɛɛ́ fɔ́lɔ́b. A nɛɔ́bɔn, pálɛ afɛga lɛ́ pə́məʼkuyə́ən ngə́ ɛ kəə́liʼtiniʼ, páagɛɛn na mɔɔnɛ́ miíŋ.

⁶Ɛɛ́ɛ! Kɛ́lɛ náan fɔ́lɔ́b lɛ́, mɔɔd əməʼkəə́yíis a pɛbán pɛ́ a ngə́ ɛ kəə́liʼtiniʼ, áanyɔ́ga tɛn na ngab yɛ́ Táán amámoyɛ́ʼkɛn, alɛ na tugúm tó togóón

⁷lɛ́ a niə́bíən niə́s a nsí yɛ́ɛnɛ, tidiʼkə́əgiim na yoom. Náan tɛn aa tɛdɛndɛ́ɛ́ kuúlií na yoom.

⁸Kɛ́maʼkɛɛn agá lɛ́ tɛándɛ na nkə kɛ́ tɛánɛ, na nkə kɛ́ tiə́gəə́níig, tɛ́nyɔ́ga na mólɛ́.

⁹Kɛbán kímuʼ, a pá páanyɔ́ŋɛn kugúmi kɛ́fɔlɛ́, pə́ədə́əŋ a kisindiʼ kɛ́ a pɛásɔ́sɛ́n, páagaag ɔʼtɛ́m a moom mó mobɛ́, moom mó náan iyó, moom mó múəwíiyi mɔɔd, mó móagɛɛlɛ lɛ́ ólíoŋ.

¹⁰Ɛ́fɔlɛ́ ɛ́ pɛbán pɛ́ pɛbɛ́ pɛ́lɛ́ əgiim a nɛag nɛ́ ɔʼtɛ́m a mɔɔnɛ́. Ngab ɛ pɔɔd yimmú yiíním ngə́ ɛ Táán lɛ́ páyáág ɔʼtɛ́m kɛ́fɔlɛ́ a mɔɔnɛ́, pə́mə́yəə́súidin ntɔ́b ngíŋ.

¹¹Timoʼtə́ə! A noá na wɛ nyɔ́ olɛɛ́ lɛ́ waagoob na Táán, odɛsɔ́d a pɛbán pɛ́ pɛbɛ́ pɛ́ɛb. Ágɔ́nɛ́gɛ́ɛ́ kɛɛn sáád a udi ó Táán, táŋána wɔnɔ́ ná alɛɛ́ anyɔ́ŋɛn, udiʼtí kaag kó oʼto na nyɔ́lɛ́. Wɛ́ɛn na nnyɔ́ŋánán na pɔɔd, nóʼtan pɛbán, wɛ́ɛn kiwiiyiʼ kɛ́ mɔɔd.

¹²Nɔɛyɛ́ pɛdá pɛ́laŋ, pɛdá pɛ́ kəə́liʼtiniʼ kuə́s kólɛɛ́ əgusəə lɛ́ mɔɔd ánɔɛyɛ. Ə́gúmə́nə́níí a ɔlaa ó pɛnɛŋ piim lɛ́ wólɛ́ aa Táán ayɛ́goodɔ́ŋɔn lɛ́ ná wɛ́ɛn na wólɛ́ ná wɛɛ́sɔ́yɔ pisig pɛ́ tɔgɛ́ɛ́ pɛ́ wɛɛ́sɔ́yɔ a udi wó ɛ́fɔlɛ́ ɛ́ pawɛ́sɛnɛg, a wɔnɔ́ ná waágɛ́nɛ́ɛ́ oʼto na Yə́sus Kilíʼtus.

¹³A udi ó Táán nyɔ́ aágɛɛlɛ lɛ́ yoom yiim yɛ́ɛn na ɔlaa, na a udi ó Yə́sus Kilíʼtus nyɔ́ yiísə́ə́ fɔ́lɔ́b a udi wó ngɔ́mɛnaʼ yɛ́ nkóʼkóón, Pɔ́nsɛ́ Pɛláad wɔnɔ́ ná nyɔ́lɛ́ yaágɛ́nɛ́ɛ́ oʼto na Táán[23], ndagodɛ́anɛ lɛ́,

¹⁴nkə kɛ́ njɛ́godɛánɛ, óóbɛn kɛ́lɛ́ fiɛ́d kufiləni, wə́siəd a ombod wó mɔɔd ɔdɛɔ́gɔɔ́ŋɛ́ɛ́ ɛgom ɛgogoóbɛn agɛɛn əgiig əgín a wɔɔ́s wó Sə́dúk wəəs Yə́sus Kilíʼtus alɛ́ɛ́ kimbuúlinií.

¹⁵Kimbuúlini kuə́ŋ kóog kólɛ́ɛ́ kɛɛn əgín a wɔɔ́s wó Táán yiídə́nígi. Táán nyɔ́ alɛɛ́ nyɔ́lɛ́nyɔ́əsíŋ na toɛn tuim, na nyɔ́lɛ́ aa kɔŋɛʼ kólɛɛ́ əgiim. Alɛ nkúm ɛ puʼkúm, Sə́dúk ɛ pəsə́dúg[24]

¹⁶Nyɔ́lɛ́nyɔ́əsíŋ aa ədiə́gúú. Alɛ a kisəə kɛ́ mɔɔd ɔdɛɔ́gɔ ogaáʼkɛɛ́ kaáyɛʼtɛnɛ a ɛbá. Mɔɔd ɔmbɔ́ úmmuʼ adɛ́njaŋ komoodála na əngis. Mɔɔd tɛn ɔdɛɔ́gɔ ogomoodála[25] Moom móonɛ lɛ́ nugəm, toɛn, móɛn na nyɔ́lɛ́ a pɛnɛŋ piim! Aamɛn.

¹⁷Timoʼtə́ə! Tɛánɛ́ na pɔɔd pá pálɛɛ́ na tugúm a nsí yɛ́ɛnɛ lɛ́ pə́dinjə́gídə́níí a igog, pádɛmmɛ́na pɛda a tugúm tó túəwu na koany[26] Ɛ́bodɛánɛ lɛ́ pámɛna pɛda na Táán nyɔ́ alɛɛ́ əgibisúgi kibisúgiə́n niúd na moom miim lɛ́ tɛ́nyɔ́ga na mólɛ́.

¹⁸Óbodɛ́anɛ lɛ́ pɛ́ɛlanɛ pɛbán pɛ́ pɛŋɛʼ, pə́gúmi a pɛbán pɛ́laŋ kɛɛlanɛ, pɛ́ɛn na nuboʼ, páŋáan na moom mó pógódíí.

¹⁹Náan, pálɛ agaágɔnyan tugúm tɔmɔɛ́d tó fɔ́lɔ́b a ɔlaa ó yuudi[27] agɛɛlɛ lɛ́ pɛ́ɛn na ɔlaa ɔmmɔɛ́d ó fɔ́lɔ́b.

²⁰Ɛɛ́ɛ óo Timoʼtə́ə! Lɛŋ kəə́gumənən a nkə kɛ́ Táán əmə́guúcúm. Kɛnɛŋ kɛ́ pɔɔd pɔ́ɔsɔyɔ pɛbán pɛ́ náan iyó, pɛbán pɛ́ pɛ́dɛɔ́gɔ a ngə́ mmuʼ na pafɔ́lɔ́b pá Táán ayɛ́bɛyásɛ́nɛn, odɛnjáág unuʼ wááŋ kɔ aá! Odɛsɔ́d a masáŋ má pɔɔd pálɛanɛɛ́ na mɔ́lɛ́ əguloodi lɛ́ pɔ́lɛ́ pálɛ na nsiŋ kɛ́fɔlɛ́, kɔmɔɛ́d lɛ́ nsiŋ yɔɔbɔn ɛgo ɛdɛɔ́gɔ nsiŋ ɛ fɔ́lɔ́b.

²¹Kɛ́lɛ lɛ́, pɔsɔ́g pə́mmú píísə́ə́ náan lɛ́ pɔ́lɛ́ pálɛ na nsiŋ, pííním ngə́ ɛ kaag oʼto na Táán. Táán áboyɛ́ʼkɛn mawɔʼ á!