Read Yambeta 2 Timoʼtə́ə 1 Bible Online

2 Timoʼtə́ə 1 - Yambeta bible

2 Timoʼtə́ə 1

¹Mɛ Póol nyɔ́ a nɛnyɔ́ŋɛn nɛ́ Táán ndɛɛ́ mɔɔ́n o maʼtom o Yə́sus Kilíʼtus aa mbə́gudílən nufuuʼ nóonɛ. Mɛ nyɔ́ ayɛ́nyɛɛ́ʼkɛn oʼtom wóonɛ lɛ́ nyɛ́ɛn alɔɛgɛ ɔlaa wó Táán yiísə́ə́ lɛ́ abɛyɛ́ʼkɛn a oʼto wóonɛ lɛ́ tɛlɛ paladáán na Yə́sus Kilíʼtus.

²Mbə́gudílən wɛ Timoʼtə́ə[1], mɔɔ́n waam nyɔ́ ndɛɛ́ anyɔ́ŋɛn kɛ́fɔlɛ́. Táán Sɛ pɔ́lɛ́ na Yə́sus Kilíʼtus Sə́dúk wəəs págoyɛ́ʼkɛn mawɔʼ á! Pə́siəd mbilígɔɔ́ʼkɔn na wɛ, páyɛgoyɛ́ʼkɛn tɛn kiwiiyiʼ á!

³Ndɛ agɛɛ́ʼkɛn pisoyidiʼ kɛ́fɔlɛ́ na Táán nyɔ́ ndɛɛ́ əgugudin, ɔʼtɛ́m ommoáŋáán a kaadɛ, əguyə́ən ongoo ó pɛmbáa páam[2] Ndɛ agooyáyɔ́ɔ́ŋanɛ pɛnɛŋ piim a pɛɔ́sɔ́gɔ́lɔ́n, na udúg wɔnɔ́ na wɔɔ́s.

⁴Ntɛɔ́gɔ əgəə́bəli wɔnɔ́ ná wɛɛ́lɛ́ɛ́[3] Ɔʼtɛ́m wáam ólɛ əgín lɛ́ ná mbííʼkíni kogoodála ná nyɛ́ɛn na tɔnyɔ́g.

⁵Ndɛ agaáyɔ́ɔ́ŋɛ wɔnɔ́ ná waágɛ́nɛ́ɛ́ fɔ́lɔ́b fɔ́lɔ́b ɔʼtɛ́m na Táán. Nɛag oʼto nɛ́ɛn nɛ́ yəə́ŋŋíʼkóón Loyíis pɔ́lɛ́ na ŋŋí waaŋ Əníis pígóodi, mbálɛŋ lɛ́ ugóódi tɛn nɛ́lɛ́.

⁶Kólɛ́ aa ndágoyáyɔ́ɔ́ŋɛnɛ lɛ́ ósógɛdɛ nkə kɛ́ Táán əyíguúcúm ná njɛ́goyábɛ́gɛn ɔmbɔg a oʼto

⁷lɛ́, Uŋun wó Táán ayɛ́bɛyɛ́ʼkɛn ódɛɔ́gɔ wóonɛ lɛ́ óbɛyáánɛ piɛ́yɛ́y, Ndóo. Ólɛ Uŋun wóonɛ lɛ́ óbɛyɛ́ʼkɛn toɛn, óbɛyɛ́ɛlɛ lɛ́ tɛ́nyɔ́ŋɛn pɔsɔ́g, tɛ́yɛɛn pɔɔd pá pɔ́dɛɔ́gɔ na ntɛ́m a kaadɛ pab pab pab.

⁸Odɛnjóób anɛ́ɛ́n oʼto kono agodɛ́lɛmɛn Sə́dúk wəəs mbaasɔ́. Ɔmbɔ́ tɛn na mɛ, odɛnjóób oʼto kono. Mɛ nyɔ́ ndɛɛ́ a yoog yɛ njaan a oʼto wə́ə́ŋ[4] Ónɛ ntɔ́b ondáŋ na mɛ a kidíídí kɛ́ Tɔsɔm Tólaŋ. Ónɛ yɛ́lɛ́ a toɛn tó Táán amágoyɛ́ʼkɛn.

⁹Nyɔ́lɛ́ aa amábɛyɔ́ɔ́yɛ, amáabɛdɔ́ŋɔn lɛ́ ná tíɛn ndɛg yɛ́ yaágoob na nyɔ́lɛ́. Kɛ́dɛɔ́gɔ a oʼto wóonɛ lɛ́ tɛyɛ́ɛ́lánɛ pɛbán pɛ́laŋ. Náa, kɛ́lɛ náan lɛ́ náan aa yiídə́nígi lɛ́ agɛɛlɛ, na a oʼto wóonɛ lɛ́ aádɛ́ɛ́ ɔʼtɛ́m. Yiísə́ə́ əgín kɔ kalaʼ ná adɛ́njɛ́ɛlɛ nsí yɛ́ɛnɛ, ɔnɔ́ nyɔ́lɛ́ alɛ́ɛ́ kɛbɛyɛ́ɛlɛnɛ kɔŋɛʼ kóog a ngim ɛ Yə́sus Kilíʼtus.

¹⁰Kólɛ́ aa kóonɛ kuóʼkoólodií nɛ́gɔŋ a nɛlon nɛ́ Ongɔɔyɛʼ wəəs Yə́sus Kilíʼtus əə́ʼkiim álónɛ́ɛ́. Nyɔ́lɛ́ aa yɛɛ́mánɛ toɛn tó kugu, amáabɛmoáŋɛnɛ a Tɔsɔm Tólaŋ, ɔlaa wó ódɛndɛ́ɛ́ kuwúú.

¹¹Táán ayɛ́ɛ́lɛ lɛ́ nyɛ́ɛn mɔɔ́n o maʼtom lɛ́ ná ndɔɛgɛ Tɔsɔm Tólaŋ tóod, nyáaʼkananɛ tɛn pɔɔd tólɛ́[5]

¹²Taa, a oʼto wóow aa ndɛɛ́ agonɛ ntɔ́b yɛ́ɛnɛ. Náa, ntɛágaaŋ na yɛ́lɛ́ lɛ́ mbálɛŋ na ánɛ aa nyaágɛ́nɛ́ɛ́ oʼto, mbálɛŋ, isuŋ ɛ́dɛɔ́gɔ kɔ lɛ́ alɛ na toɛn tóonɛ lɛ́ ə́nuŋ nkə kɛ́ əyícum, agɛɛn əgiig əgín a wɔɔ́s ó pɛyɔm.

¹³Madáŋánánɛ́ mááŋ mɛ́ɛn əgín a ngə́ ɛ tɔgɛ́ɛ́ tó fɔ́lɔ́b tó njɛ́godɛánɛ. Ə́gúmə́nə́níí a kəə́liʼtiniʼ, nyɔ́ŋɛn pɔɔd na nnyɔ́ŋánán yɛ́ yəə́giim na Yə́sus Kilíʼtus.

¹⁴Lɛŋ komɔ́ɔsɛ nkə kɛ́ Táán əyíguúcúm. Úgumin kɛ́lɛ́ a toɛn tó Uŋun wó Ufúlúʼtú wó ólɛɛ́ na pəsi.

¹⁵Wɔnɔ́ ná olɛɛ́ ondɛŋáán, ungim nyɔ́ a Əsíi yiídúm ngim na mɛ, ɔmbɔ́ tɛn pɔsɔ́g pá a Fisɛ́ɛl na pá a Ɛlɛmosɛ́ɛn.

¹⁶Náa, a Onəsifɔ́ɔ na yoog yəəŋ ɛ pɔɔd, Sə́dúk ábodɛ́ɛ́lɛn ɔʼtɛ́m lɛ́ nyɔ́lɛ́ aa ayɛ́ɛ əgingwiyəni ɔʼtɛ́m, ayɛ́ɛ adɛáŋ tɛn na mɛ lɛ́ wɔnɔ́ ná ndɛɛ́ a yoog yɛ njaan.

¹⁷Náa, əgín ná əyíím əgiig a Ɔlɔ́ma, əyínjuunə fɔ́lɔ́b fɔ́lɔ́b, súʼtə́ə́ amɛ́njɔɔ́ŋ.

¹⁸Sə́dúk ámoyɛ́ɛlɛ lɛ́ ádála kɔdɛ́ɛ ɔʼtɛ́m kuə́ŋ kó nyɔ́lɛ́ Sə́dúk a wɔɔ́s ó pɛyɔm. Waálɛŋ kɔŋɛʼ kɔŋɛʼ ɛ́lɛ́ɛb ngim yɛ́ ayɛ́nyɛɛ́bɛ ná njɛ́ɛ a Ɛfɛ́ɛs.