Read Yambeta 2 Timoʼtə́ə 2 Bible Online

2 Timoʼtə́ə 2 - Yambeta bible

2 Timoʼtə́ə 2

¹Náa mɛ mɔɔ́n, wɛ anɛ́ɛ́n, úsiəd toɛn a mawɔʼ má Táán alɛɛ́ agɛbɛyɛ́ʼkɛn wɔnɔ́ ná tɛlɛɛ́ paladáán na Yə́sus Kilíʼtus.

²Tɔgɛ́ɛ́ tó oyóób na mɛ ndɔ́ɔsɔyɔ a udi ó pɔɔd piíŋ, aʼkánánɛ tólɛ́ na pɔɔd pá fɔ́lɔ́b pá pɔ́lɛ́báamɔɛ́d tɛn pálɛɛ́ págaaʼkananɛ tólɛ́ na pɔsɔ́g pə́mmú.

³Nɛ́ ngab yaaŋ yɛ ntɔ́b a fɔ́lɔ́b fɔ́lɔ́b sɔ́njaa ɛ Yə́sus Kilíʼtus.

⁴Sɔ́njaa yɛ́ ɛlɛɛ́ anyɔ́ŋɛn lɛ́ nkúm yəəŋ ɛ́nyɔ́ga na pigólí piə́ŋ, ɛdɛɔ́sɔd a pɛbán pɛ́ pɔsɔ́g pá pɔ́dɛɔ́gɔ pasɔ́njaa.

⁵Yoom ímuʼ tɛn na mɔɔd nyɔ́ alɛɛ́ agaáfɛg ɔʼtɛ́d na pɔsɔ́g. Aʼtɛ́dan wɔnɔ́ ná pə́ə́də́nígə́ni pɛbán, ɔdɛɔ́gɔɔŋ nodám nó pɛsáábɔ́n pɛ́ ɔʼtɛ́d[6]

⁶Uʼkud a pɔlɛ́m nyɔ́ yiíbún kɛbon kiə́ŋ a pɔlɛ́m áa ogódíí lɛ́ áyaŋ anɛ nkə kɛ́ kɛ́alon kɔ.

⁷Lɛŋ koob nkə kɛ́ ndɛɛ́ əgusəə. Kɛ́lɛ lɛ́, Sə́dúk alɛ́ɛ́ kɛɛlɛ lɛ́ wóób piim.

⁸Áyóŋɛ́ɛ́ Yə́sus Kilíʼtus, mɔɔ́n nyɔ́ a ndɛg ɛ Tə́fid, nyɔ́lɛ́ nyɔ́ ayóndɛg a pɛlóŋ əgín wɔnɔ́ ná Tɔsɔm Tólaŋ tó ndɛɛ́ alɔɛgɛ tólɛɛ́ əgusəə.

⁹A oʼto ó Tɔsɔm Tólaŋ tóod aa ndɛɛ́ agonɛ ntɔ́b náanɛ, na wɔnɔ́ ná ndɛɛ́ tɛn náanɛ a kɛáŋ kɛ́ pasɛŋ wɔnɔ́ ɔmbɛ́ o mɔɔd. Náa, Tɔsɔm tó Táán tólɛ́ tódɛɔ́gɔ a kɛáŋ kɛ́ pasɛŋ.

¹⁰A oʼto wóow aa ndɛ agonóʼtan piim, a kɔŋɛʼ kó pɔɔd pá Táán əyííyid, ná Yə́sus Kilíʼtus áboyɔ́ɔyɛ tɛn pɔ́lɛ́, áaboyɛ́ʼkɛn tɛn nugəm a pɛnɛŋ piim.

¹¹Táá tɔgɛ́ɛ́ tó fɔ́lɔ́b áa tóonɛ: Nga tiígú ondáŋ na nyɔ́lɛ́, tɛlɛ́ɛ́ kɛɛn tɛn na ɔlaa, ondáŋ na nyɔ́lɛ́.

¹²Tɛmaʼkonóʼtan ntɔ́b ondáŋ na nyɔ́lɛ́, tɛlɛ́ɛ́ tɛn kolaamɛ ondáŋ na nyɔ́lɛ́. Timəʼkumuúʼtəm, nyɔ́lɛ́ tɛn alɛ́ɛ́ kibiíʼtəm.

¹³Pəsi timəʼkəə́buuli na nyɔ́lɛ́, nyɔ́lɛ́ ədiə́gəə́buuli na pəsi, lɛ́ ɔdɛɔ́gɔ ogogasɛ unuʼ a nkə kɛ́ əə́səə nyɔ́lɛ́nyɔ́amɔɛ́d[7]

¹⁴Áyóŋɛ́nɛ́ɛ́ pɔɔd pɛbán pɛ́ɛb piim. Ɛ́boósɔ́yɔn na toɛn a udi ó Táán, wɔʼkɔ́ pádɛsáŋɛ́la a oʼto ó nɔgɛ́ɛ́ nó mɔɔd aálónɛ. Masáŋ móom mádɛ́agɛɛ́bɛ mɔɔd, máagɛɛlɛ agá lɛ́ pá pə́əyə́ən mɔ́lɛ́, pə́nim.

¹⁵Ágɔ́nɛ́gɛ́ɛ́ kɛɛlɛ nkə kɛ́ kɛ́alon kɔŋɛʼ a əngis á Táán, wɔnɔ́ uʼkudin nyɔ́ adɛágaáŋɛ́ɛ́ na pigólí piə́ŋ, nyɔ́ aágaaʼkananɛ pɔɔd sáád, tɔgɛ́ɛ́ tó tólɛɛ́ tɔgɛ́ɛ́ tó fɔ́lɔ́b.

¹⁶Tɛ́da kɛlɛ́s kɛ́ iyó, kɛlɛ́s kɛ́ kɛ́dɛɔ́gɔ a ngə́ ɛ kəə́liʼtiniʼ, lɛ́ pɔɔd pá pálɛanɛɛ́ a kɛ́lɛ́, pálɛ pɔɔd pá páagaábalɛd na ngə́ ɛ Táán.

¹⁷Tɔgɛ́ɛ́ toɔ́bɔn tólɛ wɔnɔ́ onom o kidís kɛ́ kɛándɛɛ́ na njoʼ. Pa Imənə́ə[8] pɔ́lɛ́ na Filɛ́ɛd pálɛ wɔnɔ́ mbod ɛ pɔɔd yɛ́ɛy.

¹⁸Pə́ndigi a ngə́ ɛ pafɔ́lɔ́b, pálɛ əgusəə lɛ́ koóndɛg kó pɛlóŋ koáʼkaáyɛ́ɛlɛ. Náan, pə́ʼkuwíiyi kəə́liʼtiniʼ kó pɔɔd piíŋ.

¹⁹Ɔmbɔ́ náan, mogon mó na oʼto na oʼto mó Táán yiíbíŋ múligi monasáŋ. Tɔgɛ́ɛ́ tó tólɛɛ́ kɔ tomágámáán áa tóonɛ tólɛɛ́ lɛ́: Sə́dúk aálɛŋ pá pálɛɛ́ pə́ə́ŋ[9] Na kɛ́ɛnɛ tɛn lɛ́: Ungim nyɔ́ ɔnɔ́ agoob na Sə́dúk ədúm ngim na kɔbɛ́.

²⁰A noádɛʼ nólaŋ, adɛ́njaŋ əgín paʼtáasaʼ pá kóol, ɔmbɔ́ lɛ́ pá kisúg kɛ́ mɔɔnɛ́ aa pálɛɛ́ kɔ pɔ́lɛ́ na pɔ́lɛ́, ndóo, moom mó pámɛ́ɛ́lɛ na kiɛd, na mó páámaá na nsí ɛ nɔmaʼ mólɛ tɛn kɔ. Mó na oʼto na oʼto pálɛ alónɛ mólɛ́ əgín a wɔɔ́s ó wɔɔ́n. Mó annam ábaan mólɛ mó mɔɔ́s miim.

²¹Kɛ́lɛ náan yoom ímuʼ na nyɔ́ amásɔ́gáá, fiɛ́d na pifii pɛ́ɛnɛ pɛ́ mbə́səə, nyóon alɛ a kɛŋwáŋánán kɛ́ táasaʼ yɛ́ ándɛ páalónɛ əgín wɔɔ́s ó wɔɔ́n, yɛ́ pálɛ́ɛ́ kudə́nigií tóbó tóbó a oʼto ó Táán, yɛ́ yəə́gudin sə́dúg wəəŋ. Mɔɔd nyóon náan adɛ́lɛ́mɛn pɛnɛŋ piim, ndúmiʼ agɛɛlɛ pigólí piim pɛ́ pɛŋɛʼ.

²²Tɛ́da pɛbán pɛ́ pɛbɛ́ pɛ́ nɛnyɔmmɔ́n nɛ́lɛɛ́ agonyóŋɛnɛla, uunə pasáád, kəə́liʼtiniʼ, nnyɔ́ŋánán na pɔsɔ́g, kɛɛn a uŋóón na pá pɔ́ɔdɔ́ŋɔnɔ niiŋ nɛ́ Sə́dúk na ɔʼtɛ́m ommoáŋáán.

²³Náa, ágɛ́ɛ́ŋɛ́ɛ́ masáŋ má náan iyó, masáŋ má mádɛ́agɛɛ́bɛɛ́ mɔɔd. Waálɛŋ lɛ́ mə́əgiim na məʼtíiyiʼ.

²⁴Uʼkudin o Sə́dúk oʼkóodi lɛ́ ə́díiyəni na pɔɔd, ogóódi kuwiiyi ɔʼtɛ́m na ungim. Yɛ́ɛn kɛlág kɛ́laŋ, aánóʼtan pá páamoóbɛlanɛ.

²⁵Pá pálɛɛ́ na nkasɛ́ a tɔgɛ́ɛ́ tuə́ŋ, ə́wiiyi ɔʼtɛ́m a kaadɛ agoboyáʼkananɛ: Pɔ́dɛɔ́gɔ pálɛŋ, Táán alɛ ogoboyɛ́ɛlɛ páagasɛ ɔlaa[10] wɔ́ɔ́bɔn, ná pálɛŋ pafɔ́lɔ́b.

²⁶Áay nsiŋ yɔɔbɔn yəə́gimbuúlini, póoliog a pisindiʼ pɛ́ Omɔlɛɔ́g nyɔ́ əyíbuúguminin, amáyɛɛlɛ lɛ́ pámoyóbɛn.