Read Yambeta 2 Timoʼtə́ə 3 Bible Online

2 Timoʼtə́ə 3 - Yambeta bible

2 Timoʼtə́ə 3

¹Ugóóodi lɛ́ ólɛŋ kɔŋɛʼ kɔŋɛʼ nkə kɛ́ɛnɛ: A nsí yɛ́ɛnɛ, mədúg má a nɛman málɛ́ɛ́ kɛɛn manasáŋ.

²Kɛ́lɛ lɛ́, pɔɔd pálɛ́ɛ́ kɛɛn na ɔbɛ́, oʼto wɔ́ɔ́bɔn əgín a mɔɔnɛ́, páagaányáadɛ, páagaábágɛdanɛ, páadóga Táán. Pádɛndɛ́ɛ́ koóbɛn pasɛ pɔ́ɔ́bɔn na pa ŋŋí pɔ́ɔ́bɔn, pámaʼkoboyɛ́ɛlɛnɛ kɔŋɛʼ pə́diə́səə lɛ́ pisoyidiʼ, pádɛ́adammana yoom yɛ́ ɛ́lɛɛ́ ɛ́ Táán.

³Pálɛ na ntɛ́m yɛ́ nnasáŋ, pə́diə́siəd maan na mɔɔd, pɔ́ɔsɔyɔ əngiŋ á pɔsɔ́g kɔbɛ́, pálɛ ntɛ́m pab pab pab, pálɛ na ntɛ́m yɛ́ mbɛ́, pádɛányɔ́ŋɛn nkə kɛ́ kɛ́lɛɛ́ kɛŋɛʼ.

⁴Páalɛga pɔsɔ́g, páagɛɛlanɛ pinyəgəgə pɛ́ pɛbán, páagaábágɛdanɛ, pálɛ na ɔʼtɛ́m a pɛbán pɛ́ píəbusóbin, agaáyɛn pɛ́ Táán.

⁵Páagɛɛlɛ wɔnɔ́ páágɛn oʼto na Táán, pə́diə́líʼtíníí toɛn tó tólɛɛ́ kɔ. Ə́suídíí laálá na mbod ɛ pɔɔd yɛ́ɛy náan aá!

⁶Pə́mmú a ondáŋ wɔ́ɔ́bɔn pálɛ əgiim pɔ́sɔ́dɔn a toádɛʼ, pə́əlígə pagɛ́ɛd pá pɔ́dɛɔ́gɔ na nsiŋ agɛɛlɛ lɛ́ pɔ́dɔ́ɔg oʼto na pɔ́lɛ́. Pagɛ́ɛd póob, kɛnó kɛ́ mabɛ́ kɛ́lɛ agoboónyɔ́lɔ, pə́əyə́ən mbod ɛ pɛbán yɛ́ mbɛ́ ngim yɛ́ yəə́busóbin.

⁷Pálɛ əguunə kaaʼkan pɛnɛŋ piim, náa, pádɛáʼkɛ kiig lɛ́ pálɛŋ sáád.

⁸Wɔnɔ́ ná pa Sanɛ́ɛs pɔ́lɛ́ na Sambɛlɛ́ɛs[11] páyádádɛ́gɛ́ɛ́ na ngə́ ɛ pɛcɛm pɛ́ Moyíis, náan aa pɔsɔ́g póob tɛn páyádádɛ́gɛ́ɛ́ a ngə́ ɛ sáád. Pálɛ pɔɔd pá ntɛ́m yɔɔbɔn yəə́ʼkuʼtindií, pɔɔd pá kəə́liʼtiniʼ koɔ́bɔn kólɛɛ́ iyó,

⁹pɔɔd pá pádɛágɛɛnɛɛ́ laálá lɛ́ ungim alɛ́ɛ́ kodála puyəgí poɔ́bɔn wɔnɔ́ ná pó pa Sanɛ́ɛs pɔ́lɛ́ na Sambɛlɛ́ɛs poɛ́lón táán.

¹⁰Náa wɛ, oyóób nkə kɛ́ njɛ́ɛ agaaʼkananɛ, waádála wɔnɔ́ ná njɛ́ɛ əgəə́siəd, waálɛŋ mafɛgaʼ máam, waálɛŋ wɔnɔ́ ná nyaágɛ́nɛ́ɛ́ oʼto, wɔnɔ́ ná nyɛɛ́nóʼtan ntɔ́b, wɔnɔ́ ná ndɛɛ́ anyɔ́ŋɛn pɔɔd, wɔnɔ́ ná ntɛɔ́gɔ əgusulií ɔmbɔg.

¹¹Waálɛŋ tɛn wɔnɔ́ ná páyɛ́nnɛ́ɛ́yɛ ntɔ́b, mbáánɛ́ɛ́. Waálɛŋ nkə kiim kɛ́ kɛ́yɛ́mboan a Əntiyóos na a Iʼkoniyóom na a Líistələ. Páyɛ́nnɛ́ɛ́yɛ ntɔ́b kɔ́gɔ́ɔg ə́y! Sə́dúk ayɛ́nyaáŋɛn a ntɔ́b yɛ́ɛy ngim[12]

¹²Kɔmɔɛ́d, mɔɔd ungim nyɔ́ aányɔ́ŋɛn kuyə́ən ngə́ ɛ Táán, ondadáán na Yə́sus Kilíʼtus, pálɛ́ɛ́ komonɛ́ɛyɛ ntɔ́b.

¹³Náa, pɔɔd pá pabɛ́, na pabógán pálɛ́ɛ́ kɛɛn əgín yuudi na kɔbɛ́. Pálɛ́ɛ́ kulígə pɔsɔ́g, pɔsɔ́g tɛn pə́əbulígə pɔ́lɛ́.

¹⁴Náa, a wɛ, udindiógi ongoo a nkə kɛ́ oyáʼkan, na nkə kɛ́ uyə́líʼtíníí fiɛ́d na isuŋ. Waálɛŋ kɛlág kɛáŋ a pɛbán pɛ́ɛb[13]

¹⁵Əgín kɔ a pɛ́ nɛóndaa nɛáŋ, waálɛŋ nkə kɛ́ kɛ́lɛɛ́ kidiídílə́ a Kálaʼtaʼ ɛ Táán. Kɛ́lɛ nkə kɛ́ kɛ́lɛɛ́ kɛ́goyɛ́ʼkɛn nsiŋ yɛ́ yaágɛɛlɛ lɛ́ wɔ́ɔy a nɛag nɛ́ omáág oʼto na Yə́sus Kilíʼtus.

¹⁶Nkə kiim kɛ́ kɛ́lɛɛ́ kidiídílə́ a Kálaʼtaʼ ɛ Táán, kɛ́lɛ əgiim na Táán, kɛ́lɛ kɛŋɛʼ lɛ́ páaʼkananɛ pɔɔd, kɛ́agɛɛlɛ lɛ́ masɛd má pɔɔd málon táán, pə́di mɔ́lɛ́, páaʼkan kolaa ɔlaa ó sáád.

¹⁷Náan kɛ́agɛɛlɛ lɛ́ mɔɔd o Táán yɛ́ɛn osɔmɔ́ɔ́n a kúfuʼ, ongaábɔ́ŋɛ́náán agɛɛlɛ nkə kiim kɛ́ kɛ́lɛɛ́ kɛŋɛʼ.