Read Yambeta 2 Timoʼtə́ə 4 Bible Online

2 Timoʼtə́ə 4 - Yambeta bible

2 Timoʼtə́ə 4

¹Ndəguŋíən na toɛn, a udi ó Táán na a udi ó Yə́sus Kilíʼtus nyɔ́ alɛ́ɛ́ kiim ɔyɔmɛɛ́ pɔɔd pá poóm na pá pəguə́n. Ɛɛ́ɛ, a niiŋ nɛ́ Kilíʼtus nyɔ́ alɛ́ɛ́ kiimií a Nɛlaamɛʼ. Ndəguŋíən lɛ́

²ɔ́lɔɛgɛ Tɔsɔm tó Táán, úbis əgín, ɔmbɔ́ kɛnɛŋ kíɛn kɛbɛ́, ɔmbɔ́ kɛŋɛʼ. Kɛnɔ kɛ́ ɔsɛd ólɛɛ́, sɔyɔ na toɛn. Nyɔ́ amɛ́ɛ́lɛ kɔbɛ́, óomosásan. Nyɔ́ amɛ́ɛ́lɛ kɔŋɛʼ, óomodɛ́anɛ lɛ́ yágɔ́nɛgɛ. Ɛɛlɛ náan pɛnɛŋ piim waábonóʼtan, waáboyáʼkananɛ.

³Kɛ́lɛ lɛ́, kɛnɛŋ kɛ́lɛ́ɛ́ kiim kɛ́ ngab ɛ pɔɔd yimmú ɛdɛndɛ́ɛ́ kaáʼkɛɛ́ kə́mmú koob sáád yɛ́ páaboyáʼkananɛ. Náa, pálɛ́ɛ́ kuyə́ən nkə kɛ́ pálɛɛ́ anyɔ́ŋɛn pɔ́lɛ́báamɔɛ́d. Pálɛ́ɛ́ kodɔ́ŋɔnɔ agá a ɛbá yɔ́ɔ́bɔn, kiʼtúú kɛ́ pɛlág pɛ́ pɛ́abodɛ́anɛ nkə kɛ́ ntóɛŋ yɔɔbɔn ɛlɛɛ́ anyɔ́ŋɛn koob.

⁴Pálɛ́ɛ́ kɔɔ́lɔ́gɔ ntóɛŋ lɛ́ pádɛnjóób pasáád, páadam agá ntóɛŋ yɔɔbɔn agoob pɛbán pɛ́ məʼtəən.

⁵Náa a wɛ, udinjə́yúnjúgə́níí a ngə́ ngim, nóʼtan ntɔ́b, ágɔ́nɛ́gɛ́ɛ́ kolɔɛgɛ Tɔsɔm Tólaŋ, manánɛ pigólí pɛ́ Táán amágoyɛ́ʼkɛn.

⁶A mɛ, kɛnɛŋ kɛ́ɛnɛ lɛ́ pɛ́nyɛɛ́ʼkɛn a kɛfɔny kɛándɛ kɔ, kɛnɛŋ kɛ́am kɛ́ kugu kiə́ʼkiig.

⁷Nyɛɛ́nɔɛ́yɛ kisig kɛ́ pɛdá, mbádɛ́da tɛn ɔʼtɛ́d, mbɛ́ɛn agaádɛ, ntiliogini ongoo a nɛag nɛ́ nyaágɛ́nɛ́ɛ́ oʼto.

⁸Nɛ́gɔŋ yɛ́ɛnɛ pɛsáábɔ́n pɛ́am pɛ́lɛ agɛmboŋ. Pɛ́lɛ pɛ́ɛnɛ lɛ́ mbálón ombɔg a mɔɛn. Pɛ́lɛ nodám nó pɛsáábɔ́n pɛ́ɛnɛ lɛ́ njə́siə́díí a sáád. Sə́dúk alɛ́ɛ́ kɛnyɛɛ́ʼkɛn pɛ́lɛ́ a wɔɔ́s wóow ó pɛyɔm, nyɔ́lɛ́ nyɔ́ alɛɛ́ onjɔm pɛyɔm o sáád. Adɛ́njaŋ əgín na mɛ áa aágɛnyɛɛ́ʼkɛn, alɛ́ɛ́ kɛɛ́ʼkɛn tɛn na pá pálɛɛ́ na nnyɔ́ŋánán, pá páabóŋan wɔɔ́s wó əə́gimbuúlini.

⁹Ɛɛlɛ nkə kiim agɛɛlɛ lɛ́ wə́bisig kiim agɛmboan

¹⁰lɛ́ Tɛmáas ayɛ́ʼtɛ́da lɛ́ yaágɛn ɔʼtɛ́m kɛ́fɔlɛ́ a pɛbán pɛ́ a nsí yɛ́ɛnɛ. Ayɛ́ɛ́n áa a Təsaloníig. Kɛlɛsánsɛa amɛ́ɛn a Kalasíi, Tíid a Tələməsíi[14]

¹¹Lóʼkas nyɔ́lɛ́nyɔ́əsíŋ áa alɛɛ́ áanɛ na mɛ. Wəə́ndəgiim, mɛ́ɛn úsiəd Mə́líʼkus əgiim na nyɔ́lɛ́ lɛ́ əəgiʼkóomin pigólí.

¹²Nyɛɛ́dóm Tisíig a Ɛfɛ́ɛs[15]

¹³Wəə́ndəgiim, wíim wísiədin lɛnkóod yɛ́ nyiídí a Tolówa, a nó Kalɛʼpóos. Wíim úsiəd tɛn pagálaʼtaʼ, kɔŋɛʼ kɔŋɛʼ pá pálɛɛ́ pəmúsə́músə́ wɔnɔ́ pɛgaan[16]

¹⁴Alɛsándɛlɛ uʼtun pisúg ayɛ́nyɛɛlɛ kɔbɛ́ kɛ́fɔlɛ́. Sə́dúk alɛ́ɛ́ komosáábɔn əgín wɔnɔ́ a nkə kɛ́ amɛ́ɛ́lɛ[17]

¹⁵Wɛ tɛn, siəd kɛnɛŋ na nyɔ́lɛ́ lɛ́ ayádádɛ́gɛ́ɛ́ na toɛn a nkə kɛ́ tɛyɛ́ɛ agaaʼkananɛ pɔɔd.

¹⁶A wɔɔ́s ó na oʼto na oʼto wó nyɛɛ́dɛ́lɛm a udi ó pɔyɔm pɛyɔm agaánɔna, mɔɔd na mɔɔd adɛʼkɛ́ɛ a ngim yaam, ungim ayɛ́ʼtɛ́da. Táán adɛɛ́boʼpɔ́nɛ́sɛ!

¹⁷Náa, Sə́dúk nyɔ́lɛ́ ayɛ́ɛ a ɛbá yáam, amɛ́nyɛɛ́ʼkɛn toɛn lɛ́ ná ndɔɛgɛ Tɔsɔm Tólaŋ tɔmɔɛ́d tuim, ungim nyɔ́ alɛɛ́ kɛnɔɔŋɛʼ ayóób tólɛ́. Sə́dúk ayɛ́njaáŋɛn a unuʼ wó ngɔʼ!

¹⁸Alɛ́ɛ́ kɛnjaáŋɛn a nkə kiim kɛ́ kɛbɛ́ kɛ́ pálɛɛ́ págɛnyɛɛlɛ, áyɛnjɔɔyɛ agɛɛlɛ lɛ́ nsɔd a Nɛlaamɛʼ niə́ŋ a mɔɛn. Tɛ́moyɛ́ʼkɛnaan nugəm a pɛnɛŋ piim! Aamɛn.

¹⁹Wísoyidini pa Pilisíil pɔ́lɛ́ na Aʼkɛláas. Úsoyidi tɛn yoog ɛ pɔɔd yɛ Onɛsɛfɔ́ɔl[18]

²⁰Ɛláastɛ nyɔ́lɛ́ yɛɛ́lɔ́b a pálɛ́ɛg ɛ Kɔlɛ́ɛnt. Mbə́ədi Tolofíim a Milɛ́ɛ lɛ́ ayɛ́ɛ abany[19]

²¹Ɛɛlɛ nkə kiim lɛ́ wíim agɛmboan ná umbuməʼ ódɛ́njɛ́ɛ kɔ. Pa Əbúul, na Podáans, na Línius, na Kolódɛa na pəə́liʼtiniʼ piim pɔ́nɔ́ nkuúsoyidi!

²²Sə́dúk yɛ́ɛn na wɛ aá! Táán áboyɛ́ɛlɛ pəŋi piim kɔŋɛʼ á!