Read Yambeta Tíid 1 Bible Online

Tíid 1 - Yambeta bible

Tíid 1

¹Tíid, mɛ Póol aa mbə́gudílən nufuuʼ nóonɛ. Ndɛ uʼkudin o Táán, ndɛ tɛn mɔɔ́n o maʼtom o Yə́sus Kilíʼtus. Táán ayɛ́ʼtóm lɛ́ nyíim agɛɛlɛ lɛ́ pɔɔd pá əyííyid páág oʼto na nyɔ́lɛ́, njɛɛlɛ tɛn lɛ́ pálɛŋ pafɔ́lɔ́b, páalaa ɔlaa wó wə́əgə́mmi Táán

²ná pámɛna pɛda lɛ́ pálɛ́ɛ́ kɛɛn na ɔlaa ó pɛnɛŋ piim wó Táán ayɛ́bogágɛn əgín kɔ́gɔ́ɔg kalaʼ ná adɛ́njɛ́ɛlɛ nsí, nyɔ́lɛ́ Táán nyɔ́ ədiə́lígíí mɔɔd.

³Ná kɛnɛŋ kiə́ŋ kɛ́ yiísə́ə́ kɛ́yɛ́ɛ kiə́ʼkiim əgiig, Táán, Ongɔɔyɛʼ wəəs, ayɛ́bɛyásɛ́nɛn pɛbán pɛ́ ɔlaa ogo wó ayɛ́bɛgágɛn. Ayɛ́bɛyásɛ́nɛn pɛ́lɛ́ a tɔgɛ́ɛ́ tuə́ŋ tó ayɛ́nyɛɛ́ʼkɛn lɛ́ ndɔɛgɛnɛ pɔɔd.

⁴Mɔɔ́n waam Tíid[1], a oʼto wááŋ áa mbə́dilə nufuuʼ nóonɛ. Olɛ fɔ́lɔ́b mɛ mɔɔ́n nyɔ́ mbə́bíən lɛ́ waágɛn oʼto tɛn na Yə́sus Kilíʼtus wɔnɔ́ mɛ. Táán Sɛ wəəs pɔ́lɛ́ na Yə́sus Kilíʼtus Ongɔɔyɛʼ wəəs págoyɛ́ʼkɛn mawɔʼ na wiiy aá!

⁵Tíid, njíguudí áay a Kɛlɛ́ɛʼtɛ lɛ́ údíin uyibənən kusóbini pɛbán pɛ́ pííligi. Njɛ́godɛánɛ tɛn lɛ́ a pálɛ́ɛg ngim yɛ́ pəə́liʼtiniʼ pálɛɛ́ kɔ, údə́nigəni padɛ́lɛm yuudi kɔ. Wáyɔ́ɔ́ŋɛ ndə́b yɛ́ɛnɛ yɛ́ njɛ́goyɛ́ʼkɛn nyɔʼkɔ́:

⁶Oʼtɛ́lɛm yuudi nyɔ́ a yoog ɛ Táán ogóódi kɛɛn mɔɔd nyɔ́ pə́diə́súníí. Ogóódi lɛ́ yɛ́ɛn na ɔʼkɛ́ɛd úmmuʼ súg[2] Pɔɔ́n pə́ə́ŋ pɛ́ɛn pəə́liʼtiniʼ, pádɛnjɛ́ɛ́n na niiŋ nɛbɛ́ a nigúu lɛ́ pálɛ əgəə́siəd kɔbɛ́. Pádɛnjɛ́ɛ́n poómbaa pá pálɛɛ́ na oʼto wó ɔnnasáŋ.

⁷Kɛ́lɛ lɛ́, mɔɔd nyɔ́ alɛɛ́ oʼtɛ́lɛm yuudi a yoog ɛ Táán alɛ mɔɔd nyɔ́ aádáŋananɛ pɛbán pɛ́ Táán. Ogóódi lɛ́ yɛ́ɛn mɔɔd nyɔ́ pə́diə́súníí, mɔɔd nyɔ́ adɛágaábágɛdɛɛ́, nyɔ́ ədiə́dugəə́ mulúún, mɔɔd nyɔ́ ɔdɛɔ́gɔ ɛŋo maloʼ, nyɔ́ ədiə́gunəə́ pɛay, ədiunə konɛ mɔɔnɛ́ adɛásɔɛ́lɛ́dɛ́ɛ́ kɛɔsɛn a mólɛ́.

⁸Ogóódi kɛɛn mɔɔd nyɔ́ alɛɛ́ agolɛŋ kusiəd pəən a noádɛʼ nuə́ŋ, mɔɔd nyɔ́ alɛɛ́ anyɔ́ŋɛn kɛɛlanɛ kɔŋɛʼ pɛnɛŋ piim. Ogóódi kɛɛn mɔɔd nyɔ́ alɛɛ́ na pusiŋ pólaŋ, mɔɔd o sáád, mɔɔd nyɔ́ alɛɛ́ Sálábádábádá a əngis á Táán, mɔɔd nyɔ́ ɔdɛɔ́gɔ na ɔʼtɛ́m pab pab pab a kaadɛ.

⁹Ogóódi kɛɛn mɔɔd nyɔ́ yəə́bísíníí na toɛn a tɔgɛ́ɛ́ tó mɔɔd alɛɛ́ ogaag oʼto a tólɛ, tó tólɛɛ́ əgín wɔnɔ́ ná páyɛ́moyáʼkánánɛ. Náan, nyɔ́lɛ́ tɛn aalɛŋ wɔnɔ́ ná ábogónɛɛ́ nkó na ndə́b ɛlaŋ. Aálɛŋ kuloodi tɛn moááŋ na pá páagasanɛ tɔgɛ́ɛ́ tuə́ŋ lɛ́ pálɛ a ɔsɛd[3]

¹⁰Ndɛ əgusəə náan lɛ́ pɔɔd pálɛ kɔ piíŋ pá pɔ́dɛɔ́gɔɔ́sɔ́dɛɛ́ mɔɔd. Pálɛ əgulígə pɔsɔ́g na tɔgɛ́ɛ́ tó tódɛ́ɔgɔyɛɛ́ mɔɔd. Mbod ɛ pɔɔd yɛ́ɛy náan yaálaŋ kudəg a ondáŋ ó pɔɔ́n pá Yúdɛn pá páʼkaágɛ́ɛ́ oʼto na Kilíʼtus.

¹¹Wɛ, udiyíbuudí lɛ́ pɛ́ɛn na pigólí pɛɔ́bɔn pɛ́ɛb yuudi lɛ́ pálɛ əguyúnjugəni puog pó pɔɔd na pɛbán pɛ́ɛb pɛ́ pɛ́dɛɔ́gɔ pɛ́ kaaʼkananɛ pɔɔd. Pɔ́lɛ́ pálɛ agɛɛlɛ náan agoníɛn pɔsɔ́g nkə kɛ́ pádɛásɔɛ́lɛdɛnɛɛ́ kɛɔsɛn a kɛ́lɛ́.

¹²Ɔndɔɛgɛʼ pɛbán wɔɔbɔn nyummú, kibíəniʼ kɛ́ Kɛlɛ́ɛʼtɛ wɔnɔ́ pɔ́lɛ́ yiísə́ə́ lɛ́: «Pɔɔ́n pá Kɛlɛ́ɛʼtɛ, pɔɔd pá pɛnyaʼ na pɛnyaʼ pɛnɛŋ piim, pongɔʼ póob, palɛándɛáŋ pá pɔɔd, páabóŋan əgín lɛ́ pánɛ konɛán.»

¹³Nkə kɛ́ɛg kɛ́ yiísə́ə́ náan kɛ́lɛ fɔ́lɔ́b. Kólɛ́ aa ugódíí lɛ́ ósɔyɔn pɔɔd pá a Kɛlɛ́ɛʼtɛ na nɛnyɛ́n lɛ́ páág oʼto na Táán na toɛn,

¹⁴pádɛnjáág oʼto kə́mmú a pɛbán pɛ́ pɔɔd póob páagaaʼkananɛ. Pɛ́lɛ́ pɛbán pɛ́ məʼtəən má Yúdɛn. Pə́dinnúŋ tɛn pɛcɛm pɛ́ pɔɔd pá páásáŋɛ́nɛ ngə́ ɛ pafɔ́lɔ́b pámɛ́ɛ́ga.

¹⁵A mɔɔd nyɔ́ alɛɛ́ ommoáŋáán, moom muim mólɛ momoáŋáán. Kɔmɔɛ́d lɛ́ a nyɔ́ alɛɛ́ na ɔʼtɛ́m ufiífílə́, nyɔ́ asáŋɛ́nɛ́nɛ́ɛ́ kaag oʼto na Táán, muim mólɛ mufiífílə́ lɛ́ mafɛgaʼ mə́ə́ŋ málɛ məfiífílə́, ɔʼtɛ́m tɛn wə́ə́ŋ a kaadɛ ufiífílə́.

¹⁶Pálɛ agaáŋwágɛna nnuʼ yɔɔbɔn lɛ́ pɔ́lɛ́ páálɛŋ Táán. Náa, a maáyɛ́ɛ́lánɛ́ mɔ́ɔ́bɔn póóloodi moááŋ lɛ́ iyó, pádɛmoólɛŋɛn. Pálɛ pɔɔd pá pɔsɔ́g pádɛányɔ́ŋɛnɛɛ́, pálɛ na oʼto wó ɔnnasáŋ na Táán, pɔ́dɛɔ́gɔ tɛn págɛɛlɛ kɔŋɛʼ wɔɔ́s.