Read Yambeta Tíid 2 Bible Online

Tíid 2 - Yambeta bible

Tíid 2

¹Tíid oó! Wɛ odɛnjɛ́ɛ́n náan wɔnɔ́ pɔ́lɛ́ aá! Nkə kɛ́ waágaaʼkananɛ pɔɔd, kíɛn yoom ímuʼ na tɔʼtilíin ɛ sáád yɛ́ páyɛ́goyáʼkánánɛ wɛ.

²Ódɛ́anɛ na piʼtug pɛ́ pɔɔd lɛ́ pádɛŋŋoáŋánɛ́la maloʼ máyɛboŋwáŋɛ. Páányáadɛ, pɛ́ɛn na nsiŋ. Pálɛŋ kəə́bis a kəə́liʼtiniʼ, pɛ́ɛn na nnyɔ́ŋánán, páyɛɛn na ɔʼtɛ́m ó konóʼtan pɛbán.

³Tɛánɛ́ tɛn na pasaá pá pagɛ́ɛd lɛ́ pɛ́ɛn na ɔlaa wó wə́əgə́mmi Táán, pádɛsɔ́yɛ́la əngiŋ á pɔsɔ́g kɔbɛ́, pádɛnjɛ́ɛ́n tɛn pɛɔ́lɛ́ pɛ́ maloʼ, pɛ́ɛn pagɛ́ɛd pá pə́ələ́bən pɔɔd kɔŋɛʼ.

⁴Pə́məʼkəə́siəd náan, póoloodi na pagɛ́ɛd pá pə́ligíí pawa pawa a puog pó kodɔn wɔnɔ́ ná pógódíí lɛ́ pányɔ́ŋɛn panom pɔ́ɔ́bɔn na pɔɔ́n pɔ́ɔ́bɔn.

⁵Páaboyáʼkananɛ kusúələ nsiŋ, na kəə́gə́ʼki. Na pɔ́lɛ́ aa pagɛ́ɛd pá pə́ligíí pawa a kodɔn páagaaʼkan kugumin yoog yɔɔbɔn ɛ kodɔn. Na pɔ́lɛ́ aa páagaaʼkan tɛn kɛɛn na ɔʼtɛ́m ólaŋ, na wɔnɔ́ póóbɛnɛɛ́ panom pɔ́ɔ́bɔn, agɛɛlɛ lɛ́ pɔɔd pádɛnjɛ́ɛ́n na ɛgom yɛ́ pɔ́ɔsɔyɔn Tɔgɛ́ɛ́ tó Táán kɔbɛ́.

⁶Ósɔyɔn tɛn nidom, óbodɛ́anɛ lɛ́ pɛ́ɛn na nsiŋ

⁷a yoom yiim. A wɛ Tíid, ə́siə́díí kɔŋɛʼ a pɛbán piim ná nidom níyə́ən ongoo wááŋ. Kɛnɛŋ kɛ́ olɛ agaaʼkananɛ, aʼkánánɛ tɔʼtilíin ɛ sáád, áág ɔʼtɛ́m wááŋ kɔ ungim.

⁸Sɔyɔ tɔgɛ́ɛ́ tó tólɛɛ́ sáád, tɔgɛ́ɛ́ tó mɔɔd ɔdɛɔ́gɔ ogogasɛɛ́. Náan, pabɛnɛn pááŋ páagɛɛn na oʼto kono lɛ́ pɔ́dɛ́ɔgɔɔŋ kɛbán na kɛbán kɛ́ kɛbɛ́ kɛ́ pə́əsəə na pəsi.

⁹Na pɛɔ́lɛ́, óbodɛ́anɛ wɔʼkɔ́ pádɛnjɛ́ɛ́lɛ́nɛ pəsə́dúg pɔ́ɔ́bɔn oʼto wó ɔnnasáŋ a kɛbán ɔmbɔ́ kímuʼ. Pɛ́ɛlɛ lɛ́ pəsə́dúg pɔ́ɔ́bɔn pɛ́ɛn na tɔnyɔ́g pɛnɛŋ piim na pɔ́lɛ́. Ɛ́bodɛánɛ lɛ́ pádɛsáŋɛ́la na pəsə́dúg pɔ́ɔ́bɔn,

¹⁰pə́diíbuyííbə́nən, pálɛŋ kɛɛlɛ agá pigólí pɛɔ́bɔn. Nkə kiim kɛ́ pə́əbuŋíən lɛ́ pɛ́ɛlɛ, pádɛsáŋɛ́nɛ kɛɛlɛ. Náan, pəsə́dúg pɔ́ɔ́bɔn páagaag ɔʼtɛ́m na pɔ́lɛ́. Wɔʼkɔ́ na pɔ́lɛ́, pə́məʼkəə́siəd náan, kɛ́agɛɛlɛ lɛ́ pɔɔd pɔ́sɔyɔ kɔŋɛʼ a tɔʼtilíin ɛ Táán Ongɔɔyɛʼ wəəs.

¹¹Kɛ́lɛ lɛ́, Táán oóloodi nnyɔ́ŋánán yəəŋ na pɔɔd, nnyɔ́ŋánán yɛ́ yɔɔ́gɔɔyɛ ungim.

¹²Náan, tɛáʼkaálɛŋ lɛ́ tɛdɛɔ́gɔ kə́mmú lɛ́ tíiʼkini kolaa ɔlaa wó údiə́gə́mmií Táán. Tiə́ʼkuliogi ɔʼtɛ́m a pɛbán pɛ́ pɛbɛ́ pɛ́ a nsí yɛ́ɛnɛ agɛɛlɛ lɛ́ tɛ́lɛŋ kəə́siəd a kɛnɛŋ kɛ́ɛnɛ kɛ́ nɛ́gɔŋ kɛ́ tigódíí, tɛ́ɛlaa ɔlaa ó sáád, ɔlaa wó ólɛɛ́ ɔŋŋɛʼ a əngis á Táán.

¹³Taa, náan aa tigódíí lɛ́ tɛ́laa, tɛábóŋan wɔɔ́s ogo ólaŋ wó tɛlɛɛ́ agomɛna pɛda a wólɛ́. Wɔɔ́s wóow, Yə́sus Kilíʼtus Ongɔɔyɛʼ wəəs na Táán wəəs nyɔ́ alɛɛ́ na toɛn alɛ́ɛ́ kimbuúlini a nugəm nuə́ŋ nuim.

¹⁴Nyɔ́lɛ́ nyɔ́ əyə́líʼtíníí kugu nyɔ́lɛ́nyɔ́amɔɛ́d a kidíídí kiə́s agɛɛlɛ lɛ́ ábɛyááŋɛn a mabɛ́ mə́ə́s miim. Áabɛyɛ́ɛlɛ tɛn lɛ́ tɛ́lon Sálábádábádá a əngis yə́ə́ŋ, tɛ́ɛdɛ́lɛm tɛn lɛ́ tɛlɛ tə́ngə́d a oʼto wə́ə́ŋ, tiə́guunə əgín kɛɛlɛ kɔŋɛʼ pɛnɛŋ piim[4]

¹⁵Tíid! Táá nkə kɛ́ ugódíí lɛ́ wáaʼkananɛ pɔɔd aa kɛ́ɛg aá! Ɛ́bosɔ́yɔn a nɛ́ mɔɔd nyɔ́ alɛɛ́ na nɛlaamɛʼ a ombɔg. Pá pámágoyóób, óoboyɛ́ʼkɛn ndə́b yɛ́ yaáboónasɛ nkó. Pá pádɛgoyóóbɛnɛɛ́, óboósɔyɔn na toɛn. Udiyə́díí lɛ́ mɔɔd na mɔɔd ágosɛ́ɛdɛ á!