Read Yambeta Tíid 3 Bible Online

Tíid 3 - Yambeta bible

Tíid 3

¹Wáyɔ́ɔ́ŋɛnɛ pəə́liʼtiniʼ lɛ́ póóbɛn pongɔ́mɛnaʼ pó pogóón, na palaamɛʼ nigúu[5] Pádɛɛ́boyɛ́ɛ́lɛ́nɛ oʼto wó ɔnnasáŋ. Pɛ́ɛn ndúmiʼ agɛɛlɛ kɔŋɛʼ pɛnɛŋ piim.

²Ɛ́bodɛánɛ tɛn lɛ́ pádɛŋŋɔ́ɔ́ŋɔ́nɛ́la pɔsɔ́g, pádɛsáŋɛ́la na pɔɔd, pə́wiiyi ntɛ́m yɔɔbɔn a kaadɛ, pɛ́ɛn na nnyáádɛ́ na mɔɔd ungim

³lɛ́ pəsi tɛn tɛyɛ́ɛ náan fiɛ́d na nsiŋ kalaʼ, tɛágɛɛlɛ oʼto wó ɔnnasáŋ. Tɛyɛ́ɛ pənímə́ə́n. Tɛyɛ́ɛ na ntɛ́m əgín a mbod ɛ pɛbán ngim kɛɛlɛ. Ntɛ́m yəəs ɛyɛ́ɛ əgín mabɛ́ kɛɛlanɛ. Mafɛgaʼ mə́ə́s máyɛ́ɛ əgín a ngə́ yɛ́ mbɛ́ yɛ́lɛ́ na yɛ́lɛ́. Tɛyɛ́ɛ tɛnnyɔ́ŋɛn lɛ́ ná tɛádála yoom na əngis álaŋ a ɔmbɔg á mɔɔd wɛndɛ́ŋ, tɛábɛmbɛnanan pəsi na pəsi.

⁴Ɔmbɔ́ wɔnɔ́ ná tɛyɛ́ɛ náan, Táán, Ongɔɔyɛʼ wəəs əyíbilóódi kɔdɛ́ɛ ɔʼtɛ́m kuə́ŋ, na wɔnɔ́ ná alɛɛ́ na nnyɔ́ŋánán na mɔɔd lɛ́ mɔɔd.

⁵Ayɛ́bɛyɔ́ɔ́yɛ. Náa, adɛʼkáabɛyɔ́ɔyɛ a oʼto wóonɛ lɛ́ tɛyɛ́ɛ́lánɛ pɛbán pɛ́ pɛ́yɛ́ɛ sáád, ndóo. Ayɛ́bɛyɔ́ɔ́yɛ lɛ́ yiísiə́d maan na pəsi. Ayɛ́bɛyɔ́ɔ́yɛ, amáabɛɛ́sɔgɛn na məní má ɔsɔgɛn, na Uŋun wó Ufúlúʼtú wó ayɛ́bɛyɛ́ʼkɛn agɛɛlɛ lɛ́ tiə́bíən kawa, tɛ́yɛɛn a ɔlaa wó ongwa[6]

⁶Kɛ́lɛ lɛ́, Uŋun wó Ufúlúʼtú wóow, Táán əyíbisúgínin wólɛ́ a fug a ngim ɛ Yə́sus Kilíʼtus, Ongɔɔyɛʼ wəəs.

⁷Ayɛ́bɛyɛ́ɛ́lɛ lɛ́ tɛdɛnjɛ́ɛ́n kə́mmú na nsɔ́ɔ́ a əngis yə́ə́ŋ agɛɛlɛ lɛ́ tíɛn na ɔlaa ó pɛnɛŋ piim. Ɔlaa ogo wó tɛlɛɛ́ agomɛna pɛda a wólɛ́ lɛ́ alɛ́ɛ́ kɛbɛyɛ́ʼkɛn. A kɔdɛ́ɛ ɔʼtɛ́m kuə́ŋ áa ayɛ́bɛyɛ́ɛ́lɛ náan.

⁸Tíid oó! Tɔgɛ́ɛ́ tóonɛ tólɛ tɔgɛ́ɛ́ tó mɔɔd alɛɛ́ lɛ́ yáag oʼto a tólɛ́. Ndɛ anyɔ́ŋɛn lɛ́ óboósɔyɔn, úbusíʼtəg na tɔgɛ́ɛ́ tóod agɛɛlɛ lɛ́ pá páágɛ́nɛ́ɛ́ oʼto na Táán, pááyɛ́ʼkɛn na toɛn tuim agɛɛlɛ pɛbán pɛ́laŋ. Táá nkə kɛ́ kɛádɛ́ɛ́ ná ungim aa kɛ́ɛg, kɛ́aboɛ́bɛ.

⁹A wɛ, kɛnɛŋ kɛ́ pɔɔd pálɛ agɛɛlɛ musuŋ a muyənjə́g mó pɛbán pɛ́ náan iyó, odɛnjáág unuʼ wááŋ kɔ. Odɛsɔ́d tɛn a musuŋ mó Yúdɛn ɛlɛanɛɛ́ a mólɛ́ a pɛbán pɛ́ kosɔg uʼtín wɔnɔ́ ná pasɛʼkóón pɔ́ɔ́bɔn pə́míim pádɛ́ɛmɛn[7] Odɛʼtɛ́lɛ́man a masáŋ na pɔ́lɛ́. Odɛsɔ́d tɛn a musuŋ mó móadɛ́ʼtɛg pɛcɛm pɛɔ́bɔn. Pɛbán pɛ́ɛb pɛ́lɛ iyó, pɛ́dɛ́agɛɛ́bɛ mɔɔd.

¹⁰Mɔɔd amaʼkɛɛn na inyuunyugiʼ a kɛgaágadɛ kɛ́ pəə́liʼtiniʼ, ɛ́modɔ́ŋɔn, ómoósɔyɔn. Adɛgoyóbɛn a kó na oʼto na oʼto, iiʼkíni komodɔ́ŋɔn a annam ábaan, ómoyááganan mbaŋ. Ədiiʼkíni kogoyóbɛn tɛn áay, úumudúmin ngim[8], úumuúliogi a ondáŋ wááŋan.

¹¹Waálɛŋ wɛɛ́nyɔ́amɔɛ́d lɛ́ mɔɔd aándɛ náan, aándɛ osɔ́dɔ́ɔ́n a kɔbɛ́ sɔɔd, aáʼkaáyɛ́ʼkɛn tɛn nyɔ́lɛ́nyɔ́amɔɛ́d nsɔ́ɔ́.

¹²Tíid oó! Ndəəgiim nkodómɛn mɔɔd aá! Adiɛnɛn Aʼtɛmáas, áyɛɛn Tisíig. Ná nyɔ́ ndə́əgiim ntom əə́giim əgiig, wúunə ngə́ agɛɛlɛ lɛ́ wə́bisig kiim agɛmboan a Niʼkoʼpolíis lɛ́ kɔ áanɛ aa mbányɔ́ŋɛn lɛ́ nsánɛ umbuməʼ wóonɛ.

¹³Ɛɛlɛ nkə kiim kɛ́ɛnɛ lɛ́ úgóomin pa Aʼpolóos[9] pɔ́lɛ́ ná Sɛ́nas ɔnnɔnaʼ pɔɔd. Wɛ́ɛlɛ lɛ́ ɔmbɔ́ yoom ɛ́dɛɛ́boʼtáŋɛn a ongɛn wɔ́ɔ́bɔn aá.

¹⁴Pomóŋŋí pə́ə́s tɛn póʼkáag pógóódi lɛ́ páaʼkan kɛɛlɛ kɔŋɛʼ, agɛɛlɛ lɛ́ pɛ́ɛ́banɛ pɔsɔ́g pá póʼkódií yoom. Pámaʼkɛɛlɛ náan, pásánɛnɛ ɔlaa wɔ́ɔ́bɔn nsíísí iyó.

¹⁵Ungim nyɔ́ alɛɛ́ áanɛ na mɛ, ɔnɔ́ nkuúsoyidəni á! Úbiísoyidini tɛn ungim nyɔ́ alɛɛ́ káag na nnyɔ́ŋánán na pəsi, piim pá pálɛɛ́ a kəə́liʼtiniʼ á! Táán áboyɛ́ɛlɛ pəŋi piim kɔŋɛʼ á!