Read Yambeta Fɛlɛmɔ́ɔŋ 1 Bible Online

Fɛlɛmɔ́ɔŋ 1 - Yambeta bible

Fɛlɛmɔ́ɔŋ 1

¹Fɛlɛmɔ́ɔŋ! Mɛ Póol nyɔ́ ndɛɛ́ a yoog yɛ njaan lɛ́ ndɛ alɔɛgɛ Tɔsɔm tó Yə́sus Kilíʼtus aa ndɛɛ́ na nufuuʼ nóonɛ. Tiə́dilə nólɛ́ ondáŋ na móŋŋí wəəs Timoʼtə́ə. Timə́gudílən wɛ sɔ́g wəəs wo ɔʼtɛ́m nyɔ́ tɛlɛɛ́ agɛɛlɛ pigólí pɛ́go pímuʼ.

²Tiə́dilə tɛn nólɛ́ a oʼto ó móŋŋí wəəs nyɔ́ ɔʼkɛ́ɛd Áʼpɛa, na a oʼto tɛn wó Ələsíib nyɔ́ tɛlɛɛ́ agonɔɛyɛ pɛdá ondáŋ na nyɔ́lɛ́. Nóadɛ́ʼtɛg tɛn pəə́liʼtiniʼ piim pá pálɛɛ́ agaágɔnyɛla a noádɛʼ noáŋ.

³Táán Sɛ wəəs pɔ́lɛ́ na Yə́sus Kilíʼtus Sə́dúk wəəs páboyɛ́ʼkɛn mawɔʼ na kiwiiyiʼ aá!

⁴Fɛlɛmɔ́ɔŋ! Alɛ ntiguyə́bə́líí a pɛɔ́sɔ́gɔ́lɔ́n pɛ́am piim na Táán. Ndɛ əgumuúsoyidəni a kidíídí kɛáŋ

⁵lɛ́, ndɛ agoob wɔnɔ́ ná olɛɛ́ na nnyɔ́ŋánán na pəə́liʼtiniʼ piim, na wɔnɔ́ ná waágɛ́nɛ́ɛ́ tɛn oʼto na Sə́dúk Yə́sus.

⁶Ndɛ ɔgɔɔ́sɔ́gɔlɔn tɛn Táán lɛ́ ágoyɛ́ɛlɛ, kəə́liʼtiniʼ kó olɛɛ́ na kólɛ́ a unuʼ úmmuʼ na pəsi kólon na kɛsom, wɛ́ɛlɛ lɛ́ pɔɔd pálɛŋ kɔŋɛʼ kuim kó tɛlɛɛ́ págɛɛlɛ a kidíídí kɛ́ Kilíʼtus.

⁷Móŋŋí waam, nnyɔ́ŋánán yɛ́ olɛɛ́ na yɛ́lɛ́ na pəə́liʼtiniʼ ɛlɛ agɛnyɛɛ́ʼkɛn tɔnyɔ́g kɛ́fɔlɛ́ a ɔʼtɛ́m. Ɔmbɔ́ tɛn nkə kiim kɛ́ olɛɛ́ agɛɛlɛ agoboónasɛ nkó kɛ́lɛ agɛnyɛɛlɛ lɛ́ ɔʼtɛ́m wáam úwiiyi a kaadɛ.

⁸Kɛ́lɛ tɛn lɛ́, ɔmbɔ́ ná ndɛɛ́ ogogoófanyan pɛbán lɛ́ ndɛ uʼkudin o Kilíʼtus, ntɛágoófanyan.

⁹Ndagoyɔ́sɔ́gɔlɔn agá a nnyɔ́ŋánán yɛ́ olɛɛ́ na yɛ́lɛ́. Ɛɛ́ɛ, mɛ iʼtuʼtúg ɛ́ mɔɔd, mɛ Póol nyɔ́ ndɛɛ́ nɛ́gɔŋ a yoog yɛ njaan lɛ́ ndɛ uʼkudin o Yə́sus Kilíʼtus,

¹⁰mbágoyɔ́sɔ́gɔ́lɔ́nɛ́ɛ́ a kidíídí kɛ́ mɔɔ́n waam Onəsíim. Nyɔ́lɛ́ nyɔ́ njɛ́ɛ́lɛ lɛ́ yáag oʼto na Táán áanɛ a yoog yɛ njaan yɛ́ɛnɛ yɛ́ ndɛɛ́ a yɛ́lɛ́[1]

¹¹Ayɛ́ɛ əligi kifód kɛ́ mɔɔd kalaʼ. Náa, nɛ́gɔŋ yɛ́ɛnɛ aándɛɛ́ ugibiígudinií pəsi piim lɛ́ na wɛ na mɛ.

¹²Nyɔ́ aa nyóonɛ mbííʼkíni kiim nkoodómɛn. Alɛ ɔʼtɛ́m wáam.

¹³A mɛ na mɛ ná mbúúd ndɔb áanɛ na nyɔ́lɛ́ agɛɛlɛ lɛ́ yɛ́nyɛɛlanɛ maʼtóʼtóm a niiŋ nɛáŋ wɔnɔ́ ná ndigíí a yoog yɛ njaan yɛ́ɛnɛ yɛ́ ndɛɛ́ a yɛ́lɛ́ a oʼto ó Tɔsɔm Tólaŋ.

¹⁴Náa, ntɛnyɔ́ŋɛnɛn kɛɛlɛ náan ntɛgoyábɛ́gɛ́ɛ́ agɛɛlɛ lɛ́ kɛ́dɛnjɛ́ɛ́n wɔnɔ́ ndɛ agá agoogóda ambaan lɛ́ wɛ́nyɛɛlɛnɛ kɔŋɛʼ. Ndóo, wɛɛ́nyɔ́amɔɛ́d áa ugódíí lɛ́ wáyɛ́ɛ́ŋɛn kɛnyɛɛlɛnɛ kɔŋɛʼ a kɔdɛ́ɛ ɔʼtɛ́m koáŋ.

¹⁵Amaʼkɛɛlɛ, Táán áa ayɛ́ɛ́lɛ lɛ́ Onəsíim áyag kuliog a ambaan yááŋ ná ə́díin anɛ́ɛ́n yímbuúlini a kúfuʼ.

¹⁶Əndigi kə́mmú kɛɔ́lɛ́, amááyɛn kɛɔ́lɛ́ nɛ́gɔŋ, aándɛ móŋŋí wəəs wo ɔʼtɛ́m. Alɛ kə́mmú kolaŋ náan a ɔʼtɛ́m Wáam. Yɛ́ɛn tɛn kolaŋ náan a ɔʼtɛ́m wááŋ. Kɛ́ na oʼto na oʼto, alɛ kɛɔ́lɛ́ kɛáŋ. A pɛ́baan aándɛ woómóŋŋí o kəə́liʼtiniʼ.

¹⁷Kɛ́maʼkɛɛn lɛ́ fɔ́lɔ́b olɛ əgisiəd lɛ́ ndɛ woómóŋŋí o kəə́liʼtiniʼ, siəd tɛn Onəsíim wɔnɔ́ mɛ agá aa ndɛɛ́nɔ.

¹⁸Ɔmbɔ́ ayɛ́goyɛ́ɛ́lɛ kɔbɛ́ igə! Ɔmbɔ́ olɛ əgumuŋíən uŋín igə, áág pɛ́ɛb piim a oʼto wáam, ndəguyúlisini.

¹⁹Taa, ombɔg wáam ó mɛɛ́nyɔ́amɔɛ́d Póol aa wóonɛ mbándagaágɛ́ɛ́ a nufuuʼ əgudilə lɛ́ nkə kiim kɛ́ wəə́muŋíən, mɛ Póol ndəguyúlisini. (Udinjə́bə́líí lɛ́ wɛɛ́nyɔ́amɔɛ́d tɛn wiʼkóódíni uŋín wó ómááyɛn náan lɛ́ mɛ fiɛ́d ná odɛɔ́gɔ na ɔlaa ó pɛnɛŋ piim.)

²⁰Móŋŋí, mbágoyɔ́sɔ́gɔ́lɔ́nɛ́ɛ́! Sɛ́gɔɔ, wɛ́nyɛɛlɛnɛ nkə kɛ́ɛg kɛ́ ndə́guŋíən. Ɛɛlɛ kɛ́lɛ́ a nnyɔ́ŋánán yɛ́ tɛlɛɛ́ na yɛ́lɛ́ na Sə́dúk. Wíngwiiyi ɔʼtɛ́m lɛ́ tɛlɛ unuʼ úmmuʼ a Kilíʼtus.

²¹Mbə́gudílən nufuuʼ nóonɛ lɛ́ odɛɔ́gɔ ogosan nɛŋo nɛ́am. Mbálɛŋ lɛ́ wagɛɛlɛ agosan náan, ɔmbɔ́ tɛn nkə kɛ́ ntiguŋíəninií.

²²Ísóbíníni tɛn kɛ́am kɛsom kɛ́ yoog lɛ́ a ɔʼtɛ́m wáam mbálɛŋ lɛ́ Táán adɛɔ́lɔb lɛ́ adɛóbɛn pɛɔ́sɔ́gɔ́lɔ́n pɛáŋan. Aagɛndónɛ a yoog yɛ njaan yɛ́ɛnɛ yɛ́ ndɛɛ́ a yɛ́lɛ́ ná nyímbuúli káag.

²³Ɛʼpafɛláas nyɔ́ alɛɛ́ áanɛ a yoog yɛ njaan na mɛ a oʼto ó Yə́sus Kilíʼtus ɔnɔ́ nkuúsoyidi á!

²⁴Na Mə́líʼkus, na Alɛstáag, na Tɛmáas, na Lóʼkas pá pálɛɛ́ agɛɛlɛ pigólí pɛ́ Táán ondáŋ na pəsi pɔ́nɔ́ nkuúsoyidi tɛn aá[2]

²⁵Sə́dúk Yə́sus Kilíʼtus áboyɛ́ɛlɛ kɔŋɛʼ á!