Read Yambeta Əbələ́ə 10 Bible Online

Əbələ́ə 10 - Yambeta bible

Əbələ́ə 10

¹Kɛcɛm kɛ́ Moyíis kɛ́lɛ əgín agá kílíndiʼ kɛ́ moom mólaŋ mó mólɛ́ɛ́ kiimií. Kɛ́dɛɔ́gɔ kɛ́lɛ́gɛ́amɔɛ́d moom mógo móom. Kólɛ́ aa kɛcɛm kɛ́ɛg kɛ́dɛɔ́gɔ kíguufúŋi a kúfuʼ pá pálɛɛ́ əguunə kaáyɛʼtɛnɛ a ɛbá ɛ́ Táán pɛag piim a kɛfɔny əgín kɛ́go yoom ímuʼ yɛ́ páamoyɛ́ʼkɛnan pɛnɛŋ piim, nɛman fiɛ́d.

²Kɛ́yɛ́ɛnɛn náan, ná pɔ́dɛɔ́gɔ əgiiʼkini kɛɛlanɛ pɛ́lɛ́ kə́mmú lɛ́ pɛáʼkoboósɔgɛn mabɛ́ mɔ́ɔ́bɔn kə́muʼ a pɛnɛŋ piim. Pá páagɛɛlanɛ pɛ́lɛ́ pádɛʼkɛ́ɛ əgiiʼkini kaáságɛma tɛn kə́mmú mabɛ́ mɔ́ɔ́bɔn.

³A fɔ́lɔ́b kɛ́lɛ lɛ́, pɛfɔny áa pɛ́agɛɛlɛ lɛ́ pɔɔd pááyɔ́ɔ́ŋanɛ mabɛ́ mɔ́ɔ́bɔn maag miim

⁴lɛ́, maŋɔ́ má panom pá paʼkáwoʼ na má pibə́b mádɛ́asɔgɛn pɔɔd mabɛ́ má pámɛ́ɛ́lɛ.

⁵Kólɛ́ aa, ná Kilíʼtus ayɛ́ɛ əə́ndəgiim a nsí yɛ́ɛnɛ, yiísə́ə́ ɔnɔ́ na Táán: «Adɛ́njaŋ ponyam aa oyɛ́ɛ əguunə lɛ́ ná mɔɔd amágofɔ́nyɛn, ndóo. Adɛ́njaŋ ɔmbɔ́ tɛn moom aa oyɛ́ɛ əguunə lɛ́ ná pámágoyɛ́ʼkɛ́nan, ndóo. Náa, oyɛ́nyɛɛlɛ mɔɔd na nkó.

⁶Odɛɔ́gɔ anyɔ́ga ná pálɛ ɔgɔ́lɔnɛ ponyam lɛ́ págoyɛ́ɛlɛnɛ kɛfɔny, ndóo. Odɛányɔ́ga tɛn ɔmbɔ́ ná pálɛ agooyɛ́ɛlɛnɛ pɛfɔny lɛ́ ná úlisin pɔɔd mabɛ́ mɔ́ɔ́bɔn.

⁷Áay aa nyiísə́ə́ anɛ́ɛ́n nyɔʼkɔ́ na wɛ Táán: “Taa, mɛ aa nyóonɛ o! Mbíim mɛɛ́nyɔ́amɔɛ́d ná olɛɛ́. Mbíim agɛɛlɛ nɛnyɔ́ŋɛn nɛáŋ, əgín wɔnɔ́ ná kíyə́dílə́ə́ a niiŋ nɛ́am, a kálaʼtaʼ ɛ pɛcɛm[54]” »

⁸Kilíʼtus nyɔ́lɛ́ yɛɛ́yáŋ əsəə ɔnɔ́: «Udiʼkə́əguunə lɛ́ ná mɔɔd amágofɔ́nyan ponyam, udiunə tɛn ɔmbɔ́ lɛ́ ná mɔɔd amágoyɛ́ʼkɛ́nan moom. Udiʼkə́əguunə lɛ́ ná pɔ́ɔ́gɔ́lɔ́nɛ́ ponyam agooyɛ́ɛlɛnɛ pɛfɔny, udiunə tɛn ɔmbɔ́ lɛ́ ná pámágoyɛ́ɛ́lɛ́nɛ pɛfɔny lɛ́ ná úlisin pɔɔd mabɛ́ mɔ́ɔ́bɔn. Pɛfɔny pɛ́ɛb pɛ́dɛʼkɛ́ɛ əgugə́mmi.» Kɔmɔɛ́d lɛ́ páyɛ́ɛ agɛɛlanɛ pɛ́lɛ́ əgín wɔnɔ́ ná kɛcɛm kɛ́yɛ́ɛ əgusəə.

⁹Aáság kiiʼkini kusəə ɔnɔ́: «Taa, mɛ aa nyóonɛ o! Mbíim mɛɛ́nyɔ́amɔɛ́d lɛ́ nyíim agɛɛlɛ nɛnyɔ́ŋɛn nɛáŋ.» Náan aa Kilíʼtus yɛɛ́mánɛ pɛfɔny pɛ́ kalaʼ, aáfɛabɛ na kiə́ŋ kɛ́ nyɔ́lɛ́nyɔ́amɔɛ́d.

¹⁰Wɔnɔ́ ná Yə́sus Kilíʼtus ayɛ́ɛ́lɛ nɛnyɔ́ŋɛn nɛ́ Táán niim ná ayáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d a kɛfɔny, kə́muʼ súg a pɛnɛŋ piim, áay aa Táán əyíbifúŋi a mabɛ́ mə́ə́s.

¹¹Ɔnjaaganɛʼ pɛfɔny o Yúdɛn ungim alɛ agodɛ́lɛman mɔɔ́s miim agɛɛlɛ pigólí piə́ŋ, aáyaaganɛ pɛfɔny əgín pɛ́go pímuʼ, kɔmɔɛ́d lɛ́ pɛ́dɛɔ́gɔ píguliogi ɔmbɔ́ wɔɔ́s, mabɛ́ má pɔɔd páagɛɛlanɛ[55]

¹²A Kilíʼtus, nyɔ́lɛ́ ayɛ́ɛ́lɛ kɛfɔny kímuʼ súg a pɛnɛŋ piim a oʼto ó mabɛ́ má pɔɔd, amáyɛɛn ələndin a ombɔg ó nɛnom ó Táán.

¹³Alɛ agoboŋ nɛ́gɔŋ lɛ́ Táán yɛ́ɛlɛ pabɛnɛn pə́ə́ŋ píim ədə́əŋ a udi wə́ə́ŋ, pɛ́ɛn wɔnɔ́ pɛgaan a ambaan yə́ə́ŋ[56]

¹⁴A pómbóg yəəŋ ɛ kɛfɔny yɛ́ɛy mmuʼ aa yiífúŋi kúfuʼ kúfuʼ a mabɛ́ mɔ́ɔ́bɔn, pá ayɛ́ɛ́lɛ lɛ́ pɛ́ɛn tə́ngə́d a oʼto ó Táán.

¹⁵Uŋun wó Ufúlúʼtú óyɛ́bɛdɛánɛ tɛn lɛ́ kɛ́lɛ náan fɔ́lɔ́b. Wɛ́ɛ́yáŋ əsəə wɔnɔ́:

¹⁶«Sə́dúk yiísə́ə́ lɛ́: “Taa, nɛálad nɛ́ ndɛ́ɛ́ kaáyóóbananɛɛ́ na pɔ́lɛ́ a ngim ɛ mədúg móom aa nɛ́ɛnɛ: Ndɛ́ɛ́ kaag pɛcɛm pɛ́am a ntɛ́m yɔɔbɔn. Ndɛ́ɛ́ komágam pɛ́lɛ́ a nto yɔɔbɔn a kaadɛ”.»

¹⁷Yiísə́ə́ tɛn kə́mmú lɛ́: «Ntiə́giiʼkini kaáyɔ́ɔ́ŋɛ kə́mmú mabɛ́ má páyɛ́nyɛɛlɛ. Ɔmbɔ́ tɛn masɛd mɔ́ɔ́bɔn, ntɛágaáyɔ́ɔ́ŋɛ[57]»

¹⁸Kɛnɛŋ anɛ́ɛ́n kɛ́ Táán əə́ʼkulisinií pɔɔd mabɛ́ mɔ́ɔ́bɔn, kídíəguunə kə́mmú lɛ́ píiʼkini kɛɛlɛ pɛfɔny agosɔgɛn mɔ́lɛ́.

¹⁹Pomóŋŋí, a oʼto ó maŋɔ́ má Yə́sus yɛɛ́fɔ́ny a kidíídí kiə́s, tɛándɛ na ngə́ ɛgosɔd nɛ́gɔŋ a uʼkóó wó ufúlúʼtúʼtúʼtú, tɛʼtammána.

²⁰Əyíbibuə́nin ngə́ yɛ́ ngwa, ngə́ yɛ ɔlaa. Ɛlɛ ngə́ ɛgosan yɛ́ a kɛsaa kɛ́ kilə́ə́ kɛ́ a Tɛ́mpɛl, áay lɛ́, a nkó yəəŋ.

²¹Tigóódi ɔnjaaganɛʼ pɛfɔny nyɔ́ oʼkóʼkóón nyɔ́ pə́ə́də́nígi lɛ́ álaamɛ yoog ɛ Táán.

²²Tɛáyɛʼtɛnɛan anɛ́ɛ́n a ɛbá ɛ́ Táán na ntɛ́m sáád a kaadɛ, tɛ́yaag oʼto wə́ə́s kɔŋɛʼ kɔŋɛʼ na nyɔ́lɛ́ lɛ́ maŋɔ́ má Kilíʼtus mɛ́ɛ́moáŋɛ ntɛ́m yəəs a mafɛgaʼ má mabɛ́, məní má məfúŋiə́n má máabɛyóonanɛ[58]

²³Tiɛ́naan əgín náan yuudi na komɛna pɛda na Táán kó tɛlɛɛ́ alɔɛgɛ, tɛʼtambɛ́lɛd, lɛ́ nyɔ́lɛ́ adɛágasɛ unuʼ a nkə kɛ́ aágagɛn pɔɔd.

²⁴Tiə́ŋíənəən tuə́ áa tɛlɛɛ́ págɛɛ́ʼkɛnanan ndə́b agɛɛlɛ lɛ́ tɛágɔ́nɛgɛ kɔnyɔ́ŋanan pəsi na pəsi, na lɛ́ tíɛlanɛ tɛn pɛbán pɛ́laŋ, wɛ ogo waágɛɛlɛnɛ sɔ́g.

²⁵Pɔsɔ́g pə́mmú pə́ʼkudi ondoŋá ó kɛɛnan agaágɔnyɛd na pɔsɔ́g. Pudinjə́ən ongoo wɔ́ɔ́bɔn. Náa, pəŋi! Todáan əgín yuudi na konasanɛ nkó pəŋi na pəŋi lɛ́ wɔɔ́s ó Sə́dúk əə́ndəgimbuúlinií wándɛ ndúmiʼ, polɛ palɛŋáán náan.

²⁶Pəsi pá tɛáʼkolɛŋɛɛ́ pafɔ́lɔ́b kɔŋɛʼ kɔŋɛʼ, tɛmaʼkɛɛnanan əgín náan yuudi, tɛágɛɛlɛ mabɛ́ a kɛsɛ́n, kɛfɔny kímmú kɛ́ kɛ́abɛɛ́sɔgɛn mabɛ́ kɛ́dɛágɛɛn kɔ.

²⁷Nkə kɛ́ kɛáʼkɛbɛɛ́lɔbɛnɛɛ́ pəsi póob kɛ́lɛ lɛ́ tɛáboŋ na wɛɛ́y ungim nkə kɛ́ kígódíí lɛ́ kɛ́bɛɛ́boan. Kɛ́go kɛ́ɛg kɛ́lɛ wɔɔ́s wó Táán alɛ́ɛ́ kiim ɔyɔmɛɛ́ pabɛnɛn pə́ə́ŋ na kɛa kɛ́ yug yɛ́ yáabogɔ́lɔnɛ[59]

²⁸Kɛnɛŋ kɛ́ mɔɔd əə́də́əŋ kɛcɛm kɛ́ Moyíis, náa wɛ́sɛnɛg ɛ́baan, ɛ́dáád yaálón lɛ́ pámámoodála, nyóon alɛ lɛ́ pámoyóon, pə́diə́siəd maan na nyɔ́lɛ́[60]

²⁹A nyɔ́ aásɛ́ɛ́dɛ anɛ́ɛ́n Mɔɔ́n o Táán óo, kɛ́agɛɛn tuə́ na nyɔ́lɛ́ ə́? Nyɔ́ əə́siəd maŋɔ́ má nɛálad, maŋɔ́ má mə́mə́mufúŋi wɔnɔ́ málɛ iyənjə́g ɛ́ yoom. Nyɔ́ aádóga Uŋun wó Ufúlúʼtú wó úmə́bilóódi kɔŋɛʼ kó Táán alɛɛ́ agɛbɛyɛ́ɛlɛ əə, nyóon náan, a nɛáŋan nɛfɛgaʼ əə, poádála tuə́ ə́? Yəəŋ pɔ́nɔ́ɔs ɛdɛágaáyɛn yɛ́ɛy a?

³⁰Kɛ́lɛ lɛ́, pəsi tɛálɛŋ nyɔ́ yiísə́ə́ ɔnɔ́: «Kəə́gun na mɛ áa kólɛɛ́. Mɛ áa nkódíí lɛ́ nsáábon ɛ́nɛ́ mɔɔd pɛsáábɔ́n pɛ́ pɛásɛʼtan na pigólí piə́ŋ pɛ́ əə́gud!» Yiísə́ə́ tɛn kə́mmú ɔnɔ́: «Mɛ Sə́dúk, ndɛ́ɛ́ koyɔmɛ pɔɔd páam[61]»

³¹Ngililiʼ ɛlɛ kɔ kɛ́fɔlɛ́ a mɔɔd nyɔ́ əə́də́əŋ a ɔmbɔg á Táán nyɔ́ alɛɛ́ na ɔlaa.

³²Áyɔ́ŋɛ́an nkə kɛ́ kɛ́yásánɛ́ɛ́ na pəŋi a niə́bə́ə ná sáád ɛ Táán ɛyɛ́bomoáŋɛ əngis. Poɛ́nɛ́ ntɔ́b ngíŋ a kɛnɛŋ kɛ́go kɛ́ɛg, náa poɛ́nɔɛ́yɛ pɛdá na toɛn.

³³Poyɛ́ɛ lɛ́, páaboodóga áanɛ, pə́əbuúyəʼkəni kága a udi ó mɔɔd ungim. Pɛnɛŋ pímmú póodɛ́lɛm a ngim ɛ pá páyɛ́ɛ əguyəʼkəni tɛn wɔnɔ́ pəŋi.

³⁴Puísiə́d ngab na ntɔ́b ɛ pá páyɛ́ɛ a yoog yɛ njaan a oʼto ó Yə́sus. Ná páyɛ́bobɔ́gɔ tɛn tugúm toáŋan, puyə́líʼtíníí kolɔ́ɔs tólɛ na tɔnyɔ́g lɛ́ poɛ́lɛŋɛn lɛ́ pugóódi tugúm tó toɛ́dɛ́ɛ́ agaáyɛn tóod, tugúm tó tódɛndɛ́ɛ́ komanɛɛ́.

³⁵Pudisúúli anɛ́ɛ́n ɔmbɔg, polɛ́ɛ́ kɛɛn na pɛsáábɔ́n pɛ́ pɛgóón.

³⁶Nkə kɛ́ kíəbuyúunən kɛ́lɛ lɛ́ puə́yíis agɛɛlɛ lɛ́ póɛlɛ nkə kɛ́ Táán alɛɛ́ anyɔ́ŋɛn, ná púim ɔɔgɔɔŋ nkə kɛ́ ayɛ́bɛgágɛn lɛ́ abɛyɛ́ʼkɛn.

³⁷Kɛ́lɛ kidiídílə́ a Kálaʼtaʼ ɛ Táán lɛ́: «Aáʼkolɔb əgín kɛnɛŋ sɔɔŋ, kɛnɛŋ sɔsɔ́ɔ́ŋ iyó lɛ́ nyɔ́ ogódíí lɛ́ yíim, yíim alon. Kiim kuə́ŋ kúndigi laálá.»

³⁸Táán ɔnɔ́: «Ungim nyɔ́ alɛɛ́ sáád, alɛ́ɛ́ kolaa lɛ́ amáág oʼto na mɛ. Náa, əməʼkuúlini kə́mmú ngim, ntɛányɔ́ga na nyɔ́lɛ́[62]»

³⁹Pəsi tɛdɛɔ́gɔ kə́mmú pɔɔd pá kuúlini ngim lɛ́ ná tínim. Pəsi tɛmáág oʼto na Táán, tɛlɛ a ngə́ yɛ́ yaábɛyɔ́ɔyɛ.