Read Yambeta Əbələ́ə 11 Bible Online

Əbələ́ə 11 - Yambeta bible

Əbələ́ə 11

¹Kaag oʼto na Táán áa kóonɛ kólɛɛ́ lɛ́: Lɛŋ lɛ́, nkə kɛ́ olɛɛ́ agomɛna pɛda a kɛ́lɛ́, wɔɔ́ʼkɔɔŋ. Kó aa kóonɛ kólɛɛ́ tɛn lɛ́: Ólɛŋ lɛ́ nkə kɛ́ odɛɔ́gɔ agodálaá na əngis yááŋ, kɛ́lɛ fɔ́lɔ́b kɔ, odɛnjáág isuŋ na kɛ́lɛ.

²A oʼto wóonɛ lɛ́ pɔsɔ́g pá kalaʼ páyáág oʼto na nyɔ́lɛ́ aa Táán yɛɛ́nyɔ́ga na pɔ́lɛ́.

³A oʼto wóonɛ lɛ́ tɛágɛn oʼto na Táán aa tɛlɛɛ́ palɛŋáán lɛ́ a nɔgɛ́ɛ́ nó noɛ́lón a unuʼ wə́ə́ŋ áa moom muim móyáyɛ́lɛ́ɛ́. Áay lɛ́ yiim yɛ́ tɛlɛɛ́ agodɛ́ʼtɛg, ɛ́yáyɛ́lɛ́ɛ́ a nkə kɛ́ tɛdɛɔ́gɔ agodálaá[63]

⁴Ábɛl ayáágɛn oʼto na Táán, kólɛ́ aa ayɛ́moyɛ́ɛ́lɛ́nɛ kɛfɔny kɛ́ kɛ́ɛ́dɛ́ɛ́ agaáyɛŋ kɛ́ Kayɛ́ɛŋ. A oʼto wóonɛ lɛ́ Ábɛl ayáágɛn oʼto na nyɔ́lɛ́ aa Táán yɛɛ́nyɔ́ga na kɛfɔny kiə́ŋ, əmə́əsəə lɛ́ nyóon alɛ sáád. Əgín tɛn a oʼto wóonɛ lɛ́ Ábɛl ayáágɛn oʼto na Táán áa nkə kɛ́ ayɛ́ɛ́lɛ, pə́ligi əgusəə kɛ́lɛ́ súʼtə́ə́ na nɛ́gɔŋ kɛ́, ɔmbɔ́ ná yiígú[64]

⁵A oʼto wóonɛ lɛ́ Ɛ́nɔ́g ayáágɛn oʼto na Táán áa ədiʼkə́əgúú, Táán əyímusiə́d a mɔɛn, a ɛbá yə́ə́ŋ. Mɔɔd na mɔɔd adɛʼkáamoyɔ́ɔŋ kɛnɔ kɛ́ ayɛ́ɛ, lɛ́ Táán əyímusiə́d a mɔɛn, a ɛbá yə́ə́ŋ. Kɛ́lɛ lɛ́, Kálaʼtaʼ ɛ Táán ɛlɛ əgusəə yɔ́nɔ́: A kóonɛ lɛ́ Táán ə́díin əmuúsiəd a mɔɛn, ɔlaa wó Ɛ́nɔ́g óyɛ́ɛ wə́ʼkumugə́mmi[65]

⁶Náa kɛ́lɛɛ́ lɛ́, mɔɔd ɔdɛɔ́gɔ ugugə́mmi Táán ná mɔɔd nyóon adɛágɛn oʼto na nyɔ́lɛ́. Kɛ́lɛ lɛ́, nyɔ́ aágaáyɛʼtɛnɛ a ɛbá ɛ́ Táán, ogóódi kəə́liʼtini lɛ́ Táán alɛ kɔ. Táán aasáábɔn ungim nyɔ́ əə́muyúunə.

⁷Kɛ́lɛ lɛ́, Táán yɛɛ́dɛánɛ na Nówə lɛ́ pɛbán pɛ́lɛ́ɛ́ kaáyɛ́ɛlɛ pɛ́ mɔɔd adɛ́ʼtálaá. A oʼto wóonɛ lɛ́ Nówə ayáágɛn oʼto na Táán áa yiísiə́d tɔgɛ́ɛ́ tó Táán tóod fɔ́lɔ́b fɔ́lɔ́b a ɔʼtɛ́m wə́ə́ŋ, əə́dím siʼtíməʼ lɛ́ ná yoog yəəŋ ɛ pɔɔd yɔ́ɔy. A niɛlɛ nɛ́ Nówə ayɛ́ɛ́lɛ náan aa yiílóódi nsɔ́ɔ́ ɛ pɔɔd pá a nsí. Táán əyímusiə́d wɔnɔ́ mɔɔd nyɔ́ alɛɛ́ sáád lɛ́ ayáág oʼto na nyɔ́lɛ́[66]

⁸A oʼto wóonɛ lɛ́ Ábɛlaam ayáágɛn oʼto na Táán áa ayɛ́moyóbɛn ná ayɛ́modɔ́ŋɔn, amáyɛɛn a nigúu nɛ́ ayɛ́mogágɛn lɛ́ aamoyɛ́ʼkɛn. Yɛɛ́dɛ́ɛ́mɛn agɛɛn andɛŋ ə́lə́ə́ áa alɛɛ́ agɛɛn.

⁹A oʼto wóonɛ lɛ́ Ábɛlaam ayáágɛn oʼto na Táán áa ayɛ́ɛ́n ələndin a nigúu nɛ́ɛn nɛ́ Táán ayɛ́mogágɛn. Yɛɛ́láá kɔ wɔnɔ́ kɛnɔɔŋɛʼ. Páyɛ́ɛ əgubúlimən kɔ́gɔ́ɔg a piób pɛ́ toádɛʼ na pa Ɛ́sag kɛ́, na Yáʼkɔb pá pɔ́lɛ́ tɛn Táán yɛɛ́gágɛn lɛ́ aaboyɛ́ʼkɛn nigúu nɛ́ɛn[67]

¹⁰Ábɛlaam ayɛ́ɛ abóŋan lɛ́ nyɔ́lɛ́ aalaa a pálɛ́ɛg yɛ́ Táán nyɔ́lɛ́nyɔ́amɔɛ́d aálɛŋ kowáag wɔnɔ́ ná ayɛ́ɛ anyɔ́ŋɛn, pálɛ́ɛg yɛ́ ɛlɛɛ́ nkónáán kɔŋɛʼ.

¹¹A oʼto wóonɛ lɛ́ Sáála ayáágɛn oʼto na Táán nyɔ́ ayɛ́mogágɛn mɔɔ́n áa, yiísiə́d nium, əə́bíən, ɔmbɔ́ ná ayɛ́ɛ əə́ʼkulun[68]

¹²Kólɛ́ aa, a oʼto wó Ábɛlaam nyɔ́lɛ́nyɔ́əsíŋ, ɔmbɔ́ ná ayɛ́ɛ aáʼkoman kulun, aándagaáboŋ əgín lɛ́ ə́gu, Táán ayɛ́ɛ́lɛ lɛ́ ásaŋ yoog ɛ pɔɔd, ídəg wɔnɔ́ muə́dədəʼ mó a mbálámɔɛn, wɔnɔ́ ɔsáyɛ́n wó a ɛbá ɛ́ noom[69]

¹³Ungim nyóon yiígú oʼto na Táán. Pííguə́ʼkən, pɔ́dɛɔ́ŋ nkə kɛ́ Táán ayɛ́bogágɛn. Náa, pɛ́ɛ́dála pɛ́lɛ́ kɔ laálá, páányɔ́ga na pɛ́lɛ́. Pə́yə́líʼtíníí lɛ́ a sáád pɔ́lɛ́ pálɛ pəən a nsí yɛ́ɛnɛ, pálɛ agá a ɔsaa[70]

¹⁴Kɛ́lɛ lɛ́, pɔɔd pá pálɛɛ́ agosɔyɔ náan, póóloodi moááŋ lɛ́ pɔ́lɛ́ pálɛ əguunə nigúu nɛ́ nɛ́lɛɛ́ nɛɔ́bɔn.

¹⁵Kɛ́yɛ́ɛnɛn lɛ́ pálɛ əgəə́lə́ʼkəni nigúu nɛɔ́bɔn nɛ́ píídí, ná páyɛ́ɛ pə́guúlini a nɛ́lɛ́, yoom yɛ́ yə́əbusiə́gi fiɛ́d.

¹⁶Náa a fɔ́lɔ́b, nigúu nɛ́ páyɛ́ɛ əguunə, nɛ́yɛ́ɛ nigúu nɛ́laŋ nɛ́ nɛ́yáyɛnɛn nɛ́ɛn, nigúu nɛ́ a mɔɛn. A oʼto wóow aa Táán adɛágaáŋɛ́ɛ́ lɛ́ pámoodɔ́ŋɔn lɛ́ nyɔ́lɛ́ alɛ Táán yɔɔbɔn. Əyíbusóbíníni nigúu nɛ́ nɛ́agoob na pɔ́lɛ́.

¹⁷A oʼto wóonɛ lɛ́ Ábɛlaam ayáágɛn oʼto na Táán áa yiísiə́d mɔɔ́n Ɛ́sag agɛɛn amoófɔnyɛn ná Táán ayɛ́moyásɔ́sɛ́nɛ́ɛ́ agodála nga amáág fɔ́lɔ́b oʼto na nyɔ́lɛ́. Ayaʼkafɔ́nyɛn Táán kɛmbóg kiə́ŋ kɛ́ mɔɔ́n, kɔmɔɛ́d lɛ́ a nyɔ́lɛ́ aa ayɛ́ɛ aándaamɛna pɛda na oʼkag wó Táán ayɛ́moyɛ́ɛ́lɛ́nɛ

¹⁸ná ayɛ́modɛánɛ wɔɔ́s wúmmú ɔnɔ́: «Ɛ́sag aa alɛ́ɛ́ kosaŋɛɛ́ ndɛg yɛ́ njɛ́gogágɛn lɛ́ olɛ́ɛ́ kɔɔŋ[71]»

¹⁹Ábɛlaam yɛɛ́lɛŋɛn lɛ́ Táán alɛ na toɛn tó kiiʼkini koóndɛgɛ mɔɔd nyɔ́ əə́ʼkugúú. Náan aa Táán əyímuyúlísíni mɔɔ́n wəəŋ. Kɛ́yɛ́ɛ wɔnɔ́ mɔɔd nyɔ́ ayɛ́ɛ aándɛ kɛlóŋ, náa amámoyóndɛ́gɛ.

²⁰A oʼto wóonɛ lɛ́ Ɛ́sag ayáágɛn oʼto na Táán áa yiíbílis pa Yáʼkɔb pɔ́lɛ́ na Ɛsawúu lɛ́ ná Táán áboyɛ́ɛlɛ kɔŋɛʼ a nkə kɛ́ kíígóodi lɛ́ kɛáyɛ́ɛlɛ a ɔlaa wɔ́ɔ́bɔn wó a mədúg má yuudi.

²¹A oʼto wóonɛ lɛ́ Yáʼkɔb ayáágɛn oʼto na Táán áa, ná ayɛ́ɛ aándɛ ndúmiʼ na kugu, yiíbílis ɛ́nɛ́ mɔɔ́n ó Yósɛb. Əyə́bísíí a oʼtɔ́ŋ wə́ə́ŋ, əə́bə́ə́ konyáadɛ Táán[72]

²²A oʼto wóonɛ lɛ́ Yósɛb ayáágɛn oʼto na Táán áa, ná ayɛ́ɛ aándɛ ndúmiʼ na kugu, yiísə́ə́ kɛbán kɛ́ pɔɔ́n pá Ɛ́sɛlayɛl lɛ́ pálɛ́ɛ́ kolon a poɔ́lɛ́ pó páyɛ́ɛ a pólɛ́ a Əsíibtə, amáabodɛ́anɛ wɔnɔ́ ná pálɛ́ɛ́ kɛɛlɛɛ́ na kɛlóŋ kiə́ŋ a kɛnɛŋ kɛ́go kɛ́ɛg[73]

²³A oʼto wóonɛ lɛ́ sɛ na ŋŋí o Moyíis páyáágɛn oʼto na Táán áa, kɛnɛŋ kɛ́ pííbíən mɔɔ́n wɔɔbɔn, páyɛ́moyɔ́ɔ́sɛg məə́ málaŋ mádáád lɛ́ pɛ́ɛ́dála lɛ́ alɛ isisíg ɛ́ mɔɔ́n. Páyɛ́moyɔ́ɔ́sɛg páʼtammána kɛcɛm kɛ́ nkúm yɛ́ nkóʼkóón yɛ́ a Əsíibtə ɛyáág.

²⁴A oʼto wóonɛ lɛ́ Moyíis ayáágɛn oʼto na Táán áa, ná yɛɛ́yám, yɛɛ́sáŋɛ́nɛ lɛ́ pámodɔ́ŋɔn pɔ́nɔ́ nyɔ́lɛ́ alɛ mɔɔ́n ó mɔɔ́n nyɔ́ ɔʼkɛ́ɛd o Falawɔ́ɔŋ[74],

²⁵əmə́yəə́liʼtini agá lɛ́ ánɛ ntɔ́b na ndɛg ɛ Táán, agosan lɛ́ álaa a podogoloʼ a kɔbɛ́ a kaadɛ. Podogoloʼ pó púdiə́ʼtə́líí.

²⁶Yɛɛ́dála lɛ́ pámaʼkomosɛ́ɛdɛ nyɔ́lɛ́ wɔnɔ́ ná pálɛ́ɛ́ kosɛ́ɛdɛɛ́ Məsíi wɔɔ́s, kɛ́lɛ na nyɔ́lɛ́ nugəm kɛ́fɔlɛ́ agaáyɛn tugúm tó a Əsíibtə tuim. Ayɛ́ɛ́lɛ náan lɛ́ ayáágɛn oʼto a pɛsáábɔ́n pɛ́ Táán alɛ́ɛ́ komoyɛ́ʼkɛnɛɛ́ a mədúg má yuudi.

²⁷A oʼto wóonɛ lɛ́ Moyíis ayáágɛn oʼto na Táán áa, yɛɛ́dɛ́ɛ́mɛn a Əsíibtə aásán, aʼtammána ilúún yɛ́ nkúm. Əyə́yísíí wɔnɔ́ mɔɔd nyɔ́ alɛɛ́ agodɛ́ʼtɛg Táán yɛ́ pádɛádálaá.

²⁸A oʼto tɛn wóonɛ lɛ́ Moyíis ayáágɛn oʼto na Táán áa ayáág wɔɔ́n ó Páska lɛ́ pə́ə́bə́ə́ kɛɛlanɛ. Yɛɛ́dɛánɛ na pɔɔ́n pá Ɛ́sɛlayɛl lɛ́ pə́wu maŋɔ́ a mədíyoog mɔ́ɔ́bɔn agɛɛlɛ lɛ́ ná uŋun wó páadom lɛ́ wíim agoóna pɔɔ́n pá panɔ́mɛɛd pá na oʼto na oʼto pá a puog pó pɔɔd pó a Əsíibtə, ósan a pɔ́lɛ́ mbámbáŋ, wóʼtɔ́bɛb mɔɔ́n nyɔ́ a ndɛg yɛ Ɛ́sɛlayɛl ɔmbɔ́ úmmuʼ.

²⁹A oʼto wóonɛ lɛ́ pɔɔ́n pá Ɛ́sɛlayɛl páyáágɛn oʼto na Táán áa pɛ́ɛ́yáág noom nó nubógógó na ambaan wɔnɔ́ pálɛ agodáŋana a nsí mmɔɛ́d. Kɔmɔɛ́d lɛ́ ná pɔɔ́n pá Əsíibtə páyaʼkanjáág tɛn náan, noom núyíbusúʼkin, nuə́suu na pɔ́lɛ́[75]

³⁰A oʼto tɛn wóonɛ lɛ́ pɔɔ́n pá Ɛ́sɛlayɛl páyáágɛn oʼto na Táán áa, páyɛ́ɛ́lɛ mədúg máʼtáan na mábaan pə́əgəə́gingilidəni pálɛ́ɛg ɛ Yəlíʼko, oʼkág wó pɛ́ɛ́goʼkɛnɛn pálɛ́ɛg na wólɛ́ wááság kubumbug.

³¹A oʼto tɛn wóonɛ lɛ́ Ɛlaáab nyɔ́ ayɛ́ɛ kɛdáŋanaʼ, ayáágɛn oʼto na Táán áa ədiʼkə́əgúú ondáŋ na pɔɔd pá páyɛ́ɛ́lɛ́nɛ Táán oʼto wó ɔnnasáŋ. Nyɔ́lɛ́ yiísiə́d na uŋóón ungim, pɔɔ́n pá Ɛ́sɛlayɛl pá Táán yɛɛ́dóm lɛ́ pɛ́ɛn agɛɛlɛ ɛfɛ́b a pálɛ́ɛg yɛ́ ayɛ́ɛ a yɛ́lɛ́[76]

³²Nkə kímmú aa ndɛɛ́ ugusəə aáŋ? Ntɛágɛɛn na kɛnɛŋ kɛ́ kosɔyɔ kɛbán kɛ́ Sɛdɛyɔ́ɔŋ[77], ɔmbɔ́ kɛ́ Paláag, na kɛ́ Samsɔ́ɔŋ, na kɛ́ Siɛftə́ə, na kɛ́ Tə́fid, na kɛ́ Samowɛ́ɛl, na kɛ́ palɔɛgɛʼ pɛbán pá Táán

³³lɛ́ pɔ́lɛ́ póob piim, a oʼto wóonɛ lɛ́ páyáágɛn oʼto na Táán áa, pɛ́ɛ́nyɔ́ŋɛ́la əʼkúu yə́mmú a pɛdá, páálaa a pasáád, pɔ́mɔ́yɔɔŋ nkə kɛ́ Táán ayɛ́bogágɛn. Pɛ́ɛ́lɔ́gɔ pongangó nnuʼ.

³⁴Pɛnɛŋ piíŋ, pə́ə́wííyə́ni muug mó móyɛ́ɛ alola na toɛn, pɔ́mɔ́bɔ́gɛ́ɛ́ a ɔmbɔg á pɔɔd pá páyɛ́ɛ əguunə koboyóóna na moyafág mó pɛdá. Ná mabámbany máyɛ́boyɔ́gɛnɛ, Táán ayɛ́boyɛ́ʼkɛn toɛn a ngim yɛ́ɛy. Páyɛ́ɛ panɔɛyɛʼ pɛdá pá panasáŋ. Pɛ́ɛ́fámɛ panɔɛyɛʼ pɛdá pá əʼkúu yɛ́ndɛ́ŋ.

³⁵A oʼto tɛn wóonɛ lɛ́ pagɛ́ɛd pə́mmú páyáágɛn oʼto na Táán áa, pɔɔd pɔ́ɔ́bɔn pá pííguə́ʼkən, páyóndɛ́gan, pagɛ́ɛd póob pámáboodála na əngis yɔ́ɔ́bɔn. Pə́mə́yiʼkini koboyɔ́ɔŋ[78] Kɔmɔɛ́d lɛ́ a pɔsɔ́g pə́mmú, pɛ́ɛ́sáŋɛ́nɛ kɛɛn filí, pámábonɛ́ɛ́yɛ ntɔ́b, súʼtə́ə́ pámáboyóóna. Pɔ́lɛ́ Píísə́ə́ pɔ́nɔ́ kɔŋɛʼ lɛ́ páboyóóna, Táán áboyóndɛgɛ, ná pɛ́ɛn na ɔlaa ólaŋ wó ómááyɛn náan.

³⁶Pɔsɔ́g tɛn pə́mmú pɛ́ɛ́nóʼtan, pɔ́nɔ́: Kɔŋɛʼ lɛ́ páboónyɛɛŋanɛ, pábobáam na nsuə́, páágan pə́mmú a kɛáŋ kɛ́ pasɛŋ, páaboyáágan a puog pó njaan.

³⁷Páyóóna pɔsɔ́g tɛn pə́mmú na aʼtáán, páásóma pə́mmú na sɔɔ́, ɔmbɔ́ lɛ́ pámáboosóma pɛnág na moyafág mó pɛdá. Pɔsɔ́g pə́mmú tɛn páyɛ́ɛ əgiim pófíoŋ, páabag, pə́əsuu. Əgín piob pɛ́ todóm, oó lɛ́ pɛ́ pobon aa páyɛ́ɛ pəníigən wɔnɔ́ pilə́ə́. Pə́diʼkóogóodi yoom na yoom, pɔɔd páaboócɔʼkɔnɛ, pándɛŋ kubuúsiəd[79]

³⁸Páyɛ́ɛ pɔɔd pálaŋ ə́! Pádɛʼkɛ́ɛ póonɛ lɛ́ pálaa a nsí yɛ́ɛnɛ. Páyɛ́ɛ əgiim pófíɔŋ. Pálɛ a pɛnɔ pɛ́ pifələ́ə́n, pálɛ a nkon a mɔɛn. Páyɛ́ɛ alaa a pɛbaŋ a kaadɛ. Pɛbaŋ pɛ́ a aʼtáán na pɛ́ a nsí mmɔɛ́d.

³⁹A oʼto wóonɛ lɛ́ páyáágɛn oʼto na nyɔ́lɛ́ aa Táán yɛɛ́nyɔ́ga na pɔ́lɛ́ póob piim. Náa, ɔmbɔ́ úmmuʼ adɛʼkɔ́ɔgɔɔŋ nkə kɛ́ Táán ayɛ́bogágɛn lɛ́ aaboyɛ́ʼkɛn.

⁴⁰Wɔnɔ́ ná kɛ́lɛɛ́ lɛ́ Táán yiígúmin kɔ kalaʼ lɛ́ nyɔ́lɛ́ alɛ́ɛ́ kɛbɛyɛ́ɛlɛnɛ nkə kɛ́ kɛ́mááyɛn kɛ́ɛg, pɔ́lɛ́ pádɛʼkɛ́ɛ lɛ́ páyaŋ ɔgɔɔŋ nkə kɛ́ɛg kiim ná pəsi tɛdɛ́njɛ́ɛ kɔ.