Read Yambeta Əbələ́ə 12 Bible Online

Əbələ́ə 12 - Yambeta bible

Əbələ́ə 12

¹Ɛ́fɔlɛ́ ɛ́ pawɛ́sɛnɛg póob pá páyɛ́bɛyáŋɛ́nɛ a ngə́ ɛ kəə́liʼtiniʼ, nkə kɛ́ páyɛ́ɛ́lɛ kɛ́lɛ kɔ áanɛ a ambaan yə́ə́s. Pəsi tiə́diŋiniən anɛ́ɛ́n nkə kiim kɛ́ kɛ́lɛɛ́ agaádádɛg a ngə́ yəəs, kɔŋɛʼ kɔŋɛʼ kɔbɛ́ kó kóbɛgódánɛ́ɛ́. Tiɛ́naan na ɔʼtɛ́d, tɛdɛʼtɔ́m, tíɛn alon a kɛnɔ kɛ́ páyɛ́bɛdɛánɛ.

²Tɛ́dámaan əngis na Yə́sus nyɔ́ əyíbibuə́nin ngə́ lɛ́ tɛ́ag oʼto na Táán. Alɛ əgibigóomin kɔ a ngə́ yɛ́ɛy, kəə́bə́ə́ əgín kɔ a niə́bə́ə, súʼtə́ə́ a nɛmananɛʼ. Yɛɛ́nóʼtan lɛ́ ə́gu a ɔmbásá, əʼpísim na oʼto kono wó ólɛɛ́ kɔ a ombod ó kugu wɔnɔ́ wóow lɛ́, nyɔ́lɛ́ yɛɛ́lɛŋɛn tɔnyɔ́g tó tóamooboŋ. Nɛ́gɔŋ yɛ́ɛnɛ, alɛ undəndínə́ə́n kɔ a noʼkóm nó nɛlaamɛʼ, a ombɔg ó nɛnom ó Táán.

³Áyɔ́ŋɛ́an wɔnɔ́ ná yɛɛ́nóʼtan ntɔ́b ná pɛɛlɛ mabɛ́ páyɛ́ɛ agomoónɔɛyɛ. Náan, ntɛ́m yaaŋan yaagɛɛn a kaadɛ yəə́b, podɛágɛɛn pusun a ngim.

⁴A kiʼtuuliʼ kɛ́ɛnɛ kɛ́ polɛɛ́ a kɛ́lɛ́, kɛ́ɛnɛ lɛ́ ná púliog a ngə́ ɛ kɔbɛ́, podɛ́nnɔɛyɛ kɛ́lɛ́ súʼtə́ə́ əgiig a niɛŋ nɛ́ kugu.

⁵Puə́ʼkəə́bəli ndə́b yɛ́ Táán ayɛ́boyɛ́ʼkɛn na pəŋi wɔnɔ́ pɔɔ́n pə́ə́ŋ óm? Ayɛ́bodɛánɛ agoboónasɛ nkó, ɔnɔ́: «Mɛ mɔɔ́n, udisiə́d mbáámanan ɛ Sə́dúk wɔnɔ́ iyənjə́g ɛ́ kɛbán; Amaʼkogosásan, wiiyi ɔʼtɛ́m

⁶lɛ́, Sə́dúk aabáam nyɔ́ alɛɛ́ anyɔ́ŋɛn, aasásan nyɔ́ aálɛŋ lɛ́ alɛ mɔɔ́n wəəŋ[80]»

⁷Pónóʼtan ntɔ́b yɛ́ Táán alɛɛ́ agoboyɛ́ʼkɛn. Alɛ agɛɛlɛ náan lɛ́ polɛ pɔɔ́n. Mɔɔ́n oyaán áa pádɛásásanɛɛ́ ə́?

⁸Wɛ nyɔ́ Táán adɛágosásanɛɛ́, wɛ nyóon odɛɔ́gɔ fɔ́lɔ́b fɔ́lɔ́b mɔɔ́n wəəŋ, olɛ anyóon mɔɔ́n nyɔ́ pə́ə́bíən a kɛɔg.

⁹Tɛáyɔ́ŋɛan pasɛ pə́ə́s pá a nsí yɛ́ɛnɛ. Ná tɛyɛ́ɛ poómbaa, páyɛ́ɛ pabɛsásan, tɛáboyóbɛn. Tuə́ anɛ́ɛ́n áa tɛlɛɛ́ págolɔb tɛdɛóbɛn Táán Sɛ wəəs nyɔ́ alɛɛ́ a mɔɛn, agɛɛlɛ lɛ́ tíɛn na ɔlaa ə́?

¹⁰Ɛɛ́ɛ, pasɛ pə́ə́s pɔ́lɛ́ pálɛ agɛbɛsásan əgín ɛyaa ɛ́ kɛnɛŋ a nkə kɛ́ a nɛfɛgaʼ nɛɔ́bɔn páádála lɛ́ kɛ́lɛ kɛŋɛʼ. Náa, Táán nyɔ́lɛ́ alɛ agɛbɛsásan a kɔŋɛʼ kuə́s lɛ́ ná tíɛn pəfúlúʼtú wɔnɔ́ ná nyɔ́lɛ́ alɛɛ́ ufúlúʼtú.

¹¹Kɛnɛŋ kɛ́ pálɛ agɛbɛsásan, tɛdɛɔ́gɔ əgusiəd Pɛsásaʼ pɛ́ɛb a kɛnɛŋ kɛ́go wɔnɔ́ yoom ɛ́laŋ, kɛ́abɛyɛ́ʼkɛn agá ɔʼtɛ́m kogany. Náa, a ngim yɛ́ɛy, pá pɛ́ɛ́sásan, pálɛ́ɛ́ kodála kɔŋɛʼ kó kólɛɛ́ kɔ. Pálɛ́ɛ́ kɛɛn na kiwiiyiʼ, páyɛɛn na ɔlaa ó sáád.

¹²A oʼto wóow aa pəŋi pá poáʼkodɔmɛɛ́ kuyə́ən Kilíʼtus, kónɛ́an ɔmbɔg yááŋan yá yándɛɛ́ ɔʼtɔmɔ́ɔ́n, nasɛ́an əndu yááŋan yá yáʼkolɛbɛdɛɛ́.

¹³Táŋánáan a pungə́ pó pólɛɛ́ tə́lə́lə́lə́[81], agɛɛlɛ lɛ́ ambaan á pá pálɛɛ́ na pɛnɛ́m ádɛmmán kogɔlɔgɛsa, yóóm agá.

¹⁴Ɛlɛ́an nkə kiim agɛɛlɛ lɛ́ kiwiiyiʼ kíɛn a kɛgaágadɛ kɛáŋan na a kɛ́ mɔɔd ungim. Laaláan ɔlaa wó ólɛɛ́ a ngə́ yɛ́ Táán alɛɛ́ anyɔ́ŋɛn, náan fiɛ́d, úmmuʼ na úmmuʼ a ondáŋ wááŋan adɛndɛ́ɛ́ kodála Sə́dúk.

¹⁵Pólóʼkɔd agɛɛlɛ lɛ́ nyummú ədiʼtúm ngim na kɔŋɛʼ kó Táán alɛɛ́ agɛɛlɛ. Nyummú a kɛgaágadɛ kɛáŋan adɛnjɛ́ɛ́n wɔnɔ́ kiɛd kɛ́ kíəguum modámádám mó móanɔ, modámádám mó múəyə́bi pɔsɔ́g, moábosánɛnɛ konoʼ kuə́ŋ[82]

¹⁶Pólóʼkɔd, úmmuʼ na úmmuʼ a ondáŋ wááŋan adɛnjɛ́ɛ́lɛ pɛɔg, ɔmbɔ́ úmmuʼ tɛn adɛsɛ́ɛ́dɛ moom mó mufúŋiə́n wɔnɔ́ ná Ɛsawúu ayɛ́ɛ́lɛ, aálɛg nɛsaá niə́ŋ a oʼto ó táasaʼ ɛ moom mó konɛ mmuʼ súg yɛ́ páyɛ́moyáábɛn.

¹⁷Poálɛŋ lɛ́, kɛnɛŋ kímmú a ngim yɛ́ɛy, əyəʼkənjúúnə lɛ́ sɛ ámofámɛn pɛda pɛ́ pɛ́lɛɛ́ a mɔɔ́n nyɔ́ osaá, ngə́ ɛdɛʼkɛ́ɛ kɔ kə́mmú lɛ́ ágasɛ oʼtɛ́lɛm wóow. Ɔmbɔ́ ná yɛɛ́lɛ́ɛ́la, ɔmɔ́sɔ́gɔ́lɔ́nɛ́ɛ́, ngə́ ɛdɛʼkɛ́ɛ kə́mmú kɔ lɛ́ págasɛ nkə kɛ́ ayɛ́ɛ́lɛ[83]

¹⁸Podɛʼkáagaáyɛʼtɛnɛ ndúmiʼ na yoom yɛ́ polɛɛ́ págodɔ́bɔ na ɔmbɔg yááŋan wɔnɔ́ ná pɔɔ́n pá Ɛ́sɛlayɛl páyáyɛ́ʼtɛ́nɛ́ɛ́ ndúmiʼ na oʼkon ó Sinayíi wó yug ɛ́yɛ́ɛ alola kɔ a mɔɛn na toɛn, mbálámɔɛn imílígən kɔ, yoóy yə́ə́nímin, kigud kiə́fiŋ kɔ na nɛŋo a unuʼ.

¹⁹Isə́ə́ yɛ́ɛ́dáŋ, nɛŋo nɛɔ́sɔyɛd na toɛn, pámóób. Ná pɔɔ́n pá Ɛ́sɛlayɛl páyóób nɛŋo nɛ́ɛn, píísə́ə́ lɛ́ nɛ́dɛ́lɛm, nídinjíʼkíni kusəə yoom na yoom kə́mmú[84],

²⁰pádɛʼkɛ́ɛ lɛ́ pááʼkɛ koob nkə kɛ́ nɛ́yɛ́ɛ əgusəə. Nɛ́yɛ́ɛ əgusəə nɛɔ́nɔ́: «Ɔmbɔ́ nnyam aa yɔɔ́dɔ́bɛd oʼkon wóow, páamodóan na aʼtáán súʼtə́ə́ ə́gu.»

²¹Nkə kɛ́ pɛ́ɛ́dála wɔɔ́s wóow kɛ́yɛ́boyɛ́ʼkɛn ngililiʼ a kúfuʼ. Kɛ́yɛ́ɛ́lɛ, Moyíis aáság kusəə ɔnɔ́: «Wɛɛ́y ólɛ na mɛ, ndɛ əguliminə kulimínə́ə́n[85]!»

²²Náa, a pəŋi, poyáyɛ́ʼtɛ́nɛ́ɛ́ ndúmiʼ na oʼkon ó Siyɔ́ɔŋ, na pálɛ́ɛg ɛ Táán nyɔ́ alɛɛ́ a ɔlaa. Ɛlɛ Yolósalɛm yɛ́ a mɔɛn, kɛnɔ kɛ́ kiʼtúú kɛ́ məŋun má maʼtom má mɔɔd ɔdɛɔ́gɔ ogaáʼkɛɛ́ kobana, málɛɛ́ kɔ maágɔ́nyɛ́dáán, a tɔnyɔ́g.

²³Poyáyɛ́ʼtɛ́nɛ́ɛ́ ndúmiʼ na kɛnɔ kɛ́ pɔɔ́n pá na oʼto na oʼto pá əgəə́bíən na Táán páyágɔnyɛdɛn, pɔ́lɛ́ pá əngiŋ yɔ́ɔ́bɔn alɛɛ́ əʼtiídílə́ a mɔɛn. Poyáyɛ́ʼtɛ́nɛ́ɛ́ ndúmiʼ na Táán nyɔ́ ɔɔ́yɔmɛ pɔɔd piim, nyɔ́ ɔɔ́yɔmɛ tɛn məŋun má pɔɔd pá sáád, mɔ́lɛ́ má Táán aáʼkɛɛlɛɛ́ lɛ́ mɛ́ɛn məfúŋiə́n a kúfuʼ.

²⁴Poyáyɛ́ʼtɛ́nɛ́ɛ́ ndúmiʼ na Yə́sus, nyɔ́lɛ́ nyɔ́ adɛ́lɛ́mɛ́nɛ́ɛ́ wɔnɔ́ kɛgom a kɛgaágadɛ kɛ́ pɔɔd na Táán, a nɛálad nɛ́ nɛwa nɛ́ Táán ayɛ́ɛ́lɛ na pɔɔd. Poyáyɛ́ʼtɛ́nɛ́ɛ́ tɛn ndúmiʼ na maŋɔ́ mə́ə́ŋ má yiísúb, maŋɔ́ má mɔ́ɔsɔyɔ kɔŋɛʼ a kidíídí kiə́s agaáyɛn má Ábɛl má málɛɛ́ agaálɛɛ lɛ́ mə́ə́gun[86]

²⁵Lóʼkɔ́dɔɔn anɛ́ɛ́n óo! Podɛsáŋɛ́nɛ koob nkə kɛ́ nyɔ́ alɛɛ́ na pəŋi, alɛɛ́ agobodɛ́anɛ. Náan aa pɔɔ́n pá Ɛ́sɛlayɛl pɛ́ɛ́sáŋɛ́nɛ koob Moyíis nyɔ́ ayɛ́ɛ aboyááganan mbaŋ a nsí yɛ́ɛnɛ[87] Pɔ́yɔ́ɔ́ŋ njəʼkə́nə́ní. A pəsi anɛ́ɛ́n óoʼ? Tɛdɛɔ́gɔ pɔ́gɔɔ́bɔg njəʼkə́nə́ní, ná tiə́dúm ngim na Táán nyɔ́ alɛɛ́ agosɔyɔ na pəsi kɔ́gɔ́ɔg ná alɛɛ́ a mɔɛn.

²⁶Nyɔ́lɛ́ nyɔ́ nɛŋo niə́ŋ níínyígid nsí kɔ́gɔ́ɔg a kɛnɛŋ kɛ́ kalaʼ, náa nɛ́gɔŋ yɛ́ɛnɛ, aáʼkɛbɛdɛ́anɛɛ́ ɔnɔ́ na pəsi: «A kə́mmú kó ndɛ́ɛ́ kosɔyɛdɛɛ́, ntɛndɛ́ɛ́ kunyigid əgín nsí yɛ́lɛ́ na yɛ́lɛ́, ndɛ́ɛ́ kunyigid tɛn na mbálámɔɛn kɛ́[88]»

²⁷Tɔgɛ́ɛ́ tóod tó əə́ʼkiiʼkini kubiʼtií kowa, tuóloodi lɛ́ moom muim mó ayɛ́ɛ́lɛ, mólɛ́ɛ́ kəə́nyigid, mólɛ́ɛ́ kuwu, ná mó módɛɔ́gɔ múgəə́nyigidií mólɔb a pɛnɛŋ piim.

²⁸Wɔnɔ́ ná Táán ándabɛyɛ́ʼkɛnɛɛ́ nɛlaamɛʼ nɛ́ mɔɔd ɔdɛɔ́gɔ ugunyigidií, tɛ́moyɛ́ʼkɛnaan pisoyidiʼ, tímuúgudin a ombod wó wə́əmugə́mmi, tɛámoyóóbɛn, tɛámoódammana.

²⁹Kɛ́lɛ lɛ́, Táán yəəs alɛ wɔnɔ́ yug yɛ́ yə́əsíŋini yiim[89]