Read Yambeta Əbələ́ə 13 Bible Online

Əbələ́ə 13 - Yambeta bible

Əbələ́ə 13

¹Pəŋi pá polɛɛ́ pəə́liʼtiniʼ, póɛn əgín náan na nnyɔ́ŋánán pəŋi na pəŋi wɔnɔ́ pɔɔ́n pá niŋŋí.

²Pudinjə́bə́líí lɛ́, ungən ó mɔɔd əməʼkiim a pəŋi, póolɛŋ kumuúsiəd. Pɔɔd pə́mmú páyɛ́ɛ́lɛ náan, píísiə́d pəən pá pɔɔd kɔŋɛʼ, pándɛŋ lɛ́ məŋun má maʼtom má Táán áa málɛɛ́nɔ[90]

³Áyɔ́ŋɛ́an pá pálɛɛ́ a puog pó njaan, káag wɔnɔ́ polɛ kɔ na pɔ́lɛ́. Áyɔ́ŋɛ́an tɛn pá pɔsɔ́g pálɛɛ́ əguyəʼkəni lɛ́, pəŋi tɛn pugóódi nkó yɛ́ pálɛɛ́ págobonɛ́ɛyɛ ntɔ́b.

⁴Ɛ́nɛ́ mɔɔd ányáadɛ yoog yəəŋ ɛ kodɔn. Ɔmbɔ́ umbúlim, ɔnɔ́mɛɛd ə́súg əgín na oʼkán, ɔʼkɛ́ɛd tɛn ə́əsug əgín na onom. Táán, alɛ́ɛ́ kɛɛ́ʼkɛn nsɔ́ɔ́ na pá páagɛɛlanɛ pɛɔg, na pá pálɛɛ́ əgubúlimən na pɔɔd oó lɛ́ na pagɛ́ɛd pá pɔ́dɛɔ́gɔ panom pɔ́ɔ́bɔn, ɔmbɔ́ lɛ́ pagán pɔ́ɔ́bɔn.

⁵Podɛndáŋ kaag ɔʼtɛ́m wááŋan a mɔɔnɛ́. Nyɔ́gáan na nkə kɛ́ pugódíí lɛ́ Táán nyɔ́lɛ́nyɔ́amɔɛ́d yiísə́ə́ ɔnɔ́: «Ntɛndɛ́ɛ́ kuguudi, ntɛndɛ́ɛ́ tɛn kogoodo[91]»

⁶Kólɛ́ aa tɛlɛɛ́ pə́gusəə, fiɛ́d na isuŋ, tɛɔʼkɔ́: «Nkə aa mɔɔd alɛɛ́ ogɛnyɛɛlɛ əə́? Ntɛádammana yoom na yoom, Sə́dúk áa alɛɛ́ nyɔ́ aágɛnyɛɛ́bɛ[92]»

⁷Áyɔ́ŋɛ́an padɛ́lɛm yuudi pááŋan pá páyɛ́bolɔɛ́gɛ́nɛ Tɔsɔm tó Táán. Áyɔ́ŋɛ́an ɔlaa wɔ́ɔ́bɔn wó pɛ́ɛ́láá, pə́ə́gú. Áágáan tɛn oʼto na Táán wɔnɔ́ pɔ́lɛ́.

⁸Yə́sus Kilíʼtus adɛácɛ́ndɛ. Alɛ naánɛ́ wɔnɔ́ ná ayɛ́ɛ puə́y. Náan aa aágɛɛn tɛn a pɛnɛŋ piim.

⁹Pudiyə́díí lɛ́ mɔɔd ə́bulígə na mbod ɛ tɔʼtilíin ngim yɛ́ pondɛŋɛnɛɛ́ lɛ́ ná ə́buuními ngə́. Kɛ́lɛ kɔŋɛʼ lɛ́ ntɛ́m yəəs ɛ́gon na toɛn tó Táán aábɛyɛ́ʼkɛnan. Toɛn tóod tódɛɔ́gɔ a oʼto wóonɛ lɛ́ timə́núŋíí a pɛcɛm pɛ́ pɛ́abɛdɛ́anɛ moom mó tiʼkódií lɛ́ tɛ́nɛ, tólɛ́ a mawɔʼ má Táán. Pɛcɛm pɛ́ɛb pɛ́dɛ́agɛɛ́bɛ pá pə́əgəə́nuŋ a pɛ́lɛ́[93]

¹⁰Pəsi tigóódi kibóŋ kɛ́ pɛfɔny. Náan aa payaaganɛʼ pɛfɔny pá Yúdɛn pá pálɛɛ́ əgugud a uʼkóó póʼkóodi filí lɛ́ pánɛ nkə kɛ́ kɛ́lɛɛ́ kɛfɔnyáán kɔ a kibóŋ kɛ́ɛg.

¹¹Ɔnjaaganɛʼ pɛfɔny nyɔ́ oʼkóʼkóón o pɔɔ́n pá Yúdɛn alɛ agɛɛnan na maŋɔ́ má ponyam pó pááfɔnya a uʼkóó wó ufúlúʼtú ó kúfuʼ lɛ́ ná Táán ə́lisin pɔɔd mabɛ́ mɔ́ɔ́bɔn. Náa pɛlóŋ pɛ́ ponyam pɛ́ɛb, pálɛ agɛɛn ɔgɔ́lɔnɛ pɛ́lɛ́ laálá na mban[94]

¹²Kólɛ́ aa pɛ́ɛ́lón pálɛ́ɛg na Yə́sus agɛɛn amoyóon[95] lɛ́ ná ə́fúŋi pɔɔd na maŋɔ́ mə́ə́ŋ.

¹³Tɛ́lónaan anɛ́ɛ́n pálɛ́ɛg, tíɛn amoóboanaan, tɛ́nóʼtanaan kaaŋ kóog ondáŋ na nyɔ́lɛ́

¹⁴lɛ́ tiʼkóodi áanɛ a nsí yɛ́ɛnɛ, pálɛ́ɛg yɛ́ ɛlɛɛ́ a pəliə́g. Yɛ́ tɛlɛɛ́ əguunə, ɛlɛ yɛ́ ɛlɛ́ɛ́ kiimií a mədúg má yuudi[96]

¹⁵Kɛfɔny kɛ́ tigódíí lɛ́ tíɛlanɛ nɛ́gɔŋ, kɛ́lɛ lɛ́ tɛ́nyáadɛ Táán tɛʼtɔm. Nnyáádɛ́ yɛ́ɛy yɛ́ tɛányáadɛ niiŋ niə́ŋ na unuʼ wə́ə́s, tɛ́sánɛan yɛ́lɛ́ a ombɔg ó Yə́sus Kilíʼtus.

¹⁶Pudinjə́bə́líí kɛɛlanɛ kɔŋɛʼ, na kɛɛ́bananɛ pəŋi na pəŋi. Pɛbán wɔnɔ́ pɛ́ɛb aa pɛ́lɛɛ́ pɛfɔny pɛ́ píəgə́mmi Táán.

¹⁷Puóbɛn pɔɔd pá páabodáŋananɛ, podɛyɛ́boyɛ́ɛ́lɛ́nɛ oʼto wó ɔnnasáŋ, pɔ́lɛ́ aa pálɛɛ́ əbuúnuŋ. Kɛ́lɛ lɛ́ pálɛ́ɛ́ kaáloaŋanan na Táán, tuə́ áa pə́ə́gud pigólí pɛɔ́bɔn. Pomaʼkoboyóbɛn páagɛɛlɛ pigólí pɛɔ́bɔn na tɔnyɔ́g, pɔ́dɛɔ́gɔ́dɔ́ɔ́. Pámaʼkoboyɔ́gɔ́dɔ, pigólí pɛɔ́bɔn pɛ́dɛ́aboɛ́bɛ pəŋi.

¹⁸Ɔ́sɔ́gɔ́lɔ́nɛ́an a kidíídí kiə́s. Tɛlɛ palɛŋáán, isuŋ tɛn ɛ́dɛɔ́gɔ, ntɛ́m yəəs ɛlɛ yəə́b a kaadɛ, tɛlɛ əguunə lɛ́ ná tɛmɛ́ɛ́lɛ kɔŋɛʼ pɛnɛŋ piim.

¹⁹Nkə kɛ́ ndə́buŋíən kə́mmú na toɛn áa kɛ́ɛnɛ kɛ́lɛɛ́ lɛ́: Sɛ́gɔɔ, poɔ́sɔ́gɔlɔn Táán lɛ́ yɛ́ɛlɛ nyə́bisig kimbuúlini a kɛgaágadɛ kɛáŋan[97]

²⁰Táán nyɔ́ uŋóón ungim wə́əgiim na nyɔ́lɛ́, nyɔ́lɛ́ nyɔ́ ayóndɛ́gɛ Sə́dúk wəəs Yə́sus, áboyɛ́ʼkɛn toɛn tó kɛɛlɛ kɔŋɛʼ lɛ́ ná póɛlɛ nɛnyɔ́ŋɛn niə́ŋ áaá! Yɛ́ɛlɛ na pəŋi, nkə kɛ́ kíəmugə́mmi, a niiŋ nɛ́ Yə́sus Kilíʼtus nyɔ́ alɛɛ́ unnuŋ mudúg nyɔ́ oʼkóʼkóón. A oʼto ó maŋɔ́ mə́ə́ŋ má yiísúb a kɛfɔny áa nɛálad nɛ́ a pɛnɛŋ piim nɛ́máyɛ́lɛ́ɛ́ na Táán, na pɔɔd. Nugəm nóɛn na nyɔ́lɛ́ a pɛnɛŋ piim. Aamɛn!

²²Pomóŋŋí, mbáboyɔ́sɔ́gɔ́lɔ́nɛ́ɛ́: Óbáan ndə́b yɛ́ɛnɛ yɛ́ mbáboyɛ́ʼkɛn a nufuuʼ nóonɛ nó nóndaŋɛnɛɛ́ koom, ɛlɛ ndə́b yɛ́ yaáboónasɛ nkó.

²³Ndɛ anyɔ́ŋɛn lɛ́ pólɛŋ lɛ́ móŋŋí wəəs Timoʼtə́ə[98] aáʼkolon a yoog yɛ njaan. Mbábodɛánɛ lɛ́ ná pólɛŋ náan. Əməʼkəə́bisig kiim alon áanɛ ná tɛlɛɛ́, tiəgiimənən ondáŋ na nyɔ́lɛ́ káag ná polɛɛ́.

²⁴Soyídíən padɛ́lɛm yuudi pááŋan piim aá! Púsoyidi tɛn ungim nyɔ́ alɛɛ́ agoob na Táán áaá! Pɔsɔ́g pá Ɛʼtálɛa[99] pɔ́nɔ́ mpuúsoyidi á!

²⁵Táán áboyɛ́ɛlɛnɛ pəŋi piim kɔŋɛʼ!