Read Yambeta Əbələ́ə 2 Bible Online

Əbələ́ə 2 - Yambeta bible

Əbələ́ə 2

¹Kólɛ́ aa tigódíí lɛ́ tiə́gumənən kɔŋɛʼ kɔŋɛʼ a nkə kɛ́ tɛyóób nga tɛdɛányɔ́ŋɛn lɛ́ pə́biiními ngə́.

²Kɛ́lɛ lɛ́ tɔsɔm tó məŋun má maʼtom mə́yíbiyíímín na tólɛ́ kɔ́gɔ́ɔg kalaʼ[8] túyólóódíí tólɛ́dóamɔɛ́d lɛ́ tólɛ fɔ́lɔ́b. Pə́mmú pádɛʼkáadam ntóɛŋ na tólɛ́, pámɛ́ɛ́lɛ oʼto wó onnasáŋ. Táán ayɛ́ʼkɛn na ungim nyóon, njəʼkə́nə́ní yɛ́ yɛɛ́sɛ́ʼtan a nkə kɛ́ páyɛ́ɛ́lɛ.

³Tuə́ anɛ́ɛ́n aa tɛlɛɛ́ pɔ́gɔɔ́bɔg a njəʼkə́nə́ní yɛ́ɛy ná tɛáfóy ngə́ ɛ kɔɔy ə́! Kɔɔy kó Sə́dúk nyɔ́lɛ́nyɔ́amɔɛ́d yɛɛ́yáŋ abɛɛ́lɔɛgɛnɛ. Pá páyóób kɛ́lɛ́ a unuʼ ó Sə́dúk páyɛ́bɛdɛánɛ lɛ́ kɛ́lɛ fɔ́lɔ́b.

⁴A piə́wúunəniʼ pɛ́ pɛbán na mbod ɛ mangán yɛ́ Táán ayɛ́boyɛ́ʼkɛn lɛ́ pɛ́ɛlanɛ, yiílóódi lɛ́ nkə kɛ́ pálɛɛ́ əgusəə kɛ́lɛ fɔ́lɔ́b[9] Yiílóódi tɛn lɛ́ pɛbán pɛ́ɛb pɛ́lɛ fɔ́lɔ́b a nkə kɛ́ Uŋun wó Ufúlúʼtú wáagɛɛ́ʼkɛnanan a nɛnyɔ́ŋɛn niə́ŋ.

⁵Kɛ́lɛ lɛ́, adɛ́njaŋ na məŋun má maʼtom aa Táán ayɛ́ʼkɛn toɛn lɛ́ málaamɛ nsí yɛ́ ngwa yɛ́ tɛlɛɛ́ əgusəə,

⁶ndóo. Mɔɔd nyummú yiísə́ə́ a Kálaʼtaʼ ɛ Táán agá lɛ́: «Táán, mɔɔd anyóon ánɛ lɛ́ ómoyáyɔ́ɔ́ŋɛ ə́? Alɛ ánɛ lɛ́ úsiəd kɛnɛŋ na nyɔ́lɛ́ ə́?

⁷Oyɛ́ɛ́lɛ lɛ́ məŋun má maʼtom mámoyáyɛn ɛsom ɛ́ kɛnɛŋ; omámoyɛ́ʼkɛn nugəm, omáamonyáadɛ;

⁸Wiísúúli muim a ambaan yə́ə́ŋ lɛ́ ná álaamɛ.» Ná Táán ayɛ́ɛ́lɛ lɛ́ muim mómoyóbɛn, ímuʼ na ímuʼ yɛ́ yiídí fiɛ́d komoyóbɛn ɛ́dɛʼkɛ́ɛ kɔ. Náa, nɛ́gɔŋ yɛ́ɛnɛ tɛdɛ́njɛ́ɛ agodála lɛ́ aándalaamɛ muim.

⁹Kɔmɔɛ́d lɛ́ nkə kɛ́ tɛáʼkodálaá kɛ́lɛ lɛ́: Yə́sus nyɔ́ oyɛ́ɛ́lɛ lɛ́ məŋun má maʼtom mámoyáyɛn ɛsom ɛ́ kɛnɛŋ, Táán a mawɔʼ mə́ə́ŋ, əə́ʼkumuníigi nɛ́gɔŋ yɛ́ɛnɛ nodám nó nugəm na nó nnyáádɛ́ a oʼto wó ntɔ́b yɛ́ yɛɛ́nɛ́, na kugu kó yiígú a kidíídí kɛ́ mɔɔd ungim.

¹⁰Kɛ́lɛ lɛ́, Táán nyɔ́ ayɛ́ɛ́lɛ moom muim, nyɔ́ muim tɛn móagoob na nyɔ́lɛ́, kɛ́ɛ́sɛʼtanɛn lɛ́ yɛ́ɛlɛ lɛ́ Yə́sus ánɛ ntɔ́b, ná yɛ́ɛn fɔ́lɔ́b fɔ́lɔ́b nyɔ́ aádáŋananɛ ɛ́fɔlɛ́ ɛ́ pɔɔ́n agɛɛlɛ lɛ́ pə́siəd ngab a nugəm nuə́ŋ, ə́əbuúbuənin ngə́ ɛ kɔɔy.

¹¹Náa kɛ́lɛɛ́ lɛ́, Yə́sus nyɔ́ alɛɛ́ əfúŋi pɔɔd a mabɛ́ mɔ́ɔ́bɔn, na pɔɔd pá alɛɛ́ əfúŋi, pɔ́lɛ́ piim pálɛ na Sɛ mmuʼ. Kólɛ́ aa adɛágaáŋɛ́ɛ́ kobodɔ́ŋɔn lɛ́ pomóŋŋí.

¹²Kɛ́lɛ lɛ́, alɛ əgusəə ɔnɔ́: «Táán yaam, ndɛ́ɛ́ kolɔɛgɛ niiŋ nɛáŋ na pomóŋŋí páam, ndɛ́ɛ́ kudúmə nugəm noáŋ a udi ó pɔɔd pəə́yílə́ə́n[10]»

¹³Əmə́əsəə tɛn lɛ́: «Ndɛ́ɛ́ kaag oʼto wáam ungim na wɛ Táán waam.» Ɔnɔ́ tɛn kə́mmú: «Táá, mɛ aa nyóonɛ na pɔɔ́n pá Táán ayɛ́nyɛɛ́ʼkɛn[11]»

¹⁴Wɔnɔ́ ná pɔɔ́n pə́ə́ŋ póob pálɛɛ́ pɔɔd na pumog, na maŋɔ́ a nkó, ayáán tɛn nyɔ́lɛ́nyɔ́amɔɛ́d mɔɔd wɔnɔ́ pɔ́lɛ́ agɛɛlɛ lɛ́, a kugu kuə́ŋ kó yiígú, ɔ́nyɔŋ toɛn tó Omɔlɛɔ́g nyɔ́ alɛɛ́ na toɛn tó koóna pɔɔd.

¹⁵Náan aa ayááŋɛn tɛn pɔɔd pá wɛɛ́y ó kugu óyɛ́boyáánɛ pɛɔ́lɛ́ a ɔlaa wɔ́ɔ́bɔn ungim.

¹⁶Kɛ́lɛ lɛ́, adɛ́njaŋ məŋun má maʼtom aa əmíim agɛɛ́bɛ, ndɛg yɛ Ábɛlaam aa əmíim agɛɛ́bɛ[12]

¹⁷A oʼto wóow aa yiígóodi lɛ́ áŋwáŋanan pomóŋŋí pə́ə́ŋ a pɛbán piim, agɛɛlɛ lɛ́ yáán ɔnjaaganɛʼ pɛfɔny nyɔ́ oʼkóʼkóón na ɔʼtɛ́m ólaŋ, aágɛɛlɛ pigólí piə́ŋ sáád a udi ó Táán. Náan aa ayɛ́ɛ́lɛ, agɛɛlɛ lɛ́ Táán ə́lisin pɔɔd mabɛ́ mɔ́ɔ́bɔn[13]

¹⁸Kɛ́lɛ lɛ́, nɛ́gɔŋ yɛ́ɛnɛ Yə́sus alɛ ogɛɛ́bɛ pá pálɛɛ́ na pɛásɔ́sɛ́n lɛ́ nyɔ́lɛ́nyɔ́amɔɛ́d yɛɛ́nɛ́ ntɔ́b ná ɔyɔ́ɔ́ŋ pɛásɔ́sɛ́n.