Read Yambeta Əbələ́ə 3 Bible Online

Əbələ́ə 3 - Yambeta bible

Əbələ́ə 3

¹Náan anɛ́ɛ́n, pəŋi pomóŋŋí páam pá poágoob na Táán, pəŋi pá ayɛ́boodɔ́ŋɔn, táláan na Yə́sus. Nyɔ́lɛ́ aa Táán əyíím ádom, ɔnjaaganɛʼ pɛfɔny nyɔ́ oʼkóʼkóón. Tɛmáág oʼto náan, kɛ́lɛ́ aa tɛlɛɛ́ alɔɛgɛ tɛn.

²Kɛ́lɛ lɛ́, Táán əyímudə́nígi a pigólí pɛ́ɛb, adɛ́lɛ́mɛn tɛn sáád a pɛ́lɛ́, wɔnɔ́ ná Moyíis ayáyɛ́ʼkɛ́nɛ́ɛ́ a yoog ɛ Táán[14]

³Yə́sus ogóódi lɛ́ yɛ́ɛn na nugəm agaáyɛn Moyíis, əgín tɛn wɔnɔ́ ná ándɛ páanyáadɛ mɔɔd nyɔ́ aáwáág noádɛʼ agaáyɛn noádɛʼ nó aáwáag.

⁴Kɛ́lɛ lɛ́, noádɛʼ nuim núgóódi mɔɔd nyɔ́ aáwáag, náa, ɔngɛɛlɛʼ moom muim alɛ Táán.

⁵A noá na Moyíis, nyɔ́lɛ́ ayáyɛ́ʼkɛ́nɛ́ɛ́ a sáád a pigólí pɛ́ a yoog ɛ Táán ngim. Náan aa wɔnɔ́ uʼkudin, yiígóodi lɛ́ ádɛ́lɛm mbaasɔ́ a nkə kɛ́ Táán ayɛ́ɛ lɛ́ əəsəə.

⁶Náa, Kilíʼtus alɛ əgín wɔnɔ́ Mɔɔ́n nyɔ́ Sɛ amámoyɛ́ʼkɛn noádɛʼ nuə́ŋ lɛ́ nyɔ́lɛ́ aa yɛ́ɛnɛɛ́ oʼto a nólɛ́. Pəsi aa tɛlɛɛ́ noádɛʼ nuə́ŋ nógo nóon ná tɛmɛ́ɛ́yɛg oʼto kɔŋɛʼ kɔŋɛʼ[15] a pɛbán pɛ́ tɛlɛɛ́ agomɛna pɛda, tɛányɔ́ga na pɛ́lɛ́.

⁷Kólɛ́ aa Uŋun wó Ufúlúʼtú wísə́ə́ wɔnɔ́: «Naánɛ́ yɛ́ɛnɛ, pomaʼkoob nɛŋo nɛ́ Táán,

⁸puə́nəən ntɛ́m yaaŋan agɛɛlɛ lɛ́ tɔgɛ́ɛ́ tuə́ŋ tóboosɔd. Podɛnjɛ́ɛ́lɛ oʼto wó onnasáŋ wɔnɔ́ ná poyɛ́ɛ́lɛ kalaʼ ná puídə́ə́míni oʼto ná pɛásɔ́sɛ́n pɛ́yɛ́bobóan a kɛnɔ kɛ́ kifələ́ə́n.»

⁹Táán yiísə́ə́ lɛ́: «Pasɛʼkóón pááŋan páyɛ́nyaásɔ́sɛ́nɛ́ɛ́ a kɛnɔ kɛ́ kifələ́ə́n lɛ́ ná pádála nkə kɛ́ ndáagɛɛlɛ, pɛ́ɛ́dála kɔmɔɛ́d nkə kɛ́ njɛ́ɛ́lɛ

¹⁰a pɛag əʼtin ábaan. Kólɛ́ aa njóób ilúún na ɔsɛg wóow, mbáság kusəə nyɔʼkɔ́: “Mafɛgaʼ mɔ́ɔ́bɔn málɛ pɛnɛŋ piim mənímə́ə́n, pádɛányɔ́ŋɛn kolɛŋ ngə́ yaam.”

¹¹Náan aa, a ilúún yɛ́ɛy, njácɛ́mɛ́ɛ́ nyɔʼkɔ́: “Pádɛndɛ́ɛ́ kosɔd a kɛnɔ kɛ́ nyiísóbíni lɛ́ pálɛ́ɛ́ kooyig a kɛ́lɛ́[16]!” »

¹²Pólóʼkɔd óo, pomóŋŋí, úmmuʼ a ondáŋ wááŋan adɛnjɛ́ɛ́n na ɔʼtɛ́m wó ɔmbɛ́, adiɛn na isuŋ yɛ́ ɛ́lɛɛ́ ɛ́gomoyɛ́ɛlɛ lɛ́ ə́dúmin Táán ngim. Táán nyɔ́ alɛɛ́ na ɔlaa.

¹³Poágɔ́nɛganɛ anɛ́ɛ́n nkó mɔɔ́s miim pəŋi na pəŋi agɛɛlɛ lɛ́ kɔbɛ́ kúdindígə nyummú, áság kosáŋɛnɛ koob ntɔ́ŋɔ́nɔ́n ɛ Táán ɛ naánɛ́.

¹⁴Kɛ́lɛ lɛ́, pəsi tɛándɛ ondáŋ na Kilíʼtus. Tɛagɛɛn ondáŋ na nyɔ́lɛ́ súʼtə́ə́ a nɛman ná timə́bísíí əgín na toɛn a oʼtɛ́lɛm wó tiísiə́d kɔ a niə́bə́ə.

¹⁵Kɛ́lɛ kidiídílə́ náan a Kálaʼtaʼ lɛ́: «Naánɛ́ yɛ́ɛnɛ, pomaʼkoob nɛŋo nɛ́ Táán, puə́nəən ntɛ́m yaaŋan agɛɛlɛ lɛ́ tɔgɛ́ɛ́ tuə́ŋ tóboosɔd. Podɛnjɛ́ɛ́lɛ oʼto wó onnasáŋ wɔnɔ́ ná poyɛ́ɛ́lɛ kalaʼ na puídə́ə́míni oʼto na nyɔ́lɛ́[17]»

¹⁶Pa ánɛ aa páyóób anɛ́ɛ́n nɛŋo nɛ́ Táán pámáamoyɛ́ɛlɛnɛ oʼto wó ɔnnasáŋ ə́? Pɔɔd pá Moyíis əyíím álónɛ a Əsíibtə aa páyɛ́ɛ́lɛ náan.

¹⁷Na pa ánɛ aa Táán yiílíŋ əʼtin á pɛag ábaan ə́? Əgín na pɔ́lɛ́ pá páyɛ́ɛ́lɛ kɔbɛ́, pə́mə́əgu a kɛnɔ kɛ́ kifələ́ə́n áa Táán yiílíŋ.

¹⁸Na pa ánɛ aa ayácɛ́mɛ́ɛ́ lɛ́ pádɛndɛ́ɛ́ kosɔd a kɛnɔ kɛ́ yiísóbíni lɛ́ póogooyig əə́? Əgín tɛn na pɔ́lɛ́ pá páyɛ́moyɛ́ɛ́lɛ́nɛ oʼto wó ɔnnasáŋ áa ayácɛ́mɛ́ɛ́[18]

¹⁹Tɛlɛ agodála tɛn lɛ́ Pádɛʼkɔ́ɔsɔd kɔ a kɛnɔ kɛ́ yiísóbíni lɛ́ póogooyig lɛ́ pə́diʼkə́əgəə́liʼtini.