Read Yambeta Əbələ́ə 4 Bible Online

Əbələ́ə 4 - Yambeta bible

Əbələ́ə 4

¹Táán ayɛ́bɛgágɛn lɛ́ tɛlɛ́ɛ́ kosɔd a kɛnɔ kɛ́ yiísóbíni lɛ́ tiogooyig kɔ. Oʼkag wóow úligə́ni súʼtə́ə́ nɛ́gɔŋ kɛ́. Tɛ́lóʼkɔdɔɔn anɛ́ɛ́n lɛ́ úmmuʼ a ondáŋ wə́ə́s adɛʼtáŋ kosɔd kɔ lɛ́ aáyɛ́ɛn.

²Kɛ́lɛ lɛ́, pəsi tɛn tɛyóób Tɔsɔm tó Táán tóod lɛ́ tɛlɛ́ɛ́ kosɔd kɔ wɔnɔ́ ná pasɛʼkóón pə́ə́s tɛn páyóób tólɛ́ a kɛnɔ kɛ́ kifələ́ə́n. Tódɛʼkáaboɛ́bɛ pɔ́lɛ́ lɛ́ pə́diʼkə́əgəə́liʼtini tólɛ́.

³Pəsi pá tiyə́líʼtíníí tólɛ́, tɛlɛ́ɛ́ kosɔd kɔ a kɛnɔ kɛ́ɛg kɛ́ kooyig kɛ́ Táán yiísə́ə́ na pá pə́diʼkə́əgəə́liʼtinií ɔnɔ́: «Náan aa a ilúún yɛ́ɛy, njácɛ́mɛ́ɛ́ nyɔʼkɔ́: Pádɛndɛ́ɛ́ kosɔd a kɛnɔ kɛ́ nyiísóbíni lɛ́ pálɛ́ɛ́ kooyig a kɛ́lɛ́[19]!» Taa, náan aa Táán yiísə́ə́, kɔmɔɛ́d lɛ́ ayɛ́ɛ aáʼkoman pigólí piə́ŋ əgín kɔ́gɔ́ɔg kalaʼ ná ayɛ́ɛ́lɛ nsí.

⁴Kɛ́lɛ lɛ́, a kɛbán kɛ́ wɔɔ́s wó annam áʼtáan na ábaan, kɛ́lɛ kidiídílə́ kɔ a Kálaʼtaʼ ɛ Táán a kɛnɔ kímmú lɛ́: «A mədúg máʼtáan na mábaan, Táán oyóóyig ná aáʼkoman pigólí piə́ŋ[20]»

⁵Əgín tɛn nyɔ́lɛ́ aa yɛɛ́sɔ́yɔ tɔgɛ́ɛ́ tóonɛ tó tɛmóób lɛ́: «Pádɛndɛ́ɛ́ kosɔd a kɛnɔ kɛ́ nyiísóbíni lɛ́ pálɛ́ɛ́ kooyig a kɛ́lɛ́[21]»

⁶Náan anɛ́ɛ́n, wɔnɔ́ ná pá pɛ́ɛ́yáŋ agoob Tɔsɔm tó Táán pádɛʼkɔ́sɔ́dɛ́ɛ́ a kɛnɔ kɛ́go kɛ́ɛg lɛ́ pádɛʼkáagoóbɛn Táán. Náa, a pɛ́ndɛ́ŋ, ngə́ ɛgosɔd iligi.

⁷Kólɛ́ aa Táán əmíʼkíni kudə́nigi wɔɔ́s wɛ́ndɛ́ŋ. Aálog wɔɔ́s ogo wóow ɔnɔ́: «Naánɛ́ yɛ́ɛnɛ.» Pɛag a ngim yɛ́ɛy, yɛɛ́sɔ́yɔ kɛbán kɛ́ wɔɔ́s wóow, a unuʼ ó Tə́fid ná yɛɛ́sɔ́yɔ a oʼto ó kɛbán kɛ́ɛg kɛ́ tɛáyaŋ abana lɛ́: «Naánɛ́ yɛ́ɛnɛ, pomaʼkoob nɛŋo nɛ́ Táán, puə́nəən ntɛ́m yaaŋan agɛɛlɛ lɛ́ tɔgɛ́ɛ́ tuə́ŋ tóboosɔd[22]»

⁸Kɛ́lɛ lɛ́, pɔ́nɔ́ Yosuwə́ə əyíbusúidin fɔ́lɔ́b a kɛnɔ kɛ́ kooyig[23], Táán adɛʼkɛ́ɛ a ngim yɛ́ɛy, kiiʼkini kosɔyɔ kə́mmú kɛbán kɛ́ wɔɔ́s wɛ́ndɛ́ŋ úgooyig.

⁹Wɔɔ́s úgooyig wó wáʼkolɔbɛnɛɛ́ ndɛg ɛ Táán, ólɛ wó wáŋwáŋánan wɔɔ́s ó kisúgiʼ wó Táán oyóóyig a wólɛ́ mədúg máʼtáan na mábaan

¹⁰lɛ́ mɔɔd nyɔ́ ɔɔ́sɔd a kɛnɔ kɛ́ kooyig kɛ́ Táán yiísóbíni, alɛ ogooyig a pigólí piə́ŋ kɔ wɔnɔ́ ná Táán oyóóyig a piə́ŋ.

¹¹Tɛágɔ́nɛgɛan anɛ́ɛ́n agɛɛlɛ lɛ́ tɛ́sɔd a kɛnɔ kɛ́ kooyig kɛ́ɛg, ná tidiʼtə́əŋ a ongoo ó pasɛʼkóón pə́ə́s pá páyɛ́ɛ́lɛ́nɛ Táán oʼto wó ɔnnasáŋ.

¹²Kɛ́lɛ lɛ́, tɔgɛ́ɛ́ tó Táán tólɛ a ɔlaa, tólɛ tɛn na toɛn. Tólɛ agood wɔnɔ́ ɛyafág ɛ́ pɛdá yɛ́ ɛ́lɛɛ́ ɛgɔ́gɛ́náán toá tuim. Tóɔsɔ́dɔnɔn súʼtə́ə́ a kɛnɔ kɛ́ ɛdáányɛ́ ímə́búníí na uŋun, súʼtə́ə́ a kɛnɔ kɛ́ angɛŋ amɛ́ɛn əgəə́bun na mɔfɔɔfɔŋɛʼ. Tóagɛɛlɛ lɛ́ mafɛgaʼ má málɛɛ́ na mɔɔd a ɔʼtɛ́m, na nkə kiim kɛ́ aányɔ́ŋɛn lɛ́ ná amɛ́ɛ́lɛ, kɛ́lon táán.

¹³Yiim yɛ́ Táán ayɛ́ɛ́lɛ alɛ agodɛ́ʼtɛg yɛ́lɛ́ əgín náanɛ moááŋ a əngis yə́ə́ŋ. Ímuʼ na ímuʼ yɛ́ mɔɔd alɛɛ́ ogomoyɔ́ɔsɛgɛn ɛ́dɛɔ́gɔ. Na nyɔ́lɛ́ aa tɛlɛ́ɛ́ kɛɛn agaáloaŋanan nkə kiim kɛ́ tɛmɛ́ɛ́lɛ.

¹⁴Tɛlɛ na ɔnjaaganɛʼ pɛfɔny nyɔ́ oʼkóʼkóón, alɛ Yə́sus, Mɔɔ́n o Táán. Nyɔ́lɛ́ nyɔ́ yɛɛ́sáála mbálámɔɛn agɛɛn súʼtə́ə́ a udi ó Táán. Tiə́yísiən anɛ́ɛ́n a kəə́liʼtiniʼ kó tɛlɛɛ́ alɔɛgɛ.

¹⁵Ɔnjaaganɛʼ pɛfɔny nyɔ́ oʼkóʼkóón nyɔ́ tigódíí, ɔdɛɔ́gɔ ombod wó úʼkódií kɛnɛŋ na ntɔ́b yəəs, ndóo. Alɛ nyɔ́ ɔyɔ́ɔ́ŋ mbod ɛ pɛásɔ́sɛ́n ngim wɔnɔ́ pəsi. Náa, nyɔ́lɛ́ adɛʼkáagɛɛlɛ kɔbɛ́.

¹⁶Tiɛ́naan anɛ́ɛ́n, tɛáyɛʼtɛnɛan na pɛsány piim a ɛbá ɛ́ noʼkóm nó nɛlaamɛʼ nó Táán nyɔ́ amɛ́ɛ́lɛ́nɛ pɔɔd kɔŋɛʼ lɛ́ ná ə́siəd maan na pəsi, áabɛyɛ́ɛlɛnɛ kɔŋɛʼ agɛbiɛ́bɛ a kɛnɛŋ kɛ́go kɛ́laŋ.