Read Yambeta Əbələ́ə 5 Bible Online

Əbələ́ə 5 - Yambeta bible

Əbələ́ə 5

¹A kɛgaágadɛ kɛ́ pɔɔd aa ándɛ pə́əgiiyid ɔnjaaganɛʼ pɛfɔny nyɔ́ oʼkóʼkóón ungim. Pigólí piə́ŋ pɛ́lɛ lɛ́ ə́gudin Táán a kidíídí kɛɔ́bɔn. Nyɔ́lɛ́ aa alɛɛ́ lɛ́ áyaagɛnɛ na Táán, ngab yɔɔbɔn, áyɛɛlɛ tɛn kɛfɔny a oʼto ó mabɛ́ mɔ́ɔ́bɔn.

²Wɔnɔ́ ná nyɔ́lɛ́ tɛn alɛɛ́ ondɛbɛ́dáán a pumog lɛ́ alɛ əgín tɛn agá mɔɔd, alɛ ogoob pá pə́ə́ním ngə́ lɛ́ pándɛŋɛn.

³A oʼto wóonɛ lɛ́ nyɔ́lɛ́nyɔ́amɔɛ́d tɛn alɛ ondɛbɛ́dáán a pumog, adɛágɛɛ́ʼkɛn Táán pɛfɔny əgín a oʼto ó mabɛ́ má pɔɔd, aagɛɛ́ʼkɛn tɛn a oʼto ó mə́ə́ŋ má nyɔ́lɛ́nyɔ́amɔɛ́d[24]

⁴Mɔɔd adɛágaásoŋ nyɔ́lɛ́nyɔ́amɔɛ́d nugəm nóonɛ lɛ́ alɛ ɔnjaaganɛʼ pɛfɔny nyɔ́ oʼkóʼkóón, ndóo. Táán áa aámoodɔ́ŋɔn agomoyɛ́ʼkɛn oʼtom wóow, wɔnɔ́ ná yɛɛ́dɔ́ŋɔn Álɔn[25]

⁵Yoom tɛn náan ímuʼ na Kilíʼtus. Adɛʼkáagaásoŋ nyɔ́lɛ́nyɔ́amɔɛ́d nugəm nóon lɛ́ alɛ ɔnjaaganɛʼ pɛfɔny nyɔ́ oʼkóʼkóón. Táán áa ayɛ́moyɛ́ʼkɛn. Yiísə́ə́ ɔnɔ́ na nyɔ́lɛ́: «Wɛ olɛ mɔɔ́n waam, Əgəə́bə́ə naánɛ́ yɛ́ɛnɛ, mɛ ndɛ sɛ waaŋ.»

⁶Náan yoom ímuʼ aa yiísə́ə́ a kɛnɔ tɛn kímmú a Kálaʼtaʼ yəəŋ, ɔnɔ́: «Wagɛɛn ɔnjaaganɛʼ pɛfɔny a pəliə́g, a ombod ó Mɛlkɛsɛdɛ́ɛg[26]»

⁷Ná Yə́sus ayɛ́ɛ a nsí yɛ́ɛnɛ, [27] ayɛ́ɛ yɔɔ́sɔ́gɔlɔn Táán nyɔ́ yiígóodi toɛn tó komoyááŋɛn a unuʼ ó kugu. Ayɛ́ɛ amoyɔ́sɔ́gɔlɔn, aáyɛmbɛlɛdanɛ ɔmbɔg, pɛlɛɛ píəmuúsuu, aágaányam nɛŋo a mɔɛn. Táán ayóób pɛɔ́sɔ́gɔ́lɔ́n piə́ŋ lɛ́ ayɛ́moyóbɛn.

⁸Náa, ɔmbɔ́ ná ayɛ́ɛ lɛ́ alɛ Mɔɔ́n o Táán, a ntɔ́b yɛ́ yɛɛ́nɛ́, ayáʼkan nkə aa kɛ́lɛɛ́ koóbɛn Táán.

⁹Ná Táán ayɛ́ɛ aáʼkoman kolɛŋ kumusóbini, ayáán isim yɛ́ yɔ́ɔgɔɔyɛ a pɛnɛŋ piim, ungim nyɔ́ aámoyóbɛn.

¹⁰Ɛɛ́ɛ, Táán ayɛ́mobágɛ a oʼkɔɔ wó ɔnjaaganɛʼ pɛfɔny nyɔ́ oʼkóʼkóón a ombod ó Mɛlkɛsɛdɛ́ɛg.

¹¹Tɛlɛ na pɛbán piíŋ pɛ́ kusəə a oʼto wó oʼtɛ́lɛm wóow. Náa, kɛ́lɛ kɛnasáŋ agɛɛlɛ lɛ́ tɛ́bomoáŋɛnɛ wólɛ́ lɛ́ podɛɔ́gɔ əgəə́bisig koob kɛbán.

¹²Kɔ́gɔ́ɔg kalaʼ aa poyɛ́ɛ poándɛ lɛ́ póaʼkananɛ pɔsɔ́g pɛbán pɛ́ Táán, náa, kíligi əguunə lɛ́ páboyáʼkananɛ kə́mmú pəŋi, pɛbán pɛ́ na oʼto na oʼto pɛ́ a tɔsɔm tó Táán. Puligi póonɛ lɛ́ póŋɛ́ɛŋ maŋɛ́ɛŋ, podɛ́njɛ́ɛ págonɛ moom mó konɛ mó monasáŋ.

¹³Mɔɔd nyɔ́ əligíí agoŋɛ́ɛŋɛɛ́ maŋɛ́ɛŋ, əligi mɔɔ́n nyɔ́ uʼtom, adɛ́njɛ́ɛ na nsiŋ ɛgolɛŋ nkə kɛ́ kɛ́lɛɛ́ sáád[28]

¹⁴Kɔmɔɛ́d lɛ́ moom mó konɛ mó monasáŋ mólɛ a pá páʼkogónɛ́ɛ́. Pɛbán pɛ́ páʼkodálaá a ɔlaa wɔ́ɔ́bɔn pɛáʼkoboyɛ́ɛlɛ lɛ́ pálɛŋ kocálɛn nkə kɛ́ kɛ́lɛɛ́ kɛŋɛʼ na kɛ́ kɛ́lɛɛ́ kɛbɛ́.