Read Yambeta Əbələ́ə 6 Bible Online

Əbələ́ə 6 - Yambeta bible

Əbələ́ə 6

¹Náa anɛ́ɛ́n, tídíən pɛbán pɛ́ na oʼto na oʼto pɛ́ a ngə́ ɛ Kilíʼtus pɛ́ pɛ́ɛ́yáŋ agɛbɛyáaʼkananɛ, tɛágasɛ a nkə kɛ́ kɛ́lɛɛ́ kɛ́ pɔɔd pá páʼkogónɛ́ɛ́. Tidinjúúlíni kə́mmú a pɛbán pɛ́ na oʼto na oʼto pɛ́ a niə́bə́ə nɛ́ tɔsɔm wɔnɔ́: Kudum ngim na pɛbán pɛ́ náan iyó, pɛbán pɛ́ píəbiyíimin na kugu, na kaag kó oʼto na Táán,

²na tɔʼtilíin yɛ́ a noá na ɔsɔgɛn, na yɛ́ a kɛbán kɛ́ kaábɛgɛn mɔɔd ombɔg a oʼto[29] a niiŋ nɛ́ Táán, na ɛ koóndɛg kó pɛlóŋ, na kɛbán kɛ́ súsúgə́n ɛ pɛyɔm.

³Nkə kɛ́ tigódíí kɛɛlɛ aa kɛ́ɛg aá, ná Táán əmə́líʼtíníí.

⁴Pɔɔd pə́mmú pálɛ kɔ pá pɔ́yɔ́ɔ́ŋ kisəə kɛ́ Táán, pámóʼtɛn nɔŋáan nuə́ŋ, pɔ́mɔ́yɔɔŋ tɛn ngab a Uŋun wó Ufúlúʼtú.

⁵Pɔ́lɛ́ póob pɛ́ɛ́dála kə́muʼ na kə́muʼ, kásɛ́g áa tɔgɛ́ɛ́ tó Táán tólɛɛ́ tɔŋɛʼ, pámáalɛŋ tɛn toɛn tó Nɛlaamɛʼ nɛ́ niə́ndəgimií.

⁶Pə́míʼkíni kudə́əŋ agá kə́mmú kɔmɔɛ́d a ɔlaa wɔ́ɔ́bɔn ó kalaʼ. Mɔɔd ɔdɛɔ́gɔ ogaáʼkɛ kə́mmú kɛɛlɛ lɛ́ páágasɛ kawa kawa kə́mmú lɛ́ a nɛɔ́bɔn, pálɛ əgiiʼkini kobaŋan Mɔɔ́n o Táán a ɔmbásá lɛ́ ná pɔɔd pámoodóga.

⁷Tísiədəən nkaʼtɛ́n na pɔlɛ́m. Pɔlɛ́m pó noó nóanaaŋan kɔ pɛnɛŋ piim, nóagɛɛlɛ lɛ́ moom mó páágóna múum, moɛ́bɛ pɔɔd pá pə́əgud mólɛ́, pólɛ pɔlɛ́m pó Táán əə́bilis.

⁸Náa, pómaʼkɛɛn lɛ́ pɔsɛ́n áa poálog kɔ na togógósɛa, póob pódɛ́agɛɛ́bɛ mɔɔd a yoom na yoom. Kɛnɛŋ sɔɔŋ Táán ə́lumisəni pólɛ́, ná a komananɛ tɛn pɔ́gɔ́lɔnɛ[30]

⁹Náa kɛbán kímuʼ, ɔmbɔ́ tɛsɔyɔ náan, tɛálɛŋ lɛ́, a pəŋi pɔsɔ́sɔ́g páam pá ɔʼtɛ́m, polɛ a ngə́ ɛlaŋ, ngə́ yɛ́ Táán aáboyɔ́ɔyɛ a yɛ́lɛ́.

¹⁰Kɛ́lɛ lɛ́ Táán alɛ sáád. Adɛndɛ́ɛ́ kəə́bəli pigólí pɛáŋan pɛ́ pomɛ́ɛ́lɛ, na nnyɔ́ŋánán yaaŋan yɛ́ puílóódi na pɔɔd a niiŋ niə́ŋ. Puílóódi yɛ́lɛ́ ná poyáyáágɛ́ɛ́ əgugudin pá pálɛɛ́ pə́ə́ŋ. Polɛ agɛɛn əgín yuudi na kubuúgudin.

¹¹Náa, nkə kɛ́ tɛlɛɛ́ anyɔ́ŋɛn na pəŋi kɛ́lɛ lɛ́, ungim a ondáŋ wááŋan yáyɛ́ʼkɛn əgín náan na toɛn, yɛ́ɛn əgiig a nisug, agɛɛlɛ lɛ́ nkə kɛ́ polɛɛ́ agomɛna pɛda a kɛ́lɛ́ kɛáyɛ́ɛlɛ.

¹²Ɔlɛáŋ údiíbugúmin. Yə́nə́ən agá ongoo ó pá pɔ́yɔ́ɔ́ŋ nkə kɛ́ Táán ayɛ́bogágɛn. Pɔ́yɔ́ɔ́ŋ kɛ́lɛ́ lɛ́ páyáág oʼto na nyɔ́lɛ́, pə́məyəə́yíis.

¹³Ná Táán yɛɛ́gágɛn Ábɛlaam nkə kɛ́ nyɔ́lɛ́ aámoyɛ́ɛlɛnɛ, ayácɛ́mɛ́ɛ́ a niiŋ niə́ŋ nɛ́ nyɔ́lɛ́nyɔ́amɔɛ́d lɛ́ mɔɔd o nyɔ́lɛ́ kaácɛm a niiŋ niə́ŋ nyɔ́ ayɛ́moyáyɛnɛn, adɛʼkɛ́ɛ kɔ.

¹⁴Ayácɛ́mɛ́ɛ́ ɔnɔ́: «Əgín áa kɛ́am kɛ́ mɛ Táán, ndɛ́ɛ́ kugusúgi niúd na kɔŋɛʼ, ndɛ́ɛ́ kooyɛ́ʼkɛn tɛn udəg[31]»

¹⁵Ábɛlaam ayɛ́ɛ agobóŋan ɔʼtɛ́m wə́ə́ŋ yəə́b lɛ́ nkə kɛ́ Táán ayɛ́mogágɛn, ɔɔgɔɔŋ. Ɔyɔ́ɔ́ŋ tɛn.

¹⁶Kɛnɛŋ kɛ́ pɔɔd pálɛ agaácɛma, pálɛ agaácɛm a niiŋ nɛ́ mɔɔd nyɔ́ amáboyááyɛn. Ncɛm aa yaágɛɛlɛ lɛ́ pɔɔd pádɛnjɛ́ɛ́nánan na musuŋ yuudi.

¹⁷Kólɛ́ aa Táán ayácɛ́mɛ́ɛ́ agɛɛlɛ lɛ́, pɔɔd pá ayɛ́bogágɛn lɛ́ nyɔ́lɛ́ aaboyɛ́ɛlɛnɛ kɔŋɛʼ, pádɛnjɛ́ɛ́n na isuŋ lɛ́ nyɔ́lɛ́ ɔdɛɔ́gɔ ogogasɛ unuʼ a nkə kɛ́ əə́səə.

¹⁸Pɛbán pɛ́lɛ anɛ́ɛ́n kɔ pɛ́baan pɛ́ pɛ́dɛɔ́gɔ pɛ́gaácɛ́ndɛɛ́, Táán ədibilígə tɛn a pɛ́lɛ́ ɔmbɔ́ sɔɔŋ[32] Pɛ́lɛ́ pɛ́go aa pɛ́abɛgónɛ nkó na toɛn, pəsi pá tɛámɛna pɛda a nkə kɛ́ ayɛ́bɛgágɛn, pəsi pá tɛɔsɛ́mɛ́nɛ́ɛ́ a ngim yəəŋ.

¹⁹A pəsi, nɛmɛnaʼ pɛda niə́s nɛ́ɛn nɛ́lɛ a ɔlaa wə́ə́s wɔnɔ́ kisúg kɛ́ kíəgumən siʼtíməʼ nimiŋ nímuʼ a məní. Nɛ́lɛ tíŋ tíŋ tíŋ, nɛ́ɛ́yáág kɛsom kɛ́ sanjaʼ kɛ́ a Tɛ́mpɛl yɛ́ ɛlɛɛ́ a mɔɛn.[33]

²⁰Kɔ́gɔ́ɔg aa Yə́sus ayɛ́bɛyáŋɛ́nɛ, ɔɔ́sɔ́d kɔ a kidíídí kiə́s lɛ́ ayáán ɔnjaaganɛʼ pɛfɔny nyɔ́ oʼkóʼkóón a pəliə́g a ombod ó Mɛlkɛsɛdɛ́ɛg.