Read Yambeta Əbələ́ə 7 Bible Online

Əbələ́ə 7 - Yambeta bible

Əbələ́ə 7

¹Mɛlkɛsɛdɛ́ɛg ogo nyóon ayɛ́ɛ nkúm yɛ́ a Salɛ́ɛm, nyɔ́lɛ́ tɛn ɔnjaaganɛʼ pɛfɔny o Táán nyɔ́ alɛɛ́ a mɔɛmɔɛ́n. Ná Ábɛlaam ayɛ́ɛ əgimbuúli pɛdá pɛ́ ayɛ́ɛ́n abáam puʼkúm, Mɛlkɛsɛdɛ́ɛg ayɛ́ɛ́n əgəə́bun na nyɔ́lɛ́, amámofámɛn pɛda a udi.

²Moom muim mó Ábɛlaam əyíím áfɔnda a pɛdá, ayáába mólɛ ngab yówád, amámoyɛ́ʼkɛn mmuʼ. Əngiŋ yá pɛ́ɛ́lóg Mɛlkɛsɛdɛ́ɛg áyɛ́ɛ lɛ́, nɛ́ na oʼto na oʼto: «Nkúm ɛ sáád.» Nɛ́ annam ábaan, pɔ́nɔ́: «Nkúm ɛ Salɛ́ɛm», áay lɛ́ «Nkúm ɛ wiiy[34]»

³Sɛ wəəŋ, pádɛʼkóolɛŋɛn, ɔmbɔ́ tɛn ŋŋí. Ɔmbɔ́ tɛn yoog ɛ pɔɔd yɛ́ əyə́biə́níí a yɛ́lɛ́, pádɛʼkóolɛŋɛn. Ɔmbɔ́ wɔɔ́s wó əyə́biə́níí a wólɛ́, ɔmbɔ́ tɛn wó yiígú, pádɛálɛŋ[35] Alɛ ɔnjaaganɛʼ pɛfɔny a pɛnɛŋ piim, a kɛŋwáŋánán kɛ́ Mɔɔ́n o Táán.

⁴Mɛlkɛsɛdɛ́ɛg alɛɛ́ kɛgóʼkóón ə́y! Ɔmbɔ́ sɛʼkóón wəəs Ábɛlaam ayɛ́moyɛ́ʼkɛn kɛowád kɛ́ moom mó əyíím áfɔnda a pɛdá.

⁵Kɛcɛm kɛ́ Moyíis kiɛ́ʼkɛ́nɛn kɔmɔɛ́d toɛn na ndɛg ɛ Lə́fi yɛ́ ɛlɛɛ́ payaaganɛʼ pɛfɔny lɛ́ pə́ŋíənə kɛowád kɛ́ moom muim mó pɔɔ́n pá Ɛ́sɛlayɛl pógódíí[36], áay lɛ́ na pɔɔ́npásɛ pɔ́ɔ́bɔn, ɔmbɔ́ ná pɔ́lɛ́ tɛn pálɛɛ́ ndɛg yɛ Ábɛlaam.

⁶Mɛlkɛsɛdɛ́ɛg adɛʼkɛ́ɛ wo ndɛg ɛ Lə́fi. Náa, ɔyɔ́ɔ́ŋ kɛowád kɛ́ moom mó Ábɛlaam əyíím áfɔnda. Nyɔ́lɛ́ nyɔ́ Táán yɛɛ́gágɛn lɛ́ aamoyɛ́ɛlɛnɛ kɔŋɛʼ. Mɛlkɛsɛdɛ́ɛg ayɛ́mofámɛn pɛda a udi.

⁷Tɛálɛŋ, isuŋ tɛn ɛ́dɛɔ́gɔ kɔ lɛ́ osaá áa ándɛ aáfámɛn moóngaa pɛda a udi.

⁸Payaaganɛʼ pɛfɔny pá pálɛɛ́ ndɛg ɛ Lə́fi aa pə́əsiədə kɛowád kɛ́ moom. Pɔ́lɛ́ pálɛ pɔɔd pá pə́əgu wɔnɔ́ ungim. Náa, a noá na Mɛlkɛsɛdɛ́ɛg, kɛowád kɛ́yáyɛ́ʼkɛ́nɛ́ɛ́ na nyɔ́ alɛɛ́ a ɔlaa, əgín wɔnɔ́ ná kɛ́lɛɛ́ kidiídílə́ a Kálaʼtaʼ.

⁹Ndɛg ɛ Lə́fi aa ándɛ yə́əsiədə kɛowád kɛ́ moom. Nkə kɛ́ tɛlɛɛ́ pə́gusəə anɛ́ɛ́n kɛ́lɛ lɛ́, Lə́fi tɛn yɛɛ́ʼpɛ́ɛ́ kɛowád kiə́ŋ kɛ́ moom na Mɛlkɛsɛdɛ́ɛg lɛ́ Ábɛlaam nyɔ́ alɛɛ́ sɛʼkóón wəəŋ yɛɛ́ʼpɛ́ɛ́.

¹⁰Kɛ́lɛ lɛ́ ɔmbɔ́ ná a kɛnɛŋ kɛ́go kɛ́ Mɛlkɛsɛdɛ́ɛg ayɛ́ɛ́n əgəə́bun na Ábɛlaam, Lə́fi nyɔ́lɛ́ ayɛ́ɛ ədínjə́bíən, kɛ́lɛ́ wɔnɔ́ ayɛ́ɛ aándɛ kɔ a maŋɔ́ má Ábɛlaam.

¹¹A ondoŋá ó kolónɛ payaaganɛʼ pɛfɔny a kibúúm kɛ́ Lə́fi aa pɛcɛm pɛ́ɛ́yɛ́mɛ́nɛ́ɛ́. Náa, pigólí pɛɔ́bɔn pɛ́dɛʼkɛ́ɛ agolon kɔŋɛʼ. Pɔ́nɔ́ pɛ́ɛ́lónɛn kɔŋɛʼ, kɛ́dɛʼkɛ́ɛ əgəə́yúunə lɛ́ pábágɛ ɔnjaaganɛʼ pɛfɔny nyɔ́ ɔdɛɔ́gɔ a ombod wó ndɛg yɛ Álɔn, [37] áyɛɛn agá a ombod ó Mɛlkɛsɛdɛ́ɛg.

¹²Kɛ́maʼkɛɛn lɛ́ kobágɛ kó payaaganɛʼ pɛfɔny koácɛ́ndɛ kibúúm, kɛcɛm kɛ́ɛg kígóódi tɛn lɛ́ kíliog, páág kɛ́ndɛ́ŋ.

¹³Sə́dúk wəəs anɛ́ɛ́n nyɔ́ tɛlɛɛ́ agosɔyɔ kɛbán kiə́ŋ áanɛ, alɛ o kibúúm kɛ́ndɛ́ŋ na kɛ́ Lə́fi. Mɔɔd nyɔ́ a kibúúm kiə́ŋ adɛ́njaŋ kugud a kibóŋ kɛ́ pɛfɔny wɔnɔ́ ɔnjaaganɛʼ pɛfɔny.

¹⁴Kɛ́lɛ lɛ́, pəsi piim tɛlɛ palɛŋáán lɛ́ a kibúúm kɛ́ Siudáa aa Sə́dúk əyə́biə́níí. Ná Moyíis yiísə́ə́ kɛbán kɛ́ɛg kɛ́ kibúúm kɛ́ kɛ́alónɛ payaaganɛʼ pɛfɔny, ədiʼkə́əbuŋ kɛ́ɛg kɛ́ Siudáa[38]

¹⁵Kɛbán kɛ́ kɛálɛŋ komoáŋɛ kɛ́ɛg aa kɛ́ɛnɛ kɛ́lɛɛ́ lɛ́: Ɔnjaaganɛʼ pɛfɔny nyummú əmíim nyɔ́ alɛɛ́ a kɛŋwáŋánán kɛ́ Mɛlkɛsɛdɛ́ɛg.

¹⁶Nyɔ́lɛ́, Táán adɛʼkáamobágɛ ɔnjaaganɛʼ pɛfɔny a nɛ́ pɛcɛm pɛ́ píəsəə tuə́ áa pɔɔd píiyidií ɔnjaaganɛʼ pɛfɔny. Ayɛ́mobágɛ a toɛn tó a ɔlaa wó ódɛndɛ́ɛ́ komanɛɛ́.

¹⁷Kɛ́lɛ lɛ́, nkə kɛ́ kíyə́dílə́ə́ a niiŋ niə́ŋ áa kɛ́ɛnɛ lɛ́: «Wɛ, olɛ́ɛ́ kɛɛn ɔnjaaganɛʼ pɛfɔny a pəliə́g, a ombod ó Mɛlkɛsɛdɛ́ɛg[39]»

¹⁸Náan aa kɛcɛm kɛ́ kalaʼ kɛ́ɛ́mán lɛ́ kɛ́dɛʼkɛ́ɛ na toɛn, kɛ́dɛʼkɛ́ɛ agɛɛ́bɛ tɛn.

¹⁹Kɛ́lɛ lɛ́, kɛcɛm kɛ́ Moyíis kɛ́dɛʼkáagɛɛlɛ lɛ́ mɔɔd əgín ɔmbɔ́ úmmuʼ, álon ommoáŋáán a əngis á Táán. Náa nɛ́gɔŋ yɛ́ɛnɛ, Táán amɛ́ɛ́lɛ lɛ́ tɛ́mɛna pɛda a nkə kɛ́ kɛ́mááyɛn kɛcɛm. A nɛ́lɛ́ aa tɛlɛɛ́ págaáyɛʼtɛnɛ a ɛbá yə́ə́ŋ.

²⁰Na tɛn lɛ́, kɛ́dɛʼkáagaáyɛ́ɛlɛ náan, Táán adɛácɛ́mɛ́ɛ́. Kɔmɔɛ́d lɛ́ a payaaganɛʼ pɛfɔny póʼkáag, mɔɔd adɛʼkáagaácɛm.

²¹Náa, a noá na Yə́sus, Táán ayɛ́mobágɛ ɔnjaaganɛʼ pɛfɔny ná yiísə́ə́ ɔnɔ́ na nyɔ́lɛ́: «Mɛ Sə́dúk áa mbáncɛ́mɛ́ɛ́, nyɔʼkɔ́: “Olɛ ɔnjaaganɛʼ pɛfɔny a pəliə́g.” Ntiúlíní tɛn ngim a nkə kɛ́ mbə́səə[40]»

²²Kólɛ́ aa Yə́sus alɛɛ́ nyɔ́ amɛ́ɛ́lɛ lɛ́ nɛálad niə́s na Táán níɛn nɛ́ nɛ́mááyɛn nɛ́ kalaʼ a kúfuʼ.

²³Yoom yímmú tɛn yɛ́ ɛ́lɛɛ́ kɔ ndɛ́ŋ ɛ́lɛ lɛ́: Payaaganɛʼ pɛfɔny póʼkáag páyɛ́ɛ piíŋ lɛ́ páyɛ́ɛ əguguə́ʼkən, pádiɛn na pigólí pɛɔ́bɔn yuudi, pɔsɔ́g pɛ́ndɛ́ŋ pə́əsiəd oʼkɔɔ.

²⁴Náa, Yə́sus nyɔ́lɛ́ agɛɛn əgín na pigólí piə́ŋ pɛ́ ɔnjaaganɛʼ pɛfɔny yuudi lɛ́ ɔlaa wə́ə́ŋ ólɛ a pəliə́g.

²⁵Kólɛ́ aa nyɔ́lɛ́ alɛɛ́ ogɔɔyɛ a kúfuʼ, pá páasan a ngim yəəŋ agɛɛlɛ lɛ́ pááyɛʼtɛnɛ a ɛbá ɛ́ Táán, lɛ́ alɛ a ɔlaa a pɛnɛŋ piim lɛ́ yɔ́sɔ́gɔlɔn Táán a kidíídí kɛɔ́bɔn.

²⁶Taa, ɔnjaaganɛʼ pɛfɔny nyɔ́ oʼkóʼkóón nyɔ́ kɛ́yɛ́ɛ əgibiyúunən lɛ́ tíɛn na nyɔ́lɛ́ anyóon. Alɛ ufúlúʼtú, oʼkóodi ɔsɛd ɔmbɔ́, adɛʼkáagɛɛlɛ kɔbɛ́, Táán əyímuliógi a ondáŋ ó pɛɛlɛ mabɛ́, amáyɛmobágɛdɛ a mbálámɔɛn a moɛmɔɛ́n.

²⁷Yə́sus nyɔ́lɛ́ ɔdɛɔ́gɔ wɔnɔ́ puʼkúm pó payaaganɛʼ pɛfɔny póʼkáanɛ pɛ́ndɛ́ŋ pá pógódíí lɛ́ pɛ́ɛlanɛ Táán pɛfɔny mɔɔ́s miim. Páayaŋ amoyɛ́ɛlɛnɛ pɛfɔny a mabɛ́ mɔ́ɔ́bɔn má pɔ́lɛ́báamɔɛ́d, ná pɛ́ɛlɛ tɛn a má pɔɔd[41] Yə́sus nyɔ́lɛ́ ayɛ́ʼkɛn kɛfɔny na Táán kə́muʼ súg a pɛnɛŋ piim ná ayáyɛ́ʼkɛ́nɛ́ɛ́ nyɔ́lɛ́nyɔ́amɔɛ́d.

²⁸A kɛcɛm kɛ́ Moyíis, mɔɔd lɛ́ mɔɔd, ɔngɛɛlɛʼ kɔbɛ́ aa kɛ́lɛ́ kɛ́yɛ́ɛ kɛɛlɛ lɛ́ ábág nkúm ɛ payaaganɛʼ pɛfɔny. Náa, Táán aábágɛ Mɔɔ́n Ɔnjaaganɛʼ pɛfɔny nyɔ́ oʼkóʼkóón a ncɛm yɛ́ ayácɛ́mɛ́ɛ́ a ngim ɛ kɛcɛm, amáyɛɛlɛ lɛ́ yɛ́ɛn nyɔ́ əə́yə́ə́gi pɛbán piim a kúfuʼ.